السلام عليكم

اليوم حبيت أنزل أول قصه كتبتها بلهجتنا المحليه(يعني اللهجه الجعلانيه وأتمنى تنال إعجابكم)

من بد كل الخلايق حبيته

للكاتبه: همسات الحنين..

{ الجزء الأول}

صوت صايح وركض..حسيت كأنه شي بيطيح فوق راسي.. عجدت حياني(حواجبي) من الازعاج الي اسمعه,اصبحنا واصبح الملك لله هيش اذيه الربشه..؟!
فتحت عيوني شوي شوي ابا اتأكد أنه حلم ولأ لا!!
شفت فراس ود مريم ختي واقف عند الباب ويتبسم كنه مسوي شي.."فجدتك ماتعرف تصبح علي اللوادم بهدوء" : فروس يايي مع من ؟؟
فراس: مع أمي
وبهاللحظه دخلت مرايم: أحلامووه بسك ارقاد..
سحبت لحافي وتغطيت,وقلتلهي
-بعصبيه- من تحته: أقولك أنتو متعرفو تو غير يوب الناس يكونو راجدين؟؟
والحين هيش يايبنكم من غبشه؟؟
مريم بستغراب: غبشـــه؟؟؟؟ الحين ساعه 12 عندك غبشه..
'سحبت عني اللحاف' ثوري ثوري يقولو اليوم بتطلع النسب
طشيت واقفه من الروعه: حلفي..تصدقي أني نسيت
فتحت الدريشه: نزين غسلي ويهك وتعالي قعدي عندني برا
ثرت وأني اتشاحط لأني بارحه مارجدت غير ساعه 2 ..دخلت الحمام مسكت الباب ودكيت عليه: إلا شيخونه هينه؟ مشوفهي هنيه؟؟
مريم: مسكينه داخله عنك أنتي المطبخ
أحلام: خليها تعلم,,مب صغيره مب صغيره "سكرت الباب وبديت أفرش ضروسي"

><><><><><><><><><><><><><><><><><

وبعد ماغربت الشمس وصلينا المغرب طلعت النسب وبدي التوتر وكلن ماسك تيلفونه ويسأل ويستفسر..حسسوني كني فحرب
والي وترني زايد يمعوه خويه الحمار..كل ماطلعت نسبة حد من
البنات يقولي:" خلاص اب يايبه شي نسبه مب لازم نتعب عمارني.. بنشغلك فلي(سفينه) عمي هههه"
اذيك اللحظه بغيت أثور اعطيه سطار..ولا اسوي حساب انه اكبر مني,, فوق الضغط الي أني فيه يايي يتفلسف عليه حضرته..
المهم بعد عنا طويل طلعت نسبتي 93 أمي بكيت ودعتلي من خاطرهي..وأني فرحـــاانــــه متشوفوني كيف متشققه..
بعد شويه:
شفت يمعوه طالع من الحمام متوضي..طلعت له لساني عشان اغيضه: موت غيض.. اللينج مخلتنه لك ولأشكالك يالأسود!!
عطاني نظره طيحت قلبي من الروعه,,بعدين جلس يضحك علي شكلي يوب رتعت وقال: هههه أقول خلي عنك الخروفه الي ماعليها حايه...ومبرووك وع الجامعه ان شاء الله
تصدقو أذيه أول مره يقولي شي يفرح القلب..مصدقت عطيته بوسه في الهوي وقلت له: فديتك بومحمد
يمعه رجع راسه لورا من الضحك: ههههههههه صدقتي عمرك يابقره؟؟ أنتي اقصاك آمطبخ هههه
عاد أني فورت من الغيض... عرفته ميعرف يقول شي حلو مالت عليه من أخو..
جبلت عنه علي أمي وقعدت أخطط هيش بغير فالتسجيل! وهيش بسوي لو قبلوني فالجامعه!!
أذاك اليوم التيلفونات ماوقفت ربايعي وبنات عمامي وبنات خوالي..اخلص من اتصال يي غيره,,, حسيتني كني (رجلة اعمال) علي قول رحامي هههه..
علي الساعه12-11 كيه رجدت, رجدت وأحلام تيبني وأحلام توديني >>> محد قالهم يسموني أحلام خخخخخ

><><><><><><><><><><><><><><><

بعد ماصليت الصبح مرقدت, روحت وسويتلهم ريوق عمرهم مايحلموبه>>> عاد محد يجاربني مخترشه علي الآخر هههه
..نظفت البيت وغسلت الثياب وغسلت المطبخ مابقيت شي مسويته..تقولو كني أخر مره اشتغل فيها<خدامه وتودع خخخ@@

جرايب الساعه 8 ثارو بويه وأمي..

أمي حطت إيدهي علي كتفي: ماشاء الله اليوم ثايره قبل اللوادم كلهم هيش مستوي بالدنيا

أحلام: مياني شي رجاد قلت خليني اقلط عني شغل البيت مادام اني ثايره..

حط بويه ايده فوق راسي ونعفشه عليه الله يهدي وقال: أذيه كله عشان النسبه؟؟ هههه

الله يوفقك أن شاء الله

أحلام رفعت ياديه فوق: أمييين.. اييب لكم الريوق؟؟

بويه: ههه ريوق بعده؟ صدق شي صاير بالدنيا "وهز راسه بمعنى اهاا"



"تريقني فالحوش-على صوت العصافير فوق العود وكان الجو مغيم-..

خبرت ابويه هيش كنت مسجله وهيش بغير! وهو وافق..

