الله على الخيال الجميل والقصه اللي شبيهه بالواقع صراحه هذه قصه جميلة جداً وبدون مجامله


وودنا نشوف تكملتها أحسها كانها واقعيه ولما قريتها بالبدايه تاثرت بالقصه ودمعت العين :)

هذا الشي يدل على انه اللي كاتبه هذه الروايه مبدعه ونتمنى إنه نشوف قصصك بالواقع في المسلسلات وليش لا مادام هذه روايه من رواياتك

إلى الأمام وبإنتظار كل جديد ونتمنى لك مستقبل زاهر في مجال الروايات

تسلمي كبرياااء كملي القصه

جعلاني للابد...تسلم اخوي عالمرور وعالتشجيع

الراسبي... صراحة اخجلت تواضعي... وتعتبر الرواية مجرد بداية ومجرد تمثيل لهواية.... وحبيت اني اصيغ الواقع على شكل رواية تجذب القراء للتعرف على مجتمعنا وعلى عاداته واسلوب معيشتنا...بالاضافة الى لهجتنا اللي احس انه بدينا نخلطها باللهجات الثانية وبدت تفقد اصالتها
تسلم اخوي عالتشجيع وكلمات الاطراء اللي تحسس الواحد بقيمة اللي يسويه

سهم الموت...الله يسلمك اخوي... وان شاء الله بكملها

~ô§ô~كبريــاء انـثى~ô§ô~
ღღღღღالجزء الثانيღღღღღ
~ô§ô~كبريــاء انـثى~ô§ô~

بعد 3اسابيع...اليوم بتطلع النتايج وبتنزل على موقع الوزارة بالنت او عن طريق المسج بالموبايل...ومريم على اعصابها متوترة ومن الصبح على التلفون تكلم ربيعاتها..وكانت تنتظر على موبايل ابوها واخوها صالح..وعلى موبايل اسما...ماخلت حد ماطرشت من تلفونه عشان تعرف نتيجتها... والساعه 11 ياتها اسما البيت..ولاقتها مريم عند الباب: هلا اسوم نور بيتنا وشارعنا وجعلان كلها...ههههههههههه
اسما: ياعيني ياعيني هيش آالترحيب؟!....اللي بيقول مايي بيتكم ابد!!
مريم: تراه لك اكثر من شهرين ماطحتي بيتنا
اسما: ماكنك نسيتي تنشديني عن شي؟
مريم: انزيني انتي دخلي وبعدين بنشدك
ودخلت مع بنت عمها وحصلت ام مريم (عايشه) ف الصالة جالسة...ودخلت تسلم عليها
مريم: السلام عليكم خالوه كيف حالك؟
عايشه: وعليكم السلام...هلا ببنتي اسوم...كيف شراك عيني؟
مريم: الحمدلله بخير خالوه
عايشه: زين يوم بتطلعي من بيتكم...وبتينا...ولو انه مريوم كل يوم والثاني معك حتى ماتخليك تواحي تشتاقيها
مريم تدلع على امها: امااااااااااااااه...حراااااااام...تراني ماروح غير بيت عمي...وبعدين ملللللل من يوم خلصت الدراسة
اسما: فديتها الريم مرحبا بها ف أي وقت
مريم توها تتذكر...صرخت ونقزت اللي معها: النتيجة... اسومي؟؟ كيف طلعت؟
عايشه واسما يضحكن عليها.... واسما: اصريك نشدتيني عنها لين اقولك؟
مريم: تراك انتي من ييتي والكل يرحب بك ونسيتينا النتيجة....بس ادري بها ماطلعت تشوفيني ماسكة تلفون ابويه وللحين ماطاع يصيح باي مسج..متعيم
اسما وهي تبتسم: واذا قلتلك انها طلعت!!
مريم وهي تصارخ وتمسك بنت عمها: قووووولي والله
عايشه: هاه اسوم بشرينا كم؟
اسما وهي تناظر مريم وتغايظها: كم بتعطيني؟
مريم: بتييك كرخه على راسك اذا ماتكلمتي
اسما: ههههههههه زين زين بقول...حشا بتاكليني
مريم واعصابها تالفة خلاص: قولي بسرعه ذبحيتني ببرودك
اسما: 97
مريم وعيونها طلعت على برى وتقول شكلي سمعت غلط: كم كم؟
اسما: اقولك 97
عايشه: مريوم مبروك حبيبتي..الحمدلله الحمدلله
مريم وهي تتنطط وتداور ببنت عمها وتصارخ: قولي والله...قولي والله
اسما وهي تضحك على خبال بنت عمها: والله انك يبتي 97 والله...ويا توقعي ف محله.. تتذكري لما كنت اقولك بتيبي فوق ال95؟
مريم وهي شبه تخبلت تضحك والدموع ف عيونها وتصارخ: الحمدلله الحمدلله... وتبوس بنت عمها ف خدودها وتحضنها: الحمدلله والشكر...والله بصلي ركعتين شكر..ماكنت متوقعه هالنتيجة...فديتك بنت عمي فديييييييييييييييييييييييييييتك على البشاره
وراحت ف حضن امها وتبوس امها,,,,وامها تحمد الله وتبكي على النتيجة المشرفة اللي يابتها بنتها وكانو متاكدين انها بتييب نتيجة اكثر من كذيه لولا المصيبة اللي ياتهم
اسوم جلست عدالهم: انزين الريم ماقلتيلي هيش بشارتي؟
مريم: عيوني لك...انتي امري تدللي
اسما: انزين عطيني عيونك
مريم وهي تضحك: هههههه...عاد انتي ماصدقتي
وهنيه دخل صالح (اخو مريم العود بعد موزه اختهم...وهو طويل وعليه جسم ضخم...وشكله حلو.. بس متعقد من شي اسمه زواج...بعد الذل اللي شافه من بنت عمته)... من برى ومستغرب على الحشرة والاصوات اللي طالعه من بيتهم...وهو داخل شاف حد عند امه واخته
صالح: اوه..حد عندكم...السموحه بطلع
عايشه: تعال ياصالح....محد غريب..اذيه اسما بنت عمك
صالح وهو يقرب منهم ومنزل راسه عن بنت عمه: هيش صاير؟؟ وليش حاشرين الدنيا؟؟ وانتي مريوم حسوسك طالعه برى......... التفت على اخته وشافها مبتسمة والفرحة شاقة ويهها...وقفت وقربت يمه: صلوحي بارك لي بارك لي... يبت 97
صالح: صدج؟
مريم: اها صدج
صالح وهو يبتسم ويحط ايده على راس اخته الحبيبة الى قلبه ودلوعة البيت: مبروك مريوم تستاهلي...قدها والله...بس ماياني مسج للحين بنتيجتك... من خبرك؟
مريم وهي تناظر بنت عمها: اسوم...فديتها
هنيه انتبه صالح لبنت عمه وكانت لابسة عبايه ومتغشية ومنزلة راسها...ويقول من متى ماشفتك يابنت عمي ظنتي من قبل ماتتغشي...سنين والله
صالح: اسما كيف حالك؟ وكيف حال عمي وحال محمد؟
اسما بصوت هادي وخافت: الحمدلله كلنا بخير....اشحالك؟
صالح: الحمدلله بخير
صالح لامه: اماه مبروكة على نسبة مريوم......... وهو يربت على كتف اخته
عايشه: الله يبارك فيك.... مريوم بيضت لنا ويوهنا....تستاهل
مريم: اووووووووووووووه صح بمشي ابشر بويه...وببشر ربيعاتي...
وروحت مريم تبشر ابوها واختها موزه وفاطمه...واخوها حمد بمسقط... وربيعاتها

صالح: اني بروح حجرتي...برتاح لين صلاة الظهر
عايشه: صحيح صالح؟.... اشوفك طالع من وقت من شغلك؟
صالح: اها... عندي شوية اشغال هنيه ف جعلان ابا اخلصهن...استاذنت من الشغل
عايشه:انزين بويه روح ارتاح
صالح: لعاد اترخص اني
عايشه: الله يحفظك

