قبل سنين.... كنت بالعمر عشرين
واليوم طاف العمر ... ..الاربعيني
ماني مصدِّق كنها والله سنتين
الله اكبر كيف تجري السنيني
شاب الشعر لين صرت كهلٍ ومسكين
حكم الزمان تكاثر الشيب فيني
عدَّى زمانٍ كنت في قمة الزين
واليوم تجاعيد الزمن في جبيني
راح العمر مابين باكر وبعدين
لين انتهيت وتَعْبَتْ الساعديني
ماعاد اقوى قطف ورد البساتين
ضعف برجولي صرت شايب وشيني
اوّاهـ صرت اعيش سن المسنين
دربٍ وطيته غصب عن ام عيني
ليت الشباب يعود لو بس يومين
واشكي المشيب واقول له لاتجيني
لو ترجع اسنيني ورا جبت عرسين
عرس لشبابي وعرس للِّي تبيني
وابني من الاحلام مايملي العين
وامدْ للِّي بالمــحبـة تبــينـــــــــي
واكتب اساطير الهوى للمحبين
اكتب بروح ولهفة العــاشــقيني