مرحباين عووووودة بكم

اليوم رحنا صوب قرون

قرية ساحلية بعد الاشخرة باتجاه محوت

عشان ندور قرون عتر

قرون عتر نبتة برية لذيذة بنزل لكم الصورة لاحقا للي ما يعرف شو هو العتر

بعدها قالوت بنروح صوب خويمة

رحنا هناك وشربنا شاي

وصنفوا يروحوا على شاطي شنة ورحنا شنة صوب المرفى مال السفن اللي تروح لمصيرة

المهم من هالتصنيفات انتهينا في محوت تعشينا ورجعنا البيت

رحلة جدا روعة :)

تصبحون على خير

اليوم دخلت المنتدى ولقيت رسالة من قايدة الغيد

عنوانها تحرير مشاركة

اشوف تحرير مشاركة في مدونتي

رحت مباشرة اشيك عالمدونة وين التحرير لا يكون كاتب رد غلط او شي

ما حصلت شي


رسلت لقايدة بنتاااااه هيش مستوي

قالت هايتك عصبتك اني زخرفت مدونتك بدون اذن


وانا لا حس ولا خبر انه تغير

متعود على البساطة


المهم لا بد من شكر قايدة الغيد على لفتتها الطيبة بتجميل العنوان

ما ادري شو سالفتي هالايام

طلعت مطلوب جدا جدا

الحين يبوني اروح الاشخرة مع الاهل

قالوا بنزعل اذا ما طلعت عندنا

اتراني طلعت مب سهل وما لهم غنى عني

المهم تراني بس حبيت ادخل واغايركم اني بروح الاشخرة


نشوفكم على خير ان شاء الله

مساء الخير للجميع

امس رحنا الاشخرة على الساعة 2

بس انتظرنا اخوي لحد ما يوصل جلسنا بعد الاشخرة بشوي

والموج كان تقريبا هائج اذن العصر ورحت اتوضأ

الا الموجة جايبة عندها صخرة تقريبا كبر رأسي وتضربني في قدمي

عاد نزفت شوي واليوم شفتها متورمة شوي بس عادي العوق خفيف

وصلتا لحد خويمة واخذنا خبز براتا ورجعنا

وقفنا الاشخرة اخذنا العشاء

الجماعة كلهم ما اكلوا انا واخوي خلصنلا العشاء خلال 10 دقائق

وقفنا بعد الاشخرة في عروق (طعوس) تجلسنا 20 دقيقة ورجعنا البيت

وسيده عالفراش

عاد الصبح وغوني من الساعو 9 عشان اسلم على اختي وعيالها جايين من الاردن متمشين

وبس

انا من الناس اللي ما تتعامل بالرسائل مال الجمعة والاشعار كثير

لما استخدم الرسائل يعني اسأل واتريا اجابة

وتجيني رسائل كثيرة بس ما ادير لها بال

عاد امس قلت لا يقولوا عني بطران وما اذكرهم او شي

فعبيت رصيد ريال في رقمي النورس وسويت حزمة الرسائل ورسلت ل70 شخص تقريبا

خلص الرصيد وعبيت مرة ثانية


الغاية وايدين ردوا عليه يزاك الله خير من معي؟؟؟؟


لانه رقمي النورس ما يعرفوه الاغلبية هععععععع

اخوي رسل لي من معي

قلت له: جميل الهاشمي؟

قال من؟ جميل مجمل

قلت هووو اذا بغيت ديو تعال البيت

وبس هذا شي استثنائي حصل معي امس وحبيت اشارككم فيه

صباح الخير للجميع

اشكر كل من مر على مدونتي وشاهدها

اليوم مسكت الحاسبة وحسبت معدل رؤية مشاركات مدونتي

وحصلتا 16 مشاهدة لكل مشاركة

يسلموا لي على تشريفكم لمدونتي المتواضعة

لا عدمناكم

السلام عليكم ورحمة الله وبركاته

رجعنا لكم بعد غيبة

الغيبة كان سببها كنت طالع كشتة مع عيال عمي وخالي

رحنا بندر الصقلة

الجو كان روعة وصلنا الثلاثاء نصبنا خيامنا وعدلنا مطبخنا واطبخوا لنا الشباب

انا جلست اعدل خيمتي الخاصة ماخذ خيمة الوالد

نبي ننام على راحتنا

الساعة 12 الليل هبت ريح قوية وبدت الخيمة تتمايل واخوي نايم عندي

اقوله الخيمة بتطيح يقول مشي بأس

هو نام وانا بعد ما نمت وتطيح الخيمة

قالي طاحت الخيمة وانا اقول ماشي بأس تراها مغطتنا هع

قمنا وكان في مطر خفيف هو راح على الخيمة الكبيرة

وانا جلست ارتب الخيمة بسرعة اذا ما حافظت عليها الوالد بيعصب عليه

رحنا الخيمة الكبيرة وكانت الريح قوية قلنا بعد بتطيح الخيمة بس الحمدلله خفت الريح ونمنا

عاد اليوم الثاني نصبت خيمتي مرة ثانية ودامت لحد أمس اللي هو موعد رجعتنا

الجو كان جدا رهيب الطباخ روعة والتسلية روعة

لعبنا كرة يعجبك لما تشوت الحصى بدل الكورة

عاد باكر ورانا رحلة غيرها ان شاء الله مع العائلة الى جزيرة مصيرة

الصيف ما شاء الله عامر بالرحلات


تحيتي لكل من يقرأ مدونتي