بنت المضيبـــي آآنــآ بنزل الجزء الثانــي ابا اقراء القصــه خخ

الحلـــــــــــــــقة الثــــــــــانيـــــــة))


حطيت ايدي ع حلجي و انا اطالع امايه و شيخاني و حصة و خالوه ام حصه و خوااتهاا موزه و بدور ....و طاحت عيني ع الكيكه الموجوده ع الطاوله و غير الهداياا و الورود ..ضحكت يوم قالولي بصوت واحد "مبروك عليج التخرج "

قلتهم مستانسه : و الله سعيد طلع راعي سوالف ..

تجدمت مني خالوه حليمة و سلمت علي و لحقتها موزه و بدور و باركولي ع التخرج ..
قلتهن و انا فيني غبنه : ودي اصيح من الفرحه بس تعبت اليوم من الصياح ..

تجدمت مني حصه حرمة سعيد : فديتج و الله "وحضنتني " ....

بدور : ليش شو بلاج ..؟؟؟ اجوف ويهج متورم .
شيخاني : محتجه : ماشي ماشي من الفرحه قاعده اتصيح ..

كانت اعيوني ع الهدايا الموجوده ع الطاوله ...
امايه : امايه بنتي عن تطلع اعيونج من مكانها فجي الهدايا جان في خاطرج هالشيء
الكل : هههههههههههههههههههههه

اتجدمت و انا اضحك ع تعليق امايه و قلتهن : و الله احرجتوني ..

شيخاني : يالله عقبالي ما اتخرج

كلنا : آآآآآآآآآآمين ..

فجيت اول البكس العود و جفت البطاقه و كانت من حصه و حرمته سعيد ...كان بداخله طقم كامل من البدله و الجوتي و الشنطه و شيله و عبايه ..ابصراحه اشياء راقيه ..و كان لونها بنفسج ..اكيد اختاروا اللون البنفسج لاني اشجع فريق العين ...

شكرت حصوه و جفت الوناسه بعيونها يوم جافت الهدايا عيبتني ...فجيت الهديه الثانيه كانت عطووور من عبدالصمد القرشي .. و شي منها من باريس غاليري و بعد من الحرمين ...و كانت من قوم خالوه ...احرجوني ابصراحه ...ام البكس الصغير كان من شيخه و ماماتيه و باباتيه .. شهقت و انا اجوف طقم الالمااس يلمع تحت اعيوني ..

قلتهم و اعيوني كانت تدمع : مشكورات و الله اشكثر انا مستانسه ...

لوت عليه امايه و قعدت اتصيح ..
شيخاني : يالله عاد بدينا ..

خالوه :يلا قطعوا الكيك خلونا انروح بيتنااا ..
امايه : محتجه : لا و الله ما اتروحن الا بعد ما تتعشون عندنا .

موزه : خالوه عندنا شغل ..

حصه: زين سعيد رايح اييب لنا عشى شوفيكم ..مستعيلات ..

شيخاني : شوقاني يلا قطعي الكيك ترا بنش و بااكلها كلها عنكم ...
اتجدمت و قطعت الكيك .. و قعدن ناكل .. سولفنا بوايد مواضيع ..كثيره طرت من الوناسه يوم سمعت خالوه اتقول ..: عقبال ما اتقطعين كيكه ملجتج

حسيت بطعنه بقلبي يوم قالت موزه : ودنا يكون ريلج راشد بس عاد محجوز حق ندى بنت عمي

ليش ما يفهمون ان راشد ما يبا ندى راشد يباني يحبني و احبه الا اعشق التراب الي يمشي عليه ..ليش يحطمون قلبين يهون بعض علشان بس سالفه بنت عم وولد عم ليش يا ربي ليش ..؟؟؟


حصه: انتي بعد امايه ييبي ولدين يابه لنا بس راشد و الباجي كله بنات ..
شيخاني : استغفر الله ..
الكل : ههههههههههههههههههههه

امايه : كل شيء قسمه و نصيب . و محد ياخذ غير نصيبه و راشد و نعم فيه الف بنت تتمناه ..

بدور الخقاقه: لازم هذا راشد ولد ...............................

حصه: عدااااااااااااال مدري منوه اخوج جان شرات ذياب ولد ...............