مريم بعد ماكلمت ابوها واخواتها وحمد اخوها وبعض ر بيعاتها.... واخر شي اتصلت بربيعتها المقربة لها ف المدرسة ايمان بنت سيف...وتصير بنت عم سعيد (مريم يصيرسعيد ولد عمتها غاليه)
مريم:: هلا ايماني
ايمان: هلا وغلا بريومي
مريم: هاه بشري طلعت نتيجتك؟
ايمان: اها طلعت...وانتي؟
مريم بابتسامة عريضة: طلعت...كم يبتي؟
ايمان: انتي قولي قبل
مريم: مابا....اني سالتك قبل...جاوبي انتي وبعدين بقولك
ايمان: انتي قولي
مريم: انتي قولي
ايمان: يوووووووووووه اشوفها السالفة مابتخلص
مريم: جاوبي وبجاوب وريحي عمرك
ايمان: اعرفك عناديه...مب تكلمي
مريم: ايماني يالله قولي
ايمان بحزن : 94
مريم: مبروكة حبيبتي...تستاهلي..قولي الحمدلله
ايمان: الحمدلله.... بس كنت اباها اكثر
مريم: والله نسبتك حلوة....الحين متصلة على فاطمة اختي بالوافي وهي معلمة مثل ماتعرفي وقالت لي أن النسب منخفضة بصفه عامة ف السلطنة
ايمان: اهاااااااااه... انزين كم يبتي انتي؟
مريم بفخر: 97
ايمان فرحت لربيعتها رغم حزنها على نتيجتها: والله...كللللللوووووووووووووويييييييييييش....مبروك ة ريومي
مريم: الله يبارك ف حياتك ايماني...الحين متى التسجيل؟ بعد اسبوع؟
ايمان: لا..التسجيل يوم السبت..واليوم الثلوث يعني بعد 3 ايام بالضبط...كيف بعدك على حلمك؟؟
مريم: اااااااااااااه يا ايماني تعرفيني اتمنى اني اتخصص هندسة....بس ادعي انهم يوافقو
ايمان وهي تدري بمحافظة اهل مريم وتعقدهم ف هالسوالف: أن شاء الله يوافقو...وتحققي حلمك
مريم: كيف؟ وانتي مصرة على الانجليزي؟؟
ايمان: اكييييييييييييييييييد....بس اخاف مايقبلوني بالجامعه بهالنسبة
مريم: لاتخافي....ترى النسب منخفضة
ايمان: حتى لو ماقبلوني بالجامعه...بدرس بالكليات...اهم شي احقق حلمي
مريم: أن شاء الله... زين الحين بخليك...لان اسومي عندنا وبروح اقعد عندها
ايمان: اوكي.... سلمي عليها وعلى امك..يالله مع السلامة
مريم: الله يسلمك ويسلم غاليك... باي
ايمان: لحظة لحظة...ماكنك نسيتي شي؟
مريم: اوووووووووه صح...اليوم النتايج مدورة بروسنا
ايمان: صدجك
مريم: امووووووووووواه
ايمان: اموااااااااااااااااااااه
وضحكن على خبالهن
مريم: يالله باي
ايمان: بااااااااااااااااي

راحت مريم صوب امها واسما...وجلست
عايشه: اتصلتي بابوك؟
مريم: اها...ووايد فرح...وقال لي هديتك بتكون اللي تبيها...انتي اختاري...واني اكيد بختار اخر موديل من التلفونات ببطاقته
اسما: ياعيني...من قدك؟ وبشارتي...ماكنك نسيتيها؟
مريم: ههههههه .... لامانسيتها...وبويه قال قولي لاسما البشارة عليه..يعني انتي من قدك دام ابويه بيعطيك
اسما: احم احم...اكيد...ههههه
مريم: ههههههه
عايشه:هههههههه... انزين واتصلتي بخواتك وحمد؟
مريم: اكييييييييييد.... عشان كلهم يجهزو هداياهم... وتسلم عليك فطوم تقول بيونا يوم الخميس...تقول مصدعنها عيالها بنمشي بيت عودوه...وقال ابوهم بنشلكم يوم الخميس
عايشه: ذكرتيني...خالد ود موزه كم ياب؟ نسيناه مسكين
مريم: تراني يايتنك ف السالفة.... تسلم عليك موزه وخلود ياب 88 .... وخبرتها أن فطوم بتينا وقلتلها هاتي الشلة كلهم...مشتاقه لحمودي
عايشه: زين يوم ياب 88... ترى خالد على قلة مذاكرته بس شاطر
مريم تتفشر: اكييييييييييد طالع على خالته
اسما: ههههههههه....يافشااااااااااااار!...شوي شوي على عمرك
مريم: اكيد بتفشر.... اذا اني بمدرستي يايبه اعلى نسبة
عايشه وهي قايمة: نسيتني بخروفتكن اتشوف درمينيا هيش سوت ف الغدا ...اسما حبتي بتغدي معنا اليوم
اسما: لا ماقدر خالوه...عذريني... بويه وحده تعرفي... بقول لو معه محمد
عايشة: ابوك خليه عليه.... بتصل به وبخليه يي يتغدي معنا
اسما: على شورك خالوه

وبعد الغدا....جلسو العرب بالمجلس يتثقلو وهم متسدحين
ناصر: كيف مريم هين ناويه تدخل؟
محمد: اكيد الجامعه... وبتصير مدرسة
صالح: بس بعده مانشدناها هيش بتخصص؟
ناصر: زين... الله يوفقها
محمد: ابويه صالح...ابا عمك ف كلمة راس
صالح وهو قايم: بروحي ابا استاذن...مواعد علي الاقيه برى... يالله.. ف خواطركم شي؟
ناصر: سلامتك صالح
محمد: الله معك...وسلم على علي
صالح وهو واقف: أن شاء الله يبلغ السلام...ف امان الله
وبعد ماراح صالح...محمد قعد وقعد معه ناصر
ناصر: هيش ف خاطرك بوصالح؟
محمد: والله من زمان افكر ف حمد واسما...من سنة ابا اكلمك عنهم..بس عاشه قالت خلي البنت تتخرج وبعدين تكلم
ناصر: اهااااه....زين كمل
محمد: تعرف من زمان وحن قايلين حمد لاسما
كمل ناصر: ومحمد لمريم
محمد: الحين محمد ومريم بنخليهم على صوب....خلينا نتخرف ف سالفة حمد واسما
ناصر بحزن: بس للحين المرحومة ماكملت شهرين
محمد: صالحه الله يرحمها..بس الحي ابقى من الميت....وانا ماقولك ان بنخليهم يعرسو الحين....بس ابا ااكد لك الحجز ونقدر نخليهم يعرسو ف اجازة نص السنة...يعني عقب 5، 6 شهور...وحن مابنسوي عرس وطبل...بس بنعزم الاهل
ناصر وهو يفكر ف بنته الوحيده اذا راحت عنه: خير لين اذاك الوقت....الله يسهل لهم

************************************************

************************************************
يوم الخميس...ف بيت محمد (بوصالح) التمت العايله...موزه وعيالها وريلها سالم.. وفاطمه وعيالها وريلها علي.. و ناصر وعياله اسما ومحمد...وغداهم عرسيه (اكله جعلانيه) بمناسبة نجاح مريم وخالد ف الثانوية...والكل كان يبارك لمريم وخالد على نسبهم
الحريم ملتمات ف مجلس الحريم....والعرب ف المجلس....واليهال ف الصالة على البلي ستيشن
ف مجلس الحريم (عايشه، موزه وبناتها(منال، منى)، فاطمه، اسما، مريم) :
منال: هاه مريوم..على هيش نويتي؟
مريم وهي تجس نبض امها: هندسه
عايشه: هيش هندسه نابه؟ مدرسة وماشي غير مدرسة
فاطمه: يامي الناس تطورو... خلوها تاخذ التخصص اللي تباه
عايشه: والناس هيش بيقولو عنا؟ مخلين بنتهم ف الهندسة
فاطمه: حن هيش علينا من الناس.. والله شغل المعلمة اتعب شغل
موزه: اسمع منال تتشكي من الحين
منال: عودتي....كلامهم صحيح....والله أن المعلمة تكد من الصبح لين فالليل..محد يرحمها
موزه: بس حتى لو اقتنعت امي...مستحيل ابويه يقتنع انا اعرفه
مريم: لا والله على كيفكم يعني؟؟...حرام عليكم تحرموني من حلمي
موزه: حن عادي عندنا...بس خلي الشوبه يوافقو قبل
مريم: ماعليكم من بويه....انا اعرف كيف اقنعه
منى تغايض خالتها: اونها دلوعة ابوها... يؤيؤ
مريم: دلوعة ابويه وامي والجميع...حرررررررررررررررة على العذال
منى تستعبط: وينكم يالعذال تسمعوها؟
مريم: محد غيرك انتي يامنوه
منى وتخلي عمرها مستغربة: افااااااااااااا.....اني؟؟...افا عليك خالتي..هي هي هي هي (وتمثل انها تبكي)...ماحسبتها تيي منك
والكل يضحك على اسلوب مريم ومنى ونجرتهن وتنكيتهن اللي مايخلص لما يتلاقن

