كتبت الشعر مو لجلك ولكن فاض بي بركان
واما انتي فلا تسوي قصيدة في نظر عيني
حلفتي لي تصونيني اذا صار الزمن خوان
واول ما عثر حظي على دربك خذلتيني
كسر رمح الزمان صدري وجيتك اشتكى حيران
نزعتي الرمح من صدري وفي ظهري طعنتيني
خساااارة كيف حبيتك؟؟!! نعم والله انا ندمان
غبي ادري نعم ادري مادام انك سكنتيني
ثلاث سنين من عمري وأنا في لعبتك غرقان
اشيل الشوك من دربك وجرحي كان يدميني
وكنت ابكى اذا تبكي واكون لبسمتك فرحان
وكنت اقرب من رموشك لعينك يوم تبغيني
عرفتك للاسف صحراء وحولتك الي بستان
وشلتيني غصن اخضر وفي صخرك زرعتيني
حفرتك وداخلى ضني تصوني عشرتي ازمان
وكنت احفر قبر موتي على ساحل شرايني
على كف الشقا نامت جروحي والألم سهران
يحطمني..يبعثرني..وفي صحراك يرميني
ولكن عزتي تفرض اكون بدنيتي سلطان
واذا ظنك اجي اركع لرجلك..ما عرفتيني
انا ما عادتي اشحت من امثالك رضا واحسان
اموت بعزتي ارحم ولا ذلك يغطيني
وما دام الوفا عندك يدور له على عنوان
بدور لي على قلب يصون الحب وسنيني
ولو قلبي رجع حبك بولع فيه بالنيران
وبكسرها انا رجلي اذا صوبك توديني
ولو دار الزمان ضدك وجيتي تطلبي الغفران
وجبتي الشمس في كفك لعندي..ما بتلقيني
تقول الناس في وصفك:جميله مثل عود لبان
وانك اجمل واحلى بشر مخلوق من طيني
وانك غاليه واثمن من الياقوت والمرجان
تقوم اكوان من شانك وتقعد لك بلاديني
حسااافه غرهم شكلك،وياما تخدع الالوان
عموما..قد بقت كلمة اخيره لك وسمعيني
اذا كنتي في نظر غيري ملاك في شكل انسان.....
قسم بالله ماتسوي قصيده في نظر عيني