بعد ماطلع بويه..أمي روحت بيت عوتي! جلست فوق راس شيخونه بغيتهي تثور عندي بس راسهي يابس قالت: مادامك انتي ثايره أني مب ثايره عناد"



جلست فليوان وحدي اتشوف برامج الصبح,, والملل لاعب فيه لعب..وفجأه رن تيلفون بيتنا..قربت منه ورديت: الووو (كنت متوقعه تكون وحده من ربايع امي بس تفاجأة يوب سمعت صوت ريال,,وبويه بتلشت)

: عفوا من معي؟؟؟

: ههه أحلاموه الهبله معرفتيني؟

"سكتت مب لأني معرفت الصوت..

سكتت لأنه من زمان مسمعت له صوته..

فجأه صدري بدي يرتفع وينزل وقلبي يدق يدق يدق,,"الله من زمان عنه!"

سمعته يصيح لي فصماخي: ايييييه.. هين روحتي؟؟

أحلام: هاه لا م..معك معك

سالم: أقول مبروك علي النسبه تستاهلي والله..

رجعت طبيعيه بس قلبي بعده يدق: بتواااحي

سالم وهو يضحك: ع الأقل قولي الله يبارك فيك

أحلام: الله يبارك فيك..بس يات متخره,,, أحيدني العام الاول بايته لين ساعه 12 عشان اكون اول وحده تبارك لك بالنسبه..

سالم:ههههههههههههههههههههه

ههههههههههههههه تراه الناس مقامات

أحلام بضيقه: مالت عليك..تراك مرابع يمعوه كلكم معندكم ذوق

سالم متهزي: هههه ذوق؟؟؟؟ والله طورنا.. ولأ عشان بدخلي الجامعه صرتي تعرفي الذوق؟

خلاص وصلت عندي الحد.. هو ويمعوه جالسين ويتهزو عليه

القرود..صرخت فسماعه لين فشقت له طبلته- يستاهل-: أني أعرف الذوق قبل مشوف ويهك.. أونك أنته داخل الجامعه وياي تتفلسف...

سالم:هههههههههههههههههههههههههههههههههههههههههههه

محيدك تعصبي بسرعه..هههه

>>> لا ويضحك بعده.. متفيج

والله

هههههههههههههههههههههههههههههههههههههههههههههه

أقولك هاري يمعه خليه يفتح تيلفونه ضروري

قلت له بهدوء وبنص عين: يعني مب متصلت عشان تباركلي؟؟

سالم: لاحووول..أحلام والله عندي شغل!! يختي باركنالك بس طيقي عنا..

"أذيك الساعه بغيت أنفجر بكي معرفه ليش!! بس حسيته

كنه جرحني..

وأني مكبرتله راسه وأحبه بعده.."

مسكت عمري ورديت عليه بهدوء وثقل: مشكور يي منك أكثر.. وأن شاء الله ولد خالي ألحين أكلملك يمعوه!

يله مع السلامه...

وبندت قبل مسمع منه ولأ كلمه,, ورجت يماع وخبرته..وهو بعده مقصر عطاني كم كلمه>>> يوب قلت لكم سوقهم متساوي,,

عطيته طاف وسحبت لي مجله وقعدت اقري لين ثارت أم كشه...

><><><><><><><><><><><><><><><

><><>





مرو شهرين بسرعه عليه.. قبلوني بجامعة السلطان,,فرحت فرحه ماتوصف! كيف مفرح واذيه حلم الطفوله يتحقق جدامي ألحين...

ماعجبت شي مشتريته..خلصت فلوس هلي كلهي,,

فهذاك اليوم شلنا يماع السوق..وروح عنا لفيت بمريم ختي السوق كله>> سوق؟؟ من حلاوته روحه لأ سوق بلاد..

المهم كني طالعين من دكان خالد العلوي وحن نسير لاحظني أنه في واحد يلحقني صار له ساعه..

مريم تساسرني: أقولك مطاع يفكنا..هيش نسويبه؟؟

أحلام: هيش رايك أفصخ نعالي وعسفه بهي؟

مريم: هههه وتهايه بيخليك؟

قلت بضيق: الله ياخذه نكد عليه.. والله معرف هيش يعجبهم فملاحق البنات!!

سحبتني مرايم ودخلتني دكان حريم(يعني ميدخلوه العرب)..

مريم وهي طلع تيلفوني: بسني من دواره بتصل ليمعه يي..

مسكت عني التيلفون وترجيتهي: لا شيمه..بعدي مخلصت

مريم سحبته مني: العروس وهي عروس مسوت سواتك.. أقولك أنتي تبي تضفي السوق كله..

دقت الرقم ولا عاودتني وصلهي صوته: ألووو

مريم: هلا يمعه..حن خلصنا تعال شلنا..

يمعه وكان عنده ازعاج: اتصلن لسعيد.. أني روحت الأشخره..

مريم عصبت: هيش؟؟؟؟ الأشخره؟؟؟؟ وبعدين اني مقلت لك أنه سعيد مسافر.. ألحين من تباه يشلنا؟؟؟؟

يمعه: نزين لتصيحي! فضحتيني..

مريم: والله أنك متفيج.. خلصني بتي ولأ لا؟؟؟

يمعه يتغامز: أتصلي لواحد من عيال عمي خليــــ...

قاطعته مريومه: يوب لأذيه خروفتك ليش مخلصلي رصيدي؟؟ " بندت له فويهه"

<صراحه كان ودي أشوف ويه يمعوه ألحين خخخخ أكيد مفور..

