بسم الله الرحمن الرحيم
حبيت تقرو معي اول رواية لي
تحتوي على اجزاء
اذا حبيتو الجزء الاول... وشجعتوني على المواصلة;) ... بكمل معكم وبكمل بقية اجزاء الرواية...وتقدرو تطلبو التثبيت لها ف القسم :D

ولاتبخلو عليه بارائكم :o

تقبلو مني ارق تحية اختكم :)

بسم الله الرحمن الرحيم

ღღ رواية: ღღ
~*¤ô§ô¤*~~ ليش ياهلي وناسي؟!! ~*¤ô§ô¤*~~
ღღكتابة: ღღ
~ô§ô~كبريــاء انـثى~ô§ô~

رواية من تأليفي…بلهجتي الجعلانية…رواية اجتماعية عاطفية…
حاولت امثل فيها بعض من الواقع اللي معايشنه…والمعروف بتحفظه وتزمته فبعض المسائل…الا اننا نلاحظ بعض من التفتح الحضاري بدأ يغزو مجتمعنا ويغير هذه العادات

ليش ياهلي وناسي؟!! ماتخلوني على راحتي؟؟ اختار اللي اريده...ليش تفرضو علي رايكم؟؟ وتخلوني اعاني...ليش ماتتركو لي حرية الاختيار؟؟ وف النهاية اكون مسؤول عن قراري حتى لو غلط...ليش تربطوني بعادات حتى ديني ما اقرها؟؟ بس مجرد عادات ورثتوها من اللي قبلكم...ليش ماتعايشو الواقع اليديد وتاخذو منه الزين وتتركو الشين؟؟...كل هالشي من خوفكم علينا ولا ايش؟؟
هذه الرواية ربما تجيبكم على هذه التساؤلات...نثرتها بين ايديكم...واتمنى أن تقبلوها كهدية مني لكم......وان تنال على اعجابكم…وتثير الفضول والحماسة عندكم

*أولا:: التعريف ببعض كلمات اللهجة الجعلانية:

هيش: ايش، شو، وش
هين: وين
عرب: الرجال
زهب: جهز
اها: ايه، نعم (ابيكم تنتبهو لهالكلمة...لانها عند ناس ثانيين للاستيعاب والاندهاش نحن نقول ف هالحاله اهاااه) انما ف "اها" فتحه عالالف وسكون عالهاء ومانمد ف الاخر
اذيه: هذا وهذي...يعني للمؤنث والمذكر...والاختلاف ف حركات التنوين للمؤنث نكسر الذال ونرققها( أَذِيه)
حن: نحن
اني: انا (مو مثل مالة العراقيين، حن مانطول الالف مثلهم، الالف تكون فيها فتحة بس)
ثوري: قومي، فزي (بالضم على الثاء)
كيه: كذيه (بعض المرات نختصرها ونقول كيه)
كيف شراك: كيف حالك
ينشد: يسأل
خروفة: سالفة (مو تانيث للخروف هههههه…ننطقها غير… بفتحة عالخاء وسكون عالواو)
يتخرف: يسولف
استحي: تغشي، غطي وجهك ( يعني مب معناتها من الحيا...نقول بدالها خيلي (خجلي))
عودي: جدي
عودتي: جدتي
مب: مو
يوب: مثل

ننطق الجيم يا (مثلا جا: يا)…والقاف جيم (قال: جال)…مثل اخوتنا الاماراتيين وبعض الكويتيين والبحرينيين…

ومانبدل ضمير المخاطب المؤنث " الكاف" الى ج او ش انما ننطقها كاف (مثل اقولِك، فيِك) بس نزيد كسرة للحرف اللي قبل الكاف…يعني مثل السعوديين بس النطق غير شوي

