مساء الخير للجميع

امس رحنا الاشخرة على الساعة 2

بس انتظرنا اخوي لحد ما يوصل جلسنا بعد الاشخرة بشوي

والموج كان تقريبا هائج اذن العصر ورحت اتوضأ

الا الموجة جايبة عندها صخرة تقريبا كبر رأسي وتضربني في قدمي

عاد نزفت شوي واليوم شفتها متورمة شوي بس عادي العوق خفيف

وصلتا لحد خويمة واخذنا خبز براتا ورجعنا

وقفنا الاشخرة اخذنا العشاء

الجماعة كلهم ما اكلوا انا واخوي خلصنلا العشاء خلال 10 دقائق

وقفنا بعد الاشخرة في عروق (طعوس) تجلسنا 20 دقيقة ورجعنا البيت

وسيده عالفراش

عاد الصبح وغوني من الساعو 9 عشان اسلم على اختي وعيالها جايين من الاردن متمشين

وبس

انا من الناس اللي ما تتعامل بالرسائل مال الجمعة والاشعار كثير

لما استخدم الرسائل يعني اسأل واتريا اجابة

وتجيني رسائل كثيرة بس ما ادير لها بال

عاد امس قلت لا يقولوا عني بطران وما اذكرهم او شي

فعبيت رصيد ريال في رقمي النورس وسويت حزمة الرسائل ورسلت ل70 شخص تقريبا

خلص الرصيد وعبيت مرة ثانية


الغاية وايدين ردوا عليه يزاك الله خير من معي؟؟؟؟


لانه رقمي النورس ما يعرفوه الاغلبية هععععععع

اخوي رسل لي من معي

قلت له: جميل الهاشمي؟

قال من؟ جميل مجمل

قلت هووو اذا بغيت ديو تعال البيت

وبس هذا شي استثنائي حصل معي امس وحبيت اشارككم فيه

صباح الخير للجميع

اشكر كل من مر على مدونتي وشاهدها

اليوم مسكت الحاسبة وحسبت معدل رؤية مشاركات مدونتي

وحصلتا 16 مشاهدة لكل مشاركة

يسلموا لي على تشريفكم لمدونتي المتواضