لا تشعري باحباط ولا غيره
باستمرار اشيك ع الموضوع اذا نزلتي شي جديد ولا..


اكيد وايدين متابعين لك
مب شرط اعضاء حتى الزوار معنا
يكفيك المشاهدات اكثر من 600

الغلا::

ننتظر الاجزاء بشوق

اشكر كل من يتابع روايتي واسمحولي على القصور لانشغالي



ساعتين وأني جالس هنيه بسيارتي..بس اتأملهم وهم يتمشو علي البحر..واحترق قهر..!!
وأني هيش اسوي غير اكل قهر واسكت..


شغلت مسجل وصدفه كانت فيه أغنية ل0 حسيتها صدق توصف أحساسي وأني اشوفها بأذيه القرب من راشد..

( )

أسبوع وأني لاشغله ولامشغله غير ملاحقهم من مكان لمكان..صرت مثل المينون وراها..
حاولت أني انسى وارجع جعلان بخيبة أمل بس قلبي ماطاعني..

والله صدق بن فطيس يوم قال"والله مااحر من دمع اليتيم غير دمع الرجال من فرق المره"

بس الحمد لله ماوصلت أذيه المرحله..
(رجعت رأسي ورا وسندته بذراعي اليسار ومسحت لحيتي المخنيره بكفي اليمين وأني افكر باللي ياي..)

همست مع نفسي"المهم ألحين أنفذ الي برأسي حتى لو ماياب نتيجه..المهم أحسسها بعذابي..
المهم احاول أحسسها..أنه في قلب متعذب من فراقها"

مسكت تيلفوني ورسلت لها

( {{لـــك وحشـــــة}}‏
تلفني شوق وعتاب..
وإن جيت تسكني حنان وطرابة..
علمتني إن الوفا طبع الأحباب..
رسمت عمري وردتين وسحابة..
خذني لوجودك وضمني بين الأهداب..
عمري بدونك ماتحمل عذابه..)



><><><><><><><><><><><><><><><><><><><><><><><><><><><><><><><><><><><><


..بيت بو يمعه..


بويمعه يأخذ فنيال القهوه: هين شيخه..؟
أم يمعه: تراجع فحجرتهي..

بويمعه: ويمعه؟؟

أم يمعه تقص البرتقال: طالع من الظهر حتى ماتغدا..

بويمعه رفع تيلفون عن طاوله: بتصله بتشوف هو هين؟

ام يمعه: محمد..الصبي صار ريال..مب لازم كل شويه أنته هين؟ ومع من؟ خف عليه

بويمعه يدور الرقم: أنتي بس لاتدخلي بيني وبين ولدي يكون أحسن!

ألووو...هينك بومحمد؟

يمعه: موجود طال عمرك..بغيت شي ياالغالي؟

بويمعه: تعال البيت..ابا اجلس معك نتقهوى رباعه

يمعه يغمز: حمود مصبح متقهوي ماعك كشتقتني؟؟

بويمعه: هههه حمود ؟؟ ياالخايس..فيه حد يقول لأبوه حمود؟

يمعه: هههههه اهاا فيه.. أني!
انزين بويه أني ألحين عند باب..بدخل السياره وبيي ونكمل سوالف ياحلوو هههه

(بعد خمس دقايق)


يمعه:السلام على من اتبع الهدى

:وعليكم السلام ورحمه

جرب يمعه وجلس جنب امه قبال ابوه: ها ابويه عسى مازعلت مني؟!

بويمعه يأشر لحرمته تصب ليمعه فنيال: عزيز وغالي بومحمد مينزعل منك..

يمعه يتناول الفنيال: قدرك الغالي يا بويمعه..

أم يمعه تدفع كتف يمعه: يمعوه اليوم اشوفك تتبسم هيش عندك..؟؟

ببتسامه جانبيه: فهيـــمه يافطيـــن طالعه علي ولدك..

بويمعه: ههههه لاتجل ادبك علي امك ياصبي..
يمعه يحب راس أمه: كوني مسامحه ياالغاليه..حقك علي هالرأس
(يشوف ابوه) رضيــــــت؟

بويمعه هز رأسه: انزين قول قول..خلصنا هيش تبا؟؟

جلس مكانه..وقال بهدوء: ابـــا.. ابا اتيوز
ام يمعه بفرحه: والله

بويمعه: بشرك الله بالخير..من زمان وأني احرس اذيه اليوم..

انزين ياالنشمي..أحسن شي نمشي حار بحار..
والعروس أن شاء الله متردك!

يمعه عقد حواجبه: اسمحلي بويه أعرفك تقصد رحمه بس أنـــي..
مـــابـــا رحمه..

أختفت ابتسامة ابوه..وتغيرت ملامحه للهدوء الواضح عليه عدم الرضا: عيل من تبا..؟؟

نزل رأسه وشبك اصابع ايدينه ببعض: والله يابويه... أنــــــي..

من زمان خاطري فــــ..

.
.
.
.
.
.

أختفت ابتسامة ابوه..وتغيرت ملامحه للهدوء الواضح عليه عدم الرضا: عيل من تبا..؟؟

نزل رأسه وشبك اصابع ايدينه ببعض: والله يابويه... أنــــــي..

من زمان خاطري فـــــ..
فــــــهدى بنت خالتي موزه..

بو يمعه ثار واقف وقال بعصبيه: هدى المطلقه؟

يمعه وقف: ليش؟ هيش يعيبها المطلقه؟
بويمعه: يعيبها أنها مطلقه.. وبعدين أنته لاتقول هيش يعيب مطلقه!
قول هيش يعيبك انته عشان تأخذ مطلقه..؟!

يمعه: اني راضي بعيوبهي..واباها حتى لو فيها عيوب ادنيا كلها

بويمعه بعصبيه: ورحمـــه؟؟

(سكت شوي يفكر ويوزن كل كلمه بيقولها لأنه يعرف ابوه وشخصيته العصبيه زين..يعرف أنه لو مااقتنع باللي بيقوله..محد بيرده من الي يباه يصير...وبذيك اللحظه راح يضيع كل شي بلمح البصر) زم شفايفه وهز رأسه : اسمعني ياالغالي..
رحمه بنت عمي وعلي عيني ورأسي..بس زواجي من هدى مب نهاية حياتهي..
رحمه حرمه سنعه وكل ريال يتمناها..والحياه بعدها جدامها.. وأن شاء الله بييها الي أحسن مني!