(( وضمير المتكلم للجمع " نا" نقلب الالف الى يا ( مثلا تعشينا ننطقها تعشيني) بسكون على النون واليا..يعني مانمد الياء وايد
وينطبق على ضمير الغايب للمؤنث (عليها ننطقها عليهي)
بالاضافة الى بعض الكلمات اللي تحتوي ف نهايتها حرف الالف (مثلا عشا ننطقها عشي)
(وهنيه ماكتبت على لهجتنا…كتبتها باللهجة العامية..عشان ماتتلخبطو بس ذكرتها للتعرف على اللهجة وتحاولو تتاقلمو معها) ))

*ثانيا:: التعريف بالشخصيات:

عائلة محمد:
محمد: الاب, يشتغل بالاعمال الحرة وعنده اخو(ناصر) وثلاث اخوات (نصرى، شيخه، غاليه) وهو الاكبر بينهم, متزوج من عايشة بنت عمه راشد ( وحيده ماعندها اخوة), وعندهم 3 بنات وولدين
موزه:36سنة،البنت البكر, متزوجة ولد عمتها نصرى سالم, وعندها بنتين و3 اولاد
صالح:29سنة، بعد موزه والولد اللي معتمد عليه ابوه, مطلق (كان ماخذ بنت عمته نوره) بس عقدته ف شي اسمه زواج، يشتغل ف صور متخرج من بريطانيا، طويل وعليه جسم ضخم
فاطمة:27سنة،بعد صالح ومتزوجة من عيال خوال امها من الوافي وتعيش هناك وعندها ولد وبنت، معلمة
حمد:24سنة بعد فاطمة, يشتغل ف مسقط وعزابي...وراعي سوالف..وصديق ولد عمه محمد الروح بالروح، دبدوب شوي ابيض واقصر من صالح
مريم:17سنة,اخر العنقود ودلوعة العايلة واخر سنة بالثانوية، بيضا وطولها متوسط وعليها جمال يجذب أي شخص يشوفها خاصه عيونها العسليه وشعرها الطويل

عائلة ناصر:
ناصر: الاب, واخو محمد وعنده ولد وبنت، متقاعد (كان ضابط بالبحرية)، طيب القلب
محمد:25سنة،الولد البكر ويشتغل ف مسقط وعايشين هو وحمد بشقه هناك، وسيم واسمراني، ومغرور شوي
اسماء: 20سنة، سنة ثالثة تقنية مسقط، جمالها هادي..بياضها متوسط...وشخصيتها هاديه وحبوبه

عائلة سالم (زوج موزه):
سالم: 40سنة، يشتغل بمديرية الاسكان ف الشرقية جنوب
منال: البنت البكر، 19 سنة.تدرس بجامعة عجمان ف الامارات، شخصيتها هاديه وخجولة، جميلة ومحلتنها شامة بذقنها
خالد: ثالث ثانوي، ووايد قريب من ابوه، ومحسسنه بالمسؤلية، وملامحه قريبة من ابوه
منى: اول ثانوي، وشخصيتها مرحه..ودوم تنكت خاصة اذا تلاقن هي ومريم خالتها، واحلى مافيها طولها وعيونها الحور
عمار: صف خامس، وكل همه البلي ستيشن
احمد: عمره سنتين،وشكله كيوت يدخل القلب بسرعه، دلوع العايلة...خاصة دلوع مريم

عائلة علي (زوج فاطمه)
علي: 30 سنة ومتزوج فاطمة عن حب وبعد معاناة، صديق صالح..ويشتغلو بنفس المكان ومتخرج من بريطانيا مع صالح
معاذ: الولد البكر، صف رابع، ومثل عمار يموت ف البلي ستيشن
سارة: اربع سنين، بنت دلوعة ورقيقة وحلوة

اخوات محمد وناصر:
نصرى: زوجها احمد ولدعمها سالم.. وعيالهم: سالم (زوج موزه)، سلطان(متزوج ليلى بنت عمه خميس وعايش بمسقط)، ندى (اخر سنة جامعه،بتصيرمعلمة، حنطية البشرة وملامحها حلوة)

غاليه: زوجها عبدالله متوفي وعندها ولد(سعيد 23، سنة ثالثة جامعه بماليزيا)، واطيب وحده ف اخوتها، واخوتها مب مقصرين فيها كل يوم يزوروها...لانها وحدها ومعها الخدامة بس

