عطْر المعاني لافْ من كَفّ عطََّار طِيب القوافي من خوافي زهرها
عٌوْد احملتْه النُّود ما تحرقه نار له فكرٍة تسفر ويغشى سفرها
من شيخ له تاريخ ومواقف كبار يستلهم الأيام ماخذ عبرها
دليل ما يحتار ويدل الآثار به طاب فال الدار وأزهى ثمرها
بيني وبينه علم وأيّام وأخبار أيام عشناها من أول فجرها
وبيني وبينه بيتْ بالمجد والغار ساسه بزايد لي لنفسي ذخرها
وبيني وبينه زين ما شان من صار ما غَيّره بيض الظروف وحمرها
وبيني وبينه ودّ في سر وإجهار محفوظ في قلوبٍ بعيدٍ نظرها
وبيني وبينه كشف ما يحجب ستار ومن نظرته عارف معاني فسرها
وبيني وبينه عَهْد خُوّه ومقدار تقدير نفسٍ له تجود بعمرها

وبيني وبينه مُول ما مُوْشيٍ سار سيره شرى شمس الضحى في جهرها
يا ليت يدري الودّ لأجله والإكبار عند القلوب اللي غزيرٍ بحرها
مشكور بوخالد على نظم الأشعار وعلى التهاني لي تبسم ثغرها
وأحمد ولدكم تابع نهج الأحرار وإنتوا خواله لي كبيرٍ قدرها
ومن كان في دمّه ولو ربع مقدار من دَمّ زايد الأوّله يبتدرها
إش عاد والبيتين عنده م الخيار الخير فيه وكل صعبه قهرها
يا مرحبا ف أوّل وتالي ولك دار في عين معتاده تشوفك بصرها
سمو الشيخ محمد بن راشد آل مكتوم