بويمعه مسح لحيته وقال بعصبيه: رحمه محد بيأخذها غيرك رضيت ولأ غصب علي عيونك..تسمع
وهاه بحلق لحيتي من اولها لأخرها كان خذيت غيرها..

يمعه خذ فنيال ولاحه ع اليدار بعصبيه: ابا افهم بس..أنته ولأ أني الي بيتيوز؟؟

بويمعه: ووووس...صوتك ماترفعه عليه تسمع..
أني بعدي ماطحت الأرض وأنته ترفع صوتك عليه عشان بنت حمد..
عيل لو خذتها هيش بتسوي..؟! بتجتلني؟

يمعه خذ مصره من راسه وعصره بين كفوفه وكأنه يبا يطلع جزء من ضيقه فيه: يااللـــــــــه..آآآآآآآآآه
ألحين ابا افهم هيش دخل هدى فالموضوع؟ ولأ بس تدور شي عشان ماتوافق عليها..

بويمعه بهدوء جاتل: قلت لك بتأخذ رحمه غصب عنك..يعني بتأخذها
حتى لو كسرت البيت اذيه كله فوق راسي.. وسع عن الدرب..وسع (وطلع)

يمعه يمسك امه من كتوفها وقال وعيونه تولع شرار: سمعيني..قولي لريلك غير هدى مب مأخذ.. وإذا يبا يتحكم فيه وملزم علي رحمه..أحسن متزوج..
قوليله بقعد هنيه لين امووت ولأ اخذ حد غير هدى..

(خذ مصره وطلع وأمه فاتحه عيونها من صدمه..هالموقف أول مره يصير بين زوجها وولدها..
صحيح بويمعه عصبي ومايحب أحد يمشي شوره عليه بس هو دايما يسمع لولده الوحيد ويأخذ ويعطي معه..حتى لو انتهى الحوار بينهم بفرض رأيه عليه، بس كان برضا يمعه..وماتوصل السالفه للغصب )

أم يمعه: يارب استر..يارب تهديهم ثنينتهم! يــــــارب

><><><><><><><><><><><><><><><><><><><><><><><><><




تيشيرت بيج داخل وفوقه جاكيت أسود..ع بنطلون جنز اسود وفيه لون ابيض من عند الركبه..
و ع ذيج النظارات الشمسيه البنيه..بهاللوك وشياكه والوسامه نزلت من الطايره بثقه وانا أخذ هواء يملى رئتيني وزود:
يااللــــــه محلا هوا البلاد..فديت الخليج وهالعبي السود الي محلتنها<<خخ من بدايتها صياعه ياصبي خخخخ


خلصت الأجراءت المطلوبه ودخلت شريحة اتصالات بجوالي ودقيت ع الخبل الي من المفترض يستقبلني..

(مغلق..)

ايهي شكلنا بنروح البيت بروحنا بدون موكب ولأ خرابيط..
سحبت شنطي ورحت الباركنات إلا أشوف الريم..فديتهــــــا السودا..خويتي فالأيام الخوالي

جربت من سيارتي وطبعت بوسه عميقه عليه"خلاص ياعمري خلصنا دراسه..قاعد عندج هنيه طول العمر..فديتج والله..ماتغيرتي" << عز الله انهبل الولد خخخخ

حطيت الشنط ورا وحركتها..أخذتلي لفه بشوارع الإمارات من شارع لشارع..

وفجأه رن جوالي حسبته خويلد فرفعت السماعه وانا احرج عليه وانافخ بقو: شو تبا داق ألحينه..؟؟ أول خلني اتنقع بالمطار بعدين دق و...

..: شو بلاك ياولدي..؟ انهبلت بالغربه ولأ شو؟

"وابوها..رحت فيها وطي": اسمحلي ياعمي..مادريت أنك انته المتصل..ظنيتك أخوي الخبل..
اشحالك ياعمي؟ واشحال اهلك؟ عساكم بصحه

..: الحمد لله..اشحالك أنت؟

وقفت عند الأشاره الحمرا: اشكر الله..عسى ماشر عمي..فيك شي؟محتاج مني شي؟

..: شوف ياولدي مايد..أنا كنت اترياك من زمان..ويوم دريت انك رديت البلاد اتصلت فيك ع طول..

مايد: امرني ياعمي..انا حاضر بكل اللي تباه؟ بس آمر

..: تسلم..طول عمرك ولد اصل ومب مقصر..بس انا بغيتك تمرني البيت..اباك بحايه

مايد: ..............
..: شو؟؟
مايد: ألحين؟
..: والله داري أنك تعبان من سفر وتبا تريح..بس الموضوع شاغل بالي وماقدر أأجله أكثر..

(ماحبيت اسأله زياده..قلت ماعليه صحيح المشوار طويل.. بس هالريال فيه ريحت الغالي عسب جيه ماقدر ارده)


ودوووس..
مسكت الدرب سيده من بوظبي لين رأس الخيمه..

ويوم وصلت..دقيت عليه.. وأتفقت معه نلتقي فالمسيد جريب حارتهم..لأنه مافيه هبه اتذكر جلساتي ويا الغالي عند بيتهم ولأ اتذكر معانات العزا والفراق الي حرق كل عروق قلبي..
وهو بعد تفهم الموضوع وياني فالمسيد بدون اعتراض..

بو هزاع: السلام عليكم
قفزت واقف وحبيت راسه: وعليكم السلام والرحمه..اشحالك عمي؟
والله أني اشتقت شوفك وريحتك

بو هزاع بدت تتجمع الدموع بعيونه الي اتعبها الزمن: بخير ياولدي بخير

(ذكرتني حالته هذي بأخر مره شفته فيها..قبل شهرين وهو يترجاني ابعد عنهم..كنت مصر أني ازورهم وهو معزم أني مااطب رأس الخيمه بكبرها..