شيخه: يعيشيو بالامارات وماييو الا بالصيف شهر7 و8..زوجها خميس اخواحمد (يعني هي واختها نصرى متزوجات عيال عمهن سالم) وبناتهم: ليلى(معلمة، زوجة سلطان)، (نوره طليقة صالح وماتزوجت بعده)، سعاد(تدرس بعجمان مع منال)

~ô§ô~كبريــاء انـثى~ô§ô~
ღღღღღالجزء الأولღღღღღ
~ô§ô~كبريــاء انـثى~ô§ô~

دخلت مريم بيت عمها ناصر وهي متغشية تخاف تحصل ولد عمها ف البيت...ولقت الخدامة...تنظف الصالة
مريم: ميري هين عمي ناصر؟
ميري: باباه مافي موجود...فيه روه برى
مريم: طيب هين اسما؟
ردت ميري: اسما في هجرة..ومافي يتلأ اليوم من هجرة
راحت مريم صوب حجرة بنت عمها ودقت عليها...بس محد رد
مريم: اسوم فتحي...اذيه اني
فتحت اسما الباب...وعيونها متورمة من الصياح وبعدها تشهق...نقزت مريم من حال بنت عمها
مريم: حبيبتي اسوم هيش فيك؟ ليش تسوي بعمرك كذيه؟؟ والله حرام عليك
وردت اسوم على كرفايتها تكمل بكاها...وتقول: ابا اجلس وحدي الريم خليني
مريم: هيش اخليك؟ والله مب زين اللي تسويه ف عمرك...عمتي اليوم بتكمل شهر الله يرحمها وانتي كل يوم على آالحالة
اسما وهي تتكلم وسط صياحها: اذيه امي....تعرفي هيش امي؟؟ كيف بقدر اعيش من دونها...اااااااااااه اااااااااااه...
مريم: استهدي بالله اسوم...لازم ترضي بالقضاء...ادري أن عمتي غالية ووايد غالية على الجميع...والكل لين اليوم حزين عليها .... بس رحمي عمرك شويه...الحين قولي هيش بيفيد بكاك؟؟ بس يتعبك انتي زيادة
اسما وهي تصيح: اااااااااااااه يالريم اااااااااااه والف اااااااااااااااه....برجد ف حضن من بعد اليوم؟؟ بتدلع على من؟ من بينازعني على تنظيف حجرتي وانا بعاندها؟؟ من من؟؟ امي راااااااااااحت راااااااااحت
مريم تقطع قلبها على بنت عمها والدمعه حايسة بعينها بس ماتبا تضعف جدامها وتزيدها بكا
قامت مريم وحضنت اسما... واسما تبكي وتبكي...وتحاول مريم تهديها
مريم: ياحبيبتي انتي المفروض الحين تدعيلها بالرحمة وتقري قرأن على روحها بدل آالصياح...والله كلنا بنموت ولنا يوم ومحد ياخذ يوم غيره...يالله قومي ولا اصريني بخلي عمي ناصر يييب الباكورة ويلشطك بها....هههههه
اسما بعدها راجدة ف ركبة بنت عمها...وسكتت شوي عن البكا
مريم: يالله اسومي قومي عشان خاطري...قومي غسلي ويهك...تشوفي عمرك ف المنظرة...تروعي
وتضربها اسما على ظهرها....وتقول لها : محد يروع غيرك انتي
مريم وهي تضحك: ههههه..ادري اني اروع... وانتي احلانا وقمرنا وشمسنا وكوكبنا وكل شي

