إنت ...انت ياللى هناك واقف رليه و ما بتتكلمش
واخوك اللى جنبك مديك ضهره ولا بيردش
إسمعنى بقى انت و هو , رمضان ده شهر كريم
ولا ينفع فيه ابدا نتخاصم و لا نتشاحن او نتصادم
متنح ليه انت و هو , اصل الخصام ده افظع بلوة
اعمالك فيه مش مرفوعه , واجورك ليك مش مدفوعه
يقول ابو هريرة رضى الله عنه عن رسول الله صلى الله عليه وسلم
"تعرض الأعمال فى كل أثنين و خميس , فيغفر الله لكل إمريئ لا يشرك بالله شيئا , إلا إمرأ كانت بينه وبين أخيه شحناء فيقول : اتركوا هذين حتى يصطلحا " رواه مسلم
لو مستغنى عن حسناتك و مش محتاج تترفع اعمالك , يبقى لأخوك خاصم و اعمل ما بدالك
لكن هقولك كلمة و حطها فى بالك . اذا مت فى يوم وانت على خصامك هتبقى النار هى مقامك
عن ابى هريرة رضى الله عنه عن رسول الله صلى الله عليه وسلم "لا يحل لمسلم أن يهجر أخاه فوق لاث , فمن هجر فوق ثلاث فمات دخل النار "
خليك جدع وتعالى على نفسك , و أرمى السلام على اخوك ولا يهمك
مالك كشرت ليه ؟؟ شايفه فى عينك سؤال و فيه محتار...طيب محتار ليه ؟؟
بيقول خايف أجى أرمى السلام ما يردش و يجرحنى و تكون مقابلته ليا مش ولا بد
ساعتها هيكون عملت اللى عليك و ربك عنه يغنيك
وضميرك يرتاح ولا يأنب فيك
ويشيل هو الوزر وحده ولا يبقى فى وزر عليك
عن ابى هريرة رضى الله عنه ان رسول الله صلى الله عليه وسلم قال :
لا يحل لمؤمن ان يهجر مؤمنا فوق ثلاث فإن مرت به ثلاث فيلقيه و يسلم عليه فإن رد عليه السلام فقد اشتركا فى الأجر و ان لم يرد عليه فقد باء بالإثم وخرج المسلم من الهجرة " رواه ابو داود بإسناد حسن
يلا قوم حط ايدك فى ايد اخوك و إلحق بالقطر قبل ما يفوت و عليه تندم و ما ينفع وقتها ندم و أجره منك يروح ...ولا حتى ترجعه الدموع
وأنت عزيزى القارئ ...مش ناوى تقوم تصالح اخوك او تصل رحمك وتلحق القطر قبل ما يفوت !!!!
السلام عليكم والسموحه منكم يااااقرااااء قبل حلول هذا الشهر