تدرون ليـــــــــش؟؟

لأني اذكره بولده..الي ولأ يوم مر عليه من غير مايشوفني معه..مع هزاع..ولده الي انحرم منه..وانا بعد انحرمت منه

لين اليوم وانا اتذكر كل لحظات قضيناها مع بعض..لين اليوم وانا اذكر صدمتي بخبر موته..لين اليوم وانا اذكر انه اندفن من غير مااشوفه..
شهرين وانا اتمنى شوفه وبالأخير..يقولون لي اندفن وخلاص مالك رجا تشوفه..

بس شو يفيد الحزن ألحينه؟ انا لازم اكون اقوى واحاول ازرع الصبر بهالشايب المسكين..)

..: اصبر ياعمي ترا الصبر زين

بو هزاع: كل ماأشوفك أتذكره اتذكر صورته..وصوته..
سنتين يامايد سنتين وانا اقول بنسى بنسى بس مب رايم انساه مب رايم..

مايد ببتسامه مرحه عسب يرطب الجو: ها عمي تبا توقفني اكثر عسب تتكسح عظامي؟

بو هزاع: اسمحلي ياولدي تعبتك وياي..
مايد: تعبك راحه..ولأ يهمك بوقف لين باجر الصبح بس تراضا علي

بوهزاع: اقعد ياالجذاب..أنت مارمت توقف هالدقايق بتوقف لين صبح؟!
شكل الأنقليز مايطعمونك زين..صاير عصا

مايد: يطعموني؟ ههههههه ليش بقره عندهم؟؟ هههه

يلسنا قرب بعض

بو هزاع(حط ايده ع جتفي وابتسم وهو يجر كلمه ورا كلمه بصعوبه): مايد..أنت قبل شهرين يتني وطلبت عوافي..

مايد يضرب صدره بخفيف: وانا بعدي عند طلبي..ولو وافقت املج عليها اليوم انا حاضر!

بو هزاع جر نفس عميق: ولد اصل..وفرت علي رمسه طويله..فديتك..
شوف..البنت صغيره..وانا ماوافقت عليك قبل..مب عشان عيبا فيك.. ماوافقت لأنها كانت تدرس بس ألحين طلعت من المدرسه..وانا ابا ازوجها..فقلت ما راح ألقى ريال يعزها ويصونها شراتك!

مايد أن كأنك بعدك تباها شرات قبل فأنا موافق..موافق ازوجك عوافي..
شو قلت؟؟مستعد تتحمل مسؤوليتها؟

مايد: هيه اباها وبتحمل مسؤوليتها..ولاتخاف عليها ياعمي ترا غلاها بيكون من غلاك!
والله يعلم اشكثر انا اعزك واغليك..

بو هزاع: عيل خلينا نسير نملج ألحين.. وبعدها بتأخذ حرمتك لبيتكم..وانتو احرار تسون عرس ولأ لا!

مايد بستغراب: بهالسرعه..يعني مابتأخذ شور البنيه وأمها؟

بوهزاع بجديه: البنت شورها عند ابوها..وهي لو تلف البلاد كلها مابتلقى شراتك..
يله ياولدي خلينا نسير المحكمه عسب نخلص كل الأجراءات بسرعه..

(فالبدايه خفت من ردت فعل الوالد والوالده..بس انا ألحين صار عمري 24 سنه، شهر واحد وادخل25..يعني قراري بإيدي ومحد يفرض عليه شي.. وبعدين نسب عمي بوهزاع يشرف وعائلتهم مايعيبها شي..

بنهايه قررت اسير وياه والي يصير يصير...


وصلنا المحكمه..و الحمد لله لقينا واحد من ربع ابوي عسب جي خلصنا اجراءات الزواج بسرعه..



وكاني ألحين يالس بسيارتي صارلي ساعه..أتريا البنت الي بتكون شريكة حياتي تيي..

كنت حاط ذراعي اليسار ع الجامه وساند راسي بين سبابتي وابهامي واطالع هالناس الداخله والطالعه من المحطه وانا افكر
"من كان يتوقع أني بتزوج عوافي بهالطريقه؟؟
كل الي كنت اتوقعه أني برد اطلبها مره وثنتين وثلاث وابوها راح يوافق..
شو ها الأحساس يامايد ؟ هو خوف من الي جدام؟ ولأ خوف من اني غلطت وتسرعت بقراري
اوووف انا ليش مسندر رأسي..البنت وتزوجتها شو بعد يعني؟؟"

التفتت لورا شفت سيارته تقترب..ووقف ع يمين..يلس دقايق مانزل..استغربت شو قاعد يصير؟!
وفجأه شفته لف السياره وفتح الباب ونزلت وحده اقصر مني بس ماشفت منها شي كلها ملفوفه اسود بأسود..
جربو مني وفجأه انفتح الباب الي حذاي وسمعته يقول لها: ركبي..عوافي ركبي

وصارت عوافي تبجي بجى ماجفت مثله بحياتي..
ياربي انا شو سويت؟ ظلمت البنت..
بس انا شو دخلني؟ اسكت يامايد اسكت وخل ابوها يتصرف ع كيفه..

مرت دقايق وابوها يغصبها تركب وهي مب راضيه..انا ماتدخلت موليه..كنت متابع بصمت مب كنه هاي زوجتي وها ابوها..

بعد عنا وصراخ ركبت وصكر بوهزاع الباب بهدوء بعد ماقال: ما اوصيك ببنتي تراها ألحين حلالك..صونها واكرمها.. فوداعت الله..
(ركب سيارته وراح مبتعد عنا)

هي من ركبت ضمت اريولها بصدرها وصارت تبجي بشهقات.. تأملتها بستغراب "معقوله هاي حرمتيه..هاي ياهل..! الله يهديك ياعمي البنت صغيره وايد..شو الي قاعد يصير البنيه انظلمت وسبه أنا"


مرت ساعه ونحن ع نفس الحال ماتحركنا من المحطه ابد..
قلت بخليها تهدى بعدين برمسها.. شوي وهدى صوتها وصارت تبجي بصمت جاتل..
تحركت ورمستها بهدوء

مايد: شو عوافي؟ نسير؟
عوافي: ..................
مايد: عوافي..
عوافي: هاه
مايد: ترا انا مايد جاسم ال....، ربيع هزاع الله يرحمه!
أكيد كان يرمسج عني مثل ما كان يرمسني عنج..صح؟

عوافي: .................