ظنيت انها تقصد خال ندى لان ما شاء الله عليه الكل يحسده ع مركزه الراقي انا ما قد جفته بس سمعت عنه ..
خالوه : بس عاد لا تطرون الناس شو تبغون فيهم ..

موزه : امايه باجر بنروح لـ ندى و بنحتفل فيها بعد ..
امايه: و حليلها بنيه يتيمه ..

بدور : اووووووووه باجر ما اتفجنا انروح السيتي ..

موزه : لا و الله مثل ما شوقاني بنت خالتنا و احتفلنا بتخرجهااا .. بعد ندى بنت عمنا و واجب علينا نحتفل
بتخرجهاا ..

خالوه : زين عن تضاربون باجر ان شاء الله بنروح بيت عمج و بنبارك لها تستاهل ندى بنيه يتيمه
شيخاني : زين شو رايج شوقاني انروح وياهم ..

بدور : و الستيييييييييييييييييي

موزه : شو فيج انتي باجر الخميس ..لاحقين ما بنبات في بيت عمي ..

بدور : عاااااااااااد انتي ودج تبين اتجوفين بو سنيده ..
موزه : امايه جوفي بنتج ..

حصه : انتن ما تستحن تضاربن هني ..

بدور : لا و الله ايه ها بيت خالوه قبل ما يكون بيت ريلج ؟
رن موبايل حصه بها اللحظه : ويه فديت ريلي يتصل فيني ..

بدور : متى يا ربي سيفاني بتصل فيني جذ1ااا ..


موزه : اونج ما فيج حيا و جدام امايه و خالوه .

الكل : ههههههههههههههه

حصه : يالله شيخاني تعالي انزهب العشى .. سعيد يايبنه برع ..
نشيت علشان بساعدهم بس قعدتني حصه: انتي اليوم عروس يلسي حفله تخرج ..ما بنشغلج ...

و طلعت حصه و شيخاني و امايه رايحيين يزهبون العشى ..سمعت بدور اترمس خالوه ..
امايه : عيل خلي راشد و ندى يملجون ..

حسيت بقلبي وقفت دقاقته ..لا حرام عليج بدور .. ليش اتقولين جذا ..ليش تبين تذبحيني ...
موزه : هي خلاص خلصت ندى من الكليه شو بعد ..

بلعت ريجي بصعوبه .. غمضت اعيوني و انا ادعي ربي انه يكون حلم ...
سمعت رد خالوه : الشور بيد خالها الحينه ..؟؟

بدور محتجه : بس ابوي عمهاا ..
خالوه حتى و لو اهي الحينه عايشه مع خالهااا ...

بدور : خلاص زوجوا خالها حق موزي ترا بعد هوه يبا حد يربي بنته عقب ما توفت حرمته ..
موزي : جب انتي ما يخصج فيني ...

ما تحملت كلامهم ..نشيت كنت ابا اهرب من كل شي ما اتحمل فكرة راشد يرتبط بانسانه غيري حتى لو كانت ندى او ان شاء الله اختي .. وقفت بحجه باخذ هداياايي حجرتي ...

صكرت علي الباب و قعدت اصيح ... راشد لازم يخبرهم انه ما يبا ندى .. لازم يعرفون ان الي بيني و بينه حب عميق ... عفدت صوب موبايلي فتحته .. و دقيت ع رقم راشد ... ماشي رد ..

اتصل في الخمس مرات ما يرد ها وقته يزعل ... طرشت له مسج " لازم نتكلم ضروري لازم .."
نقزت ابمكاني يوم سمعت صوت امايه من ورا الباب : يلا شوقاني تعالي اتعشي ..
بلعت ريجي : انزين الحينه يايه ..

اترييييييييييت دقايق رد من راشد ماشي .. اتصدقون مراات احس ان راشد يلعب علي من حركاته الي يسويها معاي ... حطيت موبايلي داخل الدرج و ظهرت من الحجره ... رايحه حجرة الطعام ..مع ان مالي خاطر اكل شي موليه ...

تعشينا و عقب ما خلصنا العشى .. حاولت اطرد راشد من بالي بس ما قدرت كنت احاول اندمج معاهم بالسوالف و اضحك ع ضرابة موزي و بدور بس خيال راشد ما يفارقني ... شو بيصير لو راشد قالهم ان ما يبا ندى و يباني ...هل ندى بتزعل ..؟؟ بتضايج ..؟ بس ندى بحياتها ما بينت لي انها مهتمه براشد ..؟؟

ابد ما كانت اتبين انها مهتمه ... و ان في يوم ممكن يصير زوجها .. زوجها حسيت بقلبي طاح من مكانه ...

