"صدمه وصدمه أخرى"
كنت نازله السوق مع اختي واخوي الكبير..وطبعا محتاجين بيزات قبل لا نبدأ تسوق..
وقفنا جنب ماكينه سحب عشان ننتظر دور (شوي زحمه عشان الرواتب طالعه^_^)
الا اشوف حرمه بتوقعها بالاربعينات تقترب منا وشكلها مرتب بعباة راس بس وجهها مكشوف..فمسكت اختي عشان توسع لها طريق ،بس فاجأتني لما شفتها تمد ايدها واستنكرت الحركه لين تأكدت لماسمعتها تقول اعطوني اللي تقدرون عليه ..وقفت ماعرفت شو اسوي اتضايقت كثير ..ليش وليش تمد ايديها وهي بكامل صحتها..بعدها قلت ادخل بشنطتي عشان اعطيها لقيتها راحت بطريقها..
وبنفس المكان بس شوي لقدام..
حصلنا طفل جالس بين المحلات ع طاوله صغيره وبيها قواطي مقطع بيها مانجو وجنبه ملح و فلفل ويقول تفضلوا واشتروا ..
لفتني سنه ولفتتني طريقته بالكلام ...راحت اختي وسألته بكم الواحد جاوبها بنص ريال واشترت واحد و اني رحت واشتريت واحد مع انه ماكان بخاطري..وبعدها طلعت كم ميه بيسه قلت له هذي لك ،وتفاجأت لما رفض ..قال أسف ما أريد أخذها..ومع اصراري انها هديه مني وقلتله عشان انت رجال بطل،أخذها وهو منزل راسه ومستحي..
لنفرض أن الاثنين محتاجين ..كيف وجد كل منهم طريقه لكسب المال..
هي رغم كبر سنها وصحتها تمد يدها للناس وهو رغم سنه الصغير و أغلب اللي بسنه بين دفاترهم بأحسن قاعات منازلهم للدراسه جلس ليبع شي بسيط،
هذا كان قلمي ...