مايد: مب مشكله مع الأيام راح تتعودين ع وجودج وياي

(الي صدمني أنها ردت تبجي مثل اول وأكثر.."ياربي ألحين هاي شو يسكتها؟؟" شغلت السياره وطلعت من المحطه بدون ولأ كلمه)



><><><><><><><><><><><><><><><><><><><><><><><><><><><><><><><><><><



قبل اربع سنين وتسع شهور..


نشيت من الرجاد ع صوت المنبه..دخلت الحمام<الله يكرمكم> واتسبحت(طبعا ها النومه بعد ماصليت الفير) لبست كندوره بنية اللون..مشطت شعري وتعصمت ونزلت

لقيت ابويه وهثوم يتريقون
حبيت راس ابوي: صبحكم الله بالخير

جاسم: هلا ميود..
إلا متى رديت البارحه؟؟

أشرت لهثوم عسب ينقذني بس هو حمار مب راعي فزعات..جلس يغايضني اونه هو ماله خص

يلست حذاله.. التفت علي ابويه: بعد صلاة الفير صح؟
مايد بصدمه: هاه؟! لا فديتك..ساعه12 انا بالبيت..

يحط لقمه بحلجه: جذاب..انا سرت حجرتك وقت الأذان مالقيتك!

وبذيج اللحظه..يا ابو الفزعات فديته صقور: هيه..ماهو راجد بحجرتي ومأخذ الشبريه ع كيفه الحبيب!
خلاني ارجد ع كنبه..حاسس ظهري تكسر من ذيج النومه..

ابوي عاد كله ولأ صقر مايقدر يقوله انه يجذب عسب جيه..نش من صفره بدون مايرد علينا..

يلس صقر قبالي: هذي أخر مره اجذب فيه ع ابويه تسمع..

نشيت وحبيت خشمه: أنت الي فيهم بوجاسم..وهاي حبه ع هالخشم وتوبه مااعيدها مره!

هيثم يبا يفتن علي: صقور ترا مب زين كل مره تتستر عليه.. ها مايستاهل غير خيزرانه ع ظهره!

مايد: أنت جب..مايخصك..وبعدين انا شو مسوي؟ يلست ويا الربع وخذتنا الرمسه..شو اسوي يعني؟ اقول لهم ابوي مسويلنا حضر تجوال بعد ساعه12


هيثم يقوم: زين كليتنا..برخصتكم وراي دوام..

ألتفت صقر علي: خلنا من هالرمسه..لشو اليوم ناش من صبح؟

مايد ببتسامه: ابا اسير البنك..

صقر بستنكار: البنك؟؟
مايد: هيه محتاي بيزات عسب السفر.. هاي لندن ابوي مب بلاش

صقر بعد قام: الله يوفقك..شد حيلك لاتفشلنا
مايد: أن شاء عمي

(وتميت بروحي ع صفره..بس مادش شي بحلجي..وماشتهيت حتى الحليب فقمت انا الثاني وسرت صوب البنك)

.
.
.
.
.
جدام آلة سحب..
بركنت سيارتي ونزلت..وكان جدامي هندي..اول ماشافني نزلت عفد صوبي..

الهندي: بابا
سكرت ياقة كندورتي: تهبى أكون ابوك..

الهندي يبجي: ارباب انا مسكين شوف هازا نار ايدا انا ايحترق..

مايد: والله ماحلفت عليك تحرق ايدك عسب تطر..ترا انا كاشفكم عيال ابليس..حراميه!

الهندي يمد ايده: حرااام ارباب..انا ايريد فلوس ميشان علاج..
(وصار يعصر عيونه عسب تدمع بس ماشي فايده..الحمار ع باله بصدقه..بس قلت خلها يامايد صدقه تنفعك بعدين)

دخلت ايدي بمخباتي وطلعت له 500درهم: هاك ماشي غيرهم..لو تموت مب معطنك غيرهم

أخذ الخمس اميه من ايدي: بــــــس..؟!
ارباب أنت كندوره جديد..سياره جديد اعطي بس 500ديرهيم؟؟

طلعت بطاقة السحب من مخباتي: طووف طووف اشوف.. طوف

وصديت عنه صوب ثاني وحطيت البطاقه ع سياره من جدام ويلست احوس بمخباتي ادور موبايلي..
وفجأه مااجوف غير هالصخله يسحب البطاقه ويشردبها
انصدمت..لو ضاعت هالبطاقه ابوي بيجتلني..

رفعت كنورتي وربعت وراه: وقف..يعلك الحرق.. وووقف

هو يربع وانا وراه..الحمد لله أنه ما جان في ناس وايد..و لأ جان انفضحت..
شكلي جان مصخره وانا اربع وراه جني كلب بوليسي..


وسبحان الله جفت واحد بنفس عمري تقريبا جدامه فصرخت بقوتيه: زخه ها حرمي زخه

وجان الهندي بيتخطاه بس هو يره من ذراعه وعقه ع الأرض..

ويوده بقو
...: ها شو مسوي؟
يريت نفسي..وسحبت البطاقه من ايده: صرق بطاقة السحب مالتي..والله شوه جان صار لولاك؟!
مشكووور الغالي

الشاب ير الهندي من ذراعه ووقفه معه: العفو..بس ها لازم يأخذ يزاه..خله يخيس بالسجن عسب مايعيدها مره ثانية..
قاطعته: لا فديتك.. خله يسير المهم رجعت البطاقه ولأ اليوم جان بتقوم قيامتي هههه

هده..وماصدج ع الله الخايس ماجفنا غير الغبره وراه..