لا لا دخيلج ندى لا تحرقين قلبي دام ما تبين راشد ... انطقي لا اتوافقين ...بس القرار الاول و الاخير .. لـ راشد .. مب لـ ندى ولا لي هو الي يقرر و يحدد يختار من ..ابتسمت اكيد بختارني العشره الي من بينا ما اتهون لا عليه ولا علي ..

ما انتبهت لامايه ترمسني الا عقب ما دقتني موزي لاني كنت قاعده حذالها ..
قلتها : ها امايه شو قلتي ..؟؟

شيخاني : خيييييييييييييبه وين وصلتي شوقاني ..؟؟

حسيت بالاحراج .. محد له خص فيني و بافكاري محد له الحق يعرفها غير راشد حبيبي بس ...

امايه : جوفي ابوج جان خلص عشاه ..
وقفت و قلتها : ان شاء الله ..

طلعت من حجرة الطعام .. و انا رايحه فوق جفت سيف نازل من الدري .. نزلت راسي و كملت طريجي بس بداخلي كنت ميته من الخوف ...اتوقعت انه يضربني او ع الاقل يعلق يعق نغزات كلمه او كلمتين بس طنشني و انا بعد بالمره طنشته ..؟اتنفست ابراحه يوم وصلت حجرة باباتيه .. و الله مدري بدور ع شوه ميته علشان تاخذ سيفاني من حلاته و من زينة اسلوبه .. ماشي لا احترام و كلمة طيبه و معامله حسنه ...

دشيت جفت باباتيه راقد ع الكنبه و الحمدلله اتعشى زين ..اتاملته جفت الشيب براسه و لحيته ... فديتك باباتيه ...تجدمت منه .. مدري ليش دموعي نزلت ع خدي يمكن حالتة ابوي او شعور الحنين الي حسيت به للحظه .. تجدمت منه و حضنته . و يلست امسح ع راسه .. بطل اعيونه .. ابتسمت له .. رد لي الابتسامه ..

قلته : باباتيه نش ارقد ع فراشك ..

قعد يطالع الساعه ..جافها تسع فـ ليل سالته صليت .. هز راسه بمعنى هيه .. مديت ايدي و ساعدته انه ينش من مكانه و وصلته فراشه .

قلتله : تبا عشى ...ولا بسك الحمدلله شبعت ..

أشر بيده انه بسه ما يبا ... اتذكرت الحبوب ...فتحت الدرج و طلعت حبوب القلب و عطيته .. شربه بدفعه وحده .. و انسدح ع الشبريه .. غطيته عدل .. و بسته ع راسه ..انا وايد احبك باباتيه وايد ..

و انا راده صوب قوم خالتي جفتهن ظاهرات غايتهم يردون البيت ...
سالتهم : بتروحون شوه ..؟

بدور : شو تبينا انبييت هني ..

رديت عليها : هههههههههههه حياج الله ...
اامايه : ابوج تعشى ..

رديت عليها : هي و خذ الدواا و رقد ..

خالوه : الله يشافيه ..
الكل : آآآآآآآآآآآمين ..

شيخاني : شوقاني باجر بتروحين معاهم بيت ندوي ..
ما صدقت : هي طبعا بروح ..بس لازم الصبح نظهر نشتري لها هديه ...

موزي : خلاص بنمر عليكم ..
بدور : اوووووووووووووووووف هالطبع ما ادانيه فيج موزي ..
حصه : استحي و خيلي ..

الكل : ههههههههههههههه

شيخاني : زين اخاف سيفاني ما يخلينا نظهر من البيت ...
رديت ابسرعه : مب ع كيفه ..؟؟
بدور : خلوه علي انا بقنعه ..
موزي : طاح حظي ...
حصه : سعيد هني باجر بخليه يودينا ..
شيخاني : هي جذا اوكي

خالوه : يلا وينه سعيد جان بوصلنااا ..
حصه : برع يترياااااانااا

بدور : و انتي وين رازه ابويهج قلنا ريلج بس مب جذا تلصقين فيه ...

