ماورطنا غيربعض أمثالنا اللي نصدقها وكأن اللي حاطها نيوتن مو واحد فاضي ماعنده شغل غير صرف حكم بالمجان , مثل المثل اللي يقول(إن أسهل طريق إلى قلب الرجل بطنه)هالمثل خلا الحريم عندنا شغالات ماعندهم شغله غير يحشون الأكل في بطون رياييلهم لين ياب لهم الضغط والسكر والكولسترول , هذا إذا كانت تطبخ بروحها وماتعتمد على الشغاله لأنها ماتأكل من أيدها و تجيب الأكل من أقرب مطعم , أسهل وأسرع لأن الأخت ماتعرف تطبخ(فشله)حريم هالأيام نص أكلهم من المطاعم ومافيه هالأيام أنجح من مشروع(توصيل)خدمات المطاعم شغاله وسط (الفرجان)ليل ونهار توصيل أكل , شاللي خلا الرياييل (مبتلشين)بكبر كروشهم غير حريمهم اللي ماعندهم مواهب زوجيه أومعلومات غير ان بطون رياييلهم هي الطريق الوحيد إلى قلوبهم ,والشي الطيب فيهم أول مايدخل ريلها البيت معندها الا (احط لك الأكل)؟ ماتقوول هلا بهالطله , أو هلا بوعيالها أونوّر البيت وإلا فديت (مهند حقي)على قولتهم ماتعرف تغازل زوجها غير بسالفة(أحط لك الأكل)وإذا صارت رومنسيه مره تسأله شناوي أتعشى اليوم؟ هذا كل مايعرفونه بعض(الحريم)عشان يدلعون رياييلهم ومع هذا يستغربون من معدل إرتفاع نسب الطلاق وكثر العوانس , وتلاقيهم يحملون الرياييل المسؤوليه وتلاقيهم بمجالسهم (مثقفات)الريال هو ساس البلاء وأنهن مظلومات وساكتات وهن لو تقارنهن بالزوجات في دوله غير طلعن راسبات ولا لهن دور ثاني ..!!