ف مجلس العرب (محمد وعياله(صالح، حمد)، ناصر وولده(محمد)، سالم ريل موزه وولده(خالد)، علي ريل فاطمه)
محمد (بوصالح) : هاه خالد...على هيش ناوي؟
خالد: ناوي اقدم على منحة لبريطانبا...مثل ماسوى خالي صالح وعمي علي
علي: زين والله...واي جامعه ناوي؟
صالح: ابا لك جامعة اكسفورد... يمكن تخصص قانون
خالد: اني افكر كذيه
سالم وهو يناظر ولده بكل فخر: وحتى لو مادخل اكسفورد...الجامعات ف بريطانيا معظمهن معترف بهن...وفيهن تخصصات وايده
ناصر: تستاهل ياخالد....ماتكاسلت مثل غيرك.... وهو يناظر محمد وحمد
حمد: ياعمي هيش لنا بالتعب والمكده...حن ماصدقنا نخلص دراسة المدارس...تبونا ندرس مرة ثانية
محمد (بوصالح) : انت احمد ربك يوم لقينالك شغل بشهادة ثانوية...وغيرك يحوط ف الشوارع مامحصلين شغل
محمد: والله حقه عمي محمد...نعمه أن حصلنا شغل بشهادة الثانوية...وانا ناوي أن شاء الله اكمل انتساب ف مصر
صالح: زين والله...اي جامعه ناوي؟
محمد: جامعة القاهرة...واقول اتخصص ادارة اعمال
علي: حلو...انزين الشغل وافقو على دراستك؟
محمد: اها الحمد الله...وتكفلو بمصاريف الدراسة
صالح: نعمة والله....قليل تحصل هالشي
ناصر: وانت ياحمد ماناوي تكمل دراستك؟
حمد: ياعمي هيش لي بتعب الراس....كذيه انا مرتاح
محمد (بوصالح) : ياناصر اذيه راسه يابس...دوم نقوله وعلى حسابي اذا يبا...... بس ماشي فايده
صالح: خليه....يوم بيشوف اللي حوله يترقو وهو قاعد مكانه اذاك اليوم بيقول بكمل دراستي
حمد: ياخي ذبحتوني...دراسة ودراسة....اقول العرسي بيحترق...قومو بنعكسه
سالم: كنه يبا يتهرب؟!!
علي: شكله كيه
وضحك الجميع...وقامو الشباب صوب العرسيه ف الحوش...وبدو عكس....وكلن يتفاخر بقوته ف العكس...بس اكثر شي كانو ينكتو على سالم...لان يقول بعدني شباب...واقدر اعكس اكثر عنكم ياليهال............. وبعدين غرفو العرسية
والجميع تغدي

وكانو بالليل مخططات الشابات يسون حفلة لمريم...مفاجأة لها على النتيجة الحلوة
موزه وفاطمه حاولن يشغلن مريم وجلسن يسولفن معها عن النتايج والتخصصات وهالسوالف ومعهن امهن..وبقية الشابات جلسن يرتبن المجلس ويحطن شموع وزينة وملصقات عليها عبارات عن النجاح والتفوق مسوتنها منى بالكمبيوتر...وخلن محمد وحمد يجيبو الاغراض من كيك وبسكويت وكاكاوات وشكليت وعصاير وغازيات...والهديه كانت من فاطمه وموزه عقد ذهب فيه حرف الإم والجهة الثانية مبروك
ولما خلصن التنظيم...اتصلت اسما بفاطمه ييبن مريم...ولما دخلت مريم المجلس حصلته مبند قالت: وينهن اللاه الينيات؟ وراه مبند ليت المجلس!!.... وفاطمه وموزه وعايشه من وراها يبتسمن
وصرخن الشابات: سربرااااااااااااااااااااااااااااااااااااااايس
وولعن الليت...مريم نقزت من مكانها: بسم الله...الخسفات نقزتني..... وبعدين انتبهت للزينة والشموع والكيك والاغراض
ويوها احمد وساره وشكلهم كان ملائكي..احمد لابس ثوب ابيض يمد لها علبة مغلفة...وسارة لابسة فستان ابيض رقيق وتمد لها وردة حمرا
تجمعت الدموع ف عين مريم....خاطرها تصيح على المفاجأة اللي مسونها لها...قربت من احمد وساره...وناظرت ساره وكانت تمد لها الورده: مريم ندوك الوردة.. تعالي بعطيك بوسة...... قربت مريم من سارة وباست سارة مريم على خدها: مبروك يااحلى خاله
احمد: هالوه...هالوه (خالوه)............. قبلت مريم على احمد وهي تبتسم: عمري....
وتشوفه يمد لها العلبه: دوك...منوه تدول اعتيك اديه (ندوك...منوه تقول اعطيك اذيه)...وتألي ببوثك (تعالي ببوسك)
الكل ضحك على كلام احمد....خذت الهديه وقربت من احمد عشان يبوسها...وحضنت سارة واحمد
الكل قال: مبروكه مريوم
انتبهت للشابات وكانن متكشخات ولابسات قمصان وتنانير تهبل وغيرن لبسهن الاولي...وقالت لهن: والله تعبتو حالكم...كان مايحتاي
منى وهي تنكت: وحن كم خاله عندنا بتييب 97؟؟
منال: اكيد بس خاله وحده
فاطمه: ماكنكن نسيتن خالتكن فاطمه؟ وكانت يايبه ف التسعينات
منى: خالتي فاطمة انتي عدي زمانك...الاول ماشي حفلات ومفاجأت
موزه: هههههههه....حن راحت علينا يافاطمه
فاطمه: لا والله...اني ارحم عنك....عالاقل خلوني اكمل دراستي ويبت الشهادة العودة...مب مثلك لين سادس وطلعوك
موزه: هههههههه...اني عاد مب مقصر فيه...مزوجني بنت 16 سنة ومطلعه من المدرسة
عايشه: كلكن ماقصرو فيكن...ويكفو ياموزه عيالك...هم بيبو لك الشهادة
منى: عودوه...امي عندها 5شهادات...اللي هم حن...تقدر تعلقنا ف الصالة وتقول اللاه شهاداتي

ضحك الجميع على كلام منى....وهنيه دخلو عمار ومعاذ وهم يتراكضو...
عمار: ويييييييييه انتو بعدكم ماقطعتو الكيكة ولاسويتو شي....خالد يقول ابا قسمي من الحفلة...اني بعد ناجح
معاذ: اماه..يالله بسرعه عطونا
فاطمه: زين زين...حشا حشرتونا....ماظنتي خالد قالكم... بروحكم مستعيلين على بطونكم
معاذ: لا اماه...خالد قال مشو لهن وتشوفوهن هيش يسوون؟ وييبو لنا قسمنا
عايشه: يالله بنات حطن لخوتكن وهلكن...اكيد يتريو
موزه: أن شاء الله اماه
مريم: كلهم هناك؟؟
عمار: لا...محمد وحمد طالعين...هناك عودي محمد وعودي ناصر وبويه وعمي علي وخالي صالح وخالد واني ومعاذ
وحطو للعرب وخلو الخدامات يشلن لهم
احمد: ماما ابا بيبثي وهواوه (بيبسي وحلاوه)
موزه: لا ماشي بيبسي....عصير بس
احمد وهو بادي يبكي: هالوه ابا بيبثي وهوواه
مريم تنزل لمستوى احمد وتمسك ويهه بين ايدينها: من عيوني حمودي...واني عندي كم حمودي؟
موزه: مريم لاتعوديه عالبيبسي...مب زين له
مريم: بس بعطيه شوي
اسما: هاه الريم...هيش رايك فالحفلة؟
مريم: والله رهييييييييييييييييييييبة...وماتوقعتكم تسوو لي...مع اني استغربت غيبتكن من بعد المغرب....ولما سالت موزه وفطوم عنكن قالن انكن تبن ترجد فالمجلس...وانا وحليلي انضحك عليه
منال: وحن كنا مخططين وجالسين نرتب
مريم: والله ماقصرتو...فديييييييييييييييييتكم كلكم
منى: مانروم....مانروم
مريم: اقول لاتخسفي بلهجة الاماراتيين...سكتي احسن
منى: هيهيهيهي..لاتضحكيني وانا ماقدر....اصلا الاماراتيين لهم الشرف اتكلم بلهجتهم
منال: اقول بس بس عن الاماراتيين...مايهونو عليه
منى: ياتكم المحاميه....ليش انك تدرسي هناك...بتصيري محاميه لهم
عايشه: منال ماقالت سعاد متى بييو بالضبط؟
منال: والله ياعودوه كانت مطرشتلي تقول يمكن ييو بتاريخ 7\7
عايشه: موحشنا شيخه وبناتها
مريم: الا نوره... صراحه ماشتقتها
عايشه: مريوم....عيب...عن بنت عمتك
فاطمه: اماه....صدقها مريم...مايكفي انها بتسطلها وتطليبتها اللي ماتخلص و تكبيرتها الزايده وقلة احترامها له ولنا عقدت صالح بالزواج
مريم: لو واحد غير صالح....كان ذبحها من الضرب...بس اخويه طيب واحترم القرابه اللي بينا
عايشه: حتى ولو....بعدها بنت عمتكن شيخه....وشيخه محد اطيب منها
موزه: كلام امي صحيح...القرابة اللي بينا تفرض علينا نحترمها ومانتكلم عنها كيه
مريم بغير اقتناع: يمكن
منى: اقوووووووووول خلونا ناكل ميته يووووووووع بعد اذاك الترتيب والتنسيق
منال: انتي ماتفكري غير ف بطنك
اسما: حقها مسكينه...اكثر وحده اجتهدت فينا
مريم: فديييييييييييتها منوه....تعالي روحي بأأكلك بيدي
وضحك الجميع....وكملن الحفلة والكل كان مرتاح ومستانس...وروحو الجميع الساعه 10 عن بيت بوصالح ماعادا فاطمه باتت بيت ابوها