وتبتسم اسما شويه وسط حزنها العميق على وفاة امها...امها ماتت من شهر تقريبا من مرض الضغط مع انها ف الاربعين من عمرها بس الموت مايعترف بأي عمر...وكانت اسما بالتقنية باخر ايامها تودع التقنية وربيعاتها اللي عاشت معهن 3سنين...وفرحانة بتخرجها..وكانت تبا تفرح امها بتخرجها...بس للاسف ياها اخوها ووولد عمها بالسكن...وكانت اشكالهم تخوف وشكلهم صايحين...وخبرها اخوها محمد أن امها مريضة وتعبانة شوي وان لازم يروحو جعلان...وماصدقتهم وجلست تصيح وتقول امي فيها شي؟؟ اكيد تعبانه وايد ولا ماتصيحو انتو...هدوها واقنعوها أن هم متأثرين بس وامها بخير وبيروحو يتطمنو عليها...وجهزت اغراضها وراحو جعلان...واول ماوصلت ودوها بيت عمها محمد عشان يخبروها بالخبر وماتنصدم ف بيتهم...لانه انترس من الحريم..وهناك لقت بنات عمها وعماتها وتاكدت أن فيه شي...وخبروها وكان معها اخوها محمد...واول ماسمعت بالخبر...اغمي عليها
واول ماقامت جلست تصرخ وتصيح:هاتو لي امي..هاتو لي امي...اماه هينك...تعالي لي
وجلست اسبوع وهي مب مستوعبة الشي...لانها كانت مودعه امها وهي بخير ورايحه اسبوعين بتختبر وبترد....وماتوقعت تحصل هالخبر اللي ابد ما يا ف بالها

مريم: هيييييييييييييييييييييييييييييييي.....هينك؟؟ هين روحتي؟؟ اقول...اللي واخد عقلك يتهنا به
وهي تغمز لها
اسما تبتسم وهي حزينة: وين يعني؟؟!!! اكيد عند الغالية.. فديتك ياامي؟؟ ليش روحتي عني وخليتيني وحيده؟..... ودمعت عيونها
مريم ف خاطرها يالله.. الله يهديك يا اسما... اني ماصدقت اهديها بترد مرة ثانية...احسن اقومها ولا بتقعد لين باكر تصيح
مريم: يالله اسومي قومي غسلي ويهك... وبعدين مسكي الختمة وقري.. وانا بروح اييب شاهي...ياختي مب متريقة...ماعيبني ريوق درمينيا...قلت ماشي غير اتريق بيت اسومي حبيبتي...احيده طباخ ميري ماشي يوبه
تبتسم اسما: انزين بقوم وانتي مشي لميري خليها تحط الريوق والشاهي
مريم بتردد: محمد هنيه؟
اسما: لا طالع....ياني الصباح وقال بيتغدي برى مع حمد اخوك...يمكن ييو على العصريه
قامت مريم وهي تقول: لعاد مايحتاي العباية...وهذي فصخناها...وتكفي الشيلة
ومدت ايدها لاسما...وقومتها ودزتها صوب الحمام....مريم: يالله لاتتاخري بالحمام...وانا بروح المطبخ

