ياللي دفنتوا جثته ليه تبكون
لولا الحيا لا قول : معكم خذوني
منه انحرمت وكنت انا عنه مسجون
ما اذكر لمحته غير مره بعيوني
شفته وكانت فرحتي مالها لون
عجزت لاوصف من لمحته شجوني
يا ليتني كنت الكفن يوم تمشون
ابقى معه بالقبر ثم تدفنوني
او ليتني من خلفكم كنت مجنون
اتبع خطاكم والعذر هو مجنون
ابكي وراكم وادعي ان كان تدعون
ما يكفي انه عاش عمره بدوني
تكفون هاكم عمري اليوم تكفون
برخص حياتي دام خابت ظنوني
ما فادني صبري ولا فادني عون
ولا فادني دمع(ن) حرق لي جفوني
يا ما بكيته والبكي يحرق عيون
ميت او انه حي دمعي بعيوني
العام كان بفرحته يعزف لحون
واليوم تحت الارض ما هو بكوني
لكن انا في فرحته كنت مدفون
فوق الثرى واليوم موته سجوني
سميت قلبي عقب فرقاه ملعون
هو والليالي عن هناه امنعوني
ياليتني ما عشت لحظه بهالكون
ويا ليت ربعي في سكات اذبحوني
ويا ليتكم عن همي اليوم تدرون
منه انحرمت ومن عزاه احرموني
حتى بوفاته يوم انا طحت مطعون
احفيت طعناتي قبل لا يفضحوني
بكيت لكن ما تظاهرت بالهون
ابكي واقول الموت هو سبة طعوني
وان كان في حبي انا ما تحسون
دلوني لقبره وهناك اتركوني

ان شا الله تعجبكم القصيده

ماشاء الله عليج اختي صراحه كلمات حلوه حييييييل
بس وايد تعور القلب بس القصيده ماعليها كلام
تسلم يدج اختي
ولا تحرمينا من كل جديدج المميز والاحلى

تقبلي مروري:. درعيه عاشقة المشايخ

تسلمين اختي درعيه ع مرورج الحلو