يا حظ اللي ينام .. وخاطره من ضيقتـه محـروم
ماهوب يشيل فوق همـوم قلبـه .. هـم خلانـه!

ماهو مثلي يرد الحزن عـن جفنـه لذيـذ النـوم
لو يغسل الصبح وجهه .. يبان الحزن فـ/ اجفانه!

ما عدت آشك .. متأكد بإن الحزن اخـوي التـوم
ومتأكد من اني فـي الحقيقـة اصـدق اخوانـه!!

أجي في خاطري شكوى .. وتنهيدة عزاء .. ولوم
اطق ابـواب خلاّنـي .. ولا أحـدٍ هـجّ بيبانـه!

واعوّد في يدي رجفة .. وفي عيني دمع وهمـوم
وفي حلقي مخالب فقد .. وفـ/ الخفّـاق نيبانـه!!

وصوت الأمس في بالي صداه يضج ليـن اليـوم
وانا نجل الحنين اللي حفـظ سـرّه .. ولا خانـه!

ويبعث طاري الرجعه في روحي .. ويحيا .. ويدوم
واودّع شارع الحاضر .. وبيبانـه .. وجدرانـه!

وادوّر شاري لـ/ قلبي .. ولا به عاقـلٍ ويسـوم
ما سامه غير مجنـونٍ سكوتـه يستـر جنانـه!

واقول اطيّره يمكـن يلاقـي راحتـه فـي الحـوم
نسيت اني بحُب الارض قد قصقصـت جنحانـه!!

واخليه بقفص صدري على ترك الذنـوب يصـوم
ويفطـر لا نـوى يفطـر بذكـر الله سبحـانـه!

سلمت يمناك خواطر ع الطرح الذوق

تقبلي مروري

مرورك أسعدني أخي ::: تشكر