وصلك نعيّد به وبعدك كايد

مهداة إلى سمو الشيخ محمد بن راشد آل مكتوم "شعر: ميم- العين"

سلّم على الغالي سلامٍ وايد
للّي وداده في حشايه زايد

قل له محبّك يا الكريم القايد
يسال عنك المرتحل والعايد

ولى هبّ نسناس النّسيم النّايد
يحمّل النّسمه جداك نشايد

وودٍ مصفّى والقلوب شهايد
وصلك نعيّد به وبعدك كايد

وقلوبنا الاّبك تكون سعايد
ولك التحيّه والوداد الزّايد
من خاطر وايد يحبّك وايد

رد على "ميم- العين"

حيّ القصايد والمحبّ العايد
ما ابغي شهاده عن هواه الزّايد

وصّل سلامه مع صديق رايد
وانا أثنّي ع السّلام الوايد

ومن طول ما أهواه حيلي بايد
وانشدت فيه من البديع نشايد

وثياب شوقي في هواه جدايد
عن درب وصله خبّره مب حايد

لكن هم مشغلنّي كايد
أبات ليلي والعيون سهايد

واكبر تعب انك تكون القايد