عودة من بعيد

بخبركم لما رحنا مصيرة قبل رمضان بأسبوع تقريبا

رحنا على الشاطي والغداء معنا تغدينا واغلب الشباب ناموا على الساحل

انا جلست ومعي الكاميرا قلت بجلس اصور

الجو كان روعة جدا والشاطي فيه مسيلة (الحصا الصغير)

لونهن عجيب جدا عجبني اللون الاسود فجلست اجمع الحصى

اشوي وجات بنت اختي وقالت خالي شو تسوي قلت لها اجمع حصى

قالت بجمع عندك قلت لها تعالي

وجلسنا نجمع وندقها سوالف تقولي شو بنسوي بهذا الحصى قلت بنسوي مشروع

عاد هذا هو الحصى اللي جمعناه والسموحة على رداءة الصورة



خلص رمضان والحصى في الكبت محد حركه ومسكينة بنت اختي خالي متى بنسوي مشروعنا

عاد المشروع اذا بغيتوا تعرفوه قلنا بنسوي حفرة صغيرة فالحصى وبنسوي منه قلادات واساور

فقلت لازم نروج للمشروع فخبرت الاهل وكلهم استمصخوني على هالفكرة وبنت اختي متحمسة

خبرت زميلاتها فالمدرسة والبنات صغار عجبتهن الفكرة وقالن بناخذهن

عاد انا قلت للاهل اللي بيطلب من الحين بنعطيه بنص ريال واللي بيطلب تالي بريالين

المهم جبنا المعدات التالية


Drilling Machine



Drill Bits

قطرهن 2 ميليمتر لحفر الحصى



هذي الصورة لاحدى الحصوات صورتها مع الفلاش واستغربت من لونها

الحصى جدا خفيف وأملس<<<<<<< ياقوت على غفلة

المهم حفرت تقريبا 12 حصاة لحد الحين و5 انكسرن عليه

ان شاء الله يتكلل المشروع بالنجاح عالاقل قلادة وحدة لبنت اختي

لانها متأملة خير من هالمشروع

وبس

مدونتي مب عاجبنها الوضع وايد اخليها وحيدة

ومستوحشة مسيكينة

بس عاد روتيني هالفترة نفس الشي يعني ما في شي يديد اطرحه في مدونتي

واخوكم ما يحب الاشعار وكذا مدونتي لسوالفي

وطالما سوالفي عادية اذن المدونة خالية

علاقة طردية للي يحبوا الفيزياء :)

رجعة من بعيد للمدونة

أولا عذرا على غيابنا الطويل بس الظروف حدتنا

الحالة اخر الايام كانت جدا تعب في تعب

بس الحمدلله الحين الحال أحسن بكثير

ما أدري شو أقول بس احسني وايد مقصر فالمنتدى

والسموحة منكم

السلام عليكم ورحمة الله وبركاته

اليوم 10-11-2010

رحت أصلي الفجر ولما رجعت شفت ابويه واخواني يتريقوا

اللي معه شغل واللي بيروح يقضي حاجة وانا لا شغل ولا مشغلة فقلت بتريق عندهم

تريقنا كباتي (تشباتي) مع جبن وشاي حليب شي اكيد

رحت على فراشي

جاني اخوي الكبير

بنته البكر (7سنوات) مطلوب منها عمل بطاقة تهنئة بمناسبة العيد الوطني الاربعين

قالي سويها لها بسرعة

قلت مشي عندي انترنت<<<<<< شرير

خليته هو يعبي ودورت فالنت خلفيات لقابوس مع علم السلطنة

ولقيت كذا بطاقات هنئة جاهزة

عاد ما لحقت عالبنت قبل لا تروح دوامها

فهو قالي شلها لها المدرسة

بس لا تروح بالسيارة فالشارع العام تعال من وراء البيوت لانه ما عندي رخصة

المهم اختي بعد خبرتني اسوي لبنتها

الشعب كلهم ما يتكلموا من قبل اذا محتاجين شي

ماشين على مبدأ last minute dot com

خليت البطاقات في فلاض رحت بيت اختي طبعتهن

رجعت البيت غيرت ملابسي ورحت المدرسة

مع انه الدكتور قايل لي لا اسوق لاني مسوي عملية في الظهر (بسيطة الحمدلله)

رحت المدرسة وعطيتهم البطاقات ورجعت البيت

قلت بنام لاني كنت تعبان

ياني ولد اختي

خالي تبى سمبوس؟ قلت ايوه قال هات فلوس بمشي اشتري

راح يشتري ما لقى شي

ضيع عليه نومة

بس نمت من 9-11

عاد الظهرية يابولي بنت اخويه نايمة<<<< الاخ مستوي حضانة

حطيتها فحضني ونامت

المهم انا كنت شارب ديو وحطيت القوطي على صوب

قامت هي شافت القوطي راحت تاخذه حصلته خفيف

جلست تهزه وبغت تشرب بس ماكو فايدة

فرت القوطي ورجعت تنام

قبل اذان العصر طلعت عنها شوي اسمعها تبكي طلعت برع الغرفة

وشافت ابويه وراحت تركض صوبه تحضنه

وبس هذا يومي

اعرف وايد سولفت بس تحملوني

:)

عيدكم مبارك وكل عام وانتم بخير وعساكم من عوداه

وكذلك مبارك عليكم العيد الاربعين لعمان

ومبروك عليكم منتخبنا الاولمبي

وان شاء الله نقول مبروك علينا كأس الخايج

اولا احب اعتذر لمنتديات جعلان لغيابي المستمر عنها

والسبب ظروف شخصية تمنعني من التواجد مثل السابق وان شاء الله تنفرج قريبا


طبعا العيد راح بس ما كان مثل أعياد قبل

افتقدنا اخويه (ابتسم واضحك وفرفش دوما) وولداتي كانوا رايحين الحج

اول يوم عرسية وسيده ذباح

اول يوم ذبحنا 8 رؤؤوس غنم وعاد لازم تجرحك السكين

لما كنا ناكل عرسية جاء اتصال لابويه يخبروه انهم حصلوا غنم في مكان قرب صور يمكن يكونن غنمنا اللي ضايعات

بعد ما ذبحنا وخلصنا اللحم

رحت مع الوالد بعد صلاة العصر للمكان الموصوف بس حصلنا الهوش مب لنا (15 رأس غايبات علينا)

رجعنا البيت عالساعة 8 الليل اصبحنا واكلنا لحمنا

وبعدها ذبحنا بقرة وشرحنا اللحم ومر اليوم الثاني

اليوم الثالث رحنا الخبة جلسنا عالبحر شوي ورجعنا

هالعيد ما كان فيه شي استثنائي

غير 3 يوم عيد ابويه اتصل فيه شخص يخبره عن الهوش

فلما راح حصلهن الحمدلله وحصلناهن زايدات مولودين

وعمت الفرحة العائلة بعد غياب الهوش لمدة تزيد عن اسبوعين

خبرنا ايويه انه الهوش زعلانات لما امي سافرت عنهن ولما رجعت رجعن


عسى ايامكم كلها اعياد ان شاء الله

السلام عليكم ورحمة الله وبركاته

اخباركم وعلومكم؟

اسفين جدا على طول الغياب

كنت مشترك في التعداد كعداد وما صار عندي وقت ادخل

من نطلع من البيت الساعة 7 ما نرجع الا الساعة 11 الليل

اليوم خلصنا وسوينا حفلة بسيطة

بس عن جد كانت ايام جدا روعة وذكرى ما تنتسي

تعرفنا على ناس والنعم فيهم يدخلوا القلب من دون اذن

عاد الحين يات الاجازة والناس ناوية تطلع كشتات

ادعولنا بالتوفيق اخواني

واسمحولنا عالقصور

السلام عليكم ورحمة الله وبركاته

أخباركم؟

عساكم طياب ان شاء الله

ما اشتقتوا لنا

اسمحوا لنا عالغياب الطويل بس ما في فرص ندخل مثل قبل

عموما أخوكم راح اليمن سياحة مع عيالي خالي وأهلي

3 سيارات بيكب اب

اليمن جنان وروعة من حيث الطبيعة

وكذلك شعب مناضل جدا جدا ويارب نشوف اليمن مزدهرة أكثر فمقبل السنين

ان شاء الله بنزل لكم صور الرحلة بس من اكون فاضي

هذي صورتين من الرحلة الالى بعد ما دخلنا حدود اليمن في مدينة نشطون

والثانية في ساحل الصقلة بجعلان لما ردينا من اليمن سوينا عرسية





ولي عودة بأذن الله متى ما توافرت الفرصة

Miss U Baby :(

i will tell u later

اليوم بحكيكم بشد الكاف على قول اخواننا اليمنيين
معنا كورس مواد مشعة يومين اليوم وباكر
والكورس يبث عن طريق الكاميرا لعشر دول تقريبا
البرازيل~امريكا~النرويج~اندونيسيا~عمان~السعودية وما اذكر من بعد
ونحن فالامارات مع المحاضر
تخيلوا فارق التوقيت بين الدول
الكورس تأخر ساعة ونص لحد ما ضبطوا الكاميرا
واول ما بدينا رن جرس الانذار فاضطرينا نخلي البناية
وتاخرنا نص ساعة زيادة
بس الحمدلله ما طول خلص الساعة ١
ورحت انام لانه الليلة الماضية راجعين من المارينا الساعة ١٢ وصار
لنا حادث بسيط واضطرينا ننتظر الشرطة ووصلنا الساعة ٢
فكنت تعبان
عاد توني راجع من الكورة وبنزل اتعشى شغل بلاش