ضحكنا كلنا يوم انحرجت حصه : هههههههههههههههه
حصه : ترا بنظهر بنتمشى برع ... بتيين شيخاني ..

ردت ابسرعه : اكيييييييييييييييد ..
طالعتني حصه كان ودي اظهر اغير جو بس لازم ارمس راشد : لا انا برقد تعبانه ..

موزي : تو الناس ..
ابتسمت : احس ابتعب ..

سمعنا صوت هرن ..حصه : يلا عن يحشرني سعيد ...

سلمت علييهم و شيخاني ركضت حجرتها تلبس عبايتها و شيلتها .. اما انا رجعت حجرتي اتريا اتصال راشد ..انسدحت ع الشبريه ... اطالع السقف و ذكرى علاقتي بـراشد كانت حاضره جدام اعيوني ...

دايما يوم كنت اروح بيت خالتي او هم يزورونا و يكون راشد موجود كنت احس بنظراته .. بكلامه بتعليقاته و كانه يبا يجذبني له بس انا كنت شالته من بالي موليه ...

لاني كنت انظر له انه خطيب ندى بنت عمه ...و غير ان ند ى صديقة عمري يعني مستحيل .. اقولها الي كنت احسه من صوب راشد .. و مرات افكر يمكن يتهيأ لي ...و انا ابالغ في اعتقادي ...علشان جي كنت اتجنبه ...خير شر .. لين هذاك اليوم ...

يوم رحنا عزيمه بيت خالوه امناسبة تخرج راشد من كلية زايد العسكرية .... عقب الغداااء ..تيمعنا نحن البنات ..في حجرة موزي و بدور .. و كانت ماخذتنا السوالف و الضحك ...اذكر الحجرة كانت ممزوره بنات من صديقات موزي و بدور و حصه ...يعني كانت عزيمه كبيره ...و كنت ملاحظه ع ندى طول فترة العزومه صاخه و جنه مالها بارض لشيء ... حتى شكيت انها يايه العزومه بالغصب ...

ساسرتها : شو بلاج مب طبيعية ..؟؟
ردت علي بس كانت سرحانه : ماشي ..

زخيت ايدها علشان انبهها اني قاعده ارمسها طالعتني سالتها مره ثانيه: ترا ملامح ويهج فاضحتنج ..شو بلاج ندوي ..؟

حسيت انهاا شويه و بتصيح ..: متضايجه وايد ...
ريت لها متفاجاه : ليش شو مستوي حد قالج شي ...؟؟

نزلت راسها و قالت بصوت واطي : ما اروم ارمس هني ...؟؟؟

قلتلها : زين تعالي انروح بيتنا جريب ...
طالعتني : لا ما اقدر ....

قلتها : ليش ...؟؟
ندى ..................................."ماشي رد"

بلعت ريجي وعرضت عليها : تعالي انروح اي حجره زين يلا قومي عن تصيحين و تفضحينا جدام البنات ..
ما ترييت ردها سحبتها من ايدها و طلعت برع الحجره ..

بدور : وين وين ..؟؟

رديت عليها من غير ما اطالعهااا : الحينه بـنـييي "وصكرت باب الحجره "

لمحت كذا غرفه في بيت خالوه بس ما اعرف غرف منوه كنت اتذكر الغرفه الي امجابلتنا مالت حصه قبل ما اتعرس باخوي سعيد .. طالعت ندى علشان اتساعدني اي غرفه ندخلها بس جفتها بعالم ثاني خيبه شو مستوي لها الدرجه مب حاسه ابعمرهااا ..؟؟؟

المهم يريتها ع اقرب حجره و دخلناها ما انتبهت للاثاث لان ما صدقت ندى من دشينا حجره و صرنا ابروحنا قعدت اتصييييييييييح ...حضنتها اخفف عنها و انا مب عارفه شو بلاها اصلا ...خليتها تطلق العنان لنفسها ووقت ماا اتحس انها اتروم ترمس بترمس ...

قعدت اراقبها لي ما حسيت انها خلاص تعبت من الصيااح ..
سالتها بصوت حنون : ندى لا اتسوين ابروحج جذاا ترا الدنيا ما تسوى نقطة ماي ..

ردت بصوت متقطع : ادري ..

عيل : ليش كل ها الصياح ..
قالت لي : النار ما تحرق الا ريل واطيهااا ..

تنهدت و لويت عليها : ندى انا و انتي واحد رباعه و من زمااااااااااااان يعني الي يضايجج يضايجني ..
رفعت راسها اطالعني و هي تتنهد : اتصدقين خالي ذياب يبا يزوجني و انا ابوي و امايه ما كملوا سنتين من توفووااا ...

شهقت : خالج مينون ...

ردت علي :قاعد يقول لي بس خطوبه و عقب فتره طويله بنملج ..
سكت لاني ما عرفت شو ارد .........................

و بدورها ندى سكتت ..
قلتها و ببطء : ند ى انتي ا تبين اتعرسين مب علشان امج و ابوج علشان انتي ما تبين الي متقدم لج صح ..

هزت راسها بمعنى نعم ..

كملت كلامي : علشان جذا قاعده اتصيحين .. معقوله خالج بجبرج علي شي ما تبينه ..؟؟

هزت راسها بمعنى لا : ما بجبرني بس وايد قاعد يضغط علي علشان اوافق ..يعني هوه ما يعرف اني محجوزه لـ راشد بن عمي ..

سالتها : انتي تبين راشد ..
ندى : .................................."ماشي رد"

كررت سؤالي : ندى اتبين راشد ..
ردت ابسرعه : طبعااا ابااه من وعرفت الدنيا و انا اسمع ندى لراشد و راشد لـ ندى ..
قلتها : عيل ليش خالج ...........

قاطعتني : لان خالي ما ايحب راشد ما يواطنه .. مدري ليش ... ما اعرف السببب ...مع انهم كانوا ربع
نقزنا انا و ندى ابمكانا يوم سمعنا صوت ريال في الحجره : احم احم ..

صدت ندى الصوب الثاني اتغطي دموعها فاضطريت اني اواجهه صاحب الصوت ...حرجت يوم جفت راشد واقف عدال باب الحجرة ..

قلته بغيض : يعني انت ما اتعرف ادق الباب ...؟؟
عقد حياته : ادق باب حجرتي ...؟؟؟ ليش ..

شهقت حجرته !!! يلست اطالع حولي توني انتبه انها حجرة شاب .. ما عرفت شو ارد ..
راشد: شحالج ندى ...؟؟؟

همست : ابخير ..
راشد: ماشي كلمة مبروك ع التخرج ..؟؟

ندى سكتت و فقلته : مبروك ع التخرج .. الحينه ممكن اتخلينا ابروحنا .
كرر جملته و كأنه يذكرني: زين هذي حجرتي ...؟؟

ندى وقفت : ما عليه شوق تعالي نظهر ..
راشد تم واقف عدال الباب : لا لا خذووا راحتكم ...اممممممممممممم سوري ندى انا سمعت كل شيء ..اسف جذبتني السالفه ..

شهقت ندى فرديت بعصبيه : عيب عليك ..تتجسس
راشد : و الله انا كنت ياي حجرتي و سمعت صوت صياح .. وياني فضول .. بس ندى اقولج شيء ..انا ما افكر بالزواج موليه .." و اشر بيده بمعنى يلا حياكم و اختفى "

رديت ابسرعه تمنيت لو سمعني : يا الخقااااااااااااااااااااق ..

قعدت ندى ع الكنبه مصدومه و يلست اتصيح ابصوت عالي ...ما عرفت شو اسوي .. ولا كيف اتصرف ...قومتها ..علشان نطلع من حجرة راشد الخقاق ...و نحن ظاهرت لمحتنا موزي ..و يت صوبنا ابسرعه متروعه يوم جافت حالة ندى جذاا ..

موزي : شو بلاها ندوي ...؟؟

كنت مرتبكه و مب عارفه شو اقولها : ندى تعبانه ..موزي ساعديني انوديها البيت بس من غير محد يحس ..
موزي : ما يهمج صبري بيييييييييب عبايتي ..

عقب دقايق كنا في بيت ندى و في حجرتهااا ...
موزي : شو السالفه ..

رديت ابعصبيه : اخوج الخقاااااااااااااااااق ..
موزي : رشود ..؟؟ شو بلاه ..

ندى تمسح دموعها : ما بلاه شي.. ابرايه خليه ع راحته ..
رد ندى قهرني : لا طبعا ها قليل ادب ما عنده اسلوب ..

