تحية طيبة لاعضاء منتدانا الغالي منتدى جعلان .. حبيت اطرح قضية مهمة جدا تحصل
في مجتمعنا العماااني وبشكل رهييييب جدا .. ارجو ان تتقبلو كلااامي بصدر رحب وواسع
وذلك لما نشاهدة بصورة تكاااد تكوون يومية نفقد فيها اعز ما نملك بالوجود من
اهل او اصدقاء واقااارب قضية حبرها لا يجف وقضايا مجتمعنا ما تخلص ولا تجف ولا تنبض ..

اخواني خلونا نتكلم بكل صراااحه وقضيه لابد من البحث عن وجود حلول مثمره لانها ستجود بالخير لبلد الخير والعطاء ..

موضوع اليوم هو يخص الشباب بشكل عام وهو عن سرعه الشباب والحوادث التي
تصير بسببها طبعا اول شي لاننسى فضل البلااااد علينا والحكومه انها عدلت لنا
هالشوارع العامه بالاضافه للانارة الموجوده بمعظم الشوارع ماشاء الله وشرطه
المرور بعد ماقصروا اكثر الناس مثل نشوفهم سهرانين وتعبانين على سلامه وارواح
هالشباب اللي بالفعل يستحقون نقول عنهم الشباب المستهتر والطائش وطبعا مب
كلهم لكن الاغلبيه العظمى من فئات الشباااب المستهتر بالقيادة والذي لا يراعي لا حق
ولا بااطل ولا مراااعاة لقواعد الامن والسلاااامة ..

(وقفــــــــــة عتــــــب ضميــــرية )

يعني بالله عليك يا شاب شو بتحصل من وراء هالسرعه غير خساره الروح والخساير
الماديه يعني لو نقول ان الله عطاك عمر جديد ونجيت من هالحادث اللي تكون انت
السبب فيه ولا واحد طايش مثلك نقول ان الخساره الماديه هي كافيه لتكسير
الظهر يعني انت موظف على قد حالك ومأخذلك سياااره قيمتها 7 الاف او 8 الاف فاكثر
ولا سمح الله راااحت السياره شو الفايده او راااحت حياااتك من الدنيا؟؟ فكر فأهلك
فأمك وابوك واخوانك وخواتك اللي قاعدين ينتظرونك راد لهم بالسلامه ما يبوا
يشوفوك وانت محمول على الاكتاف والله يا جماعه الموضوع ما هين كم وكم وكم
من الشباب راااحو في غمضة عين بسبة السرعه الجنونيه والسواقة المتهوره ..

والقوانين موجودة والامن موجود والتوعية بصراحه اعلامياً موجود وما في تقصير ..
بس ما ادري ليش كل هذا العناد من الشباب والاستهتار ليس بأرواحهم فقط ولكن
ايضا بأرواح ناس اخرين لا ذنب لهم بصرااحه عندما اسمع مثل هذه الاحداث والوفيات
ينفطر قلبي ألما وحسرة .. وأصبحنا من كثرة امواتها نشبه بدخولنا حرب اهلية فيما
بيننا .. لا حول ولا قوة الا بالله ..

المهم الان نأتي الى اسباب الحوادث المروريه المروعة :::

اولاً :

اعتقد ان اسباب هالحوادث والسبب الاول هي الفشره الزايده عن حدها على
ما اعتقد يعني كل شاب يختار افخم سياره مثل ماقلنا وطبعا مايخفى علينا كلما
كانت السياره فخمه كلما زادت سرعتها وهذا غير السباقات اللي يسوونها بين
بعض كل يوم والثاني ومسوين اعمارهم ابطال راليات ..

وترى من يدعم خلاص الحادث مايباله شي في غمضه عين اللي يموت واللي
يلقطون مخه من شارع وريله في الشارع الثاني .. مانقول غير لاحول ولا قوه الا بالله
وربي يحفظكم من كل شر ان شاء الله ..

