يوم القوافي تتجه كنها كما سيل يسيل
حلفت ما أعوّد ورى ما دام صرت اقبالها
بنات فكري لا حصل بالسالفه قالٍ وقيل
جَنـي وانا هذبتها ولبستها موالها
محلا شبوب النار والدله على جمر المليل
رسلان صفره مزعفره ..والهيل هو يعبالها
"في يد قرم ٍ لآعتزى راغه عيونك يالذليل
خفيف جانب دلته ما يشبعك فنجالها "
اسري واسرّي هاجسي كني عشيق للرحيل
والليل لامنه سرى الالغاز من حلالها
واسج فكري في البحر ميل ٍ بعد ميل وميل
وامرْ بامواج ٍ تلاطـم ينهبل من جالها