احبج أو أحبك !!!!!!!!!!

[قلبي لمن]

سعد مسائكم ويسعد صباحك ( ما ادري وش اقول بس لاني كتبت هالمشاركة الساعة 12 ليل !!)

هذي اول مشاراكاتي في المنتدى وبصراحه المنتدى في قمة الابداع بداية من تصميمه المبهر واللون المميز لمنطقة جعلان الصحراوية
الى المواضيع المطروحه في اقسام المنتدى

بس كثير ما لفت انتباهي في اغلب المنتديات الخليجية وفي السنوات الاخيرة تعمد بعض الاعضاء تحريف كتابة بعض الكلمات والسبب ؟؟؟؟؟؟؟!!!!
واليكم بعض الكلمات

احبج=احبك
فديتج=فديتك
وحياتج=وحياتك
جلم=قلم
رقمج=رقمك
اشتجنالكم=اشتقنا لكم



ابي اعرف وش بيصير لو كتبنا الكلمة صح ؟؟؟؟؟

[بنت المضيبي]

هلااا فيج اختي

كل واحد يكتب بلهجته ولا لازم نكتب عر بية فصحى

وما فيها شي

تسلمي ع الطرح

[ابو جاسر السنيدي]

اممم

يسلمو ع الطرح

بس هاي اعتقد للتعبير عن نطق القاف باللهجة العامية البدوية

وهي ننطقها قريب من نطق حرف g بالانجليزي ^_^

ف ماكو حرف اقرب لها في النطق الا حرف ج

يعني باختصار تقدري تقولي : تعبير عن هويه الشخص ^_^

لان لما نكتبها ق نحس بتناقض اللهجة العاميه مع الكتابه بالفصحى


ههه وهاي بنت المضيبي كتبت لك : هلا فيج (فيك)

[ساحرة البشر]

اهلين اختي...يسلمو على الموضوع
يعني هي جات على هالحرف !! عادي هذي لهجه عاميه ...اذا عدلنا في هالحرف لازم نعدل كثير من الحروف عشان تستقيم الفصحى عندنا...

[mr_bigwig]

هلا وغلا بعضوتنا الجديده قلبي لمن حياك الله

منورة منتدانا


وموضوعك مناسب وحلو للنقاش



من وجهة نظري الشخصيه



اشوف انه م الافضل انه نكتبها عادي مثل ماهي باللغه العربيه الفصحى




بس نحن ف المنتدى مش رسميين وايد


يعني كأننا ف بيت واحد اخوه واخوات


ف تحصلي انه اغلبنا يكتبها باللهجه العاميه




وفيها اجابيه بسيطه


لانه اللي خارج السلطنه او ا ف غربه ويدش المنتدى



يحس انه بين اهله واخوانه







تقبلي مروري وردي المتواضع



دمتي بالود

[الفجر الجديد]

اهلا وسهلا بك اختي الغاليه في منتديات جعلان ....
بأمانه انا مثلك استغرب كتابة الناس بهذه الطريقه ..
الاخوة الذين علقوا سابقا بأن اللهجه العامية وحتى يفهم الآخرون لهجتهم ليس بالضرورة معرفة الناس للهجتك
كونك تكتب بطريقة صح فهو انعكاس لفكرك قبل كل شيء ..
اتمنى نحذف مثل هالالفاظ من قاموسنا ونرجع للصح
حتى لو حبيت تكتب بالعامي ليست بالضرورة كتابة {ج} بدل {ك} !!

[حـ أمي ـيـ روحي ـ أبي ـاتي]

ي سؤالج شو فيج تراه لهجتنا كذا طالعين من السيح هههه

[ملامح يوسفيه]

فديتس حن هب فمدرسهـ حن نمارس حياتسنا اليوميهـ>>طالعه فيها البنت
مافيهاا شي ازاا رمسينا رمستنااا العاديهـ الواحد اللي يريحهـ
وتساانكات
سي يووو

[قلبي لمن]

اشكر الجميع على التعليق
واود ان اوضح للجميع بأنني عضو ولست عضوه !!
وعموما
الاختلاف في الرأي لا يفسد في الود قضية(صح المثل ولأ انا اضفت شي من عندي)!!!

