منتديات جعلان - عرض مشاركة واحدة - باب يدش منه الريح شغل المكيف سده واستريح ..



السلام عليكم ...

شلة بنات جاعدين مع بعض يسولفوا يتغشمرون سوالف بنات طبعا لاتتعداها الى غيرها

ذي تتكلم وذي تضحك وذي ترد وذي مرتبشه معلمينها بالبيت ماتنزل الشيله من على راسها

ايدها على راسها تقول نازله عليها مصيبه ولا زي المصريات كانها تقول ياااااااااالهوي اه ياني

هذي تقولها طيب وش فيها لو نزلتي شيلتك ترى محد غريب مشي رجال كلنا خواتك وش بلاك..

ترد عليها مابا مابا انتوا محد يجعد معاكم انا احسن اروح ..

ترد عليها خويتها جعدي انتي vipغير عن البنات

وش فيها لو نزلتي شيلتك

تعصب البنت تقول اخر مره ترى والله بسير البيت احسن عن الجعده معاكن

وحده ساكته تسمع الرمسه تقول لخويتها تو الناس بدري عاد نحن نتجمع في الاسبوع مره

ونشوف بعض وانتي عادك بتروحي وبتخلينا ...

نفس البنت قامت من مكانها وراحت صوب الباب طبعا البنت اللي ساكته وصلت الباب وصكته

وكملن سوالف وجعده وضحوك والبنت صاحبة الشيله جلست وكملت معاهن

يعني السالفه كلها من الباب المفتوح والهوى اللي يدش ...

والمثل يقول باب يطير شيلتك سده واستريح

طبعا كلكم تعرفوا المثل ...

نسمع من البعض اللي تعرضوا للمشاكل والمصايب والخيانه وغيرها قصص يندى لها الجبين

واللي يريد يحافظ على مبادئه وقيمه مثل البنت اللي لابسه الشيله تريد تسمع كلام اهلها

اللي وصوها ماتخلع الشيله وجالسه على رزة الباب المفتوح بدرب الهواء اكيد راح يشيل شيلتها

لانه هواء وهذا طبعه فليش نلومه نلومه على طبعه طيب هو وش ذنبه اذا هو هواء ؟

واللي يدخل النت وعنده قيم واخلاق ومباديئ تعلمها من بيته ويشتكي من الماسنجر ويشتكي

من اسلوب البعض في المنتديات ويشتكي انه سمع كلمه ماحلوه اذا كان من النوع اللي يدش

الشات او قراء موضوع يخدش الحياء ومن ثم يرجع اللوم على النت والمنتديات وغيره وغيره

هذا هواء اقصد نت يعني لابد انك تاخذه على طبعه متجمع فيه كل شي الزين والشين

عاد انت وطبعك تريد الزين موجود واذا تريد الشين موجود فلاتشتكي من النت وبلاويه

لكن لوم نفسك انك فاتح باب لنفسك انت في غنى عنه فاحفظ نفسك بعدم التعرض

لتيار فاسد ينزع منك اخلاقك وحيائك والمباديئ التي تربيت عليها ...

ترى اذا حد فهم الفكره يشرحها لاني خلصت الموضوع وماطلعت بشي

وسلامتكم