لاتعتذر مال الهجر منك تبرير
صدك بليا ذنب والله ظليمه

ماصارلي بعدكـ يفوق اي تصوير
تجددت كل الجروح السليـمــه

بعدكـ لعبي هاجسي والتفاكير
وقلب ً جريح وروح صبا ً مهيمــه

ماغير اسلي خاطري بالمشاوير
اروح وارجع والهواجس مقيمــه

ياحبي اللي بين بيض الغنادير
لكـ في عروش القلب قدر وقيمـه

ان كان صدكـ ماخذكـ عني الغير
روّح ولو ان الخساير وخيمـه

وان كانها عني خذتكـ المقادير
فالعفو عند المقدره فيه شيمـه

يامرحبا والحب كله معاذير
تشفع لكـ ايام الغرام القديمه

يوم الهوى لازارني منكـ أعصير
أضم في صدري من اجلكـ نسيمه

واليوم اصبــّر خاطر الوجد تصبير
واقول صــّدكـ عقب وصلكـ جريمه

ولاجاكـ مني ياهوى البال تقصير
مواقفـي وياكـ والله عظيمـــــه

صخّرت لكـ مشاعر الشوق تصـّخير
وامطرتكـ بحب تقفـــّاه ديمـــــه

وظللتكـ بجفني وصارت مسافير
يوم الغلا بين النديم ونديمـــه

واليوم ماتنفع كثير المحاذيـر
تفاغمت بين النفوس الحشيمه

عسى سنينكـ روض عشب ونواوير
محد لنفســه يرتضي بالهزيمـــــه

اما تخاويني على الشر والخير
والا السلامه منكـ راس الغنيمــه