بسم الله الرحمن الرحيم
اتمنى تقروا الموضوع
ذهلتني كثير مكالمة ياتني من أم توقعوا شو تبا
تبا اجابات امتحان الفيزياء عشان تغشش بنتها الاختبار
سألتها بنت نظامي ولا تعليم حر
جالت نظامي واني عاطتنها جوالي عشان اطرشلها اجابات
انصدمت وجلتلها كيف جدرتي تربي بنتج ع هذا الأسلوب فالدراسه وانتي أم
كيف بتصيري قدوة لها وانتي جالسه تشجعيها ع النجاح بطرق ملتويه
اش ضمن لج انها تعيش ع الطرق الملتويه
واعتذرت منها وسكرت جوالي
وبسرعه خبرت رئيسه المركز وطلعنا فوق والله 50 جوال اشكال وانواع
سوينا سوق
واليوم الثاني جوا الأهالي يشتكوا ليش شليتن الجوالات من بناتنا
بذمتكم اذا الأهل كذا
كيف نلوم الأبناء
الله بسلامه العقل والدين