وبهالليلة حاولت مريم تقنع ابوها بتخصص الهندسة بكل الطرق...بس ابوها اكيد مستحيل يوافق وحاول يقنعها بانها تكون معلمة والتخصص اللي يريحها ف التربية... مريم حاولت تبين له أن حلمها تكون مهندسة.... بس هو بتفكيره الاولي قال لها أن الهندسة للشباب مب البنات وان الناس بيتكلمو عليهم اذا هي دخلت هالتخصص... وان هالمجال صعب عشان الاختلاط اللي فيه ومايسمحو لهن يتغشن...يعني صعبة من جميع النواحي
ومريم ماقدرت ترد على ابوها ووافقت رغم عدم اقتناعها لان شافته مستحيل تقدر عليهم وهم بهالتفكير رغم حلمها من وهي صغيره الهندسه...وقررت تسجل ف الجامعه تربية تخصص رياضيات...لانه احب مادة لها

انتظرو الجزء الثالث
وش من التغيرات اللي بتصير؟؟

مشوره اختي على التكمله فعلا قصه مشوقه وحلوه ذكرتيني بالف ليله وليله كل يوم تقوليلنا جزء ههههههه عشان تشوقينا عاد بروحنا فينا فضول

بسررررررررعه ننتظر التكمله

توتو تسلمي عالمتابعة
وترى الرواية بعدني مامخلصتنها... اكتبها عالراحات... وبحطها جزء جزء... اهم شي تثير الفضول عندكم وتحبوها

~ô§ô~كبريــاء انـثى~ô§ô~
ღღღღღالجزء الثالثღღღღღ
~ô§ô~كبريــاء انـثى~ô§ô~

بعد شهر ونص...قربت المدارس...وقربت الدراسة بالجامعات والكليات...مريم قبلوها ف جامعة السلطان تربية تخصص رياضيات وايمان ربيعتها قبلوها ف الجامعه اداب انجليزي...وخالد بيسافر بريطانيا جامعة اكسفورد....
فاطمه وعلي وعيالهم رايحين صلاله...وسالم وولده خالد رايحين مسقط عشان الحجوزات ويخلصو اجراءات خالد ف السفارة والوزارة

ف صلاله على سهل اتين بعد العصر..الجو مغيم ورذاذ بسيط يتساقط على الاعشاب الندية.. علي جالس مع فاطمه عالفرشة ومعاذ وساره يفررو الطيارات الورقية (جالسين بعيد عن الناس)....علي راجد ف ركبة فاطمة..ويفكر ف السعادة اللي هو فيها...خذ حبيبة قلبه اخت ربيعه...وياب منها احلى ثنين ف دنيته
فاطمه تمرر ايدها على شعر علي: اللي واخد عقلك
علي يناظر زوجته بكل حب: محد ماخذ عقلي وقلبي غيرك يافاطمه
فاطمه تبادله نظرة الحب وتاشر على عيالها: واللي يلعبو بالفرارات مب ماخذين عقلك وقلبك
يقبل علي صوب عياله: تراهم قطعه منك...اكيد بياخذو عقلي وقلبي... (ويرد يناظر فاطمه)..احبك يافاطمه
احمرت خدود فاطمه... تفكر والله كلما اسمع آالكلام كني اسمعه اول مرة وعلي بكل لحظه يردده...بس لما ينطقه غير...من قلبه... قالت له: اه منك ومن كلامك ياعلي
علي يتغزل فيها: فديت هالخدود اللي تحمر كلما قلتلها مث آالكلام...احبك احبك...ابا اصرخ احبك
فاطمه وهي تبتسم: تبا تفضحنا جدام الخلق؟ وعيالك بيقولو ين ابويه
علي: طيب قولي احبك وعطيني بوسه (ويغمز لها)
فاطمه: عيييـــــــب......والعيال!!!
علي وقلبه يدق كانه اول مرة يطلب هالشي: تشوفيهم منشغلين بالفرارات...يالله حياتي بسرعه قبل عن حد ييي
فاطمه بحيا قربت شفايفها من اذن علي وتساسره: احبببببببببك....وقربت من خده وعطته ال....
علي انتشى من هالحركه وتطمع: بس اني ماقلت على خدي....اباها هنيه ويأشر على شفايفه
ازداد احمرار فاطمه: لااااااااااااااه...اشوفك تطمعت....عيييييييييييب....ويوم حد بيطب علينا؟؟ خليها لبعدين (وتغمز له)
علي وهو يعرف كيف يحصل مطلبه: واذا قلت عشان خاطر حبيبك... ويأشر على نفسه
فاطمه بحيا: ااااااااااااااااااه منك...تعرف كيف تاخذ يوم تطلب.... وقربت منه... و"....." بالخفيف...وهنيه سمعو صوت ضحكة خفيفة...نقزو والتفتو على عمار وساره اللي كانو جالسين ياشرو عليهم ويضحكو....وضحكو علي وفاطمه وقام علي من ركبة فاطمه وقعد وهم يحسو بالاحراج من عيالهم...نادت ساره ابوها ببرائتها المعتادة: بابا تعال سوي لي الفرارة...سويها مثل مالة معاذ
علي بكل حب: من عيوني بابا
قام علي ومد ايده لفاطمه وراحو لعيالهم يلعبو معهم بالطيارات


ف جعلان ملتمة العايله كلها ف بيت غاليه بعد المغرب عشان سعيد ياي من ماليزيا
حمد: كيف الاجواء ف ماليزيا؟
سعيد: وايد رهيبه....لما رحت عنهم كان عندهم امطار
محمد: اصريه الامطار توقف عنهم؟...على مدار السنة
حمد: والله اقنع ف محمد ناخذ اجازه ونروح هناك...وهو مصدعني مالي بارض مالي بارض
محمد (بوصالح): حقه محمد...هيش يروح بكم هناك؟ مرتين كروحتو لها....وهنيه الجو زين تقول جو صلاله من حلاوته
ناصر: صدقت يابو صالح
محمد: خاصه لين رحت صوب السواحل....والله البرد يقتلك..ماتقول كنه صيف
سعيد: انزين هيش رايكم باكر نروح كشته عايليه؟ والله مشتاق ادور ف جعلان
حمد: وهيش لك بالعايليه؟...صداع حريم ويهال...بروحنا بنكشتك اني ومحمد على كيف كيفك (ويغمز لسعيد)
سعيد: لا...اني اباها عايليه...لاني مشتاق للمات العايليه...هيش رايك خالي محمد؟
محمد(بوصالح): مايخالف علينا...هيش رايكم؟ ويناظر خميس وناصر
ناصر: الشور شوركم...مايخالف
خميس: حن باكر يبو يونا بيت صالح (ولد خاله)...مانقدر...ماعليه انتو روحو
حمد: وبيت سالم من بيشلهم؟
صالح: اني بشلهم على سيارتي...وانت بتشل هلي
حمد: بيلعوز بك احمدوه.... ويقلد احمد:هالي ابا وابا
صالح: ههههه...احمد محد احلى منه حتى لو يلعوز
محمد وهو يفكر ف حبيبة القلب (ندى): وبيت عمتي نصرى...مب قايللهم؟
محمد (بوصالح): اني بقول لبوسالم...وبشوفه اذا بيمشو عندنا
سعيد: خلاص لعاد باكر بنسوي جولة ف جعلان الحبيبة