وتقرأ في الجرايد (ومن الحوادث المؤسفة آخر مقال في تقرير احصائيات الحوادث
كل اسبوع ) وهو بعده صغير لاتزوج ولا شاف الدنيا وعاد اهله الله يعنيهم والام والاخوات
من كثر الصياح يغمى عليهم الله يستر بس ..

ثانياً :

عدم الالتزام بالقوانين المروريه يعني اللي ماعنده ليسن واللي مايعرف يسوق
واللي ماخذ الليسن بالواسطه واللي مشغول باله بامور اخرى يطلع شارع التجاوز
وكل يوم تنشدهم لييييش تسوي كذا يقولون نحن شباب ومانخاف من حد ولا نخاف
من شي ... يعني الحين الحرص صار خوف؟؟؟
واخذ الليسن صار للحريم بس؟؟؟؟!!!! الله يستر والله ..

والا تحصله يكلم ربيعه مستحيل يرمس حرمته بالساعات يعني حرمته يرمسها 5 دقايق
لو كثرت الحرمه يصرخ عليها ويقولها سكري يا بنت الناس انا مشغول او عندي
ربيعي فالسياره اونه الحبيب مايعرف يكلم زوجته قدام ربيعه هههه قديييمة ..

الحلول كيييف تكووون من طريقتي الخااااصة طبعاً ..

1- يجب تنبيه الشباب عن طريق جميع الوسائل الاعلاميه بالالتزام بالقوانين المروريه وتطبيق عقوبات مثل السجن على اللي يسوق وماعنده ليسن ..
وطبعا الشرطه الصراحه ما مقصره والله العظيم نشوف دوريه في كل شارع وفي كل
سكه حتى في انصاف الليالي ولكن العتب مب عليهم على هالشباب المتهور ..

2- في اعتقادي اهم واحسن حل يزيدون من هالارادارات المتحركه اللي على الشوارع بارك الله فيكم لان مهمن كان دفع المخالفات ترى لهن دور فالتخفيف
من السرعه ولو انه بعض الرادارات بين بعضهن مسافه ..

3- الحل الثالث عدم السماح لاصحاب الكاراجات الي يحطون مكينه السرعه واللي يخلون غاز كأنها السيااره ملغمه يغرمونهم مع السجن وتفتيش اسبوعي من البلديه
وبهالطريقه يمكن شوي نخفف الحوادث على ما اعتقد ..

نصيحة لك ايها المسرع ::

اذا كنت لا تخاف على سلامتك فتذكر من يعزونك وخوفهم عليك
تذكر والدتك اخوتك وطنك ..
واعلم بأن الندامة لا تنفع بعد السرعة ..
تمهل وسق بتأني
فأن تصل متأخرآ أفضل من أن لا تصل أبدآ

واخيراً وليس آخراً ..
اسمحولي على الاطاااالة اذا طووولت ..

بس ياريت لو تشاركون في النقاش وفي رايك عن السرعه حتى لو بكلمتين وتقولوا
رايكم بكلامي هل هو صح ولا غلط ؟؟؟

والحلول للحد من هذه الظاهره من خلااال نقاشاتكم ومداااخلااتكم بالموضوع المطروح ..
وخاصه فئة الشباب بالمنتدى والنساء من جهة اخرى لكي يدلون بدلوهن معنا ..

ولكم مني ارق تحيه واعذبها ..

المســــــــــــروري

حياااك الله ي بطل النقااشاااااات الجاده ..


صدق موضووع تستاهل عليه 5 نجوم ع كتفك ^_^!!


اولاااا :: لو نشوف العراااق وكم خسرت ارواااح خلاااال الحرب ونشوف عمان وكم خسرت اروااح من خلال الحوااادث

بنلقى ان النسبه متقاربه جدا ..

بالمختصر المفيد نحن نعيش حرب (( حرب الحوادث ))

ثااانيا : اغلب الحوااااادث تعتبر انتحاااااار طبعا مب كلهن ..
يعني بعض الشباب وااثقين من عمارهم زياده عن اللزوم .. يعني انت مستعد تقابل ربك ؟؟؟!!

