عيال حارتنا.



الا ليت الزمن يرجع.. ورى ولا الليالي تدور

ويرجع وقتنا الأول..وننعم في بساطتنا..

زمان اول احس انه.. زمان فيه صدق شعور

نحب و نخلص النية.. و تجمعنا محبتنا..

زمان ما فيه لا غيبة..ولا حتى نفاق و زور..

يا ليته بس لو يرجع.. و نسترجع طفولتنا..

صغار قلوبنا بيضا.. نعيش في عالم محصور..

ولا نعرف ابد اغراب.. ما غير عيال حارتنا..

صحيح صغار في التفكير.. لكن ما علينا قصور..

نخطط نكسر اللعبة..و تسعدنا شقاوتنا..

نروح المدرسة بدري.. و نضحك داخل الطابور..

نحاول نزعج العالم..في روحتنا و جيتنا..

و عشان نأخر الحصة.. نخبي علبة الطبشور..

نشاغب بس في الآخر .. تميزنا برائتنا..

نحب الضحك و الهيصة.. نحب ننط فوق السور..

نفرفش.. ليه ما نفرفش مادام الضحك عادتنا..

و لكن دارت الأيام..وبان الخافي المستور..

و صار الهم متعلي.. على قمة سعادتنا..

كبرنا و صارت الدنيا تصف احزاننا بالدور..

و تهدينا الألم والآه.. غصب عن عين رغبتنا..

تعبنا من بلاوينا.. احد ضيق و احد مقهور..

و كل غارق بهمه.. وفي الآخر تشتتنا..

وانا ما اقول غير الا.. ياليت ان الزمان يدور..

و نرجع للورى فترة.. نعدل وضع عيشتنا

حسابٌ واحد لجميع خدماتنا !