ياصبح لاتحتار من هم عيني
تبغى الاجابه .. اسأل الليل اذا طلّ
***



ياصبح تدري كيف ضاعت سنيني
بين السهر والخوف والنزف والذل
***



اللي على قلبي بعيني يبيني
ألغاز عمري سهله ومالها حل
***




حزني وصلني ولو قطعته يجيني
علمني شلون الوفا يصير معتل
***




ضعت وشتاتك ياورق يحتويني
لاصار جرحي شمس أنا بكتب الظل
***




وبكتب عن افراحٍ أبد ماتبيني
وبكتب عن احلام لها دمعٍ يهل
***




وبكتب عن اللي خذ غرامي وحنيني
خذني وتركني يوم انا قلت له: خل
***




وبكتب عن اللي في غربتي يعتريني
فارقت لي خلان .. خلٍ ورى خل
***




ماعاد احس بـ عطر في ياسميني
وماعاد احس ان العطر يسكن الفل
***




بكذب على نفسي واشك بيقيني
مادام قلبي مني بنبضته مل
***



بكتب ابكتب لين أدمي يديني
لين اصبعي يقول له هالقلم ول
***




رحلة بدت ياليتها تنتهيني
رحلة ألم من غيمة الذنب تبتّل
***




ياصبح قل لي كيف بتنام عيني
والليل قبلك حاول ومالقى حل