موزي : مب جنكم ترمسون عن اخوي شو لساااااااااااااااااااااااااالفه ..

قلتها : ندى كانت متضايجه .. و حضرته زاد الطين بله .."وقلدت صوت راشد" انا ما افكر بالزواج موليه ..
موزي مستغربه : راشد قال جي .؟؟

ندى : عادي عندي المهم خالي ما يزوجني انسان انا ما ابااااااااه...
حضنت ندى لانها غمضتني : محد بزوجج غصبن عنج نحن مب بزمن العبوديه ندى ..

موزي مستغربه و فجأه : ههههههههههههههههههههههههههههههههههههههههههههههههه الحينه فهمت السالفه ..

ههههههههههههههههههههههههههههههههههه

تمنيت بها اللحظه اجتل موزي
موزي: ندى لا اتخافين محد بزوجج ..ههههههههههههههههههههههههه
شوق : موزي ارمسي زين عن السخافه ..

ندى : موزي شو السالفه ..؟؟

موزي : اممممممممممممممم لحظه فيني ضحكه ههههههههههههههههههههه

قمت من مكاني و شلت المخده و انا خاطري اكتم ع نفس موزي ..
موزي : ايه خلاص بتذبحيني ..
ندى مصره : ارمسي زيييييييين
موزي : البارحه خالج ذياب كان هني .. و كان يشاور ابوي الي هو عمج ..عن الخطبه بس ابوي رفض .. و قال راشد حق ندى ..

ندى بحزن: بش راشد من شويه قال ..
موزي قاطعتها : مااااااااااااعليج ها خريط عود ...يبا يغايضج..لان ابوي شاور راشد و قال انا ابا ندى ...هذي كل السالفه ..

ندى مب مصدقه : قولي و الله عيل خالي ما قالي ..
موزي : عادي هذي مشكلته و بعدين راشد قال ما يفكر بالزواج الحينه ما قالج ما اباج افهمي الرمسه ..
ندى : بس كلامه كان واضح ..

موزي : يا مماما قصده لي ما اتخلصين من الكليه ...
حضنتني ندى مرتاحه : الحمدلله .. الحمدلله .. يعني خالي ذياب ما بيطري لي سالفه الزواج مره ثانيه الحمدلله .

رن موبايلي قبل ما ارد ع ندى فرديت ابسرعه و كانت المتصله حصه : انتي وينج ..؟؟
قلتها : انا في بيت ندى ..شو مستوي ..؟؟

حصه : جالبين عليج الدنيا يدورونج المهم نحن ردينا البيت دوري حد يوصلج ...

وناسه ندى و فرحتها خلتني ما اهتم بكلام حصه : اوكى اوكى باي باي ..
موزي : منوه ..
قلتها بدون اهتمام : حصه اختج اتخبرني انهم ردو بيتنا .. و ادور حد يوصلني ..

موزي : ابيه انا ودرت رباعتي .. مالت عليكن .. و ع افكاركن الغبيه ..
ندى + شوق : ههههههههههههههههههههههه

موزي : يلا انا بروح الييت ..
وقفت ابسرعه : و انا !!

ندى : تمي معاي .
قلتها : لا ما اقدر حصه اتقول جالبين علي الدنيا يعني عادي سيفاني يجتلني .

ندى تتنهد : الله يعينج ..
طالعت موزي : دخيلج دوري حد يوصلني البيت ..
موزه امحرجه : اووووووووووووووف انا شو لي ابتلى بمشكلتكن يلا ..الله بلاني ببنت عم و بنت خاله اوووووووووووووووووووف .

ندى + شوق : هههههههههههههههههههه
موزه اتفج الباب و ادزني : يلا طوفي قاعده تضحك بعد .. بخلي راشد يوصلج ..

قلتها : وع ع الخقاق ...
موزي : حمدي ربج حد بوصلج بعد تشرطين ..

دقايق وركبنا سياره راشد ..
راشد: شوقاني شحالها نفسيه بنت العم ..

طالعت برع ........................................"طنشته"

موزي : راشد لا تستخف دمك ..راعي مشاعر الناس ..
راشد: منوه هالناس شوق و ندى ..

و الله هالانسان قليل أدب كان خاطري اقوله بس خفت يفرني من دريشه سيارته خليه يوصلني البيت مع ان بيتنا وايد جريب .. بس سيفاني امحرم علينا ..قاص علينا ها السيف .

