دق التلفون الخاص ببوابه بيت راكان وردت دانه بسرعه :- الو
الحارس:-السلام عليكم
دانه :-وعليكم
الحارس :-ياطويلة العمر فيه موظف من شركة الشيخ راكان يبي يكلمك برى ادخله
طاح قلب دانه وقالت بهستيريا :-ايه دخله بسرعه
طلعت غرفتها بسرعه البرق ولبست عبايتها وغطت وجهها ونزلت
امهات راكان :-يمه شفيه خوفتينا
دانه :-فيه موظف يبيني من شركة راكان
امهاته :-خير يمه لاتخترعين يمكن الاتصال خربان عندهم ،ومرسل لك الرجال يطمنك
ماردت دانه وطلعت تنتظر الرجال برى ..
بعد ماسلم قال :-الشيخه العم راكان صدمته سياره وحالته حرجه ويبونكم بالمستشفى
الحارس صغير السن عشان كذا ماعرف يعالج الموقف صح ولاعرف يعلمها بطريقه احسن من دفاشته ذي
دانه (تخدرت كل اطرافها ) :- حادث
الا بطلعة امهاته الي مسكنها قبل لاتطيح ؟؟؟
قالت الخاله مريم :-رح قل لهم يجهزون السياره
وراح الولد يركض..
ام راكان بتموت خوف :-يمه علامه راكان
كانت دانه تبكي من قلب :-صدمته سياره وهو بالعمليات وطالبين وجودنا
امه :-يارب لطفك يارب
ووصلت السياره ...
وعلى طول للمستشفى..
في الطريق كانت دانه منهاره وحالها مايعلم به الا الله ...
،
،
دخلن الطوارئ بسرعه ...
قالت دانه للاستقبال :-حنا اهل راكان ...كيف حاله
الرجال :-راكان بن عبد الرحمن
دانه اعصابها تلفت وترجف والدموع ماليه غطاة وجهها :-ايه
الرجال شاف حالها ورحمها :-استريحي اختي توه بالعمليات
قالت دانه :-علمني وش الي صار
الرجال :-والله ماعندنا خبر الي عرفناه انه مصدوم والطبيب معه الحين وكلي امرك لله
مسكتها الخاله مريم من ورى واخذتها :-تعالي يمه اجلسي ..
مشت دانه بلاشعور وجلست ..
ماتدري كم مر من الوقت
الا وشاب متوسط الطول وملامحه شديده يكلمها
ناظرته :-نعم
قال الشاب :-انتي زوجة راكان
دانه :- ومن تكون انت
الشاب :-انا محمد -------
وقفت دانه وقالت من قلب :-هلا محمد الحمد لله ان ربي جابك انا ماني عارفه اتصرف ولاني قادره اعرف شي عنه
قال بحنان :-اهدي التوتر ماينفع توني واصل من المطار الا ويكلموني يعلموني كيف حاله
بكت دانه :-مدري للان بالعمليات
محمد :-شرايكم اوصلكم للبيت ---------------
عندت دانه :-لا بجلس هنا
محمد قدر شعورها :-براحتك
وكمل :-بروح اشوف الاوضاع وبرجع
جلست دانه ..واعصابها تتوتر اكثر ناظرت ساعتها ..صار لهم ساعه وماجاهم خبر للان
بعدها بربع ساعه جا محمد ووجهه متهلل ..
ماقدرت دانه توقف لان حيلها مهدود ...
محمد :-ابشركم تعدى مرحلة الخطر
راح الضعف بلمح البصر ووقفت دانه :-وش الي فيه
محمد :-الي فهمته من الدكتور ان الصدمه جت على عضو الطحال والحمد لله ان الطحال بالامكان الاستغناء عنه عشان كذا اضطروا يزيلونه لانه متفتت من الصدمه وقدروا يوقفون النزيف
انهارت دانه ومسكها محمد قبل لاتطيح ...خافن امهات راكان الي كانن المسكينات بحال مايعلم بها الا الله ...مسكت الخاله مريم دانه من محمد الي استدعى الممرضات ونقلوها لغرفه خاصه ..
فحصها الطبيب وقال الي عندها انهيار عصبي ...
ولازم ترتاح على الاقل كم ساعه..
لكن دانه ما ان صحت الا وتلقى الخاله مريم جالسه معها (طبعا ام راكان رجعت البيت لانها تعبت من الجلوس طول الوقت) قالت :-يمه راكان------------
ابتسمت الخاله مريم :-راكان ابشرك بخير وصحى قبل ساعه من البنج وسأل عنك
بكت دانه غصب وزاد بكاها بدخلة امها وابوها وقمر
ضمتها امها :-بسم الله عليك ياقلب امك
سلموا على ام راكان (مريم)
قال ابوها :-احمدي ربك يبه عدت على خير
قالت دانه :-حامدته وشاكرته
ضمتها قمر وجلست تبكي معها ...
تازمت قمـــــــــــــــــــر الحياه ليه كذا ليه ماسي ...الماس من صوب ودانه من صوب لمتى بيرتاحن ..متى
الحب الزواج ....كلها دروب تمهد للالم ...
غمضت عيونها وضمت اختها المنهاره لصدرها ...
قالت دانه :-بشوفـــــــــــه
امها :-يمه غرفته كلها رجال يزورونه
دانه :-شعلي فيهم هذا زوجي انا اهم منهم كلهم
شوي الا وجوالها يدق...
"الو"
محمد :-هلا يازوجة الغالي كيف حالك الحين
دانه (ماتدري كيف توفيه حقه) :-بخير ياخوي الحمد لله
محمد :-الحمد لله تامرين بشي قبل لا اسكر
دانه :-ابي ازور راكان تقدر تفضي لي الجو
محمد :-اعتبريه صار برجع ادق عليك
دانه :-ماتقصر
محمد :-سلام
دانه :-مع السلامه
امها :-من هذا
دانه :-هذا يمه صديق راكان الروح بالروح من يوم ماجينا وهو معنا وماقصر عنا بشي حتى منع دخول الصحفيين المستشفى والله اني مادري كيف اشكره
امها :-ماشاء الله عليه ..طيب ليه ما اتصلتي علينا
دانه (تعبانه موت) :-يمه انا ما كانت عندي القدره اني افكر بشي ومحمد داقين عليه الموظفين وعشان كذا جانا المستشفى
امها :-الحمد لله على كل حال كفاره ان شاء الله
دانه :-ان شاء الله
*************
******* الفصـــــ الرابع عشر ـــــــــــل)
(الجزء الاول)
><بيت ابو احمد -غرفة طلال><
قال طلال لناصــــــــــر :- بالله بتسافر رنو بكره ..
ناصر :-ايه كنت عندها العصر وقالت لي ..
طلال :-ودي اشوفها قبل لاتسافر
ناصر :-تبيني اجي اوديك لها
طلال :-ياخي فشله كم الساعه الحين
ناصر (وهو يناظر في ساعته ) :-11ونص حكم
طلال :-اجل بروح اسلم عليها وانا واقف لو حنا مو في عطله مافكرت اروح لهم هالحزه
ناصر :-اجيك
طلال :-لا بخلي السواق يوديني
ناصر :-ياخي خلني اجي اوصلك لايكون امنا تبي تروح كالعاده مكان (قالها بحسره من كثر طلعات امهم)
طلال :-تنتظر الله لايهينها ..
نــــــــاصر :-براحتك .
سكر طلال جواله وراح يتحسس الجدران عشان يطلع ينادي السواق
قابلته امه في الطريق :-وين
ذكر طلال ربه وقال بهدوء :-بغيتي شي
نافخت عليه :-انا امك وتكلمني كذا
الا وبدخلة ابو احمـــــــــــــــــد ، جمدت ام احمد من الخوف اما ابو احمد ضغطه فل ..
مسكها بالعقال ..وهاتك ياضــــــــــــــــــرب
انهبل طلال وهو يسمع صراخ امه .. ومسك ابوه
طلال :-يبه طلبتك تكفى خلاص
ابوه وهو واصل حده :-خلني ابرد حرتي
طلال (يكره المشاكل) :-طلبتك يبه
وقف ابو احمد وقال لها وهو يناظرها بعصبيه :-ان سمعت حسك بالبيت ذبحتك طلعات مافيه طلعات فاهمه ولا لا
ام احمد (ميته خوووووووف ) :------------------
كمل والعقال يلوح به قدامها :-وعيالي ان جاهم منك شي لاتلومين الا نفسك جتى كلام لا تكلمينهم
حس طلال براســــــــــــه يعوره عوار ماله مثيل ..
قال لابوه :-يبه انا طالع تامر شي
طبعا ابوه كان مقدر وضعه واحسن شي انه مو محسسه بنقصان وبشي ..
ابوه :-سلامتك
طلال :-الله يسلمك وطلع بسررررررررعه يبي يرحم نفسه من هالجو الخانق
*
*
><في المستشفى><
دق محمد على دانه ووقف ينتظرها عند باب غرفتها .طلعت دانه والخاله مريم معها
قالت دانه :-عنده احد
ابتسم محمد :-لا
دانه :-الله يعطيك العافيه
محمد (بتواضع) :-ماسويت شي
وصلـــــــــــــــــت دانه باب غرفته وقفت الخاله مريم
قالت لها دانه :-يمه ما انتي بداخله
الخاله مريم :-لا يمه انا شفته روحي انتي انا بنتظرك بالانتظار
دانه :-بس---------------
محمد :-انا بجلس مع الوالده
ماتدري دانه كيف توفيه حقه ..بس حاليا كل همها وتفكيرها في شخص يسوى العالم كله
نايم ورى هالباب الابيض
دخلت غرفة راكان ولقته نايم ووجهه ملتف للجهه الثانيه وشعره طايح على عيونه ...
نزلت غطاء وجهها ...
ســــــــــــــــــــــــــــالت دموعها بلا شعور ..بلا مقاومه ...
ماتدري هل هي دموع ... فرح
هل هي دموع ..خوف من خسرانها له خصوصا بعد ماجربت هالمرار حتى لو كان لكم ساعه
لكنه
الـــــ قاتل ــــــــم
وش الدنيـــــــــــــــــــــــــــــا
وش العالـــــــــــــــــالـــــم
وش الحياه بدونـــــــــــــــــــــــــــــــــــــــــ ــه!! !
حطت طرحتها على كتوفها وقربت منه....جلست على الكرسي الي جنب سريره ...مسكت يده الي فيها ابرة المغذي بيدها البارده من الخوف ..
قالت وهي تحب يده من قلب :-اخ ياحيــــــــــــاتي ماتشوف شر ان شاء الله شد حيلك دندونه مالها حياه بدونك
ورجعت تبكي ودموعها من كثرها غرقت يده ...
بيد ترجف رجعت شعره عن عيونه .....
للان منعدم واقعها ..مو مصدقه انه حي وتعدى مرحلة الخطر ...
ولو نكون دقيقين اكثر ..
هي للان ما استوعبت الي صــــــــــــــــار له ...
"كن صوتها جاي من بعيد ..مايدري راكان يحلم ولايهلوس ولا ميت وفارق اهله وخلانه ، غمض عيونه اكثر وهو مايحس بجسمه ..
التفتت بشويش الا ويشوف ملاكه ماسكه يده ومنزله راسها وتبكي لدرجه حس بدموعها على كف يده ...
بذل كل جهده وقال بهمس :-دندونه
رفعت عيونها بسرعه زاد بكاها لانها موقادره تمنع نفسها ابدآآآآآآآآآآ
قالت وهي ضامه يده بيدينها الثنتين :-ياعيونها وحياتها
بنفس الهمس :-انتي بخير
هزت راسها
ورجع غاب عن الوعي
دخلت الغرفه اخوها خالد الي مسكها مع كتفها وقال :-دانه
رفعت راسها ومن شافت اخوها وهي ترمي نفسها في حضنه وتجلس تبكي
مسح خالد على راسها وقال :-احمدي ربك السالفه عدت على خير
دانه :-الحمد لله والشكر له
خالد (بحنيه) :-يالله مشينا
دانه (تقولون متروعه) :-لا بجلس معه
خالد :-دانه هذا قسم رجال وممنوع تتعدين موعد الزيارات
وبعد اقناع ...وافقت تطلع شرط انها تكون من صباح ربي هنا ..
*
طبعا هنادي من درت ان صديقتها الروح بالروح منومه بالمستشفى الا وتقوم الدنيا وتقعدها تبي تروح لها اخيرا وافق ابوها انها تروح تزورها بما ان اليوم الزيارات مفتوحه في المستشفى مالها مواعيد ..قررت تروح هي وامها اما منال فضلت تزورها من بكره لانها رايحه اليوم تسجل في الجامعه ومنهد حيلها من الدوران ورجلينها تعورها مالها حيل تمتر المستشفى ..اما الماس انخرش قلبها على اختها وقررت تروح معهم
قال سلطان :- منال وينها يمه مو رايحه معنا
امه :-لا ياوليدي رجلينها تعورها من الفرفره اليوم
سلطان :-ابوي بالبيت
امه :-لا معزوم فى عشا في رماح
سلطان :-اوووووووف رماح مره وحده
(منطقه صحراويه حلوه للتخييم بس بعيده عن الرياض)
امه :-تعرف واحد من اصدقاء ابوك مخيم هناك وعازمه
سلطان :-اممممممممممم منال
طلت منال من فوق :-yes brather
سلطان :-هههههههههههه عن الفلسفه وخذي عبايتك بتروحين معنا
تازمت منال :-الله يخليك سليطين رجليني مورمه من الفرفره اليوم ف القوايل
سلطان :-عارف امشي بوديك بيت فهد لانه بطريقنا وحنا راجعين بنمرك
منال :-الله لايعنينا وش هوله
سلطان :-ماراح تجلسين ببيت وش كبره بلحالك
منال :-الشغالات موجودات
لكن من نظره لوجه سلـــــــــطان خافت تزعله لانها تحبه وماتقوى على زعله ولان سلطان ماينحب ان زعل فطارت على غرفتها واخذت عبايتها
كانت هنادي على اعصابها وتتافف ...
نزلت منال قالت هنادي بضيقة اخلاق نادره :-اوووووووف كان نمتي
منال كانت مقدره خوفها على دانه عشان كذا ماردت عليها ..
*
*
*******
بعد ربع ساعه وصلوا المستشفى بعد مانزلوا منال في بيت فهد ..
قال سلطان وهو يكلم امه واخته والماس:-بروح اسال عن غرفة راكان ،غرفة دانه رقم 555
قالت هنادي :-هذيك السادسه
سلطان :-ايه هذيك
مشت هنادي وامها والماس قدامها بخطوه ....
ومن زود الرباشه وبدون ماتنتبه صدمت هنادي في رجال ...
رفعت عيونها الا تشوفه اطول منها واسمر وعيونه نظراتها بحدة السيف ...ولع وجهها والمصيبه ان اسوارة ساعتها نشبت في ازارير ثوبه ..
تورطت هنادي وطاحت بموقف محرج بكل معنى الكلمه ...حاولت تجرها وعيت تطلع
(العن ابو الاحراج ،يدها على صدر الرجال الي للان متحجر ومانطق بحرف تقولون متخدر)
جتها الصيحه بدون شي اعصابها بتنهار ...جرررررررت اسوارتها الي مافيه امل تطلع
تو استووووووووووووعب محمد الي صاير ...
ناظر فعيونها المنحنيه تحاول تحرر يدها من صدره .. ماحطت كحل ولا مسكره بس عيون ماشاء الله تبارك الله رمشها سليل ذباح لاحظ ان عيونها شبيهه بعيون دانه الي لمحها معقوله تكون اختها او تقرب لها
ابتسم وشوي ويجلس يضحك ...قال بهدوء :-اسمحيلي
فكت يدها بسرعه
قام هو وبحركه وحده فك الاسواره الي طاحت على الارض ...
هنادي ماصدقت خبر ، طاحت الاسواره من هنا وانحاشت هي من هنا
اخذ محمد الاسواره بيده ... والتفت لقاها منحاشه ...قلبها في يده وشاف الحرف الي معلق فيها (H) حطها بجيبه مايدري ليه...؟
حتى الرجفه بقلبه مايدري وش سببها !!
قالت امها :-وينك
هنادي (بدري يمه بغيت اروح فيها من الفشيله وانتي مادريتي عني ) :-هنا وين رحت
وصلت هنادي وامها غرفة دانه لقت خالد جالس عندها وهي توقع على اوراق ..
ام سعود :-مساكم الله بالخير
وقف خالد :-هلا بام سعود يامساء الانوار
الماس :-هلا خالد
خالد :-اهلين
طاحت عيونه بهنادي الي من لهفتها على دانه ماغطت عيونها ...ناظرها بخدر .
لكن رد ام سعود رده للواقع :-هلا يمه
اما هنادي ماعندها وقت راحت لدانه وضمتها :-ماتشوفين شر كذا تخوفيني عليك
دانه (للان متاثره من الي صار) :-اخ ياهنوده بغيت اموت
هنادي عصبت :-فالك ماقبلناه
(شافت دانه توقع اوراق الخروج) :-طالعه
دانه :-ايه
الماس وهي تضم اختها :-خليك قويه راح الكثير والاصعب
دانه :-الله لايخليني منكم جميع
قالت ام سعود وهي تسلم عليها :-شده وتزول يمه بس خليك قويه
دانه :-الحمد لله ياخاله كان ممكن تصير الامور اسوء من كذا
وبعد التوقيع ..نزلو كلهم سوى ولاقاهم سلطان بالدرب
قال لدانه :-الحمد لله على السلامه
دانه :-الله يسلمك
سلطان :-مريت على راكان ولقيته نايم
دانه :-هذا من المخدر بس بكره باذن الله بيصحى
سلطان :-مايشوف شر
دانه :-مايجيك
طبعا الخاله مريم مافارقت دانه من يوم ما دروا عن الحادث وكانت تحت بالانتظار مع محمد ينتظرونهم ينزلون
انخرش قلب هنادي ، وانصدم محمد
اجل هالبنت تقرب لدانه ...
طبعا خالد بيوصل ام راكان (مريم) ودانه لبيتهم بما ان دانه رفضت تروح بيت ابوها ..
طلع سلطان وامه واخته قبلهم ...كانت امها تكلمها وما انتبهت
قالت امها :-هنادي
التفتت :-نعم يمه
امها :-اكلمك
هنادي :-سمي يمه
امها :-سم الله عدوك اقول دقي على اختك علميها اننا بالدرب
هنادي :-طيب
كان محمد وراهم ..."اجل اسمها هنادي ..."
ابتسم وراح لسيارته .....
**
*
***
*
**