ان قلت.. وان قلت



البعد عنّك يا هوى البال ما يطاق
والقرب منّك باللهايب صلاني

الشوق كلّه والغلا لك ينساق
والقلب يبني بالمحبه مباني

تضوي به اجراحه وتسري به اشواق
جرح ٍ يباريني وشوق ٍ دعاني

ان قلت انا مجروح.. هم قلت مشتاق
وان قلت انا مشتاق .. جرح ٍ بلاني

ان قلت انا سهران .. في ليل عشاق
وان قلت انا مهموم .. في يوم عاني

ان قلت انا بوصال .. عايشت بفراق
وان قلت انا بفراق .. بالطيف جاني

ان قلت انا مرتاح .. كن خاطري ضاق
وان قلت انا في ضيق .. زال امتحاني

ان قلت انا نسيان .. هالشوق حراق
وان قلت انا حراق .. حظ ٍ رماني

ان قلت انا باشراق .. لاح السما اشفاق
وان قلت انا باشفاق .. ليل ٍ كساني

انا قلت انا بالفجر .. باعد بالآفاق
وان قلت انا آفاق .. ضاق بمكاني

ان قلت انا بوضوح .. غاصت بي اعماق
وان قلت انا اعماق .. موج ٍ طغاني

ان قلت انا يا بر .. يقبل به اغراق
وان قلت انا يا موج .. جفت مواني