يقولون الزمان بخير وأنا أقول به عثرات
مدام بدربي أشواك زرعها بعض عذالي
ألا يالواشي المسكين يامن عشت للزلات
تظن إنك وصلت وحضرتك ماتوصل ضلالي
أنا اللي لانظمت الشعر جيتك بأجمل الأبيات
على دروب الشرف والعز شعري ومعدني غالي
أنا ربي عطاني قوه أقهر بها الشمات
عزيزة نفس وأقوالي أترجمها بأفعالي
تمهل لاتحسب إني من اللي يوطن السيات
أنا بنت ربت في بيت عز وبنت رجالي
ترفق لاتظن إني ضعيفه أنثر العبرات
ولاتفكر في لحظه بهرجك مشغله بالي
لأني بطلب المعبود ربي محيي الأموات
ومدام الله معي حافظ تراني ماني لحالي
أنا ماني ردي نيه مع اللي كثر الغلطات
مع اللي ناوي(ن) حربي وتجريحي وغربالي
أبصبر ياعسى الله يحسن الهقوات والنيات
رضاء الله عني ورحمة إلهي غاية آمالي