بسم الله الرحمن الرحيم
السلام عليكم ورحمة الله وبركاته
((دلالك))
بختصار القول إنك..ياحبيبي متعبني
وبصراحه حار فكري في تغليك ودلالك
لك طبايع..إيه أحبها بس والله عذبني
مره تجرح..مره تقسى..ومره تحرمني وصالك
المصيبه ودي أزعل..لكن أرضى غصب عني
يوم أشوفك تبتسم لي وتحتضن عيني جمالك
ويش أسوي يومك إنته ياغرامي مجنني
ماخذني من حياتي..مالكني بس لحالك
لاعدمتك ياعذابي وياجنوني اللي سكني
ولاخلت هالعين منك ولايفارقها خيالك
لك عيون ٍ أتعبني..وعذبني..وذوبني
عكرن صفو الليالي..لين تفكيري صفالك
في عيونك مثل طبعك..الدلع فيها فتني
والتدلل ياحياتي بان فعله في فعالك
من دلالك ياحبيبي لو تقول البحر "بني"
قلت إيه بني حبيبي "بس لجل أرضي دلالك"
تدري إنك في غرامي مهما تتدلل بأني
مستحيل أزعل لأني..الدلع أدري مجالك
كلما لاموا جماله..قال شوفوا صغر سني
ويوم لاموني لصبري..قلت دونه القلب هالك
لو يفارقني دلاله..وش بقى ياناس مني
ياحبيبي لايهمك..للدلع كلي حلالك
أستلذ الجرح منك والتجافي التجني
طالما أدري بأني ساكن لوحدي فبالك
كلما زادت طعوني..إمسح جروحي وغني
صوتك الهادي يداوي ..جرح ليته مايطالك
الحزن شوفه بعينك يتعب القلب ويعني
والألم يطوي المشاعر لو يفارقها هلالك
لو دلالك صار جمره.. إعتبرني فيه كني
عود أخضر يحترق به بالمحبه والوفالك
إيه تتدلل..إيه تدلع مايهمك دام إني
لك حبيب ٍ طول عمره مايبدل حد بدالك
هو صحيح إنه دلالك ياحبيبي متعبني
وإن قلبي حار أمره في تغليك ودلالك
بس أنا يابعد كلي ما أغير فيك ظني
لو بتجرح..أو بتقسى..أو بتحرمني وصالك
أحمد العلوي