وقام سعيد بيسلم على حرمة خاله محمد وخالاته...عشان يتحمدن له بالسلامه
ودق على باب مجلس الحريم....وياته امه
سعيد: اماه.... بسلم على خالاتي
غاليه: ادخل يابويه محد غريب
سعيد دخل وهو يتنحنح: احم احم...السلام عليكم
قامت نصرى وشيخه وعايشه وهي متغشيه..وقربن منه يسلمن عليه
خاشم خالاته وحرمة خاله
عايشه: تستاهل سلامة الوصول سعيد...كيف حالك؟ واشخبارك؟
سعيد: الله يسلمك عمتي الحمدلله بخير...كيف حالكم.. واشخباركم؟
عايشه: الحمدلله كلنا بخير مانشكي باس
وتناشد العلوم مع خالاته.... وسلمت عليه موزه من بعيد
وجلس معهن شوي...يتكلم مع خالاته

بنفس الوقت مريم واسما وندى( بنت نصرى) ومنال ومنى وسعاد(بنت شيخه) جالسات بالمطبخ...يزهبن الفوالة....بعد ماطردن عمتهن او خالتهن غاليه وخلنها تروح عند الحريم
مريم: وراه مايات نوره معكن؟
سعاد: بس قالت مابا اروح
مريم ف خاطرها احسن مايات ولا شفت ويهها الكريهه
منى: وخالتي فاطمه متي بيو؟
مريم: بعد اسبوع....يقولو الاجواء هالمرة وايد رهيبة ف صلاله...وابوك متى بيو من مسقط؟
منى: ماعرف
منال: اتصل ابويه اليوم لما كنتي راجده...وقال بيو بعد باكر
منى: اهاه....ياخساره كنت ابا اكلمه...ابا اوصيه بحاجات
مريم: انتي حاجاتك ماتخلص مبونه؟
منال: اصلا حن بنروح الاسبوع الياي مسقط...واشتري اللي تبيه
منى: صددددددددق....من قالك؟
منال: انتي نسيتي مشيتنا قبل المدارس؟...عشان تبضيعتكم لاغراض المدرسة
منى بسخريه: وييييييييييه...صح..نسينا أن المدارس على الدرايش
سعاد: ههههههه....احيدهم يقولو على الابواب
اسوم: هههههههههه...تراها لازم تقلب كلامها...ولا ماتصير منوه!!!
منال: اقول هين الفنايين؟
اسوم: جالسة ادورهن مالقيتهن
مريم: منوه روحي نشدي عمتي غاليه عن الفنايين
منى حاطه ايدها على خصرها: وليش اني؟
سعاد: ماسمعتي أن اصغر القوم خادمهم؟
منى وهي تتفاخر بطولها: لا والله...اني اطولكن يعني اعتبر اكبركن...مب اصغركن
اسوم: وحن نقول اللي اطولنا؟!! نقول اصغرنا ف السن
منى بعناد: مااااااااااااااااباااااااااااااااااااا
منال: اقولكن لو قعدتن لين باكر مابتروح...محد اعيز منها...نشدني عنها
منى: منالووووووووووووووووه...جب
منال: جب ف عينك العيازه....مب كساع انتي امي تنازعك على عيازك اذيه؟
اسوم: اقول اني بروح انشد....حشا...كله اذيه عشان مشية للمجلس؟
منال: لا اسوم....اني بروح عنك...الزطيه اذيه مب منها فايده
منى تطلع لسانها لاختها منال....ضحكن اسوم ومريم وسعاد على ضرابة الاخوات
ندى كانت ف عالم ثاني مب منتبهه لضرابة البنات...اكيد مع محمد..
كان مطرشلها يقول: "اليوم بيت عمتي غاليه منور"
ردت عليه تبي تغيضه: "اكيد منور بولدها سعيد"
رد عليها اونه زعلان: "لاااااااااه....اغار...لاتنطقي اسم ريال على اسمك...ولاتتغزلي ف حد غيري...خلاص انا زعلت"
ردت ندى: "وابويه وسالم...ماتغزل فيهم بعد؟ "
رد عليها: "حتى ابوك واخوك لاتتغزلي فيهم....اغار عليك من نسمة الهوا ياقلبي"
دق قلب ندى على هالكلمة "ياقلبي" وابتسمت من خاطر...سعاد انتبهت لبنت عمها وبنفس الوقت بنت خالتها وقالت: هيييييييييييييييي.....اللي واخد عقلك....وبعدها تبتسم!!! اقول من تراسلي هناااااك؟؟
انتبهت ندى لحالها وارتبكت: لا...مممححد...بس اذيه نور ربيعتي من صلاله...تتذكريها اللي كنت اكلمكن عنها
سعاد: اهاااه
اسما: صحيح ندوي.. متى بتطلع نتايج توظيفكن؟
ندى: يقولو بعد اسبوع...كل حد يقول شي
مريم: ماينخاف عليك ندوي....تخصصك انجليزي ويقولو محتايين له ف جعلان
ندى: امين يامريم....الله يسمع منك...ماباني اتغرب زياده برى جعلان...والله مليت

منال وهي طالعه ماكانت متغشيه وكانت لابسه عبايتها....واول ماوصلت مجلس الحريم..يطلع لها سعيد ف ويهها...نقزززززززت منال وتمت متجمده ف مكانها تحاول تستوعب..من اذيه؟؟ هيش يسوي ف مجلس الحريم؟ وامي واني جالسة اتشوفه فيس تو فيس..وقالت: اوووه
وراحت تركض للمطبخ
بنفس الوقت...كان سعيد طالع من مجلس الحريم من عند خالاته...واول ماطلع من الباب...لقى قدامه بنت حلوه لابسه شيله وعبايه وانصدم مثلها ماعرف يتصرف...جلس يناظرها مثل ماهي تناظره...ويقول من اذيه؟ ياحلاتها...ويشوفها انتبهت للموقف وانها واقفه غلط وتركض عنه...ضحك سعيد عليها وعلى عمره...وحس قلبه يدق ويقول حلوه حلوه...بنت من؟؟ ماظنتي من بنات خالاتي ولا خوالي...ترد لسالم ولد خالتي وخالد ولده (لاتكون بنت سالم...بس سالم عنده ثنتين احيد؟؟)...ويه ويهها ملائكي وفيها شامه رهيبه ف ذقنها...ولا رقتها وهي تقول:اوووه...لازم اعرف من اذيه؟
طلعت غاليه ولقت ولدها واقف عند الباب وهو يفكر
غاليه: وراك واقف هنيه؟ تبا شي؟
سعيد بتلعثم: هاه...اممماااه..هاااه..ولا شي...يالله باي
وراح سعيد عن امه وهو مقرر يعرف من البنت...لانها شكلها سرقت له قلبه بهاللحظات اللي ماتتعدي الدقيقة

ولما راحت منال للمطبخ وهي تركض....دخلت على البنات وشكل ويهها مخطوف...ومنصدمة من الموقف
مريم: هين الفنايين؟
منال وهي متلخبطه: هااااه...ماندل
سعاد: لا والله....لعاد مامشيتي تنشدي خالتي؟
وهنيه دخلت خدامة خالتها غاليه...وانقذتها من الموقف
مريم: هيش فيك منال؟؟ داير راسك ولا شي؟
منال: ههههه...لا بس...شفت نسمة يات وقلت بنشدها...(وف خاطرها تقول فعلتي خير يوم ييتي...هيش بقولهن؟ كافخت واحد عند المجلس...شوف الغبا جالسة اتشوفه عيني عينك...بس والله ماعرفت هيش اسوي..انصدمت...واصلا هو بعد جالس يتشوف ولا صد عني....كيف يصد عنك؟وانتي مقابلتنه ف ويهه؟ الله بالستر....هيش هالحاله؟...بس من اذيه؟؟ ظنتي انه سعيد....شكله تغير...من 3سنين ماشفته...بس شكله محلو...وماشاء الله ياطوله...اقول ماكني قاعده اتغزل ف ولد العرب...الله يستر هيش بيقول عني واني مقابلتنه؟...مالت علي)