راحت مريم للمطبخ وهي حاطه شيلتها على رقبتها...و تنادي: ميري... ميري...ميري وصمخ...اذيه هين روحت؟ برايه بروحي بحط الريوق
انزين وهذا الخبز ولقيناه...يمي يمي عليك ياميري ادري بك تتفنني ف خبز الرقاق...شكله شهي..واحط الشاهي والقهوة
دخل محمد سيده على المطبخ... ياي ياخذ الشاهي نساه قبل ورد ياخذه الحين...حتى ربعه يموتو على شاهي ميري...والله وانشهرتي ياميري بشاهيك
واول مادخل شاف بنت عاطتنه ظهرها...محمد ف باله اذيه مب اسوم...اشوفها اطول وانحف...وشعرها ياطوله...شكله حلو...استغفر الله هيش اسوي اني؟؟ الحين هيش بسوي...هيش آالمصيبة وشكلها مندمجة بعد
حست مريم كانه فيه حد وراها ويتشوفها...بس ماردت للورا تشوف من...وحسبتها ميري: ميري تعالي شلي الريوق ف حجرة اسما..اقولك هين العسل مالقيته؟
محمد وهو متفضح: احم احم
مريم حست وكانه حد صب عليها ماي بارد...وماعرفت هيش تسوي... وامي من اذيه؟؟ مب عمي ..لا... واني وشيلتي والقميص نص كم والتنورة؟؟ ومسكت شيلتها وعدلتها...وتحاول تتغشا بها
محمد: السموحة...مانتبهت...باي
طلع محمد...هيش هربتت اني؟ باي؟ هيش نابه باي؟ انزين قول لها كيف حالك؟؟ شكلها بنت عمي...محد غيرها بيي الحين...بس حرام شكلها نقزت...راح سيارته وركبها...وهو يفكر والله وحلويتي يابنت العم...الخطيبة الصغيرونة...ماشاء الله على شعرها...ولا بياضها...اني شفت كراعها بس واحسني انشليت من بياضه...لعاد كيف ويهها؟ اني هيش اقول الحين!!..استغفر الله...لو يشوفنا حمد بس كان بيدفنا ف مكاننا اني وياها...بس صدفة...والله صدقو يوم يقولو الصدفة خير من الف ميعاد...ولا جسمها...حلاته عالقميص الراص..طالع الخصر يهبل...والله اني ينيت هيش جالس اقول...اعوذ بالله منك يالشيطان...اذيه بنت عمي لحمي ودمي... بقول لو بنت مجمعات ومراكز.... بس بنت عمي مايصير افكر كيه فيها... بس تراها كبرت وحلوت...ولييييييييييييي نسيت الربع اني قايل 5دقايق وبرد....بياكلوني..احسن اتحرك...وهنيه رن تلفونه(حمد يتصل بك)
رد محمد على التلفون: الو
حمد باستعجال: ياريال هينك؟؟....الربع بيروحو وانت ماخرنا
محمد: ياينكم.....الحين ف السيارة
حمد: انزين بسرعه...تراك اخرتنا...متى بتزهب المشاكيك...الشمس ف نص السما
محمد: اووووووووه...زين...ود العم تراك حشرتنا (وهو ف خاطره..لو تعرف اللي اخرني... كان ذبحتني)
حمد: اقوووول اني مافاضي لك...ياني اتصال...بااااي
محمد وهو يتطنز على ولد عمه: شكله الجو؟
حمد: الجو ولا الطقس...يالله باي قبل عن تبند
وسكر حمد ف ويه محمد....ومحمد يقول الله يهديك ياحمد متى بتعقل؟
وراح لدربه وهو يفكر ف بنت عمه وحلاوتها...وبنفس الوقت يفكر ف حبيبة قلبه بنت عمته ندى (رغم معرفته بان ابوه حاجز له بنت عمه)...محد يعرف عن حبه لندى الا هي...واللي اعترف لها بحبه عن طريق مسج بالتلفون من سنة...خذ رقمها بالسرقه من تلفون سالم اخوها....كان كاتب لها: " ندى ادري اللي اسويه غلط...بس ماحصلت غير آالطريقة...انا محمد ولد خالك...وابا اقولك اني معجب فيك...ومن وانا صغير قلبي متعلق بك...اتمنى تردي برسالة اذا تبادليني الشعور...مع اني متاكد من شعورك اتجاهي...وبتقولي هيش اللي اكد لك..بقولك قلبي يقول كذيه...انتظر رسالتك...واذا مارديتي بحترم شعورك وماراح ارد عليك..وعذريني على تصرفي"
وبعد اسبوع ردت عليه وقالت: "اللي يقوله قلبك صح"...وهنيه تمو يتراسلو بالمسجس من فترة لفترة
والحين قال خليني اطرش لها...قلبي متوله عليها..
وطرش لها:
"وين اودي شوق قلبي والوله
لو غديت بعيد عني ما اسمعك
تملك احساسي وفكري تشغله
ترحل طيوفك وفكري يجمعك
هاك قلبي هاك ليتك تقبله
خابف كثرة رسايلي تزعحك
انت تالي الحب عندي واوله
من يقول اني نسيتك يخدعك

