البارت " 13 "
ريم { محرجه }: هاي غادة انا بقصها قص بضروسي.. هاي ما تخاف ربها..؟..ما تخاف..؟ والله ما بنسى ايام اول ثنوي يوم كنتو ويا بعض كنت اغار منكم.. وف كل المدرسه مكتوب.. (( GH best friend 4 ever )).. والحين انقلبت ضدج بطريقه غير طبيعيه..ما ادري شبلاها هاي..
هند ف الورقه:" ما ادري والله.. المهم خلينا ف سوالف غير هاي السالفة.. ما ابي انكد على عمري.."..
ريم { تهدي عمرها و تخلي عمرها كول }: حاضريين..
واكتفت هند بابتسامه..
عقب خذتهم السوالف وصارت الساعه تسع..
ريم { تطالع الساعه }: اووه تأخرت انا لازم ارد البيت..
هند تكتب ف الورقه :" انزين ماعليه.. اشوفج قريب..^^.."..
ريم : يلا حبيبتي مع السلامه..
عقب وصلت هند ريم عند الباب وودعتها..
ريم { وهي تزاعج من عند السيارة }: اشوفج قريب..
وهند ابتسمت..
عقب دشت هند وحست انها تبي تدووخ.. من كثر ما تفكر..
عقب سارت صوب حجرتها.. وطاحت ع الشبريه ورقدت.. بدون عشا او اي شي..
اما صوب مرام.. كانت توها يايه من عند ربيعتها " عواش ".. وشافت سيارة ريم وهي ظاهره..
عقب دخلت البيت.. وسلمت ع امها ..
مرام: مساء الخير يا احلى ام ف الدنيا..
ام محمد: مساء النور حبيبتي..
مرام { تيلس ع الطاوله }: اخبارج..؟
ام محمد: تمام الحمدلله .. وانتي شحالج الغاليه..؟
مرام: والله ماشي حالي.. اقول امايه..
ام محمد: هلا..
مرام: ريم كانت هني صح..؟
ام محمد { مستغربه }: منو ريم..؟
مرام: هاي ربيعه هند.. بنت خالووه..
ام محمد: اهااا .. لا .. ما شفتها.. واصلا انا اعتقد هند ما ظهرت من حجرتها اليوم..
مرام { شكت ف الموضوع }: اهاا.. يلا عن اذنج الغاليه بسير ابدل عقب برد لج..
ام محمد: ان شالله..
عقب سارت مرام فوق.. لكنها سارت حجرة هند قبل لا تدش حجرتها.. ودقت الباب..
مرام { وهي تفتح الباب شوي شوي }: هند انتي هني..؟
جان تشوفها راقده..وتبتسم.. عقب جان تظهر من حجرة هند.. وسارت صوب حجرتها..
عقب ما بدلت وخلصت لبس.. كانت تبي تظهر .. بس موبايلها رن..
مرام: السلام عليكم..
الشخص: وعليكم السلام والرحمه..
مرام: منووه..؟
الشخص: امممم انتي مرام..؟
مرام: هيه نعم.. منوه ويايه..؟
الشخص: وياج حمد..
مرام { مستغربه }: منو حمد..
حمد: اممم انا حاليا ما اقدر اقولج غير انه اسمي حمد وانا اعرفج.. لانه انا يوم سحبت فلوس من البنك.. جان اشوفج هناك.. واذا كنتي تتذكرين.. عطيتيني البطاقه مالت تلفون البنك..وانا طلعت رقمج.. وبس..
مرام: اهاا.. وبصفتك شو عسب ترمسني..؟؟
حمد: بصفتي معجب..
مرام: لا والله.. آسفه انا ما عندي هالسوالف.. وانا ما ارمس شباب..
حمد: توني جريب شفتج انتي ووحده و ثلاث شباب كنتو ويا بعض..
مرام: ههههههه هاييل اولاد اعمامي و بنت عميييه.. يشتغلون ويايه ف البنك.. وكلنا نفس الاعمار وبينا عشرة..
حمد: يشتغلون ويااج..؟
مرام { حبت اللعبه }: هيه.. عندك مانع..؟
حمد: هيه اكيد..
مرام: عيل خله عندك.. هههه
حمد: خلاص عيل انا باجر بييج الشغل عسب تعرفين منو انا وتتذكرين..
مرام: دام انه ف البنك و عن الشغل.. ما عندي اي موانع.. بس اي ساعه عسب اتذكر..؟
حمد:همممم تقدرين تقولين الساعه عشر.. خلاص عيل.. نلتقى باجر ف البنك..
مرام: اوكيك..
حمد: سلااام..
مرام: بااي..
عقب سارت جدى المطبخ عسب تساعد امها..
ف اليوم الثــــــــــــــــــــاني..
الساعه: 3 ف الليل
جان تنش هند من رقادها..
هند { مخترعه }: بسم الله الرحمن الرحيم..<< طبعا تقولها ف خاطرها..
(( الاخت كانت حالمه غادة تتزوج سهيل وتغايض فيها.. وهو كان بعد يغايض فيها.. وهي محتارة وتحس عمرها مغيوضه ))
هند ف خاطرها: لالا ان شاالله يصير عكس الي حلمته.. وفجأه جان تتذكر..
" تدرين يا ط..و...ط انا احب سهيل..
والله.. مبروك عليج..
شو مبروك..؟ عرست وانا مدري..؟
هههههه لا انشاالله قرييييييييب وانا عندي احساس انه يحبج يا هند..
واللــه.. تهقين جذي..؟
انا هالي اشوفه.. اقوولج.. انا اول وحدة تعزميني اوكيك..؟
افا عليج حبيبتي..انتي بنت عمي احمد العوده وطبعا مستحيل اعز الربع ما يعزمون بعض وخـــــــــاصه ع عرس وحدة فيهم..
هههه فديتج والله.... هند..
هلا غادة..
اوعديني انه احنا ما بنفترق..؟
اكيييد حبيبتي.. الربع عمرهم ما ينسون ربعهم.. "
ونزلت دمعه من عيون هند.. و فعلا كانت من احلى ايامها ايام رباعتها ويا غـــــ اعز ربيعاتها ــــــــادة..
هند ف خاطرها: آآآآه انتي قبل كيف والحين كييف..ما علينا.. الي صار صار وانا لازم ما ارد للماضي و اعيش حياتي..هممم فيني رقاااد احسن لي ارقد واكمل نومه.. قبل لا تيني امايه و توعيني ع صلاة الفير..
عقب رقدت.. و عقب ما اذن الفير .. يت ام محمد عسب توعيي عيالها..
ام محمد: هند.. هند.. يلا حبيبتي نشي.. قبل لا تفوتج صلاة الفير..
هند فتحت عيونها عسب تعرف ام محمد انها واعيه..
ام محمد: يلا حبيبتي لا تتأخرين سيري تمسحي عقب صلي انزين..؟
وهند هزت راسها وهي مبتسمه.. وردت لها الابتسامه ام محمد عقب ظهرت..
وهند عطووول سارت تتمسح وصلت وطاحت ع شبريتها.. تحس عمرها ما رقدت عدل.. ونووومه..
اما جدى مرام.. سارت تصلي.. عقب سارت تتسبح وتتلبس حق الشغل.. وبعدين ظهرت من الحجرة وسارت صوب المطبخ وتلاقت هي و محمد ف المطبخ..
مرام: السلام عليكم.. صباح الخيير..
محمد + ام محمد: صباح النوور..
مرام { تحب راس امها }: واخبارها ام محمد..؟
ام محمد: تمام الحمد لله ومن صوبج..؟
مرام: بخير..
محمد { يحب راس امه }: اخبارج الغاليه..؟
ام محمد: الحمد لله.. ومن جداك..؟
محمد: ما نشكي باس..
ام محمد: ع فكره.. انتو تأخرتو..
مرام تطالع الساعه.. وتتذكر انه الساعه عشر بيها المعجب.. وتبتسم..
محمد { بكل فضول }: شو سر هالابتسامه..؟
مرام: انته شو يخصك..؟ افففف فضوولي.. مووت من القهر..يلا امايه عن اذنج.. احنا صدق تأخرنا..
محمد: يلا امايه ادعي لنا..
ام محمد: الله يوفقكم .. فداعه الله..
عقب سارو جدى سياره محمد.. (( داخل السيارة ))..
رن موبايل محمد.. وكان مكتوب ( رفيج الدرب )..
محمد: السلام عليكم..
سهيل: وعليكم السلام والرحمه.. شحالك..؟
محمد: ما نشكي باس.. ومن صوبك..؟
سهيل: تمام الحمدلله.. ها..؟ اليوم اشوفك نشيط..ولا انته بعدك فوق الشبريه..؟
محمد: هههه لا حبيبي تتحراني سهيل..؟
سهيل: هاهاها سخييييف.. يلا انا بسير اتلبس..
محمد: بسرعه بسرعه عن تتأخر على الحبيبه..
سهيل: باااااااااي..
محمد: سلام..
اول ما بند محمد.. مرام كانت متحرقه ..
مرام ف خاطرها:" امممم منو ها الي كان يرمس حمود..؟ ومنو هالحبيبه..؟ "..
مرام { بكل لطافه }: اقول حمود..
محمد: اووونه .. الحين تقولين حمود و قبل شوي فضولي..خير وش تبين..؟
مرام { تلعب بطرف شيلتها }: اممم منو ها الي كنت ترمسه.. ومنو الحبيبه ..؟
محمد: بقولج بس ع شرط..
مرام: شوو..؟
محمد: تقولين لي شو سر هاييج الابتسامه..
مرام {{ بعد تفكير }} : انزين..
محمد: امممم انا كنت ارمس سهيل.. والحبيــ { وقبل لا يكمل الرمسه.. }..
مرام: سهيييل..؟ وعنده حبيبه..؟ آآخ طاح من عيني وهند المسكينه اذا درت شو بتسوي ف حالها..؟
محمد { يضربها ف راسها ع الخفيف }: انتي مينونه..؟ حبيبتي.. سهيل ماله غير هند وبس..
مرام: عيل منو الحبيبه..؟
محمد: وحده معجبه فيه..و كل يوم لازقه فيه شرات ( سوبر قلوو )..
مرام: هههههههههه الله يعينه.. انزين هي من الشغل..؟
محمد: هيه هاييك الي تكون عند ( الرسبشن ).. وكل مرة تطلع قدلتها.. و ريحه عطرها تخم البنك..
مرام: اهااااا هاييك حمده..؟
محمد: هيه.. يلا لا تتهربين ع الموضوع.. انا بدور ف الدوار عشر مرات الين ما تقولين لي..
مرام :اسمعني.. ( وخبرته السالفه ).. واليوم شفت الساعه واتذكرت..انه قال بيني الساعه عشر..
محمد { بدون اي عصبيه }: اهاا..
عقب وصلو البنك.. ومرو ع الرسبشن..
محمد + مرام: صباح الخير..
الكل: صباح النور..
وكانت حمدة كل شوي تطالع صوب الباب.. ومرام لاحظت هالشي..
مرام: بلاج حمدة..؟
حمدة { تنتبه انه حركاتها انكشفت }: هاا..؟ لالا ولا شي.. شحالج..؟
مرام: الحمدلله بخير.. وانتي اخبارج..؟
حمدة: ماشي الحال..
مرام: عن اذنج..
حمده: سلام..
عقب سارت مرام صوب مكتبها..
و على حظها.. كان هاليوم عندها شغل اضافي من كثر الناس الي ييون البنك..
عقب دخل عليها شخص..
الشخص: السلام عليكم..
مرام: وعليكم السلام والرحمه.. نعم اخوي.. في شي..؟
الشخص: هيه اختي.. انا موظف جديد وابيج تكملين لي هاي المعامله..
مرام { تأشر ع الطاوله }: حطها هني وانا ان شالله بكملها..
الشخص: مشكورة اختيه..
مرام: العفو..
عقب يت وحده وخذت مكان مرام عسب تاخذ " بريك "..
وطبعا خذت ربيعتها " عواش "ويا رفيجه الدرب" شهد".. وسارو جدى الكافتيريا الي برع البنك..
وكانو هناك قوم سهيل..
وعواش كانت تطالع محمد و ترد تطالع مرام..
ميري: helo girls..!
مرام + عواش: هااي..
ميري: what do wont to eat..?
مرام: hmmm I wont tea whith milk..
عواش: me too..
شهد: me too..
مرام: قلودين..
شهد + عواش: ههههههههه
ميري: ok..5 minet
مرام: انزيين..
اما عند قوم سهيل..
محمد: شفت حبيبه القلب..؟
الحسن: اكيد شافها..ما تشوفه مبوز؟؟..ههههه
محمد: هههههههههه
سهيل: هيه هيه.. انتو تمصخرو.. انزين ما عليه..
الحسن + محمد: ههههههههههه..
وعقب البريك.. كل واحد سار مكتبه.. بس مرام نست موبايلها عند اخوها محمد.. فسارت عنده..
مرام { بدون ماتشوف منو عنده }: اقولك حمود وين الــ { وقبل لا تكمل.. جان تشوف انه في واحد عند محمد }..
محمد: عليكم السلام..
مرام { قلبت ويهها }: السموحه..
محمد: لحظه لحظه.. انتي تبين موبايلج صح..؟
مرام: هيه عطني اياه.. ادري بك.. انته الي شلته من الشنطه مالتي..
محمد: ههههههه { عقب جان ياطلعها بنظرات }.. اقول مرام.. هذا موظف يديد عندنا..
مرام { ما فهمت نظرات اخوها }: اهااا.. اهلا و سهلا..
محمد { يرد يطالعها بنظرات }: واسمه.. حمد..
مرام { منصدمــــه }: هاا..؟. { عقب ارتبكت }..انزين انا بظهر..
محمد: انزين خذي موبايلج..
وشلته بسرعــه وظهرت..
حمد: ههههه بلاها هاي..؟
محمد: هههههه اهي جي دووم..
حمد ف خاطره :" يا ويل حالي.. فديتها "..
اما صوب مرام.. ما تقولون هاي مرام.. كانت ترجف ف عز الحر..ههههه وحليلها..
عواش: بلاج..؟
مرام: ولا شي..
اما شهد تعرف حركات بنت عمها.. وقالت بعدين رح تستفسر..
وبعد ربع ساعه تقريبا.. يا عندها شخص..
الشخص: ييت ع الموعد.. صح..؟
مرام { تطالع الشخص }: ها..؟
وعواش و شهد يطالعون بعض باستغراب..
الشخص: ههههههه الحين الساعه عشر .. صح..؟
مرام { تطالع الساعه }: هههه هيه صح..؟ تفضل اخوي..
الشخص: انا اسمي حمد..
مرام ف خاطرها :" جنه ما شافني قبل نص ساعه.."..
مرام: وانا اسمي مرام..
حمد: تشرفنا.. اممم انا قلت لج اني رح اييج ع اساس شغل.. وانا حبيت افاجئج انه نقلوني من دار الزين لابوظبي..
مرام: تشرفنا.. امممم انته ف اي قسم رح تشتغل..؟
حمد { يطالع المكتب الي مجابل مكتب مرام }: ف هالمكتب..
مرام + عواش + شهد:شوو..
شهد { تقول حق عواش }: هههههههه داشين عرض..
حمد { مستغرب }: بلاج..؟
مرام: ها..؟ لا ولاشي.. مبروك ع الوظيفه ..
حمد: الله يبارك فيج.. { وينش من مكانه }.. عن اذنج بيب الاغراض لين هني..
مرام { بدت تحس بشي صوبه }: اوكي..
واول ما سار.. حست بصداع فضيـــع.. واستأذنت من المدير.. و المدير صدقها لانه واثق فيها.. عقب ظهرت برع البنك..
وشافها حمد .. عقب سار صوبها..
حمد: وين سايرة..؟
مرام: امممم برد البيت.. فيني صدااع وبطني يعورني..
حمد: تبيني اوديج المستشفى..؟
مرام: لالا مشكور..
عقب سارت من عنده.. لكن هو بكل جرأه زخ ايدها ولفها صوبه..
حمد: انزين.. خليني اوديج البيت..
مرام { مستغربه }: امممم لالا ما يصير اسير ويا واحد غريب..
عقب سارت بسرعه.. عسب توقف لها تكسي.. ودخلت التكسي.. وردها البيت..
لكن في سيارة كانت تلاحقها اليين البيت.. وهي سيارة حمد..
واول ما دشت البيت عطووول صوب حجرتها.. وطاحت فوق الشبريه..
و قعدت تفكر ف المواقف الي صارت وياها ف البنك..
مرام ف خاطرها:" معقوله يحبني..؟ لا ما اعتقد.. هه تفاجئت يوم قال انه بيشتغل عندنا ف البنك لا وين..؟ عندي ف القسم..ههههه والله صدف عجيبــه.. يا ترى.. شو تخبي الايام..؟"..
كــــــــــــــــــــــــــــــــــــــــــــــــت ..
توقعاتــــكم..
++ ظنكم مرام صدق رح تحب حمد.. ؟ولا مجرد مشاعر مالها معنى ..؟++
** وهند.. شو رح يصير فيها عقب " الصمت "الي هي فيه..؟ ولا رح يأثر ع شخصيتها..؟ **
## وهند وغادة.. شو قصتهم الثنتين..؟ هل هم صدق كانو اعز الربع من قبل..؟ وليش تخلو عن بعض بكل سهوله ..؟##
كل هالاسئله..لها اجوبه.. ف البارتات اليايه.. ^^
والسـ مـ وح ـ ــه..~
||. ج ـــــــــعلانيه طـــــــــــرررر .||