ف بيت غاليه...وبعد ماروحو الضيوف...جلس سعيد مع امه يسولف معها...وف خاطره يبا يعرف من اذيك البنت اللي لخبططت كيانه...ومن شافها وهو كله سرحان ويفكر...بس كيف بينشد امه عنها؟؟
سعيد: اقول اماه....اليوم بنات خالاتي وخوالي كلهم ييو؟
غاليه: اها كلهن ين...ماعدا نوره بنت عمتك شيخه..تحيدها من طلاقها من صالح...وهي ماتختلط ببيت خالك محمد
سعيد: وبيت سالم يو؟ سالم وولده مايو...رايحين مسقط
غاليه: موزه وبناتها ين
سعيد: يدرسن؟
غاليه: منال ف عجمان تروح سنة ثالثة ومنى الربشة تروح ثاني ثانوي
سعيد: احيد وحده منهن فيها حبة خال
غاليه: اذيه منال...فيها حبة خال ف دغمتها...محلتنها الحبة...آالبنت عايبتني...هاديه ومحترمة وطيبه...اكيد دامها مجنية (حفيدة) محمد ونصرى خوتي...وسالم وموزه عرفو يربو....عيالهم كلهم زينين
سعيد ف خاطره...لعاد اذيه منااااااااال!!!....صح والله تذكرت لما كنا صغار كنا وايد نعلق على شامتها وهي متعقده منها...بس احلوت وايد بنت سالم
سعيد: اماه
غاليه: هيش ف خاطرك امي؟
سعيد: ابا اخطب
غاليه بحزن وفرح: من متين واني اتريا تقول آالكلمة...بس حرمة خالك مالها غير 3اشهر
سعيد: يامي اني بخطب البنت الحين والسنة الياية لما بيي بتخرج وبيي من ماليزيا بملك عليها
غاليه: من تبا؟
سعيد وهو مستحي: منال بنت سالم
غاليه: اهااااه...واني اقول ليش ينشد عن بنات موزه؟...طلعت مب هين ياود عبدالله
سعيد وهو يضحك: هههههه...يامي لازم ننشد عنهن...مب منيه والدرب
غاليه: ونعم ماخترت....جمال واصل واخلاق...وتكفي انها بنت سالم بن احمد ومجنية نصرى ومحمد
سعيد: انزين اماه...انتي كلمي موزه...وشاوريها...خليها تشاور منال وابوها...واذا وافقو...بنحدد الملكة السنة اليايه...هيش رايك؟
غاليه وعيونها مدمعه: على شورك يابوي... و سالم وموزه مابيلقو احسن منك
سعيد: طيب يامي قومي رجدي....باكر ورانا نشره...اتفقت مع خوالي نتكشت ف السواحل...خلي نسمة تزهب القهاوي واللي محتاينه من السوق بييبه الصبح
غاليه: أن شاء الله يابويه...سمعت البنيات يطلبن كشته
قام سعيد وراح لغرفته وهو يفكر ف منال...ويدعي الله انها تكون من نصيبه

**********************************************

**********************************************

ف بيت محمد....موزه وعيالها يو بيت ابوها يباتو عندهم...وجالسين بالصاله مع ابوها
محمد: باكر بنمشي كشته...زهبو عماركم
مريم: والله ابويه؟؟ وحليلنا ( جنبها منى... وتحاضنن هي ومنى)
عايشه: الله بثبات العقل...اللي يشوفكن يقول محد يطلعكن من البيت
منى: عودوه.....كشته غيييييييييييييييير...يعني تغيير جو
موزه تسال ابوها: لابيتنا ولا عندنا حد؟
محمد: بيت عمك احمد وبيت عمك ناصر بس بيت خميس قالو مب ماشين بيوهم بيت راشد ود خاله...وسعيد هو طالب المشيه
عايشه: مسكين....بيكون مشتاق الدار...سنه بحالها وهو بعيد عنها
(منال انتبهت لما ذكرو سعيد وقلبها دق وتذكرت الموقف وابتسمت)
موزه: مابتكفينا سياره وحده
محمد: بنروح على سيارتين...حد بيركب ف سيارة صالح...وحمد بيسوق سيارتي
منى: اللللللللللللله وناسه....بنركب ف سيارة خالي صالح....هيش رايك مريوم؟....والشياب بنخليهم ف سيارة عودي
مريم: احسن...بناخذ حريتنا مع صالح....مب حمد استحن استحن...وحتى المسجل مايشغله يوم نركب عنده
موزه: منال شلي احمد...رجد مسكين....اليوم ماقعد بيت عمتي غاليه...من مجلس العرب لمجلس الحريم
منال: أن شاء الله امي

عمار متصنم جدام البلي ستيشن ويضغط اذيك الحبات
محمد: اذيه ولدك مايشبع من البلي ستيشن؟؟...عيونه بتروح
موزه: هيش نسوي به يابوي؟.. ف بيتنا نضمه عنه...بس هنيه يلقاه جاهز ف الصاله...واول مايشوفه سيده صوبه
عايشه تكلم حفيدها: عمار ثور رجد....باكر وراك كشته
عمار وهو مندمج: بس شويه عودوه
موزه وهي قايمه تبند الجهاز عنه: لاشويه ولا وايد...يالله الساعه 10 ...رجاد بسك من اللعب
عمار معترض: لاااااااااا....اماه لاتبندي...اخر لعبه بس
مريم: موزه خليه...اني براقبه لين يخلص اللعبه وبعدين ببنده عنه
محمد قايم يرجد: يالله اني برجد....وباكر اذا احتيتو اغراض للكشته خلو صالح ولا حمد ييبوهن الصبح
عايشه: ان شاء الله
راح محمد...ومن الصوب الثاني دخل صالح ووراه حمد
مريم: اوووووووووووووه اشوفكم اليوم مقدمين...خاصه حمد.. كيف بنقبل المدفع؟
صالح: هههههههه...اني من اول ماتاخر...بس حمد يمكن
حمد: مريموه سكتي عن الهذره الوايده...مشي هاتي لي كوب ماي
مريم باعتراض: قالو خدامتك واني ماعرف؟؟!!
عايشه: قومي ييبي له وعن الحسوس...ابوكم يبا يرجد
منى: اني بقوم اييب الماي...ولاتتضاربو
حمد وهو يناظر اخته: شفتي السنع ف بنات موزه...مب انتي متعوده على العياز
مريم سكتت وحقرته....وهي ف خاطرها متى بحصل احترام منك؟.. يا تنازعني يا ماتتكلم معي... ماعرف هالاخو طالع على من؟...ادري عنده سوالف...ومايفكر غير ف مصلحته... نعاك لصالح ف عيونك....فديتك ياصالح دووم قريب منا....واللي نطلبه تنفذه ورحيم مع الجميع الصغير قبل العود

وهنيه دق تلفون حمد... الرومانسي يتصل بك
رد حمد: هلااااااااااااااا بوجاسم...هيش الاخبار؟
وقام وطلع ف الحوش يتكلم على راحته...على الخط ردت البنت برقه مصطنعه وبدلع زايد:ههههههه...بوجاسم هاااااه؟؟ شكل الجو مغيم؟
حمد بعصبيه: مها اني ماقايلك لاتتصلي...بروحي كون اتصل فيك
مها بزعل مصطنع: يعني اذيه يزاي اني اشتقتلك واتصلت؟؟....يالله بااااي
حمد هدي ويحاول يراضيها: وييييييييييييييه مهوي لاتزعلي...اني قايلك ترى لما بفضى بتصل بك....والحين داخل بيتنا ماواحيت اوصل حجرتي
مها تتغلي: حتى ولو....تنازعني كذيييييه؟؟ اهون عليك؟
حمد: حبيبتي ماتهوني عليه...بس تصرفاتك بعض المرات تنرفزني...يالله عاااااد بس عن الدلع...هيش الاخبار؟؟ اشتقيتلي ولا
وكمل حمد سوالفه مع البنت...حمد كل يوم على هالحاله من بنت لبنت....وبعد ماخلص المكالمة
دخل الصاله وحصل موزه ومريم ومنال ومنى ومعهن صالح