ثالثاااا:: انا مايقطع فوادي غير يوم اشوف الام وخواتهم وهن يذرفن الدم بدل الدمع ولا البنت الي ترملت وما صارلها سنه او شهور من زواجها ..

رابعااا :: هذا سبب رئيسي في تزايد اعداد البناااات فالمجتمع .. لان نصف الشباب لقوا حتفهم اثر الحوادث

خامسا :: الله يرحمهم ويغفرلهم ويعفوا عنهم ..

سادسا :: انا تكلمت باختصار وعن فئة الشباب المستهتر بشكل خااااص

سابعاااا :: شكرا لك ولد المسروري ع الموضوع المهم

اسأل الله ان ينتفع به الناس

الامبراطورة اشكر اضافتك النيرة بالموضوع والنجوووم تعطى لمن يدلوا بدلوه هنا بالنقاااش

وجميييل ما ذكرتي وهذا واقع معايش لو قارنا بحرب العرااااق والحوادث المرورية بالسلطنة

حيث تشير الاحصائيات الى نسب كبيرة سنويا يعني تخيلي في الاسبوع 20 حالة فاة الاسبوع الماضي


هذا كله من الاستهتار من بعض الناس حيث لا يبالوا ولا يراعوا حق الناس ولا حق انفسهم

ولا يحملون ضميرهم حياااة من هم في اعمااارهم ومجتمعهم ..

ناادرا ما يستوعب بعض الفئات مخاااطر وعواقب السرعة الزائدة حيث فالفتوى تعتبر
سرعة بعد الـ 140 تعتبر انتحاااار وتعريض حياة الاخرين للخطر ..

ايعقل ان نرمي بانفسنا الى التهلكة بطيشنا بمجرد لحظة نشوة كما يسمونها بعض الشبااااب؟؟؟

تسلم ولد المسروري على هذا الموضوووووع
والله يعطيك العافية
ووننتظر جديدك

سكاكر اشكرك جزيل الشكر

نورتي الصفحة بوجودك

والله ما واحيت اقرا كل هذا دار راسي علت

بس شئ معروف ان السرعه خطر و انتحار !ّ!!!

مواااجع تسلمي عالمرور وشكرا على نظرتك السريعة للموضوع

مداخلتك تهمنا


الف شكر

يسلمــــــــــــوو ولد المسروري
موضوع يستحق النقاش
وخاااااصه من صوب الشباب
ومثل م نشوف م تمر علينا ايام ونسمع بوفاة وسببها السيارات
والمفقودين كثيـــــــــــر سواء من الاهل او غيرهم
وم نقول الا ........


ربي يحفظ شبابنا وين م يكونو ي رب

يسلموو وربي يعطيك العافيه

موضوووع مهم

ويااا ليت يكووون عبرة للشباااب

بس شباب هالاياااام مااا يتاثرو حتى لووو سووا حاادث ونجااا منه بتلقااه يرجع ع نفس الموال

ومن يومين متوفي معني شاب عمرة 21 سنه والسبب السرعه الله يرحمه ويغفرله

وجلسنااا نحسب عدد الشباب الي توفوو من الحوادث خلال شهر 15 واااحد

هذولااا الي نعرفهم بس

يعني الواااحد ماا يشووف كيف نتاايج السرعه

مااا يتحسف ع الي راااح عمرة ف غمضة عين

مااا يشووف كيف اهلهم يتعذبووو

مااا يفكر ف خااتمته وكيف بيجااابل ربه ؟!!!



مستغربة الصراااحه منهم

بس الله يهدي شباااب الامة الاسلاميه ويثبتهم ع الصراط المستقيم

اشكرك جزيل الشكر ع الطرح الهاادف والاسلوووب الجميل

بااارك الله فيج
الله يكثر من امثالك

الله يحفضهم شبابنا من الحوادث