هجاء ..!!!!!!!!!!



اللي يشيل إسمٍ كبير يتحاماه = يكون قدّ أسمه وقدّ الهقاوي

وإلا يشيله قبل لا الناس تنصاه = ويلحق هله عقب المديح المساوي

الطيب لو هو بالسوالف قدرناه = مير البلا دونه تخون العزاوي

والأدمي يذكر من الناس ماجاه = عشان ما ينغش عقبه رجاوي

مو كل رجالٍ إليا ضقت تنصاه = إنشد قبل تطلق قيود الخطاوي

ولا كل من عرّض من الناس تنخاه = ما للبلاوي غير مثله بلاوي

عنّز على اللي لا أظلم الوقت تلقاه = نجمٍ على روس الشواهيق ضاوي

لا دق صدره فأبشر بفعل يمناه = ماهو بـ /دقّاق الحنك بـ /القهاوي

يبي يحوش المرجله بس ما أمداه = هاز الطويله مير مالله ناوي

وعوّد مع دربه يسوقنّه خطاه = والمنحدر دلوٍ مع البير داوي

خلّه يـ / علّ أتلى الخبر عنّه رشاه = ثاوي ولا يقدر على الطيب ثاوي

يشفق عليه اللي من الناس شرواه = عندي حضوره والغياب متساوي

قم غن : ( هذي مثل غيره وننساه ) = جاوب قنيب اللي على الضلع عاوي

الليل هذا داني عذوق وأدناه = عودٍ يدندن للرحيل الغناوي

واللي مثل حالي يغنّي لـ / ليلاه = أدنى حنين يمرّه يعود غاوي

خليت هـ / الكون الوسيع لزواياه = وأخترت أكون بـ / هالزمان الخلاوي

لأني عرفت الوقت هذا .. سواياه = ما تصلح لرجال مثلي حياوي

وأمنت بإن اللي نقل داه برداه = يتعب ولا يلقى لـ / جرحه مداوي

لذا .. وحق الدمع ..والآوف .. والآه = لأثبت ولو كان الزمان متلاوي

وش قيمة الإنسان لا خان مبداه = وأفلت عقب كبر الطموح الهقاوي

خل الملام ينام بعيون الأفواه = قلبي إليا منّه نوى ما يراوي

مؤمن بإن المسكنه غير لله = ذلّه .. وعمر الأدمي ما يساوي

لحظه .. يوطّي راسه لغير مولاه = وإن الله القاوي على كل قاوي

هذا الكلام اللي ولا تنطق شفاه = عقبه ولا أسمع جرح راوي لراوي

خذ ما تيسّر لك من الشعر وإقراه = لإني تعبت بصدق منّه وناوي

أتركه لأهل الفخفخه والمباباه = عشّاق أغلفة الصحف والحكاوي

فإن غبت بكره لا تدوّر لي أشباه = مالي بـ / هالأرض العريضه حرواي

لي بالسما حلمٍ قديم آتمناه = أما أدركه .. وإلا فأنا النجم هاوي

فلا قفا نبكِ ولكن من أتلاه = ودّع هريره .. والشقاوي شقاوي

وإن كنت ذا إسمٍ كبيرٍ تحاماه = كُن قد شرهات العرب والهقاوي

حسابٌ واحد لجميع خدماتنا !