ياشاطئ الراحـة وياشاطئ الزين القلب بك يلقي غرامـه وراحه
ييتك وقـرت من بعد شوفك العين وانسيت بك هم الزمان وجراحه
فيك النسايم مثـل فـوع البساتين لي بالزهر يانـع وفاحت رياحه
بك تنتعش روح المولع من سنين والقلب في قربك يزيد انشراحه
تلفـي على شاطيـك كل المزايين لي نافـلات بالحسن والمـلاحه
البيض لي شروا الحصابي المثامين الخـرد اللي ينـورن كل ساحه
والزين لي يسكن وسط ناظر العين ياكم زاره فـي مساه وصباحـه
زاره وزاده فـوق زينه بعـد زين حتى غدا للحسن والزيـن واحه