تجدم الشاب مني ومد ايده يسلم علي..
تلومت منه..انا حتى مافكرت اسلم عليه..مالت علي: انا هزاع
مايد مديت ايدي وصافحته: تشرفت بمعرفتك..انا مايد
(اشرت بأيدي) ترا غداك اليوم ع حسابي

هزاع: يعلني فداك بس جان عندي شغله وخلصتها..وألحين لازم ارد الدار..
مايد: لا شو ترد وانا عازمك؟

هزاع حط ايده ع رقبته من ورا: لا مشكور..بس وراي طريج لين راس الخيمه تدريـــ.....

قاطعته: لا مااقبل اي اعتذار.. انا ألحين بسير اسحب بيزات..وبرد لك..هاه تحمل تشرد..

(سرت خطوتين بس رديت وقلت له)
ولا اقولك طوف جدامي ابا اطمن أنك ماتشرد مني

(ضحك علي واصر انه يترياني عند سيارتي..بس ماسرت عنه إلا بعد ماحلفته انه مايسير مكان..
أكيد بتقولون ليش كل ها..؟بس بصراحه وبيني وبينكم..الريال دش خاطري من اول ماجفته..وحسيت براحه وانا ارمسه..

*المهم* سرت سحبت البيزات وطلعت ابسرعه
ماادري ليش ياني احساس انه مابلقاه برع..بس الحمد لله لقيته يترياني عند سيارتي..)

مايد فتح الباب: تأخرت عليك؟
هزاع: هيه وايد تأخرت..كنت بسير لو ماطلعت!
مايد: جذاب..انا دقايق مااخذت..اركب اركب..حاس أني يوعان حدي

هزاع فتح الباب الي جنب السايق: جي ماتريقت؟
مايد شغلت سياره: والله انا اليوم مسوي معجزه..ناش من ساعه8 طبعا ع غير العاده هههه..
بس ماياني نفس اكل بروحي..الأهل تريقو مبجر عسب الشغل..
وتميت بروحي ع صفره..


(حركت وبتعدنا عن المكان..فكرت وين أخذه بالأخير قررت نسير مطاعم مركز ابوظبي مول ابصراحه الأكل عندهم فنتك..طلبنا لنا وجبه واخترنا طاوله مطله ع البحر ويسلنا فيها..

صرت انا ارمسه عن أهلي ودراستي وأشياء كثيره..والله حسيت كأني واحد صارله سنين مارمس بشي!
ماخليت شي مارمسته به..حتى ماعطيته فرصه يرمس عن عمره..ماادري ليش حسيت أنه محط ثقه وامان مع أني اول مره التقي به..
كنت انا كله ارمس وهو مره يبتسم ومره يضحك..حسيت أنه انسان نظيف من الداخل نظيييييف حيييييييييل)

هزاع: أنت شوه لسانك مايتعب؟
مايد طلعت لساني بحركه تضحك: ههههه ابصرحه ارتحت لك وايد..
هزاع يشرب عصيره: زين ماتبا تعرف عني شي؟؟ كله ترمس عن عمرك!
مايد: هههههه
هيه..نسيت اسألك أنت صدق من راس الخيمه..؟؟

هزاع: تو الناس!! ألحين تذكرت؟
هيه انا من راس الخيمه..وانا مثلك عندي اخت وحده بس ماعندي اخوان..
انا ماكملت الثانويه طلعت قبل واشتغلت بشركه هنا فابو ظبي..

امممممم شو بعد؟؟ هي لاطالعني جذيه..ماأعرف ارمس وأحد يتأمل ويهي الغبر..خخخخ

(صار يرمس عن اهله..وحياته عرفت من كلامه أنه سند بيتهم ومالهم غيره..وأنه ماعنده عيال عم..!
ع الأقل اهو يعرف أنه ماعنده عيال عم مب شراتي عندي عيال عم بس مب داري عن هوا دارهم..

بعد ماتغدينا تمشينا شوي ع الكرنيش..بس قطع لحظاتنا الحلوه اتصال من اهله"كانو يحاتونه" عرفت من رمسته أنها امه وشكلها كانت تصيح لأنه كله يقول لها: لاتحاتين ولدج ذيب...زين خلاص قلتلج انا بخير ليش كل ها عاد؟؟

المهم ترخص مني عسب يسير راس الخيمه..بس انا اللزقه حلفت إلا اوصله..عيا وهو يرفض بس ماشي فايده انا راسي يابس إلا اوصله..


مرت الأيام وانا وهزاع مانفترق ابد كل يوم نتغدا ويا بعض..وأيام اجازته يا انا ازوره او هو يزورني..
وأحيانا كان يسافر معي لندن..

ايام قضينها سوا مضت بس كانت أحلى ايام حياتي..)


><><><><><><><><><><><><><><><><><><><<><><><><><><><><><>

قبل سنتين و9شهور وساعتين



فالمستشفى
صار له اسبوعين مرقد فالمستشفى..وحالته كل مالها تدهور زياده..والورم ينتشر برأسه يوم بعد يوم..مانفع العلاج بالأدوية الكيماويه ويا حالته ابد..
امه صار قلبها يتقطع عليه وهي مب قادره تسويله شي..صارت تهرب منه عسب مايشوف عيونها كيف ذبلت من الصياح..وابوه بعد ماكان الريال الصلب الي مايهزه شي..صار يبجي حسره ع ولده الي يذبل وتتقطع أزهار عمره يوم بعد يوم..


اليوم قام الصبح صلى وقعد يقرا قرآن بصوت تخشع له القلوب..
انفتح الباب شوية وطليت عليه بويهي الطفولي مثل مايقولون..ابتسم لي وانهى قرايت الايه وقال لي: تعالي عوافي..

دخلت وبأيدي جيس العصاير: اشحالك اليوم؟؟
هزاع: مثل ماأنتي شايفه..أنتظر ساعتي
عوافي بخوف: هزاع لاتقول جيه..(ونزلت دموعي وانا اتخيل حياتي من دونه) عسى يومي قبل يومك

ابتسم لي بحنيه وهو حاط ايده ع رأسي قال: محد فيكم بيروح قبلي
عوافي: هزاع ترا والله اروح عنك
هزاع: هههههه الدلوعه تخافين من القدر؟؟
عوافي: لا..اخاف من الدنيا لأ رحت عني كيف بتكون؟!

خلنا من هالسالفه الي تضيق البارض وشوف شو يايبتلك.. عصير جوافه

هزاع مد ايده واخذ العصير: تسلمين لي..إلا وين ابويه؟؟

يريت كرسي ويلست عليه: ماادري نزلني جدام المستشفى وراح
(وبهاللحظه دق جوال هزاع بنشيد العفو منك إلهي..طالعته شفت ع الشاشه "ميود" طالعت هزاع الي ابتسم وحطه ع الصامت)
رفعت حياتي بستغراب: شوو؟ مابترد عليه؟؟

هزاع هز راسه بلا
عوافي: حرام عليك هزاع..الريال بيحرق التيلفون من الاتصالات!

تنهد تنهيده تقطع القلب: مااباه يعرف بمرضي..أنتي ماتعرفين مايد..مايد بيحاتيني وبيهد دراسته..وهذا مستقبله وانا مستحيل اخليه يضيع مستقبله عشاني..

عوافي: بالعكس انته جي تخليه يحاتي أكثر..شوف جم مره دق عليك من دخلت المستشفى..حطم الرقم القياسي بأتصالاته وأنته حاقره

هزاع بضيق: لاتقولين حاقره..! انا بس خايف عليه..
(دقايق صمت مرت بينهم وقطع هالصمت صوت هزاع الي باينه فيه العبره) : مشتاق أشوفه عوافي.. شهرين من سافر.. كنت اتمنى يرجع عسب اشوفه قبل مااموت..بس انا حاس.. والله حاس أني ماراح اشوفه..

حبيت اغير الجو وانسيه حاله: لا أن شاء أنت بتنش مثل عنزتنا وبتشوفه ههه..
لأ وبعد بيكون عرسكم بيوم واحد قول أمين

هزاع: ههههه محد عنز غيرج..

عوافي: إذ انا عنزه أنت شوو تطلع شاروخان؟؟
هزاع: مالقيتي إلا شاروخان وع ها مستواج يالبقره

عوافي بحالميه: وي فديته..فديت روحه.. تدري بس لو يخطبني والله اتزوجه بدون مهر

هزاع: هههههههههههه وهو أصلا شو بيعطيج مهر غير كرتون فلفل؟؟ ههه يحليلج ياختيه متأمله فمهر هههه

ضحكت من ضحكته بس يافرحه ماتمت..ورجعنا لطاري يااللي
هزاع نزل رأسه وقال بتعب وحزن واضح: بلغوه سلامي لأ رد البلاد..مو تنسون

نشيت من الكرسي قبل مايشوف دموعي الي خلاص ماقدرت ايودهن وقلت بحزن: خل ايمانك بالله قوي ياخوي..انا بروح الحمام..
وطلعت قبل مااسمع رده..استندت ع اليدار الي برع وبجيت وبجيت وشهقت من القلب..

هزاع اخوي خلاص فقد الامل الي نحن متمسكينبه..هزاع يبانا نقتنع انه راح يخلينا بروحنا..
يلست ع الأرض جريب باب حجرته وصرت ابجي بجي صامت..فكرت اتصل بمايد واخليه يي يشوفه يمجن تتغير نفسيته! بس خفت من ردت فعله..خفت يزعل مني..

نشيت من على الأرض وسرت صوب الحمام..غسلت ويهي ورديت له..لقيته مطفي جواله ويالس يقرا قرآن يريت لي كرسي وانصت له....


بعد ساعه يا ابويه..

هزاع بصوت مجهد: مرحبا ملايين ولايسدن..
بو هزاع: ههه كل ها الترحيب حقي ؟؟

هزاع: عيل حق منوه؟؟
بو هزاع: اشحالك ألحينه؟
هزاع: الحمد الله..ابوي أمي ليش مايات معك؟
(بو هزاع سرح بعالم ثاني..كان يفكر بكلام الدكتور له: والله ياحج مأدرش اعطيك آمل..ابنك حالتو ملهاش علاج..خصوصا أنه الورم بطلش يستجيب للأدوية الكيميائية.. ياحج نفسية أبنك بتعئدش الموضوع كمان..
بوهزاع: شو قصدك دكتور؟
الدكتور: أصدي أنه هزاع مئتنع في عئله الباطن انه موتوه أرب..لزالك هو مش راضي يستجيب للعلاج
بو هزاع: والحل؟؟
الدكتور بخيبه: أنا آسف..كنت عايز اساعدك..والله لو بأيدي كنت ساعدتك.. اطلبله الرحمه والشفا من رب العالمين..محدش عارف يمكن تصير معقزه والله أدر يعمل اي حاقه)
هزاع يحرك ايده جدام ويه ابوه: خيبه كل ها شوق حق الوالده؟
بو هزاع ابتسم حق ولده ودمعه حاره نزلت ع خده الي شيبه الدهر: ااي هيه راحت ايام الشوق..والغزل بسكك الفريج..

هزاع: ههههه من صدجك يبه كنت تغازل الوالده بالسكه؟؟ ههه صدج أنك مال اول!
ههههه
عوافي: ههههههه مسكينه امايه.. أكيد كنت تقص عليها بتمرتين وربطة جت ههههههههههه

بو هزاع بعصبيه: حدكم عاد..مااسمح لكم تتمصخرون ع الغاليه..(طالع هزاع بحزن طغى ع ملامح ويهه) هذي أم الغالي
عوافي بوزت: ابويه ترا أنا موجوده ماطلعت!

بوهزاع: ههههههه عاد أنتي لمبة البيت مانروم عنج!
يله هزاع انا بروح بغيت شي؟

هزاع: وين وين؟ لايكون تبا تختلي بأم السكك؟

بوهزاع: استحي ياولد..بروح عندي جم شغله بقضيهم
عوافي: وأنا؟؟

بوهزاع: خلج مع اخوج بعدين امرج..فمان الله

طلع ابويه ويلسنا نرمس ارواحنا..مره نسولف ع بوي وأمي ومره ع ام الاء جارتنا البخيله..
خذتنا الرمسه وماحسينا بالوقت.. وفــــجــــــــأه


قام هزاع يصارخ ويتويع..وأنا ماعرفت شو أسوي!
ضغطت ع الدجمه حقت الممرضات وطلعت برع اصيح بأعلى صوت املكه: لحقو علي.. أخوي بيضيع من ايدي..دكتــــــــور..دكتور فــــؤادي..ألحق ع خوي
صرت ابجي ماعرف شو صارلي..حسيت أني خلاص بفقده..بفقد اغلى شي بحياتي.. هزاع بنسبه لي كل شي..فجأه مر عليه شريط ذكرياتي وياه مرت عليه كل لحظه قضيناها سوا..كل حركه سويناها سوا..مرت عليه أيام مستحيل انساها..يارب أنا بشو يالسه أفكر؟! معقوله استسلمت للواقع؟! معقوله بفقد هزاع للأبد؟! لا مستحيل هالشي يصير
شفت مجموعة اطباء يركضون صوبي..سبقتهم ودخلت لقيت هزاع متكور ع نفسه وضاغط ع راسه بقوه ويصارخ: ويع فظيع برأسي..فظيع يا عوافي..عوافي ماابا اموت.. آآآآه يارب
ماابا اموت
ولأول مره اشوف هزاع يبجي بهالطريقه جان شكله يهز قلوب ماتهتز..
فجأه انفتح الباب وانهل سيل من الأطباء والممرضين علينا..ابعدوني عن شبريته وقوفو جدامي وصارو يعابلون فأشياء مافهمتها..كنت اصيح مب حاسه بشي غير النار الي شابه فيوفي..كنت ابجي واطالع ويهه الي بدا يختفي ورا اجسامهم وانا اموت فالثانيه100مره كيف بعيش حياتي وهي خاليه من وجوده؟! كيف بنام قبل لا اسمع صوته؟! كيف راح ايلس اذاكر وانا ادري انه محد راح يفتح علي الباب ويخرب مذاكرتي؟!
كيف..كيف ببتسم بعد ماتنسلب احلى ابتسامه فحياتي؟!
فجأه رفعت رأسي ومسحت دموعي عسب اشوفه جان يلتفت عليه ويبتسم أحلى ابتسامه شفتها بحياتي..اسبل عيونه شوي شوي وكانت هذي اخر مره اشوفه بحياتي..




<><><><><><><><><><><<><><><><><><><><><><




صارلنا ساعه من طلعنا من سوق مطرح وهو ماقال ولأ حرف..
حسيت أني مرتاعه منه وايد.."بلعت غصتي" ياربي ترحمني راشد من يعصب مايرحم..ألحين بيسويلي سالفه "وأني عديتها الي روحت وأنتي متعمده وأنتي وأنتي...."
يااللــــــــه..
"حطيت ياديه علي ويهي وهو انتبه لحركتي بس ماتكلم شكله ضام كل خروفته للفندق" ياربي سترك..


وصلنا الفندق هو روح لرسبشن وأني ركض للفت ابا اهرب قبل لايصيدني..بس الدب استعيل الموظفه ويا قبل مايفتح باب اللفت..
مسك ايدي بقو كنه يقولي هين طايره ؟ مردي بنازعك..
أحلام(ابا افلت ايدي منه): راشد ايدي تعورني
راشد( من دون مايلتفت): سكتي...(فتح الباب وسحبني داخل لفت)

ثواني وحن واصلين باب الشقه، فتح الباب ودخلت قبله وقبل مااوصل باب الحجره سمعته ينعر بقمة رأسه
راشد: أحــــــــــــلام
التفتت صوبه بدون مااتكلم
راشد يضغط علي لحيته: هيش اذيه الحركه الي سويتيها؟؟

أحلام: اي حركه؟؟
راشد: معلوم بتنسي تراه عاجبنك الوضع.. اقولك أنتي متستحي علي ويهك! من وأنتي صغيره وأنتي بايعتنه الحيا..كانــــ..

قاطعته وأني أأشر ابيدي: راشد عن الغلط..يعني أني هيش سويت؟ أني اشوف عمري ماغلطت والي صار صار بدون قصدي..
راشد: لا والله؟؟ بدون قصدك؟ لاتكذبي احلام أنتي شفتيهم الشباب من يماعتنا وياين صوبنا..بس روحك مارديتي الغشوه علي ويهك..
أساسا من بدايه أنتي ماحلالك غير اليم تفصخي فيه الغشوه..كنك حاسه بييتهم

أحلام ببتسامة اتمصرخ فيها عليه: من حلاوتهم افصخ الغشوه عشانهم.. وووع

راشد: اهاه اعترفتي يعني أنك تدوري أحلا منهم؟!
صديت عنه صوب الثاني ابا اروح حجرتي وأني اقول: الحمد لله وشكر علي نعمة العقل..

وماحسيت غير أنه ينتع ذراعي ويلوحني علي الكنبه..بس ماطحت فيها،ريولي التوت ودقيت الطاوله وطحت فالأرض..
كان عوق فضيع حسيتبه فريولي..حسيت عروق ريلي تتقطع..تشوفت عليه بنظرة ألم وعتاب: اااااي..ريولي

تواطئ راشد لمستوايه: احلام.. هيش صابهي ريولك؟؟
من بين ضروسي: يعني أنته هيش تشوف؟ اااااااااي كسرتليها وبعدك تنشد؟

حسيت انه راشد ارتبش ومب عارف هيش يسوي..ثار واقف ولتفت يمين ويسار بعدين تواطئ مره..وماحسيت غير أني بين ذراعيه..تمسكت برقبته تلقائيا وقلت من بين دموعي: راشد نزلني..

مانطق بكلمه،فتح باب شقة ونزلنا تحت والكل يتشوف.. حسيت بالأحراج من نظراتهم بس الحمد لله محد بيعرفني كنت متغشه!
~المهم~ وصلنا المستشفي
دخلنا طوارئ..
ويات الدكتوره عشان تشوف حالتي
الدكتوره: فيكي ايه ياحلووه؟

اني فوق الكرفايه وراشد علي يساري والدكتوره علي يميني قلت وأني اهمز ريولي: انزلقت والتوت ريولي
التفت راشد صوبي بصدمه وأني بادلته ببتسامه عذبه..ماكنت اقصد منهي شي! بس بغيت اغطي اسالفه..وليش افضح عمري أن شاء الله.. واقول ريلي المصقوع ضربني من اول اسبوع؟؟!
مسك راشد ايدي وضغط عليها بالخفيف فأنتبهت الدكتوره له وقالت بضحكه: ههه لاحئ عليها ياأستاز..
راشد بصدمه: هاه؟!
الدكتوره ببتسامه: بئول رجلها مفيهاش حاجه..حنحطلها جبيره وأن شاء بكره حطيب..

لفت ريولي بمية كساره وطلعتني..


فالسياره


وصلني مسجين الأول من صلوح فديته حاس فيه
يقول
"مساء الورد..عسى ماازعجتكم؟!
بس اشتقتلج وقلت اطرش اطمن عليج"

والثاني من نفس الرقم الغريب الي يطرشلي كل يوم
"سلامات.."
طاح قلبي يوم قريت الرساله "أعوذ بالله من شيطان الرجيم.." قريتها مره ثانيه وثالثه وتميت اتلفت ،يمين ويسار.. ورا جدام..مشي كله سيارات..اذيه "يراقبنا ولأ هيش؟؟"

راشد التفت عليه بستغراب: هيش فيك؟
فكرت اقول له..بس تذكرت الي صار اليوم.. كفخني عشان سبب تافه عيل يوم بقول له هيش بيسويبي..؟! برايه تراه باكر بنرجع وبعطي الرقم صويلح يتفاهم ماعه..
"وبويه صويلح"
مارديت عليه
كتبتله مسج بسرعه وطرشته له

متابعين لك
الله يوفقك الغلا

ولي عودة اكمل معك

><><><><><><><><><><><><><><><><><><><><


في الامارات

ظلم الجو ونحن تونا وصلنا ابوظبي..
دخلنا فشارع ع يمينه ويساره كله فلل وقصور..رفعت رأسي لأول مره من ركبت سيارته وطالعت برع..(ها وين ماخذني؟! انا ماعرف ساكن بروحه ولأ عنده اهل؟؟
ابيــــــه أنا مااعرف شو اسوي ألحين؟ وكيف اتعامل معه؟! الله يسامحك يا ابويه..)
"نزلت دموعي بصمت يوم وقف سيارته جدام فله كبيره مادري طابقين ولأ ثلاثه!
وطالعني ببتسامه شفافه وقال": هذا بيتج عوافي!

نطقت أخيرا والدموع ماليه ويهي: ماابا انزل..

اتسعت ابتسامته: شو ماتبين؟؟ نزلي ياالياهل انا مب مأكلج..
"ونزل وانا اطالعه بالجامه الي جدامي وهو يلف ورا السياره وينزل شنط سفر..هذي معقوله لي؟ مااذكر ابوي نزل شي من سيارته..لمن هالشنط كلها؟!
يا من صوبي وفتح الباب"

مايد: شو عوافي؟ بنظل واقفين عند الباب؟

عوافي: تكفى ردني بيتنا..
مايد: يله عاد.. بس دلع نزلي اشوف نزلي..
"نزلت وانا ميته خوف..< ياربي شو اسوي ألحين؟! شو؟ > سرت وراه ودخلنا الحوي وخطوتين ووصلنا باب فخم كان باب الصاله
فتحه بمفتاح كان بمخباه


ودخـــــــــــــــلـــــــــــــــنـــــــــــــــ ا



دخلنا ويا بعض..كانت فيه قعده ع يمين وع يسار باب الصاله(يعني قنفات راقيه).. وبوسط الصاله درج من فوق يتفرع لوجهتين يمين ويسار..كان بيتهم واسع وايد...مااجدر اوصفلكم شكله بس كان خيـــــــــال..

انتبهت لأهله الي جالسين ع يساري يوم سلم عليهم مايد وردو عليه"

الكل: وعليكم السلام
ام هيثم عاقده حياتها: مايد..
مايد وهو عارف شو بتسأله: لبيه

ام هيثم بخوف بان فصوتها: لبيت حاي..بس منو هاي الي معك؟؟!
خالد: شكله الحبيب صدق روحه وأخذ شقرا من ورانا..بس ها سوداء مب شقرا هههه
بو صقر(جاسم) رافع حياته وبصوته الرجولي الحازم قال: جــــــــــــــــــــب..
مايد منو هاي..؟؟

مايد بلع ريقه وطالعني وانا من الخوف ضغطت ع ايده عسب احس أنه لي احد بينهم..ضغط علي وهو يقول: هاي عوافي..زوجتي..

ام هيثم: ودي..أنت شووووو تقول؟؟ متى؟ ليش؟

وقبل ماينطق مايد بشي قال ابوه بصوت حازم خلا الكل يسكت: سولاف..خذي الحرمه لحجرتها.."بعدين طالع واحد واقف جريب منه" وأنت تعال ويا أخوك فالميلس..
< وطلع >

صقر: أن شاء الله..مايد سير وياي

طلعت مع سولاف فوق وانا عيني عند مايد..الي اختفى ورا الباب.."ياربي ابوه شو يبابه؟ ألحين هو تزوجني مندون شور ابوه ولأ شو؟طيب ليش؟؟ وشو بيكون مصيري انا..معقوله ابوه يحذفني برا..؟! " ونزلت ع خدي دمعه يتيمه ترثي حالي وترثي هالحياة الي انا عايشتها...

احداث حلوه ومشوقه
استمري همسات ولا اطولي فالغيبه

واصلـــــــــــــــــــــــــــــــي تميزك ..قصتج اعجبتني.الفاظها

واحداثها

وينج هموسه ،،، هاااتيلنا علوم الحلم

المشاركة الأصلية كتبت بواسطة خَ'ـفـآيآ آلـ ـرُّـوـح متابعين لك الله يوفقك الغلا ولي عودة اكمل معك

هلا حبيبتي..


الله يوفقنا يميع ان شاء الله..

مشكووووره ع المتابعه..