ما فيها بدو ولا حضر انته يالفتى أو الفتاة لما تقول لامك أحبك كيف تنطقها ؟؟؟؟؟
انا بدوي بس ما انطق احبج
ولا انطق فديتج

صح اقول ((قهوة)) بنطق القاف g بس اكتبها قهوة
وانا من البداية قلت الكتابة وليس النطق
والكل بيفهم

واعتقد المنتدى طموحه يوصل حتى للمغرب العربي
وذا دخل واحد المنتدى ما بيفهم بعض المواضيع اذا كانت تكتب بهذا الشكل




بنت المضيبي
ابو جاسر السنيدي
ساحرة البشر
mr_bigwig
اسومه 16
قلب الغيلاني

اشكركم على المرور الف شكر

والله لا يحرمنا من مشاركتكم


وفي النهاية الواحد له حرية الاختيار فيما يكتبه

[الاسيف]

اليوم من بيسير وياي يـــــــــــــــعــــــــلان

[mr_bigwig]

يعلاااااااان ,, جعلان


صراحه انا احترم وجهة نظر قلبي لمن ف الموضوع واتفق معه

[فاصلة منقوطة]

ف رأيي ان اي كلمة او موضوع انكتب اهم شي الفكره منه والاستفادة بغض النظر

بأي لهجة أو لغة كٌتب ..!

مجرد رأي ^_^

شكراآ لطارح الموضوع

[قلبي لمن]

صباح الورد

شكرا لكم على مروركم الطيب

mr_bigwig شكرا لك على تفهمك المسألة



انا بقولكم ليش كذيه نكتب
بصراحه

لاننا احن العمانيين نحاول نقلد الخليجيين في كل شي
يعني الواحد او الوحده ما يصدق نفسه يدرس في عجمان ولا دبي ولا الكويت
الا ويجينا من هناك مغير كلامه ولهجته !!!!!!!!!!!
حتى طريقة تفكيره

والله يحفظكم

[منجح بواسطة]

شكل الاخت مدرسة لغة عربية ،،،

[الشاايب]

تسلمين على هذا الطرح
وتقبلي مروري
والسبب اهمال الفصحى وبعدين يقولوا انهم عرب
واللي يقول ان الحرف بسيط غلطان لان الخراب يبدأ بالصغير ويكبر
وانا اعترف مرات اكتب الكاف جيم لكن عشان اسايرهم

[الذريب]

ههههههههههههههههههههههه ... موضوع جميل ... تشكراتي لج الغالية ...

[ملكة الورد]

حـــــــــــركــــــــــــات

[ضحكة أمي تسوى عمري]

مرااااااااااااااااااااااااحب...................
المهم تكون مفهومه وبعدين لغتنا العاميه كذيه شو نسوي

[$حبيبي جعلاني$]

م فيها شي ابدا وبالعكس هذا فخر ان نكتب بلغتنا الحقيقيه لغه الاسلام
يسلموووووووووووووووووووووووو

[$حبيبي جعلاني$]

هههههههههههههههههههههههه الأخ منجح بوااااسطه بصراااااااااحه ضحكتني بس يمكن تكون مدرسه عربي ليش لا

[عيونك أخر أمالي]

أحسن كل حد يكتب باللهجه اللي تعجبه

[ابن المرازجه]

اممم الموضوع حلوو
ويستاهل الطرح ومشكورة اختي على جهودك
بس من وجهة نظري انا نستخدم هتغيرات حتى نعرف نفرق بمنطوقنا بين البنت والولد
يعني لاحظي بلمنتدى كتبي لبنت اخبارك او يعطيك العافيه كنج كاتبه لصبي مب لبنت وياما اعضاء يردوا علينا نحنا بنات هههه فعشان كذيه نغير

تقبلي رايي