موزي : هههههههههههه حرام عليك ..

فجيت الباب كنت بنزل بس لمحت سيفاني طالع من بيتنا فرجعت صكرت باب السياره ابسرعه ..
موزي : شو بلاج ...؟؟

قلتها : سيفاني ..
راشد: محد جالع اعيونكن غير هالسيف ..
قهرني يوم نزل الدريشه و قعد يزقره ..
شهقت : حراام عليك ..بحرج علي ؟

راشد يغايضني : شوه حرام اسلم ع ولد خالوه ..

موزي : متفيج اتسوي حركاتك و الله ..

راشد : خخخخخخخخخخخخخخخخخخخخخخخخ

تجدم سيف من سياره راشد و نزل راشد الدريشه و سلم عليه ...جافني سيف قاعده ورا فطالعني بنظرات .. اضطريت انزل ..
سمعت راشد : مع اني توني جايفك في بيتنا بس مدري ليش اوله عليك يخي ؟؟
سيف و نظراته علي : المحبه من الله ياخي ..

دشيت ابسرعه البيت ...مدري كيف وصلني سيف ابسرعه و قعد يزاعج علي و كنت شاكه ا ذا راشد او موزي كانوا يسمعون صريخ سيف ..

اذكر هالك اليوم خذت ضرب من سيف ..بس بسبب سخافة راشد .. اونه ينكت ...يتحسب روحه ...
و فليل .. ياني اتصال من موببايل موزي طنشتها لاني بهذيج الحزه كنت متضايجه من حركة راشد السخيفه و حركة سيفاني انه يزاعج علي جدام عيال خالوه ..رديت ع اتصال موزي عقب ما وصلني مسج "ابسرعه ردي علي "

بس كانت الصدمه ان المتصل كان راشـد ..و اونه يحس بتأنيب الضمير .. و ما سوا ها السوالف الا علشان ياخذها حجه علشااان يتجرب مني ...و ابدت قصة حبناااا ...

نقزت ابمكاني ابسرعه و زخيت ادور عالموبايل لاني كنت حاسه ان المتصل راشد ..و بالفعل ابد ما خاب ظني كان المتصل " روحي تحبك"


حــــبك نشـــعني من مواطي للراس..يامـــصدر الشــــكوى و يامنتــهاها..جري مــجاري الدم من غير مقياس...مـــا بـاقي بــي جـارحــه مـامــلاها...خـفيف روح ولـو عـلى زبدةٍ داس...قـدمك سـلمت وكن عرشـك عداها

هاا الجزء الثاني بقرااه وبتريــآج

آآحــــــمـ (ن) بنقـــــــــرآآهــــآآ شوو ورآآنـــــــــــآآ


يثلمــــــــوو غلآيــــــه ع القصــه شكلها ترتوبيشـــــن


بروحـ آآقـــرآآها < حشرتنـــآ فضـــآووه هع

بــــــررب

المشاركة الأصلية كتبت بواسطة ريمـــــاني آآحــــــمـ (ن) بنقـــــــــرآآهــــآآ شوو ورآآنـــــــــــآآ يثلمــــــــوو غلآيــــــه ع القصــه شكلها ترتوبيشـــــن بروحـ آآقـــرآآها < حشرتنـــآ فضـــآووه هع بــــــررب

الله يسسسلمـــــج حبووبـــــه

ووادديييت طلتج انااااااااا

عسسسسسانيه ماخلاا منهاااا دووم ياااااربي

هلاااااااا العويسيه

نبى الجزء الثااالث ووينج ؟!!!

آحمـ قريتهـــآآ وعيبتــــني


اممممممم بس شخصية شووقـ آحسهــآ سخيفه لووووول حاسه انه يقص عليهاا هالرآشــــد الله يستــر بس
عيل كيف منيه خاطب ويبا يملج ومنــاك آونه يحبهــآ ولا اعترف ولا قال لهله شي ..... الخ


نتريــــــــــآآ الاحــدآث في

البــــارت 3

المشاركة الأصلية كتبت بواسطة بنت المضيبي هلاااااااا العويسيه نبى الجزء الثااالث ووينج ؟!!!

اهليين حبيبتي


فالج طيب يالغلااا