مريم: يالله صلوحي....لاتصير عناااااااادي
صالح: صلوحي ف عينك....اصغر عيالك قالولك؟
مريم: فديتك ادلعك بس...يعني اذا مادلعتك قولي من بيدلعك؟
منى تغايض خالتها: بتدلعه عودوه وامي وخالتي فاطمه واني ومنال
صالح: هههههههههه...شفتي وايد اللي بيدلعوني...بس ماينادوني (وهو يقلد مريم) صللوحي
مريم تمثل انها زعلانه: لااااااااااااااه...يعني استغنيت عني الحين؟؟....طيب ياصلوح....بعدين بتييني وبتحتايني وبتطلب...بقولك روح للي يدلعوك
موزه: الله يقطع سوالفكن....اقول يالله قومو...باكر مابتقدرو تثورو من الرجاد...اكيد الشياب بيغبشو عليكم من الصبح
منال: برايه انتو بيشلكم خالي حمد من الصبح....وحن بنخلي خالي صالح يشلنا وبنثور على راحتنا
حمد: وانتن عاد قسمتن عماركن؟ بتركبن عند صالح؟
صالح: تراهن قبل شويه جالسات يقنعني...اوين البنات يبن يركبن بروحهن...وانت بتشل هلي وعمي ناصر وموزه وعمار واحمد
حمد: اصلا عمي ناصر...بيشلهم محمد...نسيتنه؟
مريم: برايه محمد..ركبوه ف الدبه معكم...واسوم بتركب معنا
حمد: محمد ياهل!! يركب ف الدبه؟ مالت عليكن وعلى تفكيركن
صالح: انزين محمد بيركب معي جدام
مريم: لاااااااااااااااااااا...حن نبا ناخذ حريتنا
صالح: اقول خير لين باكر....بنشوف عمي ناصر...واسما اذا تبنهي تركب معكن مب مشكله بنخطف عليها
مريم ومنى قامن يبن يحظنن صالح: فديييييييييييييييييييييييتك صلوووووووحي
صالح وهو يخوزهن عنه: هههههههه...بعد ردن على صلللوحي...قومن عني لا اغير رايي
حمد: اللهم تثبت علينا العقل....تشوفن منال عاقله مب يوبكن....متى بتصيرن مثلها؟
منى: امبونا مانبا نعقل.....احسن كيه...صح خالوه...فللللللللللللللللله
صالح: اني بقوم ارجد...يالله تصبحو على خير
الجميع: وانت من اهل الخير
حمد وهو يناظر منال ومريم ومنى: وانتن الثلاث فارقن....وشلن مدمن البلي ستيشن معكن...ابا موزه ف كلمة راس
مريم: انزين...يالله عمور...بسك...من متي تقول اخر لعبه؟؟
عمار: بس اخر مرة..اخر مرة
منال وهي تبند الجهاز: اقوووووووول قوووووووووم...تضحك على من انت؟
عمار: لاااااااااااااااااااا...لاتبنديه
وشلنه منى ومريم تسابلنه وهو يصرخ....وراحن ف حجرة مريم...موزه وعمار واحمد يرجدو ف حجرة....ومريم ومنال ومنى بيرجدن ف حجرة مريم

موزه قبلت على اخوها: هيش ف خاطرك حمد؟
حمد: ابا انشدك عن ندى بنت عمتي نصرى
موزه: وراها؟
حمد: خلصت دراسة؟
موزه: اها....والحين تتريا التوظيف...ليش تنشد عنها؟
حمد وهو يفكر زين والله: افكر اخطبها؟
موزه وهي ومنصدمه: هييييييييييييييييييش؟ تخطبها؟ واسما بنت عمك؟
حمد: هيش فيها اسما؟
موزه: نسيت كلام ابويه...انه يبا اسما لك
حمد بنفاذ صبر: لا والله...الحين بيتزوج ابويه ولا اني؟
موزه: الله يهديك ياحمد....تراه مكلم عمي....ولانسيت كلامهم؟
حمد: اذيه كلام له اكثر من 10 سنين...من وحن صغار
موزه: بس بعدهم على كلمتهم....عمي كلما حد تقدم لاسما رفض...عشانك انت
حمد: والله اني ماقلتله ارفضهم
موزه: افا عليك ياحمد...هيش آالكلام؟؟...ترى مارفض الا عشان كلمة ابويه
حمد: صراحة اقولك اسما اعتبرها مثل اختي....ومالها أي مشاعر عندي
موزه: كيف اختك؟. وانت حتى ماشايفنها من يوم اتغشت
حمد: اقولك ماحس لها بأي شعور
موزه: ياحمد...ياخوي....مايصير اذيه الكلام....وبعدين لو سمعك ابويه تقول كذيه....والله بيقوم الدنيا...مايهونو عليه لا عمي ولا اسما....وبعدين نسيت انها يتيمة تبا تكسر بخاطرها وخاطر عمي؟
حمد: هو الزواج بالغصب؟
موزه: مب بالغصب....بس
حمد: بس هيش؟
موزه: السالفة فيها كلام عرب...يعني صعبه تيي الحين وترفض...وتقول ابا غير اسما..وبعدين تعال هنيه...ليش فكرت ف ندى؟ مع انه ندى واسما واحد
حمد: الحين انتي بدل ماتفرحي لاخت ريلك أن ابا اخطبها....تقولي كلهن واحد
موزه: صدج انها بنت عمتي واخت ريلي...وماتهون عليه...بس كلام الصدق ينقال...انت محجوز لك اسما
حمد: انزين ياخذها صالح
موزه: هههههه....ضحكتني واني مابا اضحك....يعني نسيت صالح ومشكلته؟!!!
حمد: صالح لازم بيي يوم وبيتزوج....مستحيل يتم بلا حرمه وعيال
موزه: انت نسيت أن صالح مطلق اكثر من 3سنين...ويوم نفتح معه سالفة الزواج يعتفس علينا وينازعنا...ويقول مالكم خص فيني اني مرتاح بلا يواز وبلا حرمه
حمد: انزين اذا قلنا له عن اسما يمكن يوافق
موزه: لا والله....لمصلحتك بتلصق اسما ف صالح!
حمد بضيق: يووووووووه ياموزه....لاتضيقي بي...ياينك ابا منك الشور وتقول لي آالكلام؟؟
موزه: تراني ماقلت غير الصراحه
حمد: انتي كلمي امي وخليها تكلم ابويه
موزه: روحي مالي خص...بعدك تبا تمشكلني اني وامي ف ابويه....روحك كلمه...واذا وافق عادي عندنا حن
حمد: يعني كلامي معك مب منه فايده
موزه: ياحمد والله لو ف ايدي الشي مايخالف عليه....بس اذيه ف ايد ابويه وعمي....مابا اسوي مشاكل بينهم ونتفرق بسبة زواج
حمد: يعني اني اللي اتزوج واتمشكل عادي؟
موزه: تراك ماشفتها البنت...ووالله اسما تنحب ومحد مثلها...حتى لو ندى بنت عمتي
حمد: اقول اني بروحي بتصرف وبشوف
موزه: ماقول غير الله يعينك ويعين ابويه عليك

وقام حمد وهو يفكر كيف بيقنع ابوه واخوه....ويفكر بندى...وهو مايباها عشان انه يحبها بس لانها بتتوظف وهو يبا موظفه...مشكلة حمد انه مصلحجي شوي...صحيح اسما متخرجة بس ماراح تتوظف بسرعه مثل ندى...يعني ندى جاهزة مجهزة...بس قرر ياجل الموضوع شوي عشان حياة حرمة عمه....مابيقدر يتكلم ف الموضوع الحين

ف حجرة مريم....منى كانت راجده...ومريم ومنال قاعدات يسولفن بشويش عن يزعجن منى
منال خبرت مريم عن اللي صار لها مع سعيد...اكدت لها مريم انه سعيد لانه اكيد ياي يسلم على امهاتهن...
منال من وصار لها الموقف تحس عمرها غير...قلبها يدق يوم تتذكر الموقف...وتضحك على حركتها معاه...بس هو ليش كان يتشوفني بأذيك الطريقة؟؟...تقول كنه ماشايف بنات ف دنيته!!....كيف ماشايف وهو عايش بماليزيا!!...احسها هاللحظات مستحيل تغيب عن بالي...ااااااااااااه ولا نظرة عيونه....احسهم كانهن بحرتغوص فيه لما اتذكرهن...وكانه فيهن حنان العالم كله....ماكني مصختها جالسة اتغزل فيه!!!....هيش خصني فيه؟؟...بس تراه ماطايع يخوز عن بالي....يوووووه اليوم شكلي مابرجد وباكر ورانا طلعه...يعني بشوفه!! ياليت اشوفه مرة ثانية... الله بالستر...شكلها هواتة رجاد بدت...رجدت منال وطول رجادها وهي تحلم بسعيد... ف ويهها ويبتسم ويحط فوق راسها تاج من ياسمين

