اعزائي اعضاء المنتدى حبيت انقل لكم هالقصه الي تتكون من 32 جزء:eek: ومكتوبه باللهجه الاماراتيه

وان شالله تعيبكم


الجـــــزء الأول :



دارت الاحداث في دولة الامارات العربية المتحدة الإمارة : أبوظبي سنة 1998م

مايد وميثا اعيال خال من يوم هم اصغار يحبون بعض .. مايد أكبر عن ميثا بثلاث اسنين .. ميثا من يوم هي اصغيرة وايد تحب تروح بيت خالها إبراهيم " بو كايد " علشان تلعب ويا سلامة بنت خالها .. هي وسلامة قد بعض ودوم ميثا في بيت خالها , أمها متوفية وابوها قبل لا تتوفى امها كان متزوج من مصرية وعنده منها بنتين وولد " إيمان وعمرها 12 سنة والريم وعمرها 15 سنة وخالد وعمرة 16 سنة " ميثا وشاهين اخوان اخلصى شاهين اكبر عن ميثا بسنتين .. حرمة ابوهم كانت قاسية عليهم وايد وبالاخص من اتوفت امهم لدرجة انه ميثا أغلب الوقت كانت تروح بيت خالها حتى انها كانت بين فترة وفترة تبات ببيت خالها .. خالها ابراهيم وايد يحبها هي وشاهين اعيال اخته فاطمة الله يرحمها ويعتبرهم مثل اعياله " كايد 29 سنة متزوج من مريم بنت عمه وعنده ولد واحد اسمه بدر .. مايد وعمره 20 .. حمدة ومحمد هذيل توأم وعمرهم 19 سنة .. سيف سلامة وعمرها 18 سنة وسيف آخر العنقود وعمره 16 سنة " ...

ميثا بنت طيبة وايد ودلوعة هي هب بيضا .. لكنها خمرية وعودها حلو وايد هب طويلة ولا قصيرة مربعانية .. عيونها سودا وشعرها اسود يوصل لين اخر ظهرها .. هي حلوة لدرجة انه اعيال عمومتها كانوا يتمنون انه تكون ميثا من نصيبهم بس هي محيرة لولد خالها " مايد " ومايد وايد يحبها وكان وايد يستانس يوم يشوفها عندهم في البيت ..

في يوم من الايام كانن ميثا وسلامة رادات من المدرسة نزلهن الباص قدام باب بيت قوم سلامة وانزلت ميثا وياها كانت مخبره ابوها من الصبح انها اليوم بتبات ببيت خالها إبراهيم ...

ميثا : سلااااااامه يله خلينا اندش البيت بموت من العطش ....
سلامة : صبري اشوي الحين اكيد بيي فيصل خليني أبا اشوفه ...
ميثا : الله يغربلج سيارة كايد اخوج واقفة ما فينا يشوفنا واقفين بالسكة بيسويلنا سالفة !!
سلامة : اوووووووه بلاج اصبري شووووي
ميثا : انا بروح داخل ويوم بتشوفين فصول وتشبعين من شوفته تعالي ....
تفتر عنها بتروح البيت بس سلامة تيودها من ايدها ...
سلامة : ميثووووه والله انج ما تشجعين اصبري شووووي دخيلج ...
ميثا وهي تنزل شنطتها على الارض : وهذي وقفة بنشوف شو آخرتها ويا ها الفيصل .....
سلامة وهي تحب ميثا على خدها : فديت روحج انا ....

سلامة تحب فيصل ولد جيرانهم وهو ما يعرف انه سلامة معجبة فيه وتحبه .. بس لاحظ كم مرة سلامة توقف تترياه عند الباب ومرات يسأل نفسه شو فيها هالبنت هو يخاف يسألها لانه يخاف من مايد وكايد اخوانها لانهم وايد شريين على عكس محمد وسيف اللي ما يخصهم بالمشاكل ..

ميثا : افففففففففففف هلكنا من الحر .. حرام عليج والله بموت من العطش ...
سلامة : اصبري شوي الحيييين بييييييي.......
ميثا : وانتي اشعرفج انه الحين بيرد من دوامه ؟؟
سلامة : عندي احسااااااااس ........

شوي وتحدر سيارة فيصل الفريج ومن شافت سلامة السيارة وهي في حالة ثانية اعدلت شيلتها ووقفت بهيبتها .. سلامة أطول عن ميثا وأبيض عنها .. بياضها غير طبيعي واللي يشوفها يتحراها سورية لانه بياضها على حمرة .. وشعرها بني وعيونها عسلية ...
توقف سيارة فيصل عند باب بيتهم ويحدر فيصل من السيارة .. كان لابس كندورة بيضا وغترة بيضا وعقال .. هو اسمراني وطويل صح انه هب حلو لكن شكله مقبول يشتغل محاسب في البنك العربي هو اكبر عن سلامة بخمس سنوات .. العام مخلص جامعة .. دارس بجامعة الامارات كلية الادارة والاقتصاد ..
أول ما وقفت سيارة فيصل قدام بابهم ميثا اركضت ودشت البيت إلا سلامة ما تحركت من مكانها ويلست تطالع فيصل هو حس بها لكنه ما صد صوبها تحركت سلامة صوب البيت شوي وميثا من داخل اتراقب الموقف ...
وقبل لا يحدر البيت وقف يطالع سلامة وابتسم لها شوي وميثا تزقرها من ورى الباب ....
ميثا : سلاااااااااااامي دشي البيت مايد ياي صوووبي ...
تركض سلامة وادش البيت وتسكر الباب وراها كان مايد يمشي صوب ميثا ومن شاف سلامة داشة وهي مرتبكة يمشي بسرعة صوبهن ...
مايد : سلااااااااااااامة اشعندكن واقفات عند الباب ....؟؟؟؟؟
سلامة وميثا وهن مرتبكات ولا تكلمن .....
مايد : بلاكن ساكتات ...؟؟؟
ميثا : لااا ماشي توه الباص منزلنا ....
مايد : ليش ما ييتن ويا الدريول ؟؟
ميثا : ما مر علينا اليوم خبرونا انه مريض ... وكايد قالنا انرد بالباص هو وصلنا الصبح المدرسة ...
مايد : هيه .. يله عيل روحن داخل عن الحر ..
سلامة : انشالله ...
يروحن صوب الفلة وميثا محتشرة على سلامة يحدرن الصالة وكانت مريم حرمت كايد يالسه تغير اثياب بدر ولدها اللي عمره سنتين ...
سلامة : السلام عليكم ...
مريم : وعليكم السلام ماشالله توكن يايات من المدرسة ..؟؟؟
ميثا : هيه ياين بالباص تعرفين عاد انتي كيف الباصات ..........!!!!!!!!؟؟؟
مريم : هيه وحليلكن كان الله في عونكن ... سليم مريض اليوم ..
بدر : عموه ........
سلامة : اعيون عمتك هلاااااااااا حبيبي ..............
تشله وتيلس تبوس فيه : فديتك بدووووري الغالي ........
مريم : يله روحن غيرن اثياااابكن بعد شوي بيي عمي وسيف ومحمد من الشغل وبنحط الغدى ...
سلامة : عيل امايه وينها ؟؟
مريم : في حجرتها احيدها تصلي ...
ميثا : بروح اسلم عليها ...
سلامة : هيه والله يله خل نروح .. مريومه يودي ولدج .. اقول حمدة وينها ؟؟؟
ميثا : في الكلية ...
سلامة : مسكينة هالبنت ..........
يروحن فوق ويدخلن عند امهن ويسلمن عليها وعقبها يروحن الغرفة علشان يغيرن اثيابهن ومن عقبها ييلسن يسولفن شوي ...
سلامة وهي تنسدح على السرير : آآآآآآآآآآآه يا ميثووووه ليتج شفتيه آآآآآآآآآآه محلاته ...
ميثا : الله يغربلج الحمدلله ميووود ما شافنا جان قصبنا قصااااب وسوانا شاورما ...
سلامة : هيه والله الله ستر ...
ميثا : سلااااااااااااامة الحب حلوووووو صح ...؟؟؟
سلامة : هيه والله ...
ميثا : وانتي كله تلوميني ؟؟؟
سلامة : عاد الوحدة يوم تحب .. تحب واحد مثل فصول هب ميووود مالت ...
ميثا وهي تضرب سلامة بالخفيف على بطنها : غربلااااااتج ليش ميود هب تارس عينج .. ها .. شو فيه اخووووج ؟؟؟
سلامة : فاشل بعد ميود شووووه فااااااااااااااااااااااااااااااشل .........
ميثا : جب جب انزين انشالله بيحصل شغل .. شهادة وعنده شو بعد ...؟؟
سلامة : منوه بيشغله بالثانوية الحين من سنتين من خلص ثانوية لا وراااسب سنة في المدرسة من يبا يشغله ... مااااااااااااااااااااااااالت .....
ميثا : بتشوفين يوم بيحصل شغل بتتعذرين عنه .. خالي قال بيتوسط له ...
سلامة : هه .. اقتنعي ميود هب مال شغل .. بس مال ارقاد ونت وسهر ويا الشباب شي ثاني ما يعرف ...
ميثا : جب جب قومي خل نروح نتغدى علشان نحط روسنا ونرقد شويه عسب انش ندرس لنا كلمتين ....
سلامة : هيه والله يله قومي ...
يروحن تحت ويشوفن امهن يالسه ويا مريم ويسولفن ...
ام كايد : زين يوم ييتن يله روحن اغسلن اديكن علشان نتغدى ...
سلامة : ابويه يا من الدوام ؟؟
ام كايد : هيه والحين بييي ....
شوي ويحدر ابراهيم " بو كايد " الصالة واول ما دخل نشت سلامة وميثا وراحن يسلمن عليه ...
بو كايد : حيالله بناتي فديتكن .. يا الغاليات حبكن ربكن ....
ميثا : حبتك العافية يا خالي اشحالك فديتك ؟؟؟
بو كايد : بخير ونعمة يا ريحة الغالية ها .. خبرني شو سويتن بالمدرسة اليوم ؟؟
سلامة : كل خير وياجر عدنا امتحان فيزياء ..
بو كايد : يله شدن حيلكن وادرسن عدل انشالله الله بيوفقكن ...
ميثا : انشالله ...
بو كايد : عوشه يله قومي انجبي الغدا ...
ام كايد : انشالله يا بو كايد ..
تروح ام كايد هي ومريم علشان يزهبن الغدا وسلامة وميثا يلسن يسولفن ويا بو كايد .. مثل ما قلنا بو كايد وايد يحب ميثا بنت اخته فاطمة الله يرحمها هي اخته الوحيدة وفقدها وايد يوم توفت بس الله عوضه بميثا بنتها وشاهين ولدها .. شاهين اكبر عن ميثا ويدرس هندسة في بريطانيا وهو خاطب حمدة بنت خاله ابراهيم بس ما بيعرسون إلا يوم بيخلص دراسه وتخلص حمدة دراستها ....
بو كايد : ابوج يعرف انج اهنه خبرتيه .؟؟؟
ميثا : هيه خالي مخبرتنه .......
سلامة : ابويه ليش ما تقول حق عمي خلفان يخلي ميثا تعيش على طول عدنا ...؟؟؟
بو كايد : يا ليت قلت له قبل بس ما رضى ...
ميثا : خالي قوله مرة ثانية والله اني احبكم وابغي اتم عندكم ؟؟
بو كايد : حتى انا اباج تكونين عدنا بس ابوج يوم قلت له قال انته عندك اولاد وانا ما ابغي البنت اتم عندكم بعدين اعمومتها بياكلون ويهي وتعرفين عاد انتي اعمومتج .؟؟؟
ميثا وهي زعلانة : هيه اعرف ...
شوي واتي البشكارة علشان تزقرهم حق الغدا ويروحون صوب غرفة الطعام علشان يتغدون بعد دقايق الكل التموا على سفرة الطعام ويلسوا ياكلون ...
بو كايد : ها ... كايد يا ولدي شو الشغل اليوم وياك ؟؟
كايد : والله الحمدلله ...
بو كايد : الله يعينك ما عرفت منوه اللي زاختنه التحريات البارحة في مصفح ؟؟
كايد يشتغل في الشرطة وهو وكيل نيابة ...
كايد : هيه هذيل شباب صايعين الله يعزك متحرشين بمغربيات وزخوا عندهم غرش خمر ....
بو كايد : اعوذ بالله مواطنين الشباب ؟؟؟
كايد : اثنين منهم مواطنين وثلاثة عرب وواحد اجنبي
ام كايد : الله يغربلهم هذيل .. يو البلاد اهنه وخربوا شبابنا ...
مريم : هيه والله جان زين ينزلون قرار يمنعونهم من اليلسة في البلاد ....
محمد : هيه سمعنا هالسالفة اليوم واحنا في الكلية واحد من هالمواطنين اللي زاختنهم الشرطة ابوه مطوع مسيد جيران حاتم اربيعي ....
ام كايد : يله شوف ابوه مطوع ويراكض ورى هالوصاخة ... عافانا الله ...
بو كايد وهو يكلم مايد : مايد رحت حق صالح بن نايم اليوم والا رقدت بعد مثل كل مرة ؟؟
مايد وهو ينزل راسه : سمحلي ابويه ما رحت له راحت عليه نومه ...
بو كايد وهو معصب : وهذا اللي انته تعرفه كله ارقاد متى بتغدي ريال شوف اخوانك محمد وسيف ماشالله عليهم اصغر منك واحسن عنك ...
تم مايد يطالع ابوه وحس بالايهانة هو ما يحب ابوه يهينه قدام حد وبالذات قدام ميثا حبيبته ....
بو كايد : متى بتغدي ريال وبتعتمد على نفسك كلهم اخوانك زينين إلا انته طالع عوي ما اعرف على منوه ؟؟؟

ينش مايد من مكانه ويروح : الحمدلله شبعت ...
ام كايد : ابراهيم زين جذه احرجت الولد ...
بو كايد : ما قصدت اجرحه ولا احرجه انا ابغيه يعتمد على نفسه صالح البارحة رمسته وقالي خل يمر عليه وهو ولا مهتم اللي يهمه بس الحواطه طول الليل والنت وربعه هذيل ..
كايد : ابويه انتوا اللي دلعتوه من البداية ؟؟
بو كايد : يا كايد احنا ما دلعناه بس شو تباني اسوي اضربه انا في عمري ما مديت ايدي على واحد منكم عيل ليش محمد وسيف غير هذوه محمد من خلص الثانوية راح التقنية وسيف بمدرسة الطيران ليش هذيل يهال ويفكرون احسن عنه وهو يعري اشكبره ولا يهتم بشي ...
كايد : الله يهديه انشالله ...
عقب الغدا راحت سلامه وميثا الغرفة وانسدحت على السرير وكانن ساكتات ما تكلمن شوي وترمس ميثا : سلاااااااااااااااامي ؟؟؟
سلامة : نعم ....
ميثا : ليش مايد ما يفكر يشتغل ؟؟
سلامة : ما اعرف ؟ اسأليه ؟؟
ميثا : سألته اكثر من مرة بس ما يرد عليه ؟؟
سلامة : تراني قلت لج انه فاشل ...
ميثا : جب .. بس خالي احرجاه حرام ؟؟؟
سلامة : ابويه ما يقصد يجرحه يباه يتحرك يسوي شي ... هب كله ارقاد .. يباه يغار من حمود وسيفوه شوفي هذيل اصغر عنه ويدرسون باجر حمود بيتخرج من الكلية وبيشتغل وسيفوه عقب مدرسة الطيران بيدش الكلية الجوية وبيتخرج طيار شو بعد ليش هو ما يسوي نفسهم ...
ميثا : انتي تعرفين ميود يكره الدراسة ...
سلامه : زين يكره الدراسة بس هب يكره الشغل .. والله ما عندج سالفة تحبين واحد فاشل شرات ميوود ........
ميثا : جب جب اسكتي ..........
سلامة : حطي راسج وارقدي شوي وبيأذن العصر خلينا نرتاح شوي علشان انش ندرس خلاف .......
ميثا : انزين اسكتي ........

تصد ميثا الصوب الثاني عن سلامة وتغمض اعيونها بس ما قدرت ترقد يلست تفكر بمايد ... " يا ترى وين راح القايلة ؟؟؟ حرام ليش يا خالي احرجته جذه ... ؟؟؟ " واتم تهويس بمااايد وتعد قصيدة في خاطرها وتقول " ساكن بوظبي حليو الاوصافي ... ومالي أبيات القصايد
من سلالة ناس أشرافـــــــــــي ... ومحافظ على التقاليد والعوايد
أموت لي قالوا لي اللافـــــــــي ... اللي لهالقلب صايـد
ليته يعلم باللي فقلبي خافـــــــي ... والسنين لي عشتها بالشدايد
يا قوي العود والاطرافــــــــي ... ياللي لرب المخاليق ساجد
اشهد ان قلبي الصافـــــــــــــي ... يحبك يا من لهالروح قايد
يا من نظرتك لي تشافـــــــــي ... ومن روحك أجني الفوايد "

ومن عقبها تغمض اعيونها وتستسلم للرقاد .....


• يا ترى مايد وين راح ؟؟؟
• ميثا وسلامة شو بيسون في المدرسة اليوم الثاني ؟؟؟
• والمصرية حرمت ابو ميثا شو بيكون دورها في االقصة ؟؟


اتمنى انها تنال رضاكم

همس

تسلمين عالقصه اندمجت والله فيها حلوه

مشكووووووره

الجزء الثاني:


حزة المغرب كانن سلامة وميثا توهن ناشات من الرقاد ومن عقبها صلن العصر والمغرب ويلسن يدرسن حق امتحان باجر ... حمدة من ارجعت من الكلية الساعة 5 العصر اتغدت وحطت راسها وارقدت لين الساعة 8 بعد العشا ومن عقبها نشت ... في الصالة كانت مريم حرمة كايد يالسه ويا عمتها ويسولفن ....
ام كايد : مايد من ظهر الظهر وهو ما رد البيت ....
مريم : اتصلتي فيه ؟.؟
ام كايد : تلفونه مغلق ما اعرف هالولد وين راح ؟؟
مريم : وين بيروح اكيد ويا ربعه بيي ......
ام كايد : والله ما اعرف هالولد شو فيه جذه من خلص دراسه وهو عايف الدنيا .....؟؟؟
مريم : انشالله الله بيهديه انتي بس ادعيله بالهداية ...
ام كايد : الله يهديه يا رب ... إلا وين بدر ؟؟؟
مريم : راقد عند حمدة .....
ام كايد : يالله حمدوه للحين راقدة اتصلي فيها وعيها ...
مريم : انشالله ...
وقبل لا تتصل إتي حمدة وكان بدر يمشي احذالها ... حمدة اكبر عن سلامة بسنة وهي مثل ما قلنا توأم محمد عمرها 19 سنة وتدرس بكلية التقنية مثل محمد هي قصيرة بس هب وايد .. مليانة شوي بيضا بس هب نفس سلامة اعيونها سودا وشعرها اسود وقصير لين كتفها ...
حمدة : مرحبا ........
مريم : ملاااااايين ولا يسدن .......
حمدة : اشوفكن إلا اروحكن وين البنات عيل ؟؟؟
مريم : يدرسن عندهن امتحان باجر ...
حمدة : هيه الله يوفقهن انشالله ...
ام كايد : امين يا رب ...
شوي ويرن تلفون البيت تشله مريم لانه قريب منها ....
مريم : الووووووو .............
: السلام عليكم ....
مريم : وعليكم السلام ورحمة الله وبركاته ....
: مريم والا حمدة ... منوه معايه ؟؟؟
مريم : انا مريم ... الا منوه الحرمة ..؟؟؟
: انا هدى حرمت خلفان ... أم خالد ....
مريم : حيالله ام خالد اشحالج ؟؟؟
هدى : بخير ربي يعافيج ... وين ام كايد عيل ؟؟؟
مريم : لحظة .......
تسكر مريم على سماعة التلفون وتودي التلفون حق عمتها ام كايد : عموه هذي ام خالد حرمت عمي خلفان المصرية .....

ام كايد : والقوم الحين بتحتشر الله يستر ....
تآخذ ام كايد التلفون وتحط السماعه على اذنها : حيالله ام خالد اشحالج الغالية ؟؟
ام خالد : بخير ربي يعافيج اشحالج انتي ؟؟ واشحال ابو كايد ؟؟؟
ام كايد : بخير وسهالة ...
ام خالد : وينكم مالكم شوووووووف ؟؟؟
ام كايد : والله موجودين في دار بو خليفة ....
هدى : عيل وين ميثا شوه هي حتنام عندكم ؟؟؟
ام كايد : يالسه تدرس ويا سلامة وشوه فيها لو ارقدت اهنه يعني هب اول مرة ؟؟ وهي مترخصة من ابوها ....
ام خالد : ايوه اعرف عادي بس ما قالت لي .. خواتها يسألون عنها ....؟؟؟
ام كايد وفي خاطرها " يا المنكر قولي تبينها تشتغل في البيت " : لا ميثا بترقد عدنا اليوم وبوكايد مرمس بو شاهين مساعه ومخبرنه ....
ام خالد : ايوا ... طيب خلاص جان جذه السالفة ....
ام كايد : زين ....
تيلس ترمسها وعقب تسكر عنها ....
ام كايد : يا منكرها تبا البنت بس علشان تغثها .....
حمدة : هذي كله جذه من تشوف ميثووه عدنا اتبعتها ,.. ما تنلام ميثوه يوم تكرها ....
مريم : حشا هذي هب حرمة .. جلبة .. عز الله السامعين ...
حمدة : هههههههه هيه والله .. مصرية ما تنلام ...
شوي ويحدرن سلامة وميثا الصالة وكانن يسولفن .....
حمدة : ها ... اشعندكن تسولفن ....؟؟؟
ميثا : وانتي اشلج والله .....!!!
حمدة : عنالااااااااااتج يالسبالة .....
ميثا : حمدوووه حبيبي متى بتاخذينا وياج التقنية ؟؟؟
حمدة : ليش تراكن عقب الثانوية بتن عندي التقنية تدرسن ؟؟
سلامة : لا عيوني استريحي انا بروح جامعة الامارات جان ميثوووه بتروح عندج ....
حمدة : ودج انتي اتييين عندي .....
ميثا : ما علييييج منها بس رمسة ...
ام كايد : ميثاني الغالية .......
ميثا : لبيه .....
ام كايد : لبيتي حايه ... اتصلت حرمة ابوج ....
ميثا : والقوم شو تبا ؟؟؟
ام كايد : تباج تردين البيت بس انا قلت لها إنج بترقدين عدنا ....!!!!!
ميثا : فديتج خالتيه وانا اصلا اليوم ببات اهنه وانا مخبره ابويه هي شلها تتصل تتخبر عني انا اعرفها تباني ادرس ايمانوه والريم ....
مريم : وليش ما يدرسن اروحهن ....
ميثا : شو عرفني متبزيات ما اعرف على شوه يهال وزامات بخشومهن عنالاااااتهن .....
ام كايد : هذيل خواتج عيييييب ......
ميثا : خالتيه يوم هن بيحترمن انه عندهن اخت اكبر منهن بحبهن ....

الريم اخت ميثا في ثالث اعدادي وهي مغرورة وايد وما تحب تحتك بميثا ودايمن يضاربن وايمان في سادس ياهل ما تعرف شي همها بس تلعب واطالع قناة االاطفال ... وخالد في اول ثانوي كله يدرس في غرفته مرات يوم يحس بملل يروح ييلس ويا ميثا شويه وميثا وايد تحبه بس هي تحب شاهين اخوها اكثر لانه وايد قريب منها وهي وايد تيلس بالساعات عقب ما تخلص دراسه تسولف وياه ع النت ....
ام كايد : الله يهداهم انشالله ...

من عقبها تروح ميثا وحمدة وسلامة المطبخ علشان يسون كيكة حمدة طباخة ماهرة .. على عكس ميثا وسلامة اللي ما يعرفن يطبخن والشي الوحيد اللي يعرفن يسونه هو الدراسة وبس هن وايد شاطرات في المدرسة ويطلعن من الاوائل من يوم هن اصغار والبنات يغارن منهن في المدرسة لانهن ماشالله عليهن ادب واخلاق وشطار ... دريشة المطبخ اطل على الشارع الخارجي وسلامة كانت بين الفترة والثانية اطالع منها بس ما كانت مفتوحة عليها ستارة يعني محد يشوفها وهي اتبطل الستارة اشوي علشان تشوف سيارة فيصل اللي واقفة عند باب بيتهم وتسابر له متى بيظهر ....

ميثا : مشكلة الحب يوم يخبل بالانسان ؟؟؟
حمدة : ههههههههههه هيه والله مشكلة الغلامة متعذبه ....
سلامة : جب انزين ....
ميثا : شوووووووه قيس ما ظهر من البيت بعده ؟؟؟
سلامة : فديته بعده ...
حمدة : هههههههه ما اعرف شو تحبين في والله انه هب غااوي .... لا واكبر منج بعد ...
سلامة : الريال هب بشكله عيل شوه تبينه نفس شاهينوه الدب ....
ميثا : ايييييييييييه لا تقولين شاهينوه شو اصغر اعيالج ......
حمدة : احسن ردي عليهاااااااااااا ...............
سلامة : مشكلة بعد كانت وحدة واستون ثنتين ......
ميثا : هيه لا تقولين شي عن شاهين فديته ....
حمدة : احسن اهناك .......
سلامة وهي اطالع من الدريشة : اييييييه سكتن هذوه الشيخ ظهر من البيت يتراكضن صوب الدريشة ويشوفن فيصل وهو شال شنطة رياضية ولابس بنطلون جينز ازرق وتي شيرت ابيض .... يالله محلاته اكيد ساير الصالة يتدرب ....؟؟؟
ميثا : حليله الشيبه بعد يهتم بصحته .....
سلامة : عنالااااااااااااااتج والله انه فصول صغير يعني كم عمره إلا 23 سنة .. لا تقولين شيبة بعده اصغير ........
ميثا : زين زين ما قلنا شي .......
حمدة : ميثوووووه صخي بتاكلج الحين بضروسها .......
سلامة : سكتن خلونا نشووووف .......
يركب فيصل سيارته عنده رنج بيضا ويتحرك ويروح ... اتم سلامة تطالعه لين ما يظهر من الفريج عقبها تروح وتيلس على الكرسي .....
سلامة : آآآآآآآآآآآه يا قلبي والله هالريال مخبل فيني ....
حمدة : سكتي عن يسمعج حد وانتي تعرفين اخوانج كله ولا ميود لو درابج بيقصبج .......
ميثا : هيه والله حلينا من هالطاري متى بتخلص الكيكة ...
حمدة : باقي لها شوي وبتخلص ....
حمدة : آآآآآآآآآآآآآآآآآآآه يا قلبي والله احبه ....
حمدة وهي ترش ماي في ويه سلامة : سلوووووووم سكتي عن يسمعج حد ....
سلامة : انزين ها بنسكت .... وتحط ايدها على ثمها .....

من عقب ما تخلص الكيكة يروحن داخل الفة وييلسن يطالعن التلفزون من عقب ما وزعت حمدة الكيكة على امها وابوها وحرمت اخوها وعلى ميثا وسلامة ....
بو كايد وهو يرمس حرمته : عوشة ... مايد ما اتصل ؟؟؟ ولا رد البيت ؟؟؟
ام كايد : لا والله يا بوكايد لا اتصل ولا رد البيت ... وتلفونه كله مغلق ....
بو كايد : والله هب عارف هالولد شو فيه ....
ام كايد : لا تقسى عليه يا ابراهيم وهاده انشالله بيهدى ....
بو كايد : انشالله ............. انا ولا مرة قسيت عليه يا عوشة ودومه مايد هو الغالي عندي من بد اخوانه رغم انهم كلهم غالين .......


من عقب ما يتعشون يروحن البنات الغرفة علشان يرقدن ... حمدة كانت يالسه عند سلامة وميثا في غرفة سلامة وكانت ميثا يالسه ع النت تسولف ويا شاهين اخوها وكانت حمدة يالسه احذالها وسلامة كانت يالسه على السرير وتدرس ... تراجع قبل لا ترقد حق الامتحان باجر ....

بعد دقايق قليلة يسكرن الكمبيوتر ....
ميثا : حمدووووه والله اني مشتاقة لشااهين خاطريه اروح عنده .....
حمدة : ليش مليتي منا ...؟؟؟
ميثا : لا .. بس ولهت على شاهين من زمان ما شفته فديته والله ....
حمدة : هب انتي اللي ولهتي حتى انا ولهت عليه ....
سلامة : شو عندكن شو يالسات تسولفن فيه ؟؟؟
ميثا : ماشي ....
حمدة : يله انا بروح ارقد دوامي الساعه 8 الصبح انتن قومن ارقدن وراكن مدرسة ...
سلامة : يله عيل تصبحين على خير ....
حمدة : وانتن من اهل الخير ... رقدن ولا تسولفن طول الليل ...
ميثا : انزين ....
حمدة : يله باي ...
ميثا : باي ...

من عقب ما ظهرت حمدة من عندهن نشت سلامة وطفت الليت وشغلت الابجورة ....
ميثا : سلاااااااااامي ... ميووووود رد البيت والا لا ؟؟؟
سلامة وهي ترتب شنطتها : شو عرفني ؟؟ هذا دووومه يسهر ويرد اخر الليل البيت ...
ميثا : ليش وين يروح ؟؟؟
سلامة : شو دراني قالوا لج تحريات ...؟؟؟
ميثا : هههههههه تصدقين سلاااامي تنفعين تكونين تحريات ........
سلامة وهي تنسدح على الفراش وتتغطى : بندي الابجورة وخلينا نرقد ورانا مدرسة ...
ميثا : انشالله ....

تبند ميثا الابجورة وتنسدح عدال سلامة لكن النوم ذيج الليلة كان مجافنها كانت وايد تفكر بمايد ... سلامة ارقدت وميثا تمت واعية على الساعة 2 ونص ما طاقت ميثا اليلسة نشت واطلعت برع عقب ما لبست شيلتها البيضا الكل في البيت كانوا راقدين والليتات امبنده نزلت تحت وتمت تتمشى في الصالة يلست على الكنبة شوي وتسمع صوت واحد يغني خافت .. التلفزون امبند يا ترى منوه هذا ؟؟ هذا اللي كان يدور في خيال ميثا هذيج اللحظة ما قدرت تنش من مكانها وشوي شوي والصوت يتقرب و من خوفها نزلت راسها وغمضت عقبها ... صاحب الصوت دخل الصالة وشافها يالسه على الكنبة اتقرب منها وتم واقف وهي حست به تم قلبها يدق بقووو ... ارفعت راسها وهي تسمي بالرحمن شافت مايد واقف قدامها ......
ميثا : عنالاااااااااااتك يا السبااااال روعتني ....
مايد : هههههههههههه فديت اللي تخاف انا ....
يلس احذالها ...
مايد : ليش واعية للحين ؟؟؟
ميثا : هب يايني ارقاد .. أحاتيك .....
مايد : فديت اللي تحاتيني ... ليش حبيبي يعني وين بكون كنت ويا ربعي ....
ميثا : كلنا تمينا انحاتيك خالتيه اتصلت بك اكثر عن مرة وانت تلفونك كله مغلق ....
مايد : ها . يمكن ما اعرف ..... هيه صح كان مفضي ....
ميثا : ميوووووووووود ؟؟؟؟؟؟؟
مايد : اعيونه ..........
ميثا : انته ادووووووووووخ ؟؟؟؟؟
مايد : هههههههههههههه وشو فيها يعني ... هيه ادووووخ ......
ميثا : الله يغربلك انشالله لو درابك خالي بيذبحك ....
مايد : ابويه وكايد يدرون شو يعني .....
ميثا : من متى ادوووخ ؟؟؟
مايد : من سنة الحين تقريبا .....
ميثا : ليش تحرق صدرك بها حرام عليك !!!!!
مايد : تخافين عليه حبيبي ....
ميثا : اذا ما خفت عليك بخاف على منوه يعني ......
مايد : فديتج ... انشالله علشان خاطر اعيونج الحلوة بودر السجاير ... شو مسويه انتي بالدراسة .......
ميثا : الحمدلله ........
مايد : الله يوفقج انشالله ...........
ميثا : مايد انته ليش ما ادور على شغل حرام عليك بس اللي يهمك الرقاد وبس .....
مايد وهو ينش من مكانه : ميثاااااااااااني انا ما افكر بالشغل الحيييييين ..........
تنش ميثا من مكانها وتوقف احذاله : لا والله باجر محد بينفعك خالي ما بيدوم لك على طوووووول ........
مايد : انشالله علشان خاطرج بدور شغل .....
ميثا : هب علشاني انا .. حرام عليك خالي وايد توسط لك وانته اداوم اسبوع وترد تظهر ليش عاد شو المسأله مسألة اعناااااااااااااااااااد ؟؟؟؟
مايد : لا هب اعناد بس انشالله بروح ....
ميثا : انشالله بنشووووف ....
مايد : يله قومي ارقدي وانا بروح ارقد بعد .........
ميثا : انشالله .............

تروح ميثا الغرفة وتسكر الباب وتحط راسها وترقد وقبل لا ترقد تفكر بمايد ومن عقبها ترقد ....
مايد من دش غرفته عق كندورته وطلع صلب السيجارة ويلس يدخن ويفكر بكلام ميثا له ويلس يذكر اعيونها " فديت اعيونج ميثااااااااااني انشالله بحاول قد ما اقدر احصل شغل علشاااان اسعدج عقب زواجنا " من عقبها يشغل الكمبيوتر وييلس يتصفح عبر شبكة المعلوماتية عقبها يدش الشات كان متواعد ويا ربعه وييلس يسولف وياهم هذي حالته سهر ونت واحواطه يسهر طول الليل على النت يتعرف على بنات وشباب هو وربعه ويعلقون البنات ويرمسهم ويواعدهم ومن عقبها يقلعهم يوم يشوفهن اتعلقن به ....

الصبح ......
ميثا وسلامة نشن من الرقاد وعقب ما صلن الفير ألبسن اثيابهن وراحن يتريقن وعقب ما تريقن ركبوا ويا الدريول وصلوا حمدة الكلية وعقبها روحن المدرسة ... ومحمد وسيف راحوا دواماتهم سيف روح مدرسته ومحمد روح الكلية كايد راح دوامه حتى ابوهم روح دوامه ... وقبل لا يظهر بو كايد من البيت وصى حرمته توعي مايد علشان يروح حق صالح بن نايم .......
وكالعادة راحت ام كايد توعي مايد لكنه ما نش قافل الباب عليه ولا يتوايب لحد راقد ... ارقاده وايد ثجيل ومن كثر ما تعبت من الدق عليه راحت عنه .....
في المدرسة :

وفي الحصة الرابعة كان عندهم فيزياء يعني امتحان البنات رتبن الكراسي والطاولات ويلسن يترين المدرسة ......
موزة : ميثا درستي ؟؟؟
ميثا : اكيييييييد عيل كيف بيييي امتحن بدون ما اكون دارسة .....
موزة : تعرفين انا وايد خايفة .....
ميثا : يله توكلي على الله ....
في الطرف الثاني من الصف سلامة يالسه تقرى أدعية .. وحنان السودانية تطالعها .....
حنان : شنو تسوين ؟.؟؟
سلامة : ماشي اقرى ادعية .......
حنان : ومن شنو خايفة انتي شاطرة المفروض ما تخافين ؟؟؟
سلامة : الله واكبر علييييييج .............
ميثا : حنون بلاج على بنت خالي اذكري الله عليها ....
حنان : يا ربي تكلمت المدعي العام .....
ميثا : هيه المدعي العام وانتي شو حارنج .....
سلامة : ميثاااااااااااني سكتي عنها .....
شوي وتحدر عليهم ابلة عاشة معلمة الفيزياء .....
ابلة عاشة : السلام عليكم
بنات الصف وبصوت واحد : وعليكم السلام ورحمة الله وبركاته ...........
ابله عاشة : ها .... مستعدات للامتحان ........
البنات : نعم ........
ابلة عاشة : سلااااااااامة تعالي .......
تنش سلامة وتروح عند ابلتها وتناولها الاوراق علشان توزع على البنات ومن عقب ما وزعت يلسن البنات يحلن الامتحان كان الامتحان شويه صعب والكل منزلات روسهن ... ويحلن ...
ارفعت سلامة راسها شوي من الورقة وشافت حنان السودانية تحاول تغش .. واطلع ورقة اصغيرة من جيبها المدرسة ما كانت منبهه سلامة شافتها وما طاقت الموقف لانه حنان كانت بارعة في الغش ومحد يقدر يشوفها على طول .. سلامة ازقرت المدرسة ويوم تقربت ابله عاشة منها خبرتها عن حنان بعد شوي راحت ابله عاشة ومن عقبها ردت لحنان واسحبت منها الورقة وظهرت الورقة الصغيرة اللي تغش منها عصبت المدرسة واطردت حنان برع عقب ما علمت على ورقتها البنات في الصف ارتبكن وهن يشوفن ابله عاشة معصبة وتهازب حنان .. وحنان اتصيييييح .. عقب الامتحان اظهرت ابله عاشة وراحت وهي معصبة ... حنان دشت الصف وهي تصيح وتتوعد ...
حنان : والله لاخبر عليها ابويه ...
سلامة : وليش تغشين هب حراااااااااام ....؟؟؟
ميثا : سلوووووووم سكتي عنها ما فينا على لسانها ......
حنان : انتي اللي خبرتي عليه صح لانه ابله عيشه عقب ما كلمتيها جت عندي ...
سلامة : وانا شو يخصني انا ماشفتج وهي شافتج انا شو دراني انج يالسه تغشين والله ...
شوي وتحدر عندهم الاخصائية ابله نعمت والوكيلة ابلة انتصار و مدرسة اللغة العربية ابلة نورة يلست الاخصائية تتنازع عليهم ..ومن عقبها كتبوا حنان على فصل يوم من المدرسة وانها لازم تحضر مع ولي امرها ....
وطافت الحصص بعد جذه بتوتر وعقب الدوام ميثا وسلامة ردن البييت من عقب ما مر عليهن سليم الدريول ...
ميثا : سلامة انتي اللي خبرتي ابله عاشة على حنان ؟؟؟
سلامة : هيه انا قهرتني يوم شفتها تغش ليش يعني ....
ميثا : ههههههه تستاهل والله يعني احنا نتعب وهي تغش على الفاضي .........
سلامة : خلينا منها ... بتروحين بيتنا ؟؟؟
ميثا : لا بروح البيت ولهت على ابويه بمر عليج العصر والا المغرب .....
سلامة : خيرانشالله ... سليم روح بيت بابا خلفان ....
سليم : انشالله ...يوصلن بيت قوم ميثا تحدر ميثا من السيارة وقبل لا ادش البيت تسمع سلامة تكلمها : ميثووووووه لا تنسين تمرين خلااااااف ......
ميثا : انشالله ...
ادش ميثا وتشوف حرمة ابوها في ويها ....
ام خالد : الحمدلله على السلامة ...
ميثا : الله يسلمج ...
ام خالد وبنفس خايسه : جان ما رجعتي ....؟؟؟
ميثا : وين تبيني اروح هذا بيت ابويه ....
ام خالد : بيت ابوكي جان يلستي مش رحتي ادورين ؟؟؟
ميثا : انا ما رحت ادور انا كنت في بيت خالي هب بيت حد غريب ....
تمشي ميثا عنها وتروح صوب غرفتها ادش وتسكر الباب وراها ...
ميثا : افففففففففففففف متى ربي بيفكني منها ومن السانها ....

في بيت بو كايد حزة الظهر ومن عقب الغدا كان بو كايد يالس ويا حرمته ام كايد في غرفتهم ..

بوكايد : هذا اليوم الثاني والريال يتريا ميود ؟؟ وميود هب راضي يروح شو اسوي يا عوشه ويا هالولد ......؟؟؟؟؟
ام كايد : خله هو بروحه بيحس وبيروح ....
بو كايد : اتمنى يا عوشه اتمنى يحس على دمه شوي ويحرك نفسه ويدور له على شغل ويكون مثل اخوانه ....
ام كايد : انشالله بيحس ربي يهديه ويصلح باله يا رب ......
بو كايد : آآآآآآآآآآآآآآآآآآآآآآآآمييييييييييييي، ................



• ياترى مايد بيسمع كلام ميثا وبيدور له شغل وإلا ما بيهتم ؟؟
• وميثا شو بتسوي ويا حرمة ابوها ؟؟؟

هااااااااا شباب وصبايا اكمل ولا القصه ماعيبتكم؟؟؟؟؟؟؟؟؟؟

ما اشوف ردود على القصه

غير من فتاة الباديه

شكلي مابا اكمل القصه

الجـــزء الثــالـث :

حزة العصر وفي بيت قوم بوكايد كان مايد في غرفته ويالس ع النت كالعادة ويدخن وكان قافل الباب شوي ويرن تلفونه والا اربيعه عبيد متصل به يرد عليه ......
مايد : مرحبا ملااااااايييييييين ولا يسدن بولد نصييييييب .........
عبيد : المرحب لاهان حيالله بو سلطان اشحالك ؟؟
مايد : طاب حالك الشيخ وينك ما خطفت علينا البارحة .؟؟؟
عبيد : والله كنت في العين ...... ويا واحد من الربع .....
مايد : ماشالله اشعندك في العين ؟؟
عبيد : مواعدين غراشيب ....
مايد : والله ما قلتوا لي كنت بخاويكم ؟؟؟
عبيد : زين انا متصل بك اذا بتخاوينا يوم الاربعاء ...؟؟؟
مايد : وين ؟؟؟
عبيد : مسافرين ؟ انا وسلطان وحمد وشباب ما تعرفهم من الشارجة ...
مايد : والله وين مسافرين ؟؟؟
عبيد : وين بعد مصر وبنتم اسبوعين اهناك جان بتخاوينا ازهب ....
مايد : اكيد بخاويكم ...
عبيد : خير انشالله رتب اغراضك وبنطير عقب الساعة 10 يوم الاربعاء ....
مايد : لحظة والتذكرة ما حجزت ....
عبيد : افا عليك انا بحجز لك الحين انا بمكتب السفريات .....
مايد : خلاص اوكي احجز لي وبعدين نتحاسب على البيزات ....
عبيد : افا عليك بو سلطان لا تذكر الفلوس امرة هالسفرة اهداء مني لك انا عازمنك وبعد آخذ منك فلوس منقود عليه احاسبك ...
مايد : فديت روحك خلاص عيل الشيخ نتلاقى اخلاف في شقة حمد ...
عبيد : خلاص تم فداعة الله ....
مايد : فداعة الله .....

يسكر مايد التلفون ومن عقبها يسكر الكمبيوتر يروح يسبح ومن عقب ما يخلص سبوح يلبس اثيابه ويحدر تحت في الصالة كانت امه وابوه يالسين يتقرب منهم ويحبهم على روسهم وعقبها ييلس على الكنبة ....
بو كايد : اشحالك مايد ؟؟؟
مايد : بخير ربي يعافيك ....
بو كايد : وينك طول النهار مالك شوف ؟؟؟
مايد : والله في غرفتيه ....
بوكايد : راقد اكيييييييد صح ؟؟؟
مايد وهو منحرج : هيه ابويه ....
بوكايد : مايد يا ولدي الرقاد ما يفيد لو انه يفيد جان فاد غيرك وانا البارحة يوم هزبتك بغيت مصلحتك ما بغيت شي ثاني ....
مايد : اكيد اعرف يا بويه ....
بوكايد : كلها سنتين وبتقول ابا اعرس والبنت هاذي اخر سنة لها في الثانوية ومن عقبها بتروح الجامعة كلها سنتين وبتقول لي يله يا بويه ابا اعرس وعمك خلفان ما بيرد لك طلبك

مايد : ابويه خلاص بسوي اللي انته تامر عليه ومن باجر بروح حق عمي صالح بن نايم ...
بوكايد : هيه يا وليد الله يرضى عليك ابغيك دوم قدام وتغار من اخوانك انا ما افضل حد على حد بس اباك تكون نفسهم ...
مايد : انشالله يا بويه انشالله ....
ام كايد : الله يرضى عليكم كلكم يا رب وافرح فيكم معاريس ...
بو كايد : امين يا رب .,,,
ييلسون يسولفون وعقبها تحدر سلامة عليهم تحب امها وابوها على راسهم وعقب تيلس تسولف عندهم .....
سلامة : ميثاني ما اتصلت ؟؟؟
ام كايد : لا ما اتصلت ....
سلامة : قالت بتخطف علينا العصر وما يت .. بقوم اتصل بها ...
تتصل سلامة ببيت عمتها وترد عليها ميثا ....
ميثا : آآآآآآآلوووووو ...........
سلامة : حي ذا الصوت ؟؟ وينج ليش ما ييتي ؟؟؟
ميثا : بعد شوي بيي ابويه عنده ريال في الميلس هو بييبني حتى عباتي لابستنها ...
سلامة : منوه الريال اللي عندكم ؟؟؟
ميثا : صدق ما قبضتي مذهب يا بنت ابراهيم وشوه عرفني بالريال ؟؟؟
سلامة : ههههههههههه ..... انزين ما قلت شي ... يالله نترياج لا تتأخرين ....
ميثا : انشالله ...
سلامة : باي ...
ميثا : باي ...
تسكر سلامة التلفون ...
ام كايد : وينها خويتج ؟؟؟
سلامة : الحين بتي ؟؟ مايد بتودينا حامد سنتر ؟؟
مايد وهو يشرب قهوة : وش عندكن في حامد سنتر ؟؟؟
سلامة : بنروح انيييب عبينا وشيلنا انا وميثاني امفصلين اهناك عندهم .....
مايد : لا والله عطيني الفاتورة وانا بييييب عبيكن ....
سلامة : لا انا ابغي اروح بشتري اغراض من الجمعية ... بعد .....
مايد : استريحي عيل ماشي ظهره ....
سلامه : ابويه قوله ....
بوكايد : ود اختك وبنت عمتك اكسب فيهن اجر ....
مايد : ابويه حامد سنتر كله شباب وربعي اهناك يوم بيشوفوني وياهن بيتحروني مواعدنهن ...
ام كايد : عنبوه محد يمشي اهله كله في حلوجهم الا مواعدين .....
بو كايد : هيه هذيل شباب اليوم ...
سلامة : والحين شو الحل ...؟؟؟
مايد : هاتي الفاتورة وانا بيب عبيكن حقكن ...
سلامة : انا ابغي اغراض من الجمعية بعد ....
مايد : عيل اقولج خلي حمود والا سيفوه ايودونج انا بروح عند ربعي ...
ينش مايد ويترخص عنهم ويظهر ....
سلامة : اوووووه والحين شو اسوي ....؟؟؟
بوكايد : روحي شوفي محمد قوليله يوديج ....
سلامة : انشالله ...
شوي واتي ميثا عندهم وتسلم على خالها وحرمة خالها وتيلس تتفول وياهم شوي وتحدر سلامة وهي تحتشر ....
ميثا : ايييييييه اشعندج تحتشرين ؟؟؟
سلامة : ابويه حمود هب راضي بيروح مصفح موتره خربان .......
بوكايد : خلاص انا بوديكن فكينا من الحشرة ....
ميثا : وين بتروحين ؟؟؟
سلامة : مخبرتنج بنروح حامد سنتر ومن عقبها بنحدر الجمعية ...
ميثا : هيه صح نسيت ما باقي شي على الحفلة ...
بو كايد : أي حفلة ؟؟؟؟
ميثا : حفلة تخرجنا ورى باجر يوم الاربعاء ......
بوكايد : ماشالله السنة الدراسية طافت بسرعة ....
ميثا : احسن علشان اندش الجامعة ...
بوكايد : الله يكتب لكن النجاح يا رب ...

من بعد ما يتفولن يظهرن ويا ابوهن ايوديهن حامد سنتر ويخليهن ويروح عنهن من عقب ما عطى سلامة تلفونه الثاني علشان عقب ما يخلصن يتصلن به ... يدخلن المركز ويروحن الطابق الثاني علشان ايييبن عبيهن وقبل لا يحدرن فوق ...
ميثا : والقوم اخاف من هالدري المتحرك .....
سلامة : خلج برستيج حطي ريلج على الدرية الاولى وبس وبيتحرك اروحه ....
ميثا : لا لا ... اخاف ....
سلامة : تعالي بيودج ....
ميثا : لا سلاااااااااااامي والله اخاااااف ....
كانوا شله شباب واقفين احذالهم وسمعوا الحوار اللي دار بين ميثا وسلامة ...
واحد من الشباب : شو الشيخة خايفة ....
يسكتن ولا اتكلمن ...
ميثا : سلووووووووم شو نسوي ...
سلامة : امسكي ايدي وما عليج ....
يرد يرمسهن : اساعدكن الشيخاااات ؟؟؟
سلامة : استريح ما نبا مساااااااااعدة ...............
تمسك سلامة بإيد ميثا ويصعدن على الدري وميثا من الخوف تمت ساكته لين ما اوصلن ... فوق ...
سلامة : عنالاااااااااااااااتج يا السبااااالة زين جذه لميتي الشبااب علينا ....
ميثا : جب جب طوفي خلينا نخلص ...
كانن يتمشن وهن متغشيات دشن المحل خذوا عبيهن وادفعوا الفلوس ومن عقبها راحن يتمشن تمن يدشن كل ساعة محل اشترن لهن عطور ومن عقبها اتصلن حق ابوهن مر عليهن وراحن الجمعيو ومن عقبها راحن ماركس وسبنسر واشترن بدلات واغراض وايدة وردن عقبها البيت .....
في شقة حمد اربيع مايد ...
كانوا الشباب متيمعين ويسولفون ويا بعض مايد كان يالس ويرمس في التلفون
عبيد : ها بو سلطان منوه ترمس .....
مايد وهو يغلق المايك : غربلاتك هذي صيدة يديدة ؟؟؟
عبيد : من وين ؟؟؟
مايد : من الشمال !!!!
عبيد : وين يعني ؟؟؟
مايد : بعدين بخبرك ....
ييلس مايد يسولف ويا البنت وعبيد راح عند حمد وسلطان وعبدالله ويلسوا يسولفون ويلعبون ورقة عقبها بدقايق ياهم مايد ويلس يسولف وياهم ...
عبيد : ها ... بو سلطان خلاص عليها الرمسة بتخاوينا مصر ...
مايد : اكييييييييييد .........
عبيد : يله عيل رتب اغراضك السفرة يوم الاربعاء ورى باكر الساعة 11 بالليل .. على مطار دبي ...
حمد : زين والله اسمينا بنستانس ...
مايد : زين زين والله ...
عبدالله : عاد انته اول مرة بتروح ويانا يا مايد والله بتستانس اخر وناسة من خاطرك الله محلات هذيج البلاد ......
حمد : روعة روعة بتروح مرة كل مرة بتقول ابغي ارووح .....
مايد : والله ليش شو فيها ؟؟؟
عبيد : كل شي فيها حرية تامة ... بنات على كيف كيفك من كل الجناسي ... وألعاااااب كل شي بنروح وبتشوف بعينك ...
مايد : شوقتوني لمصر والله ....
عبيد : كلها يوم وبنكون في ربوع القاهرة الحبيبة .....
يضحكون كلهم وبصوت واحد .... ههههههههههههههههههههههههههههههههههههههه
بعد صلاة العشا ميثا ردت بيتهم ومن ردت يلست اترتب اغراضها ومن عقبها راحت ويلست في الصالة علشان تطالع التلفزون .. كانت ايمان اختها يالسه تكتب ......
ميثا : الحين بالليل تكتبين واجبج ؟؟؟
ايمان : لا يالسه اكتب رسالة ......
ميثا : حق منوه ؟؟؟
ايمان : حق ابله العربي لانها بتسافر خلاص هذي اخر سنة لها في البلاد ....
ميثا : هيه حليلها ....
شوي وتحدر ام خالد عليهن ....
ام خالد : ايمان ليش صاحيه للحين روحي نامي .....؟؟؟
ايمان وهي تسكر الدفتر : انشالله اميه ...
تشل ايمان دفترها وتروح غرفتها ميثا يلست تقلب في القنوات ....
ام خالد : وانتي مش حتنامي ؟؟؟
ميثا : بعدني ما فيني ارقاد .. بتريا ابويه ...
ام خالد : ابوكي مش حينام اليوم في البيت حيبات في الدوام ...
ميثا : زين ... يوم بيييني ارقاد برقد ...
بو ميثا يداوم في جهاز الامن وهو يوم في البيت ويوم يبات في الدوام واليوم بيبات في دوامه ...
ام خالد : خلاص على راحتج ....
تروح ام خالد فوق وتبند الليتات اللي فوق وتروح غرفتها علشان ترقد تيلس ميثا اطالع التلفزون كانوا محطين فيلم لعبدالحيلم حافظ وميثا وايد يعيبها الفيلم تمت تطالعه ويوم خلص راحت ترقد .....
هالليلة مايد رجع البييت من وقت على الساعة وحدة لانه مواعد ابوه يروح حق العم صالح بن نايم الصبح ذيج الليلة مايد ما بات كل تفكيره مشغول بالسفرة هب عارف كيف يصارح ابوه اكيد بيرفض والا كايد اكيد ما بيخليه يسافر .. شوي وتطري ميثا على باله " ياه اليوم ما شفتها والله هالبنت معزتها بقلبي اكبيرة الله يسعدني وياها طول عمري " يتخيل زواجه على ميثا وهي تمشي احذاله بفستان العرس الابيض يالله محلاتها ... ينسدح على السرير ويفكر بميثا " فديت قلبج يا ميثوووه انتي الوحيدة اللي فاهمتني في هالدنيا كلها " ينش من مكانه ويولع سيجارة وييلس يدوخ يوقف في البلكونة ويتم يدوخ عقب ما يخلص يظهر من الغرفة ويروح صوب غرة سلامة يشوف الليت مفتوح يدق الباب على سلامة تنش وتفتح الباب من تسمع الدق عليها .....
سلامة : ميوووووووووود
مايد : هيه ..ز شو فيج ؟؟؟
سلامة : لا ما فيني شي .. اقرب حياك ....
مايد : قريب فديتج ....
يدش مايد وييلس على الكرسي : اممممممممممممم
سلامة : جان في خاطرك رمسة قولها ؟؟؟
مايد : سلامي ميثااااااا ما يتنا اليوم ؟؟؟
سلامة : ايوا وانا اقول ميود ما بيني علشان خاطر اعيوني الا اذا له حايه ....

مايد : سلووووووووووم قولي يت والا لا ؟؟؟
سلامة : هيه يت وروحنا حامد سنتر وعقبها رجعنا البيت ....
مايد : سلامة ... ميثوووه شو تقولج عني ...؟؟؟؟
سلامة : كل خير بعد شو بتقول يا منكرك انته ... انته تعرف انه ميثوه ما تشوف حد في هالدنيا غيرك وانها تحبك وايد بعد اشله السؤال ....؟؟؟
مايد وهو يبتسم : والله ... فديت روحها والله ....
سلامة : بس هي تضايج وايد يوم تشوفك ما تهتم ولا ادور لك شغل ....
مايد : يا ربي يا هالشغل اللي تحاتونه خلاص يا بوووويه انا انشالله من باجر بروح حق صالح بن نايم وانشالله احصل شغل ....
سلامة : انشالله ...
مايد : وانتي شو كنتي يالسه تسوين ؟؟؟
سلامة : سلامة راسك يا الغالي كنت يالسه ادرس عندي امتحان باجر امتحان تربية اسلامية صعب وايد ... عاد باجر اخر يوم في المدرسة وهذا امتحان تجريبي .....
مايد : الله يوفقج انشالله .....
سلامة : يوفق الجميع يا رب ....
مايد : يله عيل بخيلج انا بروح ارقد ... تصبحين على خير ....
سلامة : وانته من اهل الخير ....
يروح مايد غرفته يطفي الليتات وما ايييه ارقاد الا قراب الفير ... الصبح كلهم نشوا من الرقاد وكلهم استغربوا انه مايد واعي اول مرة كان لابس كندورة بيضا وغترة واعقال وكاشخ عرفوا انه الرمسة يابت فايدة فيه .. يدخل غرفة الطعام علشان يتريق يحب امه وابوه على روسهم ومن عقبها ييلس يتريق ويا اخوانه شوي وتحدر سلامة وحمدة الغرفة وييلسن يتريقن ...
بوكايد : ماشالله على ولدي مايد ويهك منور ....
مايد : النور نستمده منك طال عمرك ....
بو كايد : وانا ظاهر من البيت بتصل بعمك صالح بخبره انك بتمر عليه ...
مايد : خير انشالله .....
من عقبها يظهرون كلهم يروحون دواماتهم ومايد روح عند العم صالح ومن عقب ما خذى العم صالح اوراق مايد وعده يحصل له شغل قريب يظهر مايد ويروح شقة اربيعه حمد علشان يرقد عنده لانه وايد تعبان ما بات الليل بطولة ....

سلامة وميثا من عقب ما خلصن امتحان ردن البيت على الساعه 10 الصبح وفي الطريج ...
ميثا : تهقين العم صالح سوى شي حق مايد ؟؟؟
سلامة : اكيد لانه العم صالح يعرف ناس قو وايد في بوظبي وواسطته قوية اكيد مليون بالمية بيحصل شغل حق ميود ...
ميثا : الله يوفقه يا رب
سلامة : امين ...

يوسلن البيت هاليوم ميثا بتروح بيت خالها بتبات عندهم لانه باجر حفلة تخرجهم في المدرسة باجر الاربعاء وباجر بيسافر مايد مصر لكن محد للحين يعرف انه بيسافر
ميثا : السلام عليكم ....
ام كايد : حي ذا الشوف وعليكم السلام والرحمة هلا الغالية اقربي فديتج ...
ميثا وهي تحب ام كايد على راسها : قريب فديتج ......
ام كايد : عيل سلامي وينها ؟؟؟
ميثا : هذي تمشي ورايه ....
سلامة : السلام عليكم ....
ام كايد : وعليكم السلام والرحمة حيالله ببنت ابراهيم .....
سلامة : الله يحيج على فضله يا ام كايد .... وتحب امها على راسها ....
ام كايد : حبج ربج يا الغالية ...
سلامة : امايه شوفي ميثوووووه ؟؟؟
ميثا : شو سويت لج ...؟؟؟
ام كايد : شو سوت لج البنت من الله حادرة قبلج الصالة ....
سلامة : دشت وسكرت عني باب الحوش ....
ميثا : هههههههههه تستاهلين ... امايه هي من احدرت من الموتر يالسه تدلع سنة لين ما تمشي ....
سلامة : غربلاتج ....
ام كايد : قومن عن الهذربة الزايدة قومن غيرن اثيابكن ....
ميثا : انشالله امايه الساعة 11 بعد شوي بتي راعية الصالون علشان نتحنى ....
ام كايد : زين يوم تعرفن يله عيل قومن غيرن اثيابكن ....
سلامة : انشالله

ام كايد : انشالله افرح فيكن عرايس واشوفكن وانتن تتحنن حق عرسكن ...
ميثا وهي ترفع ايدها فوق للدعاء : انشالله امين ...
سلامة : عنالاااااتج يا السبالة يله خطفي قدامي اشوووف ....
ام كايد : هههههههههههه فديتكن والله .....
يروحن فوق علشان يغيرن اثيابهن وميثا من دشت الغرفة على طول اركضت للكمبيوتر وشغلته ....
سلامه : عنبووووووه اسميه ظاوي راسج النت يا بنت خلفان ....
ميثا : جب انا مواعدة شاهين هالساعه اسولف وياه على المسنجر انشالله بس هو اون لاين الحين ....
سلامة : قومي غيري اثيابج على الاقل ....
ميثا : لا لا ابغي اطمن على اخويه ....

ادش الماسنجر بس ما تحصل شاهين اون لاين تفتح الايميل وتحصله مطرش لها رساله اعتذار كاتب فيها " حبيبي ميثاني اتريتج وايد بس الظاهر انج اتاخرتي في المدرسة على العمموم طمنيني عليج ولا تحاتيني انا بروحىارقد الحين لانه باجر عندي امتحان وانشالله احصلج بالليل اوكي حبيبي لا تزعلين فديتج .... خويج شاهين " اتقرب ميثا ويها من الشاشة وتبوس الشاشة
سلامة : هوب هوب ... شو فيج اتخبلتي ....؟؟؟؟
ميثا واعيونها تدمع : سلااااااااامي والله اني ولهانة على شاهين تخيلي هالايجازة ما بيحدر البلاد .... والله حرام ...
سلامة : حبيبي قولي حق عمي ايوديج بريطانيا عند شاهين ؟؟؟
ميثا : قلت لابويه بس انتي تعرفين شغل ابويه كيف ومن غير جذه في الاجازة حرمة ابويه بتروح مصر عند اهلها وطبعا خالد هو اللي بيروح وياهم يعني انا وابويه بنتم في البلاد .....
سلامة : اممممممم شو رايج نخبر ابويه ونقوله هدية نجاحنا من الثانوية ايودينا بريطانيا منها نتكشت ومنها نزور شاهين ....
ميثا : والله صدق فكرة حلوة ... هزرج خالي بيوافق ...؟؟؟
سلامة : وليش ما يوافق ...؟؟؟
ميثا : خلاص عقب الغدا بنخبره ...
سلامة : خير انشالله ....
شوي واتي البشكارة تزقرهم لانه راعية الصالون يت البيت علشان تحنيهم حق حفلة المدرسة باجر ... ويروحن عند الحرمة علشان يتحنن كانن وايد مستانسات لانه حفلتهم باجر .....
يمر اليوم هادي ومن عقب الغدا سلامة وميثا يخبرون ابوهم عن اللي فكروا فيه مساعة عن سيرة بريطانيا بس الخال ابراهيم ما عطاهم كلمة لانه بيشوف شو الترتيب علشان شغله .. هو يداوم في شركة خاصة له وما يعرف اذا كان بيروح والا لا ؟؟؟ على حسب طبيعة شغله ...
فترة الليل ومن عقب صلاة العشا كانت سلامة وميثا يالسات في الحوش و يسولفن وسلامة كانت بين الفترة والثانية تروح صوب الباب على وعسى تشوف فيصل ولد جيرانهم بس ما شافته .....
ميثا : تعالي عن حد يشوفج وانتي تراكضين عند الباب ؟؟؟
سلامة : غريبة اليوم ما شفته طول ... حتى الظهر ما رجع من الدوام ليش رب ما شر وين رايح اليوم ؟؟؟
ميثا : سلااامي يمكن راح ليوا لانه عرس ولد عمه يوم الخميس هذا ؟؟؟
سلامة : ويروح من اليوم الثلاثاء ليش شو عنده ؟؟؟
شوي ويحدر مايد عليهن الحوش يشوفهن يالسات ويسولفن يفرح وهو يشوف ميثا كانت تضحك حلوة ضحكتها يتقرب منهن ميثا من شافت مايد اعدلت شيلتها واسكتت ...
مايد : السلام عليكن ....؟؟
سلامة : وعليك السلام ورحمة الله وبركاته ... من وين ظاوي ؟؟؟
مايد : كنت عند ربعي .. ليش ؟؟؟
سلامة : من الصبح ابويه يسال عنك ؟؟؟
مايد وهو يطالعها : ادري رمسته ... ميثاني اشحالج ؟؟؟
ميثا : طاب حالك بخير ربي يعافيك .....
مايد وهو يطالعها : سلامة خلينا اروحنا شويه ...
سلامة وبنقمة : لا والله واذا شافكم حد منوه بياكلها غيري .....
مايد : زين زين عن الحشرة اوقفي شوي بعيد ابغي اقول لميثاني شي ....
تستحي ميثا وتنزل راسها .....
سلامة : مشكلة اللي يستحون بعد ....
مايد : يله روحي ...
سلامة : زين زين لا ادز .......
توقف سلامة شوي بعيد عنهم ومايد من راحت سلامة اتقرب من ميثا وهي من حست بقربه تم قلبها يدق بقوووو .........
مايد : ولهت عليج ....
ميثا وهي منزلة راسها ومستحية : حتى انا ....
مايد : احبج .....
ميثا وهي بتموت من المستحى : ميووود شو هالرمسة ........
مايد : ما فيها شي الكل يعرف اني احبج .. حبيبي انا سويت اللي وعدتج فيه ورحت حق العم صالح ووعدني يحصل لي شغل قريب ... انشالله ....
ميثا : انشالله ...
مايد : ميثووووه انتي بتباتين عدنا اليوم صح ؟؟؟
ميثا : هيه ....
مايد : امممممم شوفي على الساعه 3 بالليل ابغي اشوفج اروحج صوب المطبخ عند قفص العصافير من ورى اوكي ...
ميثا : لييييييييش ؟؟؟؟؟
مايد : في خاطريه كلام وايد ابغي اقولج اياه ؟؟؟ الحين ما اقدر اقول شي لاني مستعيل يا دوب اغير اثيابي واظهر لاني رايح العين .....
ميثا : وش عندك في العين ....؟؟؟
مايد : بروح ازور واحد من الشباب مسوي حادث ومرقد في المستشفى ...
ميثا : حليله تعوق وايد ؟؟؟
مايد : يعني ...
ميثا : الله يعافيه انشالله ....
شوي وواتي سلامة ....
سلامة : ميوووود ..كايد ياي صوبنا ....
مايد : زين زين ... ميثا لا تنسين ... اوكي ...
ميثا : اوكي ...
يروح مايد عنها شوي ويحدر كايد وحرمته وولده كانوا ياين من برع بدر من شاف سلامة وميثا ركض صوبهن ...
كايد : اشوفكن يالسات اشعندكن يالسات في الحر ...؟؟؟
سلامة : ماشي ضقنا من اليلسة داخل ....
كايد : ليش امايه وينها ؟؟؟
ميثا : راحت السوق ويا خالي وحمدوه وياهم ...
مريم : وانتن ليش ما رحتن وياهم ؟؟؟
ميثا : قلنا نيلس انجهز حق الحفلة باجر ما عدنا وقت ...
كايد : عيل منوه وياكن في البيت ...؟؟؟
سلامة : محد الا انا والميث والبشاكير وتوه ميود حدر البيت وراح غر فته ....
كايد : عيل محمد وسيف وينهم ؟؟؟
سلامة : ظاهرين ويا بعض عند ربع محمد ....
شوي ويرن تلفون كايد كتن الدوام متصلين فيه .. يرح عنهم شوي بعيد ...
مريم : ماشالله على حناكن روعة ....
ميثا : عيونج اللي روعة يا ام بدر ...
شوي ويرد كايد صوبهن ...
كايد : مريم انا رايح الدوام ....
مريم : زين ربي يحفظك بترجع الليلة والا ؟؟؟
كايد : والله ما ادري بشوف اذا خلصت برد الظاهر شي مستوي ... انتن روحن داخل الحين ...
مريم : انشالله ...
يروحن داخل الفلة وسلامة ضاربنها احفوز تبا تعرف مايد شو كان يبا بميثا وشو قصده ب لا تنسين ؟؟؟ سألت ميثا بس ميثا قامت تلف وادور على عمرها ولا خذت سلامة منها لا حق ولاباطل ... بعد ساعة رجع الخال ابراهيم وحرمته وحمدة من السوق وعقب ما تعشوا يلسوا يسولفنون في الصالة ومايد عقب العشا خبر ابوه انه بيسافر مصر باجر ويا ربعه في البداية ابوه احتشر بس ام كايد اقنعت بو كايد ووافق انه مايد يسافر ويا ربعه من عقب ما خبره مايد انهم بيتمون اسبوعين بس وبيردون ... ميثا من درت انه مايد بيسافر وانه خالها وافق على سفرته ضربه خووووف على مايد واصراره على السفر و خافت انه هالسفرة تغير مايد .. ومن عقبها مايد ظهر وراح عند ربعه وميثا وسلامة راحن الغرفة وميثا يلست على النت تسولف ويا شاهين اخوها وسلامة كانت واقفة عند البلكونه شوي وتشوف سيارة فيصل توه راد اليبيت ومن شافته اخترشت وتمت تترياه ينزل من السيارة .....
سلامة : ميثوووووه .... تعالي ......
ميثا : بسم الله شو فيج ....؟؟؟؟
سلامة : فيصل توه راد البيت ...
تطالع الساعه : يالله الحين الساعة 12 ونص بالليل من وين ظاوي مسود الويه ؟؟؟
سلامة : ما ادريبه ؟؟ بعده ما حدر من الموتر ....
يحدر فيصل من السيارة وتحدر وياه اخته كان راد من الشارجة رايح ايييب اخته حق عرس ولد عمه يوم الخميس بليوا اخته معرسة في الشارجه ماخذه واحد من الشارجة هو هن من اهلها بس هي كانت تحبه من زمان .. واخرتها تزوجها عقب ما اهلها ردوه 10 مرات لانهم كانوا يبون ايزوجونها ولد عمها بس ولد عمها ما كان يباها .....
سلامة : هذي سهام اخته .. وياه يعني هو كان في الشارجة ....
ميثا : ايوااااااا هذي اللي ماخذه راعي الشارجة ....
سلامة : هيه ....
ميثا : زين ليش ريلها ما ايييبها ؟؟؟
سلامة : ما اعرف بس اللي عرفته من فترة انه ابو فيصل طارد ريل سهام وحالف عليه ما يحدر عندهم البيت ؟ بس سهام يوم تبا اتي بوظبي تتصل باهلها علشان يمرون عليها ومرات فيصل يروح ومرات خالد اخوه يروح لها ....
ميثا : واشله يروغ ريل بنته ؟؟؟
سلامة : تعرفين انتي هو ما كان راضي عليه وسهام خذته غصبا عنهم ومن فترة صارت مشاكل اوصلت للطلاق واجبروا عيسى ريلها يطلقها بس هو يحبها وما رضى يطلقها وخذوها عنه وتمت عندهم في البيت هي كانت تصيح تبا ريلها وابوها ميودنها عنده حالف على عيسى يطلقها وهي كله تصيح ويم ما طاج ريلها اشتكى على عمه علشان يرد حرمته ....
ميثا : انزين ليش ؟؟ حد يسعى لطلاق بنته عافانا الله ....
سلامة : شوفي حبيبتي لانه عيسى الله يسلمج هب من وخاذهم انزين ومن غير جذه هو فقير وعلى قد حاله خطب سهام 10 مرات واهلها ما كانوا راضين عليه ومن عقبها هي اجبرت اخوانها وابوها تآخذه وخذته لانهم خافوا تسوي فضايح وتشرد وياه انزين خلاف هي ما احملت صار لها 4 اسنين من عرست وما يابت اعيال واتبين عقب الفحوصات انه العيب من عيسى وانه هو اللي ما فيه اعيال بس هي ما حبت تودر ريلها لانها تحبه وقالت برايه حتى لو ما احمل طول عمري المهم مستانسة ويا ريلي ابوها جبرها تتطلق بس هي ما رضت وهذي هي كل السالفة ...
ميثا : حليلها كان الله في عونها وهي تبا عيال والا ؟؟؟
سلامة : ما في وحدة ما تبا اعيال بس الله هب رايد لها وهي تموت في ريلها وتموت على اثره وما تبا تخيله علشان جذه بعد تحدت ابوها وامها وارجعت لريلها وقالت لهم محد له خص في حياتي وعيسى من عقب السالفة حلف ما ايي بوظبي لانهم اهانوه وايد والحين سهام بين فترة والثانية اتي حق اهلها ...
ميثا : ايوا حليلها كان الله في عونها المسكينة .....
تسكر ميثا الكمبيوتر وتروح الحمام علشان تغسل ويها واسنانها يستعدون للرقاد هي وسلامة من عقب ما اطمن على فيصل سكرت البلكونة وبندت الليتات وشغلت الابجورة وانسدحت على السرير يت ميثا وهي تغني " ليت للحب قاضي قبل يوم الحساب "
سلامة : حي ذا الصوت .....
ميثا : فديتج سلامي ....
سلامة : ميثوووووه هزرج كيف بتكون حفلة باجر ؟؟؟
ميثا : اكيد بتكون حلوة ... والله ايام الدراسة حلوة مرت بسرعة بنوله على المدرسة وعلى البنات .... والمعلمات ......
سلامة : هيه والله ....
من عقب ما يسولفن ايبندن الابجورة ويتغطن سلامة استسلمت للرقاد وارقدت وميثا ما ياها ارقاد لانه على الساعة 3 بتروح لمايد عند قفص العصافير ورى المطبخ هي وايد خوافة وتخاف تروح روحها اهناك بس كل شي علشان خاطر مايد يهوووون .... اتذكرت كلام مايد لخالها وانه بيسافار اتضايقت وايد " يا ربي ليش تسافر ميود ؟؟؟ "




• يا ترى ميثا بتروح لمايد والا بيغلبها الرقاد ؟؟
ومايد شو السافة الضرورية اللي يبا يقولها لميثا ؟؟؟
• يا ترى هالسفرة بتغير مايد والا لا ؟؟
• وشو بيكون دور عبيد اربيع مايد في القصة ؟؟؟

• الجــــزء الرابع :


الساعة 3 بعد منتصف الليل وميثا ما ياها ارقاد نشت وهي تتسحب من عدال سلامة شافت الساعة تشير لثلاث لبست شيلتها واظهرت كان البيت هادي وايد والليتات مطفايه اظهرت برع وهي طول الطريج خايفة لأنه اهناك صوب قفص العصافير ظلام والليتات خافته تمت تمشي لين ما وصلت وكانت تقرى قرآن وهي تمشي وصلت عند القفص وكان مايد يترياها شافت كندورته كان واقف ويدخن .. أول ما شافها طفى السيجارة واتقرب منها ...
ميثا : الحمدلله انك اهنه .. كنت خايفة اني ما اشوفك ......؟؟؟؟
مايد : صار لي ساعة واقف اترياج ........
ميثا : والله .......
وهو يتقرب منها : والله ....؟؟؟
ميثا : ميود صدق الحين بتسافر باجر ؟؟؟
مايد : هيه .. ليش ؟؟
ميثا : انا خايفة عليك انته اول مرة تسافر ويا ربعك ؟؟
مايد : هههههههه ليش انا ياهل تخافين عليه .. حبيبي كلها اسبوعين وبرد البلاد ....
ميثا : ما بتنساني ؟؟
مايد : وليش أنساج .. انتي روحي وقلبي وكل ما لي في هالدنيا ... حد ينسى روحه ....؟؟؟
ميثا وهي تبتسم ....
مايد : تعرفين ليش قلت لج تعالي اهنه ؟؟
ميثا : ليش ؟؟
مايد : حبيت اقولج اني احبج واني ما اقدر اصبر بدونج ميثاني انا يوم اشوفج احس بقلبي يدق بقو .. واني ابغي اصرخ بصوت عالي واقولج احبج ......
ميثا وهي مستحية : وانا بعد يا مايد .....
مايد : انتي شووووه ؟؟ قولي انج تحبيني ليش مستحية ؟؟؟
ميثا : ميووووووووووود .................
مايد : عيونه ......؟؟؟
ميثا : انته تعرف اني احبك واني ما اتمنى حد في هالدنيا غيرك انته .....
مايد : وسعيد ؟؟؟
ميثا : منوه سعيد ؟؟؟
مايد : سمعت من كايد انه سعيد ولد عمج علي خطبج من ابوج ؟؟
ميثا وهي تنزل راسها وعقب ترفعه : سعيد ولد عمي علي خطبني صح الاسبوح اللي طاف وابويه وشاهين ما وافقوا وخبروه اني محيره لك انته يعني الخطبه ما تنفع ابد وهو اقتنع واستسمح من ابويه .....
مايد : توعديني يا ميثا انج ما تكونين لغيري ..؟؟؟
ميثا : اوعدك ......
ييلسون يسولفون ... تيلس ميثا عدال مايد ... وهم يسولفون يسمعون صوت سيارة توقف عند الباب وبعدها اسمعوا صوت باب الحوش وهو يسكر ...
ميثا : اوووووووويه اكيد هذا كايد الحين بيشوفنا .....؟؟؟
مايد : صخي ... لا تفضحينا .....
ميثا : شو اسوي الحين ؟؟؟


مايد : تعالي ادخلي المطبخ واظهري من الباب اللي ورى ومن عقبها دشي من الباب الثاني للفلة وعلى طول للغرفة محد بيشوفج وانا بشغل كايد يله روحي ...
ميثا وهي ادش المطبخ : انشالله .....

يطلع مايد من صوب قفص العصافير ويمشي في الحوش يشوفه كايد ... ويتقرب منه ...
كايد : شو موعنك للحين شو توك ظاوي البيت ؟؟؟
مايد : لا مساعة وانا في البيت حسيت بنفسي مخنوق قلت اتمشى شويه في الحووووش ....
كايد وهو يطالع مايد : ايوا ... إلا ما قلت لي متى بتسافر باجر ؟؟؟
مايد : بعد الساعه 10 على مطار دبي ...
كايد : ما اوصيك على نفسك لا تغرك الدنيا يا مايد وانته فاهم قصدي عدل ما يحتاي اوضح ....
مايد : انشالله يا بو بدر ...
كايد : يله عيل اترخص بروح ارقد لاني تعبان ولازم اكون في الدوام الصبح ...
مايد : زين عيل تصبح على خير ...
كايد : وانته من اهله لا تسهر وايد وروح ارتاح ...
مادي : انشالله ربي يحفظك ....
يروح كايد صوب الفلة ويروح غرفته .. ميثا من عقب ما حدرت الفلة راحت صوب الغرفة بس ما حصلت سلامة وكان قلبها يدق بقو شوي وتظهر سلامة من الحمام ... وهي دهمانه ....
سلامة : ميثووووه من وين يايه ؟؟
ميثا وهي تشرب ماي : ها .. لا ماشي ....
سلامة : شو فيج بسم الله عليج متراوي لج شي ..؟؟
ميثا وهي تيلس على السرير : لا .....
عقبها تخبر سلامة عن كل اللي صار ...
سلامة : عنالاااااااتج يا السبالة الحمدلله كايد ما شافكم جان سوى لنا سالفة ....
ميثا : هيه والله الحمدلله جان رفق عليه ما احدر بيتكم الا عروس لمايد ....
سلامة : ههههههههههههه هيه والله ... يله عيل حطي راسج وارقدي ورانا مدرسة الصبح ...
ميثا : انشالله يله تصبحين على خير ....
سلامة : وانتي من اهل الخير ....

يرقدن ... واليوم الثاني ينشن البنات ويتلبسن حق الحفلة كانن متعدلات وايد وعلى الساعه 9 راحن المدرسة لانه الحفلة بتبدأ على الساعة 10 ونص كانن وايد رهيبات ميثا لابسه فستان عنابي ومحطيه ميك اب عنابي خفيف وسلامة لابسه فستان ازرق ومحطيه ميك اب ازرق خفيف كانن فاتحات اشعورهن ماشالله عليهن حلوات وايد ... تبدأ الحفلة كانت سلامة هي مقدمة الحفل ... طبعا امهات البنات حاضرات الحفلة وتمن الحريم يتخبرن عن ميثا بنت خلفان يوم احدرت على المسرح وهي تعد قصيدة كاتبتها للبنات والمدرسات وكانت تقول فيها .....
" وا ويلي ويل يا نفسي ... من مفارق شخص تغلينه
ومن مفارق اهلي وربعي ... والتفوق اللي تحاتينه
فالخواطر حزن وهمي ... وبي كلام سمعي تمثينه
هذا كلامج داخلج مخفي ... واليوم ما عاد تخفينه
في داري ربيت من صغري .. ما تعلمت جذب وغيبه
وفي مدرستي اكتسب علمي .. وها اسم اتمنى ما تنسينه
والحين كبرت في سني ... ويا وقت الفراق وسنينه

ما ادري من افارق يا نفسي ... افارق نورة وعاشه وشيخة
والا افارق من علومني الدرسي ... والا ربايع ما ظووا شينة
اقدم رسالة تيول في فكري ... باسم الصداقة والعشرة الثمينة
اذكروا كل لحظة تمر بالعمري .. واحذري يا بنت من درب تسعينه "

عقبها يتمن الحريم والمدرسات يصفقون تصفيق حار لميثا ومن عقب ما قدموا فقرات الحفل كلها تتقدم مدريرة المدرسة علشان توزع شهادات التفوق للبنات المتفوقات والجوائز ومن عقبها يفتحن البوفيه اللي معدينه للحريم ويتقربن الحريم والبنات والمدرسات للبوفيه ومن عقبها يروحن المدرسات والحريم بيوتهن ويتمن البنات في المدرسة يروحن المسرح ويتمن يغنن ويشلن ويقصدن ويتصورن ويا بعض ومن عقبها يتمن يكتبن ذكريات لبعض في دفاترهم ... الجو كان وايد رهيب والكل مستانس سلامة اتصالحت ويا حنان السودانية لانها ما كانت ترمسها ... والحمدلله الفلوب اتصافت ... من عقبها ميثا وسلامة يمر عليهن سليم الدريول ويروحن البيت ... طبعا ميثا اليوم بتروح بيتهم من عقب ما وصلتها سلامة البيت من احدرت شافت ابوها اتقربت منه وسلمت عليه وعقبها راحت غيرت اثيابها ومن عقبها احدرت ويلست عند ابوها في الصالة ..... وراوت ابوها شهادة التقدير اللي عطتها المدرسة اياها والجوائز .... كانت فرحانة وايد ...

بو شاهين : انشالله افرح فيج عروس يا بنتي ....
ميثا وهي مستحية : ابوووووويه ..............
بو شاهين : وليش تستحين هذا هو قدر كل بنت مهما طولت في بيت أبوها لازم اييها يوم وتعرس ....
ميثا : صح يا بويه ....
بو شاهين : الله يسعدج يا بنتي ....
ميثا : ابويه الا هالصيف ما بنسافر ؟؟؟
بو شاهين : لا انا ما بسافر الا خالتج ام خالد بتروح مصر ويا خواتج خاويهم اذا تبين ؟؟؟
ميثا : لا ما ابغي اروح مصر ابغي اروح عند شاهين ....
بو شاهين : فديت شاهين والله ولهت عليه حتى هالصيف ما بيحدر البلاد ...
ميثا : هيه يا بويه تولهنا عليه ...
شوي وتحدر الريم عندهم تحب ابوها على راسه وتيلس تسولف وياهم ...
بو شاهين : الريم امج وينها ما اشوفها ...؟؟؟
الريم : يالسه اطالع تلفزون فوق .....
بو شاهين : ايوا .. عاد امج يوم تندمج بشي محد يروم يرمسها ...
الريم : هذي هي اميه كله جذه بس من تندمج بشي تنسى عمرها ...
ميثا : ابويه تامرني بحايه بروح ادرس ...
بو شاهين : لا فديتج ... روحي الغالية ربي يكتب لج النجاح يا رب ....
ميثا : امين .... انشالله الا ابويه عقب المغرب ودني لبيت خالي علشان اروح ادرس ويا سلامة ...
بو شاهين : انشالله يا الغالية ...
الريم : ليش سلامة ما اتي اهنه تدرس عندج ؟؟؟
ميثا : اهناك احسن لانه اللي ما نفهمه .. حمدة تشرحلنا اياه .....
الريم : هيه ...


تروح ميثا غرفتها وتفتح كتابها وتيلس تدرس شوي وتيلس الكتاب احذالها تنش وتوقف عند البلكونة وتذكر كلام مايد لها يوم كانوا عند قفص العصافير تبتسم وهي تطالع البلكونة " آآآآآآآآآه يا مايد متى بتمر السنين وايلس وياك في بيت واحد روحنا فديت روحك انا " .... تغمض اعيونها وتروح بها الذكريات وهي تشوف امها واقفة تترياها عند الباب ترد من بيت خالها ...
" ميثا : امايه انا ييت من بيت خالي .....
امها : فديتج ميثااااني منوه موصلنج خالج ؟؟
ميثا : لا امايه مايد وحمدة موصليني ....
شوي ويحدرون مايد وحمدة ويسلمون على عمتهم من عقبها يدخلون داخل امها توزع عليهم حلاوة وعصير ومن عقبها مايد يرمس عمته : يله عمتي احنا مروحين ....
ام شاهين : ليش يا الغالي توه الناس ..؟؟
حمدة : لا عمتيه انتي تعرفين ورانا مدرسة لازم نرقد من وقت ....
ام شاهين وهي تحضن حمدة : فديتج يا بنت اخويه انشالله ربي يخليني واشوفج عروس واشوف شاهين داخل عليج معرس الله يخليني لذاك اليوم ...
ميثا وحمدة : الله يعطيج طولة العمر والعافية يا رب ....
مايد : عمتيه وانا ليش ما تبين تشوفيني معرس ؟؟؟
ام شاهين : عاد انته غير يا مايد فديتك انته ريل بنتي ... الله يخليني لين ما اشوفك وهم يدخلونك معرس على ميثا يا رب .....
مايد : فديتج عمتيه ....
ام شاهين : ها ... مايد ما اوصيك على ميثا تراها نظر عيني ومالي حد في الدنيا هذي غيرها ....
مايد : عمتيه .. ميثا بحطها في عيوني ...
ام شاهين : الله يسلم لي عينك يا رب ...
تفتح ميثا اعيونها وهي تدمع اتذكرت امها ,, وايد كانت قريبة من امها ويلست تذكر كل لحظة حلوة عاشتها بقرب امها الله يرحمها لولا المرض الخبيث اللي حل بها جان للحين هي عايشه الله يرحمها كانت طيبة وايد وتحب الخير للناس عمرها ما غثت حد ومن صابها المرض اطلبت من ريلها يتحمل من ميثا وشاهين وانه يوم يشوفهم يشوف روحها فيهم وبعد اطلبت هالشي من اخوها ابراهيم ... بو كايد كان وايد يحب اخته فاطمة لانها اخته الوحيدة ... ووعدها يوم وفاتها انه يحط ميثا وشاهين في عيونه وانه يزوج حمدة لشاهين وميثا لمايد مثثل ما كانت تتمنى دوم .. بو شاهين كان وايد يحب فاطمة حرمته ويعزها ولا يوم كدر خاطرها ولا زعلها حتى انه يوم يا يتزوج من هدى ام خالد شاورها وخذى رضاها .. اتم ميثا يالسه في غرفتها ومن عقبها تيلس تدرس تمر الاوقات وعقب المغرب تروح ميثا بيت خالها من عقب ما وصلها ابوها تروح ميثا

عند سلامة وييلسن يسولفن عقب صلاة العشا ينزلن تحت ويشوفن مايد يالس ويا امه ويسولف عندها ....

ام كايد : حي ذا الشوووووف .....
ميثا : الله يحييييج على فضله امايه ....
مايد : وين حمدة عيل ما اشوفها ؟؟؟
سلامة : في غرفتها ...
شوي ويحدر بوكايد وكايد كانوا يايين من برع ينشون ميثا وسلامة ومايد و يحبون بو كايد على راسه ...
بو كايد : حبكم ربكم .... ها مايد ماشالله متى بتسافر ؟؟
مايد : بعد شوي بيخطفون ربعي عليه ...
بو كايد : زين عاد ما اوصيك على نفسك ...
مايد : لا توصي حريص طال عمرك ...


من عقبها ييلسون يسولفون ويتيمعون كلهم عقبها ايووون ربع مايد ويسلم على اخوانه ويظهر .. ميثا تمت تطالعه وهو يسلم على امه وابوه واخوانه وبدون احساس تمت اعيونها تدمع اول مرة مايد يفارقهم " يالله كيف بتحمل اسبوعين بدون ما اشوفه يالله .. ربي يحفظه ويرده سالم يا رب " ..........
يروحن ميثا وسلامة يوصلنه عند الباب ... وقبل لا يظهر يفتر صوب البنات ويرمسهن ....
مايد : ما اوصيكن على دراستكن ...
ميثا : مايد ما اوصيك على عمرك واتحمل لا يقصون عليك المصاروة ....
مايد : انشالله يا عيوني ...
اتم ميثا تصيح ومايد يطالعها ....
مايد : ميثاني لا تصيحين كلها اسبوعين وبرد ....
سلامة : مشكلة الحب .. يله ميود روح ربعك يتريونك هذي تدلع ...
ميثا وهي تمسح دموعها : يله يا روحي ربي يحفظك ...
مايد : يله فداعة الله ....
ميثا : ربي يحفظك يا رب ...
يظهر مايد من البيت ويركب ويا ربعه ويتحركون .. ميثا من ظهر مايد احضنت سلامة وتمت تصيح ... وسلامة يلست تهديها ...
سلامة : ميثوووووه بلاج كلها كم يوم وبيرد ...
ميثا : ما اتعودت ايي بيتكم وما اشوووف ميوووود ؟؟؟
سلامة " ميثووه هالكثر تحبين ميووود يا حظه ...
ميثا : احبه اكثر عن رووحي ...
سلامة : فديت روحج يالله يا الغالية خلينا نروح داخل ....
كيثا : يله ....
تمر الايام ميثا وسلامة كل يوم يدرسن وبو كايد حط لهم مدرسين علشان يذاكرون لهم وميثا من ذاك اليوم استأذنت ابوها علشان تيلس هالفترة في بيت خالها علشان تدرس ويا سلامة وابوها وافق ... مايد من حدر مصر اتصل بأهله وطمنهم عليه يلسوا في شقتين مفروشات في االقاهرة كانوا 7 شباب " مايد وعبيد وحمد وسلطان و عبدالله واثنين من الشارجة عبدالرحمن وفاضل " من احدروا مصر حياتهم تلخبطت اكثر عن ما كانوا في البلاد طول الليل سهر في المراقص وارقاد طول النهار بس رغم كل هذا كانوا مستانسين ......

عبدالله : ها وين السهرة اليوم ؟؟
عبيد : اليوم بنروح مرقص كليوبترا هذا كله خليجين فيه وعرب من كل الجناسي ...
مايد : فيه بنات وإلا ؟؟؟
عبيد : اكييييد اليلسه بدون بنات ما تسوى اكيد فيه بنات ... واحنا انروم نعيش بدون بنات ما انروم .......
مايد : هههههههههههههههه ...........
بالليل اظهروا الشباب وراحوا المرقص من احدروا المرقص يلسوا على طاولة كبيرة شوي واعزفت الفرقة ويو الرقاصات وتمن يرقصن ... المرقص كان متروس مصريين وعرب وخليجين من كل مكان عبيد راح ويلس ويا شلة بنات ويلس يسولف وياهم من اشكالهم ينعطن خليجيات وعبدالله وعبدالرحمن من شافوا ، عبيد يالس ويا البنات راحوا ويلسوا وياه واتعرفوا عليهن ....


