السلام عليكم ورحمة الله وبركاته
كيف حالكم؟ عساكم طيبين
راح ادخل في الموضوع مباشرة ما اعرف اكتب مقدمات كاشخه مثل بعض الاعضاء الخطيرين
لو صار ورجعت الايام لورا ورجعت لأيام لثالث ثانوي ايش راح تسوي وهل بتغير من واقعك الحالي
أقصد توجهك الوظيفي ؟؟
وشي أخير
نصيحه لأخوانا اللي للحين في مقاعد الدراسه . وخير الكلام ما قل ودل
واتمنى من الجميع المشاركه .
ولكم مني فائق الاحترام والتقدير :)

الاخت ريم الفلا ان لإختيار العنوان اسلوب ذكي وانتقاء رائع
فلربما أنا دخلت لكي أنضم الى قائمة المميزين لديكم
ومشكوووره على هالموضوع والاحظ كل مواضيعك تسترجع فينا الذاكرة المطوية
والمركونة الى يوم لا نعرف أجله. وخير مايتحدث عنه المرء هو ذكرياته
فأتمنى لك التوفيق ومزيدا من الإبداع

بالنسبة الى أيام ثالث ثانوي، فقد كان حلمي وهاجسي هو الجناح العسكري وبالأخص سلاح الجو السلطاني،لماذا ؟؟حقيقة هاجس كان يراودني في كل حين ، الا ان الاقدار حالت دون ذلك.

حيث أنني لم أيأس من طلب العسكرية فالتحقت بالجيش السلطاني العماني في جانب الضباط المرشحين وقد تعديت كل المعاضل بشتى أنواعها وظروفها الى أن وصلت الى المرحلة النهائية الا وهي المقابلة مع العميد وعدد من الرواد وغيرهم. وتمت المقابله بكل مايشار اليه بالتميز ، ولكن الجانب التربوي كان هو آخر حليف لي.

ولو وددت الرجوع الى الصف الثالث الثانوي كما يسمى سابقا، فأتمنى أن التحق بالسلك التربوي من البداية وذلك لما قد نتج تأثيره في المستوى الثقافي وتنمية الفكر التربوي بصورة ملحوظة واشكر الله على ذلك.

أما عن نصيحتي لأبنائي الطلبة ، هو نجعل لنا هدفا واحدا نسعى اليه وحتى نكون على بصيرة تامة فيما سنفعل، ولا ننطلق بصورة عشوائية لانعرف لها أي مرسى ولا من أين تبدأ وأين ستنتهي.

فالطموح هو الذي يحقق لك أهداف كل ماتسعى اليه من تفكير فاجهد لذلك واسلك طريقك عن يقين.

واتمنى لكم التوفيق جميعا

انا لو كنت بالثانيوية

كان اجتدهدت ودخلت التربية

كانت امنيتي اني اكون مدرس بس ما اجتهدت كثير

وهم الحظ ما كان محالفني . بالنسبة

وحصلي موقف كنت ممكن اختار اي جامعة او كلية للتربية

لاكن هم الحظ وقف ضدي مرة ثانية

تاكدت بعدها انة كل منا مكتوبله رزقه

وانه وظيفة التدريس ما مكتوبة اللي

بسبب موقف عجيب اجاتني الفرصة على طبق من ذهب

كان تخيير بين احدى الكليات بعمان

او الشريعة او البعثات بس ضاعت لسوء الحظ هذيك بروحها قصه

لاكن الحمد لله توفقت في وظيفة ما كنت احلم فيها

ومن افضل الهيئات الحكومية بعد

وكل الفرص مفتوحه فيها للدراسة ولكل شي

الحمد لله يعني ما ندمان ،و بمعنى الاية عسى ان تكرهو شيء وهو خير لكم

يعني زعلت عدة مرات على حظي بس صبرت

وحصلت اللي ما حصلوه ربعي اللي دشو الكليات والجامعات
الحمد لله على كل حال

انا كان اقدر اغير
كنت درست في عمان وبقيت مع صديقاتي واما عن المجموع والمجال فالحمدلله كل شي ماشي حسب ما اتمناه الحمدلله

سبحان الله " أنت تريد وأنا أريد والله يفعل ما يريد "
أخي الفيلسوف
شاكره لك تعقيبك ومشاركتك الطيبة وتستاهل كل الخير
أبو جاسر
وما نيل المطالب بالتمني ولكن تأخذ الدنيا غلابا
سبحانه قدر وما شاء فعل والحمد لله أنك بالنهاية توفقت بس وين النصيحه ؟؟؟
وعسى يارب من خلال هالمنتدى نسمع أخبار حلوه في تخص اكمال تعليمك في مجال تخصصك
توتو
اتمنى لك كل الخير والتوفيق من أعماق قلبي
مشكورين أخواني على مروركم الغالي

اما أنا ما كنت حاطه التدريس في بالي أبدا أبدا
وفي الثانويه حصلت نسبة تأهلني لدخول الجامعه وبالفعل قبلت فيها والقبول في البعثات والشركات الكبيره حتى أني أدرس طب على حساب الوالد بس بصراحه ما حبيت الغربه كنت أيامها دلوعه وما أقدر على فراق أهلي .
بالنهايه أخترت الكليه لأنها الاقرب للبيت وبيني وبينكم أموت في شي أسمه رياضيات وحبيت أكمل في هالتخصص
وما كنت متخيله نفسي أني في يوم من الايام راح أشتغل بالتدريس أو أني راح أحب هالتخصص
وفي الحقيقه لو اتيح لي أني أرجع لأيام زمان ما راح اتردد في اختيار التدريس كوظيفه لأنه ممتع جدا ويتيح لي الفرصه لبناء جيل بالقيم والمبادئ اللي مقتنعه فيها
أما النصيحه هي لكل مجتهد نصيب فمهما كانت النتيجة أبذل جهدك لأن لك رب ما راح ينساك
هذا وعذرا على الاطاله
واتمنى التوفيق للجميع

انا نصيحتي كانت واضحة وهي لا حد يزعل اذا اجتهد وما توفق في الي يبه او الوظيفة بعينها

بمعني الاية وعسى ان تكرهو شيء وهو خير لكم

يعني ممكن اجتهدت لاكن تاكد ان الله ما راح يضيع حقك يمكن يبدلك بوظيفة احسن منها .

قصتي كيف توظفت للعبرة ولطرد وعدم اهمال اي اعلان ولو كان الوظيفة المتوفرة لشخص واحد

ابدا القصة
نزل اعلان بالجريدة للوظائف حكومية وكان بينهن وظيفة كاتب بالعدل ، شفت الاعلان وما اعطيته اهمية لانهم كانو طالبين شخص واحد والوظيفة في مسقط ، وبعد اسبوع كانت رايح زيارة مسقط وكنت جالس مع اخوي بمسقط :
اخوي : كيف سجلت في وظيفة وزارة العدل ؟
انا : ههههههههههه تنكت طالبين واحد ولا في مسقط طبعنا لا
اخوي : عصب قالي ونت شكو قدم وبعدين خير عاد يقبلوك او لا

المهم على اصراره عطيته الاوراق واهو وصلهن ، كان عدد الوظائف بالجهات الحكومية الاخرى طبعا لا يتعدى 80 وظيفة ، لاكن تقريبا ما كانت تتوافق معاي الى هذيك الوظيفة ، المهم اجى وقت الاختبار : تخيلو العدد كنا في مدرسة ثلاث طوابق تخيلو كل صف فيه ما لا يقل عن 25 شخص أي ان اجمالي المتقدمين للوظائف كان 5000 شخص تخيلو ، على 80 وظيفة ، يعني انا انحبطت انا بكون من 80 ؟؟

المهم مرت الاختبارات وتم تصفية 4000 شخص وبقى تقريبا 1000 شخص مرشحين للمقابلات ، ونا كنت من هذول الاشخاص تفجات ، ما كنت متوقع ، وتقدمنا هذول الالف للمقابلات وطبعا انا كنت متهيئ للمقابلة وزارة العدل ومجمع معلوات ومستعد للمقابلة ، قبل عن ادش المقابلة بنصف ساعه تم عزلنا احنا 20 شخص ونا منهم وقالوا لنا انكم بتتقدموا لمقابلة بس لجهات ثانية لخمس جهات وكل جهة تبي واحد (التجارة- الصحة – التراث – الاسكان – وما تحضرني الخامسة ) طبعنا انا انصدمت وانحبطت لاني كنت مستعد لهذيك الوظيفة ومتهيء للمقابلة ، وهذه الجهات الثانية ما عندنا خلفية عنها ، حاولنا نقنع المختصين انهم يرجعونا للمقابلة هذيك وما رضو ا قالو لا . المهم دخلنا المقابلات وكان كل جهة شكلها ما تبي احد كل شخص يحولك على الثاني مع اني كنت اوكي بالمقابلة بس حسيت انهم ما يبون احد .

مرت اسابيع بعد المقابلة ونزلت الاسماء تقريبا 80 اسم الناجحين واسمي، ما موجود بالقائمة ، طبعنا زعلت وتضايقت ، بس كان احد في نفسي يقولي انتظر لا تزعل ،مرت ايام واتصلت بالوزارة قالو لي انت من العشرة الناجحين بس في الاحطياط ، المهم قلت بعد ما كو فايدة هذول يمشوني بالكلام بس .

وبعد اقل عن اسبوع جاني اتصال من جهة حكومية والكذب خيبة اني اول مرة اسمع اسمها ، قالو انت فلان الفلاني قلت ايه قالو تعال انت كنت مجتاز المقابلات بالخدمة واحنا اخترناك بس نبيك تجي نسويلك مقابلة تعريفية اوكي ، وانا ما ني مصدق , قالو لي تعرف وين مكانا قلت ايه اعرف ونا حتى ما سمعت فيها من قبل ، قلت اخاف يقولو هذا ما يعرف شي ، المهم حضرت عندهم وسولي مقابلة تعريفية وقالو لي تقريبا مقبول ، انتظر الى تعلن الاسامي بالجريدة ، وفي ظرف اسبوع نزل الاعلان وكنت من الناجين واللي تم اختيارهم .

شفتم كيف وصلت للوظيفة كانت شبه تعجيزية وما كنت متوقع اني اتوفق فيها ، بس اهم اشي انه الشخص يكون على عزيمة ويسعى للوظيفة ، والله راح يوفقه ، بس اهم حاجة تعلمتها من هذا الموقف انه ما تستهر بالاعلان ولوا كانت وظيفة وحدة ، ليش لا يمكن تكون انت اللي ينجح


وسلامتكم واسف على الاطالة

سبحان الله
تستاهل كل الخير يا ابو جاسر
وعلى نياتكم ترزقون الظاهر انك طيب وربي وفقك

تشكري ريم الفلا

على الرأي

والحمد لله على كل حال وعسى الكل يتوفق

اسميها فعلا معاناه



طبعا كان اريد ارد عالموضوع من امس بس المنتدى كان معلج معاي



طبعا انا امنيتي كانت سلك التربية والتعليم بس التخصص كان غير مو رياضيات وعلوم كنت اتمنى اكون معلمة إنجليزي بس الحظ ما حالفني والقصه طويله بس مثل ما جالت ريم انت تريد وانا اريد والله يفعل ما يريد