التفتت لي بضيق بعدين جبلت لتيلفوني.. بعد دقتين رد: الووو

مريم: السلام عليكم

:وعليكم السلام.. كيف حالك مريم؟

مريم: الحمد لله.. عسى ماأزعجتك ؟؟

: لا افا عليك.. امري بغيتي شي؟

مريم بخيل: راشد إذا معليك امر نباك تي تشلنا من السوق

راشد بكل روح طيبه: افاا عليك مطلبتي شي..

مريم: مشكور يزاك الله خير حن نحرسك عند دكان خالد

راشد: أوكي أني فطريق..

ربع ساعه وهو عندنا..صراحه رشود على كثر ماهو غامض على كثر ماهو طيب..

ركبت سيارته البرادو السوداء وأني أفكر في شخصيته أحسه أنسان انطوائي مع انه عنده ربع,.يمكن لأنه وايد يهتم بمستقبله معرف صراحه..يعني صار عمره 26 وللحين متزوج>> ياأخي عندك بيت عندك سياره ليش متتزوج وتفرحنا..



صح*أني أول ماشفته تذكرت شي صار قبل ثمان سنين يعني وقتها كان عمري 10سنين وهو18 سنه..شي مستحيل انساه لأني أول مره انتصر فيها على بو راسين يمعوه...

كان الجو شمس وحر..وأني كنت قاعده فظلة بيت يرانا وكنت أبكي بقوه..فجأه طلع راشد من بيتهم ولما شافني يى صوبي ووقف فوق راسي..

راشد: أحلام هيش فيك؟؟ حد ضربك؟؟

رفعت راسي وأني مبرطمه وشعري ترسه تراب: يــ.. يمعوه ضربني,,

ضـــربني عشان عقيت الكوره فوق البيـــت اهئ اهئ..

تشوف عليه مندون ولا كلمه>> أكرهه لما يسكت...

رد بعد دقايق تأمل فحالتي الي يرثى لها: تستاهلي.. محد قالك لعبي مع صبيان

تشوفت عليه بغيض وأني اصك علي ضروسي: أكرهكم..أكرهكم كلكم..

بلم شوية بعدين مد ديه ومسك ذراعي وسحبني ماعه داخل بيتنا.. لقينا يمعوه وحمد ولد عمي قاعدين يصلحو سياكلهم..

فتحني وجرب من يماع دفر له سيكله وقبضه من رقبته وعطاه سطار قوي..

يماع مقدر يرده لأنه كان اكبر منه بسنتين..رص على رقبته وقال: إذا ضربت أحلام مره.. بتشوف شي مشفته فحياتك "وجبل عليه"

وألحين رضيتي الأميره..؟؟

عضيت شفايفي بغرور..و بأنتصار: اهاا

أذاك اليوم كان فيه راشد البطل بعيوني..مع أني مكنت أحب احتك فيه لأني أحسه شريري وشايف نفسه..وهو بعد مكان يحبني كان يشوفني الدلوعه المتصبينه الي كل همي نفسي.."

ثرت من سرحاني علي صوت مريم: أحلاموه رجدتي..اييه حن وصلني

رديت بسرعه قبل مايفكروني رجدت صدق: لا لاثايره بس البس نعالي..

وقبل منزل استوقفني راشد: لحظه أحلام..

فتح الدرج الي جدامه وطلع كرتون مغلف ومده لي مسكته وحركته جدام عينه: هيش أذيه؟؟

راشد وهو يبتسم: هديه..عشان قبلوك فالجامعه ألف مبروك

أحلام: الله يبارك فحياتك..تصدق أنها أول هديه

"رفعت عباتي ونزلت وقبل مااسكر الباب" قلت: مشكور ع الهديه..كلك ذوق سلم علي رحامي وايد وايد

راشد بهدوئه وغموضه المعتاد: يوصل

"سكرت الباب..وسكرت معه يوم من حياتي.."



><><><><><><><><><><><><><><><><

><><><><

><><

{الجزء الثاني,,}



اليوم أحلا يوم بحياتي,,اليوم

تحقق أول حلم من أحلامي..

كان يوم رووعه وصلت بعد عنا طويل لمملكة أحلامي جامعة السلطان قابوس..

سلمت على مرايم وسعيد الي وصلوني والتفتت لفراس الي جالس جنبي: بشتاق لصدعتك ياالحبيب..

فراس: أني بروح عندك!

ضحكت علي شكله: ياالكذااب مذكرك تحبني

سعيد بحنية الاب: أحلام مااوصيك هلله هلله بعمرك.. وخلي عنك الافلام..وجابلي دراستك أحسن لك..

أبتسمت من الخاطر صدق سعيد انسان الكل يحسد مريم

عليه: لاتوصي حريص بو فراس..ومشكور عطلتك عن شغلك.. "التفتت لمرايم ودمعه بطرف عيني>>حشى ماشيه أموت" مع السلامه مريومه أول ماتوصلو دقولي رنه أوكيه؟؟

..نزلت وبخطوات متفائله مشيت صوب سكن البنات..الله حماس..حرس والبنات كلن يسحب شنطته ويبتسم.. مصدق معقوله أني ألحين داخل اسوار الجامعه.. كشخت من الشدق لشدق ودخلت وأني التفتت يمين ويسار:" ياترا فأي مبنى بتكون شقتي ومن سعيدة الحظ الي بتسكن عندي؟؟ هههه"



مرن الثواني وتلتهم الدقايق وبعدها الساعات..تعرفت على ربيعتي فشقه..(ساره) بنت طيوبه من البريمي تخصص

علوم رياضيات..دحاحه مره على قول سعوديين..

فالبدايه تنازعنا على مكان الكرافي بس بعدها تصافيني..