مايد وحمد راحوا يوزعون بيزات على الرقاصات وهن يرقصن وتموا يرقصون احذالهم من عقبها مايد يلس على الطاولة يدخن شوي واتقرب منه واحد مصري ... ويلس يسولف وياه ....
لطفي : شكلك خليجي ... ؟؟؟؟
مايد : هيه نعم انا من الامارات ......
لطفي وهو يطالع مايد : ايوااااااااا .... انته من دبي ؟؟؟
مايد : لا لا انا من بوظبي العاصمة ......
لطفي : ايوا معاك اخوك لطفي ....
مايد : والنعم والله عاشت الاسامي يا لطفي .... انا مايد ....
لطفي : اهلا وسهلا فيك .. ببلدك التانية مصر ... اول مرة تيجي على مصر ....
مايد : هيه نعم اول مرة بس ربعي صار لهم زمان يحدرون مصر ....
لطفي : ايواااااااااااااا ..............

تعرف مايد على لطفي وتم لطفي ملازم مايد مثل الظل ومن عقبها تعرف لطفي على ربع مايد وتم وياهم طول السفرة وكان يلازمهم في طلعاتهم ودخلاتهم عرفهم على ربعه محمود ومصطفى وهذيل طوفوهم على كل القاهرة ومقاهيها ومراقصها اتعرفوا الشباب على بنات وايدات من المراقص وكل واحد حط له اربيعه يروح وايي وياها كانوا عايشين حياتهم بحرية تامة .....

في الامارات :

ذاك اليوم ميثا كانت تعبانة وايد مزكمة وحرارتها مرتفعة وطايجة على فراشها في بيت ابوها وسلامة وحمدة من دروا انه ميثا تعبانة راحوا عندها وتموا يالسين عندها النهار بطوله من الصبح لين الساعة 11 بالليل ....
سلامة : يله ميثووووه عن الدلع ونشي من فراشج ......
ميثا وهي تكح ....: سلااااااامي والله ما ادلع ....
سلامة : فديتج ميثووووه يعله فيني ولا فيييييج ...........
حمدة : اكيد ميثووه ولهانة على ميود علشان جذه امرضت ....
ميثا وهي تبتسم : حمدوووه شو هالرمسة ......
سلامه : هيه بعد شوووه ......
شوي وتحدر الريم عليهن وتيلس تسولف عندهن .....
حمدة : الريم مستعدة حق الامتحانات خلاص قربت ما باقي شي .......؟؟؟؟
الريم : هيه مستعدة ...
سلامة : يله الله يوفقج انشالله شدي حيلج ...
الريم : الله يوفق الجميع يا رب .......

في مصر :

في هاللحظة مايد وعبيد اظهروا ويا لطفي ومصطفى وباقي الشباب تموا في الشقة بحجة انهم تعبانين ....
مايد : وين بنروح الحين ؟؟؟
لطفي : حنروح مكان في عمركم مش حتشوفوا زيه .. حيعقبكم أوي ....
مايد : يله عيل شو تتريون ودنا ؟؟
مصطفى : دحنا رايحين له دلوقتي ....


يوصلون لمكان غريب مايد وعبيد اول مرة يشوفون هالمكان ... هالمكان غريب وريد ما كانوا يشوفون هالاماكن الا في الافلام العربية ... حارة غريبة يحدرون من السيارة وهم يمشون اطوف عليهم بنات يتضاحكن وشباب طايحين على الارض مساطيل ... ايتم عبيد يطالعهم وهو مستغرب .....
لطفي : مالك يا بني امشي ....
عبيد : احنا وين يايين ..؟؟؟؟
لطفي : انته خايف ليه ...؟؟؟
يحدروون شقة .. اول ما دشوا الصالة يشوفون ريال يالس شكله في الاربعينات يالس ويشيش وعداله شباب عن يمينه وعن يساره وينات ... مايد يستغرب من المنظر ... ايروح لطفي صوب هالريال ويهمس في اذنه شوي ويتكل الريال : تفضلوا اهلا وسهلا باهل الامارات ........
عبيد : بالمهلي .....
ييلسون عبيد ومايد عدال بعض ومايد متروع من شكل الريال وعبيد نفس الشي ... يتساسرون مايد وعبيد ....
مايد : عبوود احنا وين عقينا عمارنا ؟؟
عبيد : اسكت اللي يقولولك اياه سوه ما فينا امبونا اغراااااب وفي بلااااااادهم ؟؟؟
الريال : اساميكم إيه ؟؟؟
عبيد : ها .... انا عبيد وهذا مايد .....
الريال : حياكم الله ....
شوي وايي لطفي لهم وبإيده شيشه يحطها قدام عبيد ومايد ويرمسهم ....
لطفي : اتفضلوا خذ نفس يا عبيد وبعدها انته يا مايد خد نفس ....
مايد : انشالله ...........


ايتمون مايد وعبيد يشيشون ومن اول نفس عبيد ومايد حسوا انفسهم في مكان ثاني .. عقب ما خلصوا تشييش يتقرب مصطفى منهم ويسولف وياهم وتموا كل يوم على هالحال وطبعا ربعهم قاموا يروحون وياهم لنفس المكان وطابت لهم النفس وهم يروحون اهناك كل يوم ... مايد نسى اهله وما قام يتصل بهم وهم تموا وايد يحاتونه مرات يتصلون به يرد عليهم ومرات تلفونه مغلق ومرات ما يرد مول ... وميثا من زود خوفها على مايد اتم مرات تصيح وسلامة تهديها ... مايد اتعرف على وحدة عربية وتم ملازمنها وعرفته على واحد مغربي وتم هالمغربي ملازم لمايد مثل الظل ولا هده ومايد قام يروح وياه كل يوم لكل مكان في مصر وفي يوم من الايام الشباب قرروا يظهرون رحلة لمرسى مطروح وفي ليلة من الليالي من عقب ما وصلوا مرسى مطروح قرروا يسون حفلة باربيكيو في البر وطبعا الشباب كلهم كانوا رايحين الحفلة وكان وياهم مصطفى ولطفي ومايد كانت وياه اربيعته العربية والمغربي اللي تعرف عليه عن طريق هالبنت ... كان في الحفلة رقاصات .. بنات وشباب وكلهم مستانسين .. مايد وهذا المغربي كانوا يالسين شوي بعيد عن يوله الشباب ويسولفون ....
حكيم : شو رايك تجرب ؟؟؟
مايد : شووووه ؟؟؟؟
حكيم : سمعت عن البانجو ....؟؟؟
مايد : لا ... شو ها ....؟؟؟
حكيم : شي حلو بيعجبك .....



عبدالله اربيع مايد كان يراقب مايد من بعيد وشاف هالمغربي وهو يظهر ورقة ملفوفة ويعطيها مايد ويعلمه كيف يستخدمها .. مايد في البداية يشم من هالورقة وعبدالله يطالع في المرة الثانية تم يشم وعبدالله يطالع حزتها ما هان عليه اربيعه وركض صوبهم ودز ايد مايد اللي كانت ماسكه الورقة البيضا واطيح الورقة على الارض ....
مايد وهو يطالع عبدالله : شو فيك ؟؟؟ ليش عبدالله تسوي جذه ؟؟؟
عبدالله : ميووووود وصلت فيك المواصيل لهدرجة ... بنات كلنا تعرفنا ورحنا وياهن دواخه ودخنا بس توصل لين المخدرات لا والف لا لا ....
حكيم المغربي : يا عبدالله شو فيك خل الرجال يستانس ......
عبدالله وهو يتجاهل حكيم : امش قدامي اشووف ...
ويسحب مايد من ايده .....
مايد ما كان عارف شو الموضوع بالضبط كان راسه يلف : عبدالله شوه مخدرات ... منوه يستخدم مخدرات ؟؟؟
عبدالله وهو يمشي بعصبية وساحب مايد من ايده : حسبي الله ونعم الوكيل طوف قدامي اشووووف .......
عبيد يشوف عبدالله وهو يسحب مايد ومعصب حس انه فيه شي صاير ... يركض صوبهم يوصلون الفندق يزقر عبيد .. عبدالله .. ويوقفون ....
عبيد : شو فيكم ليش رديتوا الفندق ؟؟؟
عبدالله وهو معصب : عبيد من باجر انرد البلاد خلاااااااااص ......!!!!!
مايد وهو يتكلم : ليش .... لييييييش ... اهنه احسن عن اهناك ....!!!
عبيد وهو يرمس عبدالله : شو فيه ميوووووووود سكرااااااان ؟؟؟
عبدالله : لا ... شفت حكيم المغربي اربيعه عاطنه بانجو وميووود ما كان مستوعب السالفة وخذ منه ....
عبيد : والقووووم مخدرات .... ميوووود ليش تسووي جذه ....؟؟؟
مايد : شو فيكم عااااااااااااادي ... شو صار يعني ......؟؟؟؟
عبدالله : اخبرك عبيد اذا تبون اتمون اهنه تموا انا ومايد من باجر حاجزين ورادين البلاد احنا صار لنا ثلاث اسابيع وصار كل هذا عيل لو تمينا شهر ونص مثل ما اتفقنا شو بيصير بميووووود بعد اكثر عن جذه ....؟؟؟
عبيد : هيه والله ما فينا يوهقنا خلاص بخبر الشباااااب علشاان من باجر نحجز حق الردة البلاد ....
مايد وهو يهد ايد عبدالله : اييييييييييه شو فيكم انا ما فيني شي .. بس راسي يعورني ابغي ارقد ....
عبدالله : زين ... عبيد خلاف بشوفك ... بروح ارقده عن يفضحنا ...
عبيد : اوكي ....


في الامارات :

ميثا وسلامة يالسات في الغرفة يدرسن شوي ميثا تفر الكتاب وتنش من مكانها ........
سلامة : بسم الله شو فيج روعتيني ..؟؟؟
ميثا وهي تحط ايدها على قلبها : ميوووووووووود ؟؟؟؟؟؟
سلامة : بسم الله شو فيج ميوود في مصر ؟؟؟


ميثا وهي تفتح البلكونة : ادري بس حاسة انه فيه شي .. سلااااااااامي ميوود فيه شي ....
سلامة : ما فيه الا العافية ميووود عفريت وما ينخااف عليه ...
ميثا وهي تتقرب منها : انا خايفة على ميووود قال اسبوعين وبيرد الحين صار له 3 اسابيع لا حس ولا خبر ......؟؟؟؟

سلامة : ميوووود هب ياهل بيرد ....
ميثا وهي تيلس على طرف السرير : الله يرده بالسلااامة يا رب ...
سلامة : تعالي ادرسي وخلي عنج هالسوالف ,...
ميثا : اوكي ...
ييلسن يسولفن شوي واتي حمدة عندهم وتزقر ميثا ...
حمدة : ميثااااااااني تعالي تلفون ؟؟؟
ميثا : منوووووووووه ؟؟؟
حمدة : شاهين متصل من بريطانيا ... يله اركضي ...
ميثا : فديته .. وين أي تلفووون ...
حمدة : متصل على تلفون امايه يله روحي ...

تركض ميثا صوب خالتها ام كايد وتاخذ التلفون .....
ميثا : شاااهينوووووووه حبيبي وين انته ؟؟؟
شاهين : حي الله هالصوت هلا الغالية اشحالج فديتج ....
ميثا : طاب حالك يا عيوني انا بخير ربي يعافي قلبك ولهانه عليك وايد ....
شاهين : فديتج يا روح شاهين وانا بعد ولهان عليج شو مسويه بدراستج الغالية ...
ميثا وعيونها تدمع : الحمدلله ما بتي هالاجازة ...؟؟؟
شاهين : بحاول حبيبي اذا قدرت بيي ...
ميثا : شاهين حاول والله اني محتاجة لك وايد عندي اشيااااء وايدة خاطريه اقولك عنها ....
شاهين : فديت قلبج يا روح شاهين ...

اتم ميثا ترمس شاهين اخوها ومن عقبها تسكر عنه وهي زعلانة كان خاطرها المكالمة اطول لانها وايد ولهانة عليه ... من عقبها تنش وتروح الغرفة عند سلامة وكانت زعلانة لانها سكرت عن شاهين ,,,,

سلامة : اشحال شاهين ؟؟؟
ميثا واعيونها تدمع : بخير بس تمنيت المكالمة اطول ...
سلامة وهي تيلس احذال ميثا وتحد ايدها على ايد ميثا : حبيبي انشالله ربيه بيرده لج بالسلامة ....
ميثا : يا رب ....


• ياترى مايد بيتغير على ميثا عقب ما يرجع من السفر والا لا ؟؟؟
• وشو بيصير لميثا ؟؟؟؟