يسعد مساك الغاليه،، "

وردت ندى:
" يامرحبــــــــا
"باسمك" و "رقمك" و "طاريك"
من خاطر "يحبك"
"يعزك" و"يغليك"
رغم المسافة: ترى ماني" بناسيك"
افرش لك "عيوني"...والاهداب "تغطيك"
يسعد مساك ولد خالي "

رد محمد برسالة:
"لك وحشه ياندى... متى بسمع صوتك وبرتاح؟؟ "
وردت ندى: "يوم بيكون حلال هالشي"
فكر محمد وهو يسوق السياره....الله يرحمك يامي ويغمد روحك الجنة...كان خاطري افاتحك بموضوع ندى واخليكم تخطبوها لي هالصيف بعد ماتتخرج...بس الموت خذاك مني..ودمعت عيون محمد...ورد عليها: " ان شاء الله بيكون حلال وقريب"

وبعد ماطلع محمد...روحت مريم تركض حجرة بنت عمها وهي منصدمة ونقزانة...ياربي مصيبة مصيبة...الله لابارك فيك يا اسوم...وبعدها تقول مابيو غير عقب العصر...وهيش يسوي اذيه هني؟!!
دخلت الحجرة...وتصرخ على اسوم: ماعليك ماعليك اسوم...تقولي محد هنيه...ويطلعلي اذاك مثل اليني
اسما مب مستوعبة كلام بنت عمها لانها تتكلم بسرعه...اسما تحاول تفهم: هيش فيك؟؟ أي يني واي خرابيط؟
مريم وهي تلاهث: اخوك ياني ف المطبخ؟
اسما: انزين... وخييير ياطير؟
مريم وهي فاكة عيونها: لااااااااااااااااااااه....وخير ياطير؟ تراني بالشيلة بس؟
اسما: صح والله
مريم: وازيدك من الشعر بيت...كنت ناسفة الشيلة على رقبتي وطالع شعري...ومن خيبتي اليوم مفلتتنه ومارابطتنه....وغير كرعاني اللي طالعه...والقميص المترصص...ياربيييييييييي
اسوم وهي تكتم ضحكتها على حال بنت عمها: انزين شاف ويهك؟
مريم: لا الحمد لله اني كنت عاطتنه ظهري...كانت هنيه المصيبة لو مقابلتنه
اسما وهي تبتسم: انزين خلاص يعني ماشافك؟
مريم وهي تطول ف كلامها: لااااااااااااااااااه....والشعر والجسم... وكرعاني...استغفر الله....هيش بيقول عني...لا والمصيبة اني حسيت به بس احسبها ميري وبعدني بكل برود ميري هين العسل...الا اسمعه يوم يتحنحن....نقزززززززززززت يوم سمعته وتجمدت مكاني وماقدرت استوعب ولا اتحرك...واونه سمعي هيش قال؟ .. مريم وهي تتطنز:السموحة مانتبهت باي....هههههههههه أي باااااااااي...انت قلت شي لين تقول باي
وتضحك اسوم ضحكتها الهاديه على بنت عمها واخوها...وهي ف خاطرها....والله انكم تلاقيتو وتليقو لبعض
اسما: برايه...وانا والله قايللي انه بيطلع بيتغدى مع ربعه...شكله نسي شي وياي ياخذه
مريم: ماعليه...بنكبر وبننسي على قولتهم...يالله خلي ميري تييب الريوج...ولو انه انسدت نفسي...بس بعدني خاطري ف الشاهي
اسما وهي تبتسم: من عيوني...يا احلى بنت عم (وهي تغمز لها)