من الصباح...الجميع متجهز للكشتة...ف سيارة محمد (ستيشن تويوتا) يسوق حمد ولده ومعهم عايشه وموزه وعيالها عمار واحمد
ف سيارة صالح (ستيشن لكزس) راكبات البنات (مريم راكبه جدام، منال، منى، واسما)
ف سيارة محمد (برادو) معه ابوه وعمته غاليه وسعيد
ف سيارة احمد (ستيشن تويوتا) حرمته نصرى وبنتهم ندى
وتحركت السياير صوب الاشخرة...ناوين يجلسو هناك لين مايتغدو وبعدين بيكملو جولتهم على السواحل...كل السياير هاديه ماعدا سيارة صالح....البنات مسويات ربشة وصالح عاطنهن حريتهن...مطولات عالمسجل ويغنن معه...ماعدا اسما اللي كانت مخيلة من صالح وماقدرت تربش معهن (مع انها ماتخيل من صالح كثر حمد اللي محجوزه له...بس ماقدرت تدسر صالح وايد)...وخلنه يمر على سوبر ماركت ويشتري جميع انواع المكسرات والكاكاوت والمينو والشيبس والبيبسي والعصاير...كله عشان يستمتعن بكشتتهن على اصول على قولتهن
منى: خالي صالح طول علي المسجل؟
صالح: ازيد اكثرعن كيه؟؟ اقول اشوفني دلعتكن زايد عن اللزوم....لاتخلني ابنده
منال: منوه بسك من التطليبه...خلي خالي على راحته
صالح: نعنكن منال واسما العاقلات....مب انتن ماسكتتن من اول ماطلعنا...نبا وطول وسوي وغيره
(ابتسمن اسما ومنال...ومريم ومنى اعترضن)
منى: صدعتونا بمنال واسما اسما ومنال...تراهن يريشن بس ماتشوفوهن
مريم: وييييييييييييييييه صلوحي...اذا مادلعتنا انت من بيدلعنا؟ تراك اطيبهم واحلاهم
صالح: اها...ضحكن عليه بالكلام...لو مخلنكن عند حمد احسن
مريم: لاااااااا.....الا حمد....تباه يعقدنا؟
اسما تسمع السوالف ومبتسمة على ضرابتهم...وتقول ف خاطرها صالح وايد طيب...ماشاء الله عليه...ياحظها اللي بتاخذه...مب حمد اللي بين كل لحظه ولحظه اسمعهن بيعقدنا وبينازعنا...الله يستر اذا خذاني...بس سبحان الله من كثر ماسمعت اني لحمد وحمد لي...احسني خلاص تاقلمت وماتخيل نفسي مع حد غيره
منال دقت اسما ف ايدها: وينك؟ مالك حس
اسما تكلمها بصوت خفيف عشان مايسمعها صالح: هيش تبيني اقول؟؟ ورطتني لما يبتني معكن...انتن مستربشات واني مثل الاطرش ف الزفة ماقادرة اسوي شي
منال: تراه لاخالي صالح....محد اطيب منه...وخذي راحتك معه...عاااااااااااااااادي


وصلو للشاطئ وجلسو فمكان بعيد عن الناس...حطو الحريم ف مكان والعرب ابتعدو عنهن شوي عشان ياخذن راحتهن...وكان الجو رهيييييييييييب...مغيم وبارد شوي رغم انه صيف

العرب فرشو لهم فرشة....الشياب محمد وناصر واحمد جالسين على صوب ويسولفو عن ايام زمان وذكرياتهم...والشباب كلن منسدح على صوب ويتامل البحر
محمد الفرحة ماواسعتنه أن ندى قريبة منه....خاطره يتمشى معها على الشاطي...ااااااااااااااه ياندى متى بمسك ايدي ف ايدك وبنمشي على هالشاطي؟؟؟
وسعيد منال ماخذه كل تفكيره...ويتذكر موقفه معها بارحه... ويتذكر الحلم اللي حلمه...يشوفها جدامه وهي لابسه ابيض ويلبسها خاتم....اااااااااااه يامنال والله وخذيتي وعقلي تفكيري من موقف بسيط...الله يكتبها لي
حمد يفكر ف مشكلته مع اسما وكيف بياخذ ندى؟
صالح مرتاااااااااااااااح بينهم ولا يفكر ف الحريم ولا غيره....وكان احمد الصغيرون ف حضنه
احمد ياشر عالبحر: هالي.. ابا مي (خالي ابا ماي)
صالح: اذيييييييييييييييه بحححححححححححححر
احمد يقلد خاله: بهههههههههههر
صالح: هههههههههههههههه....لا... بــــــحــــــر
احمد: خلا بههههههر
صالح: الله يقطع سوالفك يابوحميد...هيش بههههر...لو يسمعوك الشياب!!هيش بيقولو!!...خلا انزين بهههههر ههههههه. وشل احمد ف حضنه وراح يتمشي عالشاطي....وف الصوب الثاني ياينه عمار من عند الحريم وهو يركض
عمار وهو يكلم خاله من بعيد: خالي صالح...تعااااالو بتشلو الفوالة لكم
صالح مايسمع من صوت البحر: هيييييييييييش تقووول؟
قرب عمار وهو يلهث: تقولكم عودوه تعالو بتشلو الفوالة...محد عندهم يشلها لكم
صالح: خلى انزين... بنيبها اني وياك
وروحو صوب الحريم
البنات كانن عالشاطي...وعايشه ونصرى وغاليه وموزه جالسات ف الفرشة
قرب صالح منهن وسلم على عماته...وكلم امه: لو يايبين الخدامات احسن يساعدنكن
عايشه : مايحتاي خدامات...الاكل ومطرحنه ف المطعم...والفواله جاهزه...لهيش نيبهن؟؟ زيادة صداع
نصرى: قعد ياصالح...البنات بعيد
صالح: لا اني ياي اشل الفوالة...من ساعه ابويه يطلب القهوة...متعود على قهوة الضحى مع امي (ويغمز لامه)
غاليه تغلس على حرمة اخوها وبنت عمها: لعاد شلها معه...مابتهياه القهوة بدونها
وضحك الجميع: ههههههههههه
عايشه استحت من كلامهم: بسكم عاد....يالله موزه عطي صالح الفوالة وخليه يشلها
موزه: اهاااه...اماه؟...مايهون عليك الشايب يقعد بلا قهوة؟...ههههههه...تعال صالح...بس مابتقدر تشلها كلها
صالح يشوف الفاكهة والكيك باصناف ومندازي ومكسرات وشكليت والقهوة والشاهي والعصاير: كل اذيييييييييييييييييه؟ حسبت شي خفيف
موزه: ترى محد بياكله بعدين....قلنا بنحطه مرة وحده وكلو على راحتكم
صالح: لحظة بتصل على حمد ييب السيارة وبنشله

عند الشاطي كانن البنات يايات يتراكضن (مسويات سباق)...ومب منتبهات لصالح...وكانت اسما ومنى متقدمات البنات بوايد...التفت صالح على صراخ البنات...ويشوف منى ومعها بنت (بس ماركز ف ملامحها، مايهتم يشوف البنات عكس الشباب) يركضن على الشاطي ويطيحن على الشاطي وهن يضحكن....صالح ابتسم على تخبيلة البنات
اسما وهي تضحك تلتفت صوب الحريم وتشوف صالح معهن...صرخت وتورات ورى منى: ياربي فضييييييييييحة....شوفي معهن صالح
منى تضحك على اسما: ههههههههههه...مقلللللللللللللب....هههههههههه وتركض عن اسما... اسما تغشت وعدلت من عمرها وردت صوب البنات اللي يايات ركض وتاشر عليهن أن صالح موجود
يا حمد وشل صالح وعمار وشلو الاكل معهم...وجلسو ياكلو
والحريم بعد زهبن فوالتهن ونادن البنات وجلسن يتقهون

بعدين محمد وحمد وصالح راحو ييبو الغدا اللي مسونه ف المطعم الشعبي
وسعيد يسبح ف البحر ويعلم عمار السباحه

البنات كانن ماخذات حريتهن انهن بعيد عن الناس وهلهن..مستمتعات بالجو...وجلسن يتسبحن ف البحر... سعيد كان بعيد عنهن بس ينشاف أن حد يتسبح

منال ومريم كانن متعمقات ف البحر...وندى واسما ومنى ماتعمقن مثلهن
كان البحر هايج...والموج قوي...والبنات مايعرفن يسبحن زين...وياتهن موجه كبيرة...ندى واسما ومنى ركضن صوب الساحل...ومنال ومريم ماواحن...وتغدف بهن عالساحل...وطاحن بقوة.. مريم قامت بسرعه...منال ماقدرت توقف وشربت ماي وشلتها الموجة صوب البحر حاولت تقاوم وتقوم بس تشرقت بالماي (صرخن البنات لما شافن الموقف...ويشوفن منال تشلها الموجة بعيد عنهن)
قامن الحريم على صوت البنات وشافن وحده شالنها البحر..وروحن يركضن صوبهن...وسعيد انتبه للبنات...وطلع من البحر ويا ركض صوب البنات...ويشوفهن يبكن ويصارخن: منال.... مناااااااااااال.... نقز قلبه يوم سمع اسم منال... ولاشعوريا ركض بسرعه ودخل البحر...وسبح...وكانت منال تنبان مرة...ومرات يغوصها الموج ف البحر...وهي خلاص ماقادرة تتنفس...تبا تتنفس تصرخ...بس تحس كانه حد كاتم على فمها...تشاهدت على روحها...وتقول خلاص بمووووووت

انتظرو معنا الجزء الرابع.......:cool:

ياربي بسرعه كملي والا تراني بييك الحين وبسرق الدفتر ههههههههه