.

.

.

مرو ثلاث أيام حسيت فيهم أني وحيده وفغربه مع أني داخل السلطنه..ثرت الصبح علي صوت المنبه,, صليت وتسبحت ولبست تنوره بيج مع قميص أبيض مشطت شعري.. وجهزت عباتي وشنطتي

"التفتت علي ساره الراجده فسابع نومه,>> الشيطانه بيتتني لين الساعه 2 وألحين راجده.. تعرف عمرها بتثور ساعه 9.. بغيت أحسد عليها واثورهي من ألحين بس رحمتهي "..خذيت عباتي وطلعت

وصلت الكليه*

كنت اسير وحدي..وتشوف على الشباب معقوله أني ألحين مجابله الاه كلهم,,فجأه مر عليه شكل سالم ود خالي ارتعت:" لا.. يارب ماشوفه فالجامعه! فشله اتغشي عنه عند بيتني وهنيه اجابله؟؟ لا لا مايصير"

وفجأه اصطدمت بشي لأني كنت منزله راسي واسير..

رفعت راسي واني متفضحه.. شفت ولد يتبسملي قلت بسرعه:sorry‏ ماشفتك!

بعد عني وقال: أنا الي اسف. أن شاء الله ماصابك شي؟؟

شليت شنطتي الي طاحت مني: لا مشكور مافيني شي.. وروحت عنه بسرعه على اللفت..

بعد ماتسكر اللفت,,مسحت دموعي الي ماجدرت امسكها أول مره فحياتي يصير معي اذيه الموقف..كفخت عمري "فضيحه فضيحه.."

يبست إيدي على خدي يوم أنفتح اللفت وطلعو جدامي ثلاثة شباب (بـــدوااان!).. لاياربي هيش أذيه اليوم النحس؟؟ شافوني اكفخ عمري مثل الهبله,,رفعت ياديه بسرعه وغطيت ويهي وطلعت ولما مريت جمبهم سمعت واحد يقول: الأول الغمال مخبي عني بلاوي..

"انصدمت..

مالت عليك يالحمار.. الود ودي افسخ أذيه البوت والوحه فوق راسك.. ياي يكملهي عليه القرد"

بعد دقيقه دخلت الكلاس وبدت المحاضره...

على الساعه 10و 50 خلصت محاضراتي رديت السكن وأني تعبانه حدي.. تسبحت وانسدحت فوق كرفايتي وبسرعه رجدت...





فتحت عيوني علي صوت مسج فتيلفوني..مديت إيدي وفتحته

"هدهد"

@كذيه يالقاطعه لاتتصلي ولاترسلي..

حرستك البارحه فسكني مييتي ليش؟؟..@

يالله مجدر أفتح عيوني وأذيه ألحين تباني ارد عليها؟.. عقيته فكرفاية ساره ولتفتت الجهة الثانيه..

بصدمه: لا لا مب معقوله..! كل أذيه رجــــــاد؟؟؟؟

سحبت الساعه وغمضت وفتحت.. لاصدق الساعه 5 ونص.,انفتح الباب واشتغل الليت

ساره: بسج نوووم..

أحلام: يالحماره ليش ماثورتيني؟؟

ساره تضحك: ههه شفتج تعبانه قلت أخليج واروح اذاكر فشقة نوره ومريم..

ركضت صوبهي وهي طارت: ماعليك نتلاقي..

'صليت الفروض الي عليه..' وجلست فالكرفايه..خذيت تيلفوني ودقيت على بيتنا..

طوووووووط طووووووووط طووووووووووووووووو

:الووووو

مجدرت أمسك عمري صرت أشهق من البكي..

رد مره: الوووه من معي؟؟

تكلمت من بين دموعي: مشتاقتلك يالأسود!! >> لا لا لا

أني مشتاقه يماع؟ أكيد صاير شي فدنيا

ابتسم: أحلام؟ كيف حالك الجامعيه

مسحت دموعي: تمام أخباركم أنتو؟؟

"تكلمت معه حوالي ربع ساعه.. ماكنت متوقعه أنه بيوم

من الأيام بشتاق يمعوه الي مطلع لي شعر أبيض هه..

المهم كلمت بعده أمي وبويه وأول ماسمعت صوت بويه بكيت ومحد قدر يسكتني وشهقت وشهقت,,طلعت كل الي فقلبي!"

بويه يكلم حد جنبه: أنزين لحظه شوية هي مب طايره..

بعد شوي ياني صوت شيخوه: يالبكايه..لاترسلي ولاتتصلي بونك نسيتينا؟؟

أحلام: أفاا عليك أني انسى عمري ولا أنساكم.. مشتاقتلكم والله مشتاقتلكم..

شيخه: هم ثلاثة أيام وحنيتي عيل بعدين هيش بتسوي؟؟؟

قلتلهي عن الجامعه وعن ربايعي..وعن مواقف صارت لي,,بعدين سكرت من عندهم وأني فرحانه واعد الدقايق متى بيي يوم الربوع ؟؟؟(الأربعاء)..



><><><><><><><><><><><><><><><

><><



مرت الايام وتعودت على الوضع وصرت أقعد أسبوعين بالجامعه ورد الخميس واليمعه.. والقاهم ينتظروني ومشتاقلي وبالاخص فروس يحرس مني هدايا وكاكاو فديته صرت أشتاق لصدعته كل يوم فوق راسي هههه,,



يوم الاحد فليل..طلعنا أني وبنت خالتي هدى -أكبر مني بسنه- صوب المسرح المفتوح; عشان نحضر أمسيه لطلاب الآداب..

أخترني مقاعد بعيده عن الشباب..جلسنا نتابع المسرحيه كانت صدق تضحك, هودوه ماسكتت >> فضحتني الديايه كل شوية تشق الدنيا بتكركيري..

أحلام: والله إذا ماسكتي بخليك وحدك وبروح!

هدى تحط إيدي على ثمي: ها ههه والله ههه ماتكلم بس قعدي..

أحلام: فضحتيني يالمفضوحه. أنتي قبل مالقيتي حد يصلبك بس ألحين أني قاعدتلك

بالمرصاد..

هدى وهي تهز حيانئ: شوفي شوفي مب كنه حبيب القلب جالسه هناك؟؟

تشوفت مكان ماشاورت: والله هو.."التفتت لئ" لاتخليه يشوفني..

هدى تضحك: بعدك تبينا نروح,ولأ بتقعدي تبصبصي فيه؟ هههههه هههه

أحلام بحيان مرفوع: أونه شي يضحك

هدى: لابس توبه توبه..وهاا سكت

سحبتهي من ذراعهي: ثوري من رد السكن..

هدى: بعدي الساعه ل9 واليوم مدد الوقت عشان الامسيه..يله قعدي,,

أحلام: مابا..بتثوري ولا اروح عنك؟؟

مسكت إيدي: ياالله مشكانا لله..كان كل ماشفتي سلوم هربتي

أحلام: تشب

"روحت هي سكنهم وأني روحت سكنا.. فتحت باب الحجره لقيت سويره تذاكر>> قلتلكم البنيه دحاحه

أحلام: السلام عليكم

ساره: وعليكم السلام,أشوفج رديتي بسرعه شو مستوي؟؟؟؟

عقيت شنطتي على الطاوله الي بين كرفايتي وكرفايتي: سلامتك.. بس ابا ارقد من وقت

ساره: يعني طرده

أحلام بستغراب: ألحين انتي من طردك؟؟

ساره لمت كتبهي وطلعت: زين زين ليش معصبه؟؟

خذيت بجامه: اووووف



"لبست بجامتي ونسدحت فكرفايتي وأني أفكر: لو كان شافني بيعرفني ولأ لا؟؟ ثلاث سنين كافيه عشان ينسى شكلي!! يالله كل مأشوفه

أحس الدنيا تدور بي وجسمي كله ينتفض ياربي..,

فجأه رن تيلفوني بمسج فتحته:

'ولد عموه'

"مساء الخير

كيف حالك؟؟؟

أني فمسقط..إذا تبي شي؟"

رفعت حياني: رشود فمسقط هيش يدور؟؟هيش يابني عباله أصلا

رديت عليه,,

'بو فيصل'

"مساء الفل

الحمد لله..! لاسلامتك مابا شي"

'ولد عموه'

"أنزين.. أنتي بأي سكن؟؟"

استغربت اذيه ليش يسأل عن سكني؟؟

'بو فيصل'

"ليش تسأل ؟؟ صاير شي؟؟"

'ولد عموه'

"لا بس يايبلك عشاء!"

أحلام فتحت عيوني بستنكار: الصراحه غريب هالأنسان؟؟؟ يسأل عن أحوالي وهو عمره ماسأل..لا وبعد يايب عشاء!!

لو كان حمد كان صدقت.. لكن راشد لا لا لاأذيه الانسان مستحيل أفهمه..

'بو فيصل'

"مجمع(...) حطه عند الحارس وأني بعدين بنزل له..

ومشكور ماقصرت..طول الله عمرك ولد عمي"

'ولد عموه'

"أوكيه.. العفو"

@@ وصدق ياب عشاء محترم عزمت عليه كل بنات جعلان...

شيخه(ربيعتي) تشرب ماي: بسكن بتسمنن..

نوره: ماتبي برايك..أني أحسني يوعانه مووت..

شيخه لفت عليه بخبث: صح ماقلتيلنا ليش أذيه المخصه؟؟

ضحكت على تفكيرها الخايس

" أنتي لو تعرفي راشد كان ماقلتي أذيه الكلام": ياختي الريال يحبني يموت فيه

أنتي هيش يخصك؟؟؟

كلي وأنتي ساكته

جميله: صوبني صوبني الي يغازلو

أحلام: هههههههههههه..

"تمصخرن عليه شوية..بعدين تشوفني فلم رعب طيح قلوبنا..وكل وحده روحت ترجد وهي ميته من الروعه..كان يوم حلو سطرته في قائمة أيامي الرائعه.."



اليوم الثاني والي بعده والي بعده مرو مثلهم مثل غيرهم..

.

.

.

.

.

.

فتحت عيوني أحسني دايخه أااي ياراسي,,البارحه كان تعب وايد.. صح البارحه قالولي أنه اليوم ملكة فطان بنت خالتي.. ياالله هيش بلبس؟؟

تجلبت ففراشي بعدين ثرت أسحب ريولي سحب..

بعد ماتسبحت وتنشطت قعدنا أني وأم كشه نشوف هيش بنلبس,,

أحلام: أقول عن الملاغه..

شيخه تقيس الفستان علي عمرها: قلتلك ماتبيه بلبسه..!

أحلام: ومن قال أني ماباه..أني بس قلت أفكر البس مخور..

شيخه: أنزين كليتيني..

"دخلت ياديها فشعرها البني القصير" هيش رايك البس الفستان الأحمر ولأ ثوب الحرير ؟؟

أحلام: اوووف معرف!! أني بطقم مع هدى بالفستاني البحري

شيخه: انزين عيل أني بلبس الاحمر

"سمعنا صوت أمي": أحلام.. شيخه

أحلام+شيخه: هااا

أمي: أني بروح بيت خالتكم.. قفلن البيت ولحقني

شيخه: من ألحين؟؟

أمي تصرخ: اهااا..يله بسرعه.. لاتتأخرن

..: أن شاء الله

شلينا كل الي نحتايه,وطلعني برا..هناك لقيني حمد موقف سيارته جدام بيتنا ومدكي عليها ويتكلم بالتيلفون,وأول ماشافنا بنده وجرب منا

حمد: السلام عليكم

ردينا: وعليكم السلام

شيخه تشوفت التيلفونين الي في ياديه: حمد.. أشوف التيلفونات كثرانه عندك,,كم تيلفون مسوي ؟؟

تشوفت عليه لما رد وهو يرفع الي باليمين: أذيه حق العائله "ورفع الي باليسار وهو يغمز" وأذيه للحلوين أمثالك..

أني عصبت عليه: أونك ألحين تغازل؟؟؟؟؟؟

حمد: وأنتي من هاراك؟؟ أني أكلم الورده الي عندك!

خلاص هنيه وصلت حدي..أذيه يغازل ختي وجدامي بعده,, رديت عليه بضيقه: حمود تحيد يوم كنت ثاني عدادي..وقطعت شنطتي هيش سويتبك؟؟؟

حمد حط ديه فوق راسه: عيل ماحيد؟؟ بطيتي راسي وطرتي!

ابتسمت بخبث: أنزييين..إذا ماروحت من جدامي ألحين بذكرك بذاك اليوم وزياده..

حمد: هههههه

ههههههههههههههههههههههههههههههههههه

"فتح سيارته وركب..بعدها قال": متغيري ابدا.. بتظلي طول عمرك ظبعه؟؟؟؟

أحلام: تفوووووه حرمتك الظبعه يالغبي..

طلع راسه من دريشة السياره: افــــــــــااا ترضيها فعمرك

شيخه..؟؟؟؟؟؟

فتحت عيوني حدها: أنته متستحي؟؟ "ومسحت (لحيتي- دقمتي)" صبر خليني أخبر يمعوه بعدين تعال غازل..

سحبت شيخووه الي طول الوقت كانت ساكت معرف عاجبها الوضع ولأ هيش السالفه؟؟

ليش ميعجبها؟؟أكيد بيعجبها واحد بحلاوة حمد ويغازلهي عيني عينك هيش تبا أكثر؟؟

لفيت عليها وعطيتها نظره: وأنتي لاتفكري فيوم أنك تأخذي

حمود تسمعيني؟؟

شيخه رفعت حيانهي: ليش أن شاء الله؟؟

أحلام: شوف أنته!! حبيبتي حمد مغازلجي نمبر ون

'وأشرت لها بيدي'

شيخه: سيري سيري..أصلا من قال أني بفكر فواحد نص بنات المدرسه يكلمنه؟؟

'صدق شيخه بعدها صغيره بس عقلهي عقل وحده عوده..تفكر بمنطق وبعقل ومستحيل تغلط'



><><><><><><><><><><><><><><><

><><><

{الجزء الثالث}



وصلني بيت خالتي..

لقيني البنات متجمعات في حجرة فاطمه..يقيسن فساتينهن.. بعد ماسلمنا وعطيني العروس كم تعليق..ثرني نساعد أمي وخالتي فالترتيب والقهوه وغيره,,

علي ساعه 7و58 البيت امتلي

من الاكبار واليهال الي متعلق

فوق اليدار والي يرقص والي جالس على كنبة العروس>> ووع لو كنت مكان فطان..والله مطلعت

سحبت هدى ورحمه معي وروحني بيت ناصر عشان نأخد راحتنا,

كان بيته في نفس الحوش مالهم,, دخلني الحجره جلست على الكنبه وأني أتأفف: اووووووف,, ملل

هدى: شفتيها اللول طلعت مب سهله تعرف ترقص!

أحلام: أول مره تعرفي ؟؟ أذيه موتهي وحياتهي العراسات هزازه..

رحمه جلست سياري وهي تحط ديها علي جبهتهي: والله أنه أحس راسي بينفجر.. هدهوده عندكم شي حبوب عوق الراس؟؟؟؟

هدى جلست علي تسريحه مجابلتنا: والله معرف! بس بندور فحجرة اليهال لأنه يمكن ناصر حاط شي بحجرتهم بس هنيه ماجدر أفتش!

حطيت إيدي علي رقبتي وقلت: نشف ريجي.. أني بروح المطبخ بحرسكن هناك أنزين؟

رحمه+هدى: أوكيه

رفعت فستاني البحري الطويل الي مخصر على جسمي ومن تحت عند الريولي واسع..وروحت صوب المطبخ.,دخلت وشغلت الليتات فتحت الثلاجه بس مالقيت شي ماي لقيت علبة عصير برتقال-يله يمشي الحال- جلست على طاولة المغسله وشربته وكأنه صارلي سنه ماشربت بسرعه بسرعه...

وفجأه..<< نزلو تحت وبتعرفو

وش صار





><><><><><><><><><><><><><><

><><

وفجأه دخل واحد لابس ثوب بني تفصيله إماراتيه..وماسك فديه قرش ماي ولما شافني فتح ثمه وعيونه من صدمه,,

وأني بسرعه ولاشعوريا طاح القلاص مني..

وقفزت وسحبت فوطه كانت فوق الباب وحطيتهي علي راسي..

تكلم وعيونه بالأرض: السموحه..بس ناصر قالي محد فالبيت وهم مقفلنه بس المطبخ مفتوح ماكنت أعتقد أني بلقى حد هنيه..



أني بعدي مب مستوعبه أني كنت بأذيه الفستان الفاضح جدام سالم..(((((((((سالم))))))))))

الي طول عمري تمنيت يشوف كشختي هذا هو شافها وبدون ماحد يعزمه..!



ياربي ألحين هيش بيقول عني؟؟؟هيش بيكون موقفه معقوله يشوفني رشيقه وغاويه ويتحرك ويخطبني<<< يالهبله هو فلم هندي؟؟..

ياربي هيش اسوي؟؟ خلاص برد عليه

قلت له بهدوء وخدودي تولع ألوان: ماشي بأس..وحتى أني مكنت متوقعه حد من العرب يدخل هنيه,,

ابتسم بعدين قال: رضيتي؟؟؟

أحلام بستغراب: عن هيش؟؟

سالم: ههه ولأ شي,,"وهو يغمز" بس حلويتي يالرشيقه!

فتحت عيوني*ياجليل الادب عيني عينك*: يالخسف.. أنته جالس تتأمل؟عارضة أزياء عندك..؟؟

سالم: ههههههههههه ماطيقي عن لسانك الطويل؟؟

فتحت ثمي علي دخلت يمعوه وسعد ولد خالي,,

يمعه: سلوم هيش تسوي هنيه؟؟

سعد: سنه عشان توصل الماي للثلاجه؟؟

سالم كان يبتسم ويتشوف عليه كنه يقوللي سلمت من لسانك ياأحلام<< حرام عليهم طايحين عليه أم لسان أم لسان,,

دخلت هدى بعدهي رحمه وهن متغشات: السلام عليكم..هيش عندكم؟؟ صاير شي؟؟

سعد يتشوف سالم بحيان مرفوع : العلوم عند بوغنيم..

سالم يرفع ياديه بستسلام: والله مسويت شي!!

"وتشوف عليه بنظرة خبث" بس أحلام قالت من زمان مشافتني..ومشتاقه لسوالفي,,

هنيه مقدرت أمسك عمري وأني أشوف عيون يمعوه كانت بتطلع من مكانها: كــــــــــــــــــــذاب والله العظيم كذااب,,هو كانـــــ...

(طـــــــــــــــاااااخ)







فتحت عيوني وثمي وصطعت لماشفت رحامي طايحه علي الأرض ويمعوه يرفعهي لركبته..أنكشف ويههي بس الحمد لله مد يمعوه ديه بسرعه وغطي ويهي<< الله يعينك يارحام انحطت فموقف لاتحسد عليه..

صرخ سعد عليه: أحلام

أحلام: هاا

سعد: يبي بصل بسرعه

'والتفت علي هدى الي تحاول تنبهي'' وأنتي هاري أمك ولأ أمها بسرعه

مريت جنب سالم عشان دخلت الاستور.. خذيت بصل وقصيته وعطيته سعد الي بدي يشممها البصل من فوق الغشيه...

بعد نص دقيقه تقريبا بدت تفتح عيونهي وتبلع ريجهي..جربت منهي من صوب اليسار

"لأنه سعد كان جالس ع اليمين": رحمه..رحام تسمعيني

رحمه رفعت راسهي عن يماع وتلفتت يمين ويسار ولماستوعبت أنهي كانت بأحضان يمعوه وبين يادي سعد بدي البكي..نطت فحضني

وهي تصيح: أكيد أني أحلم أكيد أني أحلم..أكيد أني أحلم..



كان شكلهي يضحك بس رحمتهي..تصورت أني أفتح عيوني وأشوف عمري بين شابين<< وووي أكيد بموت من الروعه

يمعه: رحمه أنتي بخير.. متأكده ماتبي نروح المستشفي ؟؟

رحمه بعدهي تبكي وتزيد صياح: لا لا لا.. بس طلعو

منيه طلعو

أحلام: أنزين هو ماقاللك شي كليتيه.. يمعه شيمه طلعو ولأ بتموت علينا

وقف سعد ومد ايده ليمعه عشان يوقف: يله شباب خلوني

نرجع الميلس..

طلعو الشباب علي دخلت خالتي عاشه حرمة عمي(يعني أمها) وخالتي موزه أم هدى..وسون لنا تحقيق ليش؟؟ وكيف؟؟ وهيش كان مدخلهم عندكن؟؟ وبعد مانقلني رحمه حجرة ناصر وتأكدنا أنهي رجدت.. تسحبنا للحوش عشان نكمل السهره...





><><><><><><><><><><><><><><><

><><><





طلعو الشباب علي دخلت خالتي نوره حرمة عمي(يعني أمها) وخالتي موزه أم هدى..وسون لنا تحقيق ليش؟؟ وكيف؟؟ وهيش كان مدخلهم عندكن؟؟ وبعد مانقلني رحمه حجرة ناصر وتأكدني أني رجدت.. تسحبني للحوش عشان نكمل السهره...

خذنا أني وهدى زاويه وحدنا وبدت هدى تنقيزاتهي:

شفتيه سلوم كيف يتشوف عليك؟؟؟؟

أحلام بضيق: عادي نظراته عاديه مثل كل مره!

هدى تمسك طرف فستاني: لا لا أذيه المره غير

أحلام: ليش أن شاء الله؟؟ شفتيه يرسلي بوسات وأني معرف؟؟

هدى: ههههههههه لايالهبله هههه بس بارحه لما يي خالي يسلم علي فطان.. سمعته يقال لأمي أنه سالم يبا يخطب

أحلام: حلفي؟

هدى: والله,, وبعده أمي قالت أنه البنيه بعدي تدرس. قال لا حن بس نبا نحيرهي عشان عيال عمئ مايسبقونا..وبعد الاه ثلاث السنين بيصير كل شي رسمي

"كنت أحرسهي تقول أسمي فالسالفه لأن خلاص قلبي صار يدق يدق بسرعه,," كملت: وأني أول ماتكلمو فكرت فيك! فأكيد كانو يقصدوك,, مبروك الحلم...

أحلام: اييه بعده مصار شي وبعدين من قاللك أنهم كانو يقصدوني؟؟؟؟

هدى: بعده يقصدو من غيرك؟ محد فالعايله مناسبه لسلوم وبعدي تدرس غيرك,, أصلا هم قالو...

بعدين ماسمعت شي من الي قالته; لأنه أفكاري روحت بعيييــــــــــــــــد.. معقوله سالم كان يفكر فيه وأني ماأحسبه..؟ معقوله نظراته فالمطبخ كان يقصدبهي شي؟؟ وأني فسرتهي علي كيفي؟

يالله بعد كل أذيه الانتظار بيصير سالم لي,,,

)))أنتبهت علي هدى لما قالت: صح ماخبرتك بارحه هيش صار معي!

أحلام: هيش صار؟؟ أكيد السالفه فيها محمد..

ماشوف غير خدود هدى صارت تولع ألوان أحمر وردي

علي كيفكم: ههههههههه كل أذيه عشان أذاك السبال؟؟

هدى قرصتني: سبال فعينك.. المهم بارحه روحت بيتهم أدور دلال للعرس,, ووقفت عند باب الليوان ولهمت خالتي: خالتي..خالتي شيخه..

والمزيون أول ماسمع صوتي طلع من الحجره بعد ماطلعت أمه من حجرتهي(يعني صار وراها) وطول ماأني أكلم خالتي هو يأشر لي أني أجابل بس طنشته,, المهم دخلت خالتي المطبخ وهو جرب ووقف بعيد عني وحط ذراعه اليسار علي اليدار وقال: ألحين يوم أقوللك فتحي ليش متفتحي؟؟؟؟

هدى: كيفي!!

محمد: تتغلي؟

هدى: من حقي!

محمد: صح من حقك.. بس أني ألحين ريلك يعني يصح تجابليني...

وطلعت خالتي قبل مارد عليه:

محمد..بتواحي تخرفهي!! يله روح منيه

محمد نزل ايده وسحب الدلال: مابا.. كان تبيهن فتحي..

أني هنيه حبيت أعانده لفيت علي الباب وقلت: عادي ماباهن.. وأنته بجابلك بعد العرس ولذاك اليوم خلي دلالك عندك..

أحلام: بنت الذينا.. كيه بقواة راس.. وهو هيش سوي؟؟

هدى: ههههه فديتـــــه مايقدر يحرس نتع شيلتي من راسي وقال: ميخالف خلي عرسني اليوم..

أحلام: هههههههههههه نيالك ياهدى..خذيتي الريال الي تحبيه بكل سهوله

هدى: حبيبتي أني هدى مب أحلام.... يله يله ثوري بنرقص

ورقصني وستهبلني..لين انزفت العروس وفضي البيت,,

نظفنا عند بنات خالاتي بعدين رجعنا البيت وأني فرحانه حتى معرف كيف رجدت بعد كل أذيك التخطيطات والأحلام للمستقبل,,

آآآآآه ياسالم أنت بس أخطبني..بعدين بتشوف أحلام غير أحلام الي تعرفها...





><><><><><><><><><><><><><><

بتوقف عند هالحد..

وهللله هلله بالردود الزينه..ابا اشووف ارائكم، وتوقعاتكم، والشخصيات الي عجبتكم بالقصه!!!

..............

(يسلموووو - حلوووه - يعطيج العافيه ) مثل هالردود غير مقبوووله...


بأنتظـــــــــــــــــــــــــــــــــاركـــــــــ ــــــــــــــــــــــــم....
تحياتي : همسات الحنين..

واااااااااااااااااااايد حلووووووووووووووووووووووووووووة


هههههههههههههههههههههههه


حياني ,,,,,,, لا تعليق



موووووووووووفقة والى الاماااااااااااااام ,,,

مشكوووووووووووور مريض المحبه ع المرور الطيب..

حياني؟؟!! عاد انت شوو تقووول غيرها؟؟

.......



وووين البقيه؟؟؟

صراحه منتداكم محبط اهئ اهئ

رووووعه روووووووعه..تسلم ايدك خيتوووو

صراحه شخصية احلام حلوووه بنت حبوبه وتعليقاتها تضحك..
اتوووقع انه سالم بيحبها بالاخير وراح تعيش معه بسعاده ههههه** نهايه سعيده** مع اني
شاكه فأنه شي بيصير من صوووب رااشد..بس بنتظر التكمله..

لا تنحبطي انتظري وان شاء الله الاعضاء مب مقصرين معك..(إلى الامام)

روااايتك عن جد روووووعة ف رووووعة
ولاتنحبطي يا همووسة
نحن معاك ونشجعك وااصلي ابدااعك حبيبتي
وتسلم الانامل الجميلة ع الرواية الحلوووة
ربي يعطيك الف عافية

ما رمت اقراها كامله الحين
بس بدايه رووووووووووووووعه وجميله

تعرفي كنت دوم احط فبالي روايات بالجعلاني
واتمنى اشوف
والحمدلله

الله يوفقك وننتظر الجديد