وتمن مع بعض يسولفن وحاولت مريم تغير الجو لاسما....وقالت اليوم مب اخليها وحدها لازم بشلها بيتنا تبات معنا
مريم: اسومي...قولي تم
اسما: هيش ف خاطرك؟ قولي
مريم: انتي قولي تم
اسما باستغراب: انتي قولي وبعدين بقول تم
مريم: افا وانتي ماتعرفي عوايد العرب...اذا قالو لك قولي تم...تقولي تم بدون ماتعرفي هيش يبو
اسما: انزين يالمتفلسفة... تم...بس اخاف يكون شي ماقدر عليه
مريم وهي تضحك: دامك قلتي تم....خلااااااااااااااص بقعد معك اليوم لين المغرب....وبعدين بنروح بيتنا نبات هناك
اسما وهي تغلس على مريم: اوكي تقعدي معنا لين المغرب...بس ماقلتيلي من بيبات معكم؟؟
مريم: اوووووووووووووف...اسومي عن التغابي....اباك انتي تباتي معنا
اسما: لااااااااااااااااااااااااااااه....لا والله
مريم: انتي بروحك قلتي تم..وانتي بعدك ويبيني.. جالسة معك من الصبح ولين المغرب..يوم قلتلك بتباتي معنا....قلتي لا والله
اسما: الريم حبيبتي...مب سالفة مبات...بس ماقدر اخلي ابويه وحده...والله ادري به حزنان اكثر مني ومن محمد بس مايبين مثلنا...يحاول يستقوي جدامنا عشاننا...مايصير اخليه وحده..عالاقل يحس بوجودنا ف البيت...وبعد هناك اخوانك ثنينتهم ف البيت...الله يخليك انتي باتي معي...والله احسك طلعتيني من الحزن شوي
مريم: لاااااااااااااه....انا اخواني هناك...وحضرة اخوك اللي مقابلتنه قبل شوي ماينحسب ريال لما ابات معك!!!
اسما: يالله حبيبتي انتي... محمد بروحي بتصرف معه..وبخليه يبات ف المجلس عشان خاطر عيونك...هيش تبي اكثر من كذيه؟ بنطرده عشانك
مريم بدلع: مااابااا...مااابااا
اسما: بليييييييييييييييييييييز
مريم: طيب حبي راس عمتك
اسما تمسك الوسادة وتفرها على راس مريم..وتقول: عمتي ف عينك..مريموه
مريم وهي تضحك: ههههه.. ايه عمتك وتاج راسك...ولا ماراح ابات
اسما: انزين عمتي ... اف منك
وضحكن...وراحت اسما يابت لها قران وجلست تقرا بخشوع...ماشاء الله عليها صوتها حلو ف قراءة القرأن ووارثة هالشي من امها...ومريم تستمع لها بانصات..وتقول ف خاطرها الله يغفر لك ويرحمك ياعمتي صالحة...الله يوسع عليك ف قبرك...والله يصبر عمي وعياله ويعوضهم خير

وبعد صلاة الظهر يا ناصر بيته...وراح صوب حجرة بنته اسما...وسمع صوتها وهي تقرا قرأن... وفتح الباب وشاف مريم عندها...وقامت مريم وسلمت على عمها بالخشم
ناصر: مريم كيف حالك؟ وكيف حال هلك؟
مريم: الحمدلله كلنا بخير دامك بخير...كيف حالك عمي؟
ناصر: الحمدلله بخير... هين ابوك؟ ف بيتكم؟
مريم: احيده ف بيتنا لما طلعت الساعه 10 من بيتنا...بس احيده يقول بيمر عليك عصر
ناصر: اهاااااه....مرحبا به..اسما كيف صليتن؟ حطو الغدا اذا صليتن؟
اسما: اها..صلينا...ان شاء الله بنحط الغدا
وهنيه يات ميري تقول لمريم أن امها تباها ف التلفون...راحت مريم للصالة تكلم امها
مريم: الوه...اماه كيف حالكم؟
عايشه: مرحبا مريم...الحمدلله بخير...وراك ماييتي لين الحين؟؟...نبا نتغدي
مريم: اماه اني بتغدي هنيه بيت عمي... بس اماه..........
عايشه: بس هيش؟
مريم: اليوم ببات بيت عمي
عايشه: يابنتي عيب... من الصبح وانتي معهم...بعدك بتباتي هناك
خبرتها انه اسما طلبتها تبات وهي تبا تغير جو لبنت عمها ووافقت امها وسكرت عنها

وتغدو...وراحن بعدين حجرة اسوم...وفتحن النت وجلسن فترة عليه...وبعدين رجدن لين صلاة العصر
ويا ابو صالح (محمد) بيت اخوه ناصر...وجلس معه لين المغرب...وراحو يصلو المغرب ف المسجد
وبعد ماصلن المغرب...يات مريم لاسوم: اقولك محمد اشوفه ما يا لين الحين؟
اسما: تراني اتصلت به...وهزبته ليش يدخل عليك كذيه الصبح...قال وش دراني أن حد ف بيتنا واني كنت ياي اخذ الشاهي واني اصلا اول ماشفتها طلعت...وقال مابيي الا بالليل عشان تاخذي حريتك...وبعده بيبات ف المجلس...ابسطي ياعم كل اذيه عشانك...هههههه
مريم: هههههههه....انا والله ماقلتلكم سوو كيه...بروحكم متطوعين لخدمة الشيخة
اسما: هههههههه...الشيخة ولا المريم؟؟
مريم: ههههه..ماتضحك............ وتضربها على كتفها
اسما: الا ماقلتيلي الريم....متين نتايجكم متي بتطلع؟
مريم: ويييييييييييييه ذكرتيني بالهم.... يقولو بعد 3 اسابيع...الله يستر مادري كم بتيي آاالنسبة؟
اسما: افا عليك انتي ماينخاف عليك...نتايجك اعلى نتايج المدرسة من يوم كنتي صغيرونة
مريم: ترى المشكلة اني ماذاكرت وايد....بسبب العزا والصدمة اللي ياتنا
اسما نزلت راسها وبحزن: ايه والله...الله يرحمك ياامي
مريم: امين...الحمدلله اني مذاكرة الاسابيع اللي قبل...ولا كنت بروح فيها
اسما: لاتخافي...انا اتوقعك تيبي فوق ال95%...ولي بشارتي اذاك اليوم
مريم: امييييييييييييييين... من بؤك لباب السما يارب
اسما: انزين يالمصرية...قومي خلينا نطلع ف الحوش....تشوفي القمر من الدريشة...اعتقد قمر 14
مريم: مصرية ف عينك...انزين خلينا نطلع...بس اخاف محمد ييي
اسما: لا هو قال بيي على 11 فوق
مريم: بتسوي لي مثل الصباح وبعدين بيي
اسما: انزين لبسي ليسو واذا يا انتي تغشي...مب فيها شي
مريم: حقك.... هالجو مايتفوت
وطلعن برى وجلسن بهالجو الحلو اللي كانت الكوس هابتنه بس بريح هاديه...والقمر طالع رهيب مابين الغيوم...وتمن يسولفن ف مختلف المواضيع وبالاخص المواضيع العايلية...ويذكرن فلانه وعلانه...وعن الشغل اللي تتمناه اسما ولو انه متاكده انها مابتتوظف الا بعد سنتين فوق...مثل الللي سبقنها ف تخصصها....هي خاطرها تصير سكرتيره ف مدرسة...وبعد ماشبعن من الجو الحلو روحن حجرة اسوم ورجدن

قصه جمليه اختي كبرياء انثى
وبالتوفيق لك

المنصور تسلم عالمرور والمشاركة...والله يوفقك

والباقين!! وينهم؟؟

مانكمل الراوية يعني؟؟
<<توقعت احصل تشجيع منكم :(

يا كبرياء افا عليج بعد يبيلها كلام اكيد كمليها يالله صادني فضووووووووول

توتو تسلمي ياقلبي
والله يجبر بخاطرك

من عيوني بكملها لك...وانا كم توتو عندي :) ؟؟؟

وحده طبعا ما في غيرها مطلعه عيون المنتدى هههههههههه

يالله كمليها

ان شاء الله بحطها لك بالليل
الحين مشغولة شوي

تسلم اختي وروايه جيده ورائعه