بعض الأعذار أقبح م الذنوب ولا تكون أعذار

وحجه واهية أمست بحبـل البّين مخنـوقه

ويبقـى للعقـول الفاطنـة والمِدركـة معيار

تَعَلّىَ عـن معـايِير ٍ ثمْنها طايـح ٍ سوقـه

ودرب الـود تغليـه النفوس و تدركه الأبصار

معْ اللي يعرفه بالحيل في حسه وفـي ذوقه

هَزيـل الهَرج المنمّق ولـو تكثر عليه أبهـار

فلا يسمن ولا يغني ولا تبهرنـي طروقـه

أنـا لي قلبٍ بدونـك خـويّ العَزم والإصرار

طـريقه للرحابـه سمحْ و حْجاجيه مطلوقه

ما دام إن الغَـلا كلمه جثتْ مـا حصلّت مقدار

عليْ رفقه لا خلّيها على السندان مطـروقه

هديتك جـرْح كلما جيت في بالك نزف مـدرار

طلبت ولك عَلَيْ أعطيك هجرك والرضا فوقه

تفضّل طلبتك خـذْها وأنـا راعي علوم وكـار

تراني من عربْ توفي الطّليب وتدي حقوقـه