ياصاحبي والهوى ماعادني كبره
كبرت مدري هو اللي صغر في عيني
ماعاد له فالحشا درب(ن) ولا عبره
ولاعاد له موعد وشباك يغريني
يمديك تعرف مدى ضيقي من النبره
ولاعاد يمديك تضحكني وتبكيني!!
اليوم..ضاق الحليم وفاض به صبره
والدم ضاقت دروبه في شراييني
وان ضاق مثلي تعرفه زين وتخبره
اقل من حل حاسم مايكفيني
رح والفضا ماخلقه الله ثقب ابره
واختار لك درب بعده ماتلاقيني!
المنكسر شي ماتقدر على جبره
مهما تحاول وعذرك مايواسيني
لاعاد تنشد وش الحيله؟ وش الدبره؟
خسرتني والأكيد انك بتبكيني
ابني بجفواك جسر فراق واعبره
ماهمني لو وراي الكون يدعيني
مثلي ليا صد مارده سوى قبره
طبع(ن) لبوي الكريم وطبع جديّني
ماتعتبر بس من فقدي خذ العبره
لا جاك غيري ولا غير موازيني
فرطت فـالصاحب اللي طايل(ن) شبره
ورضيت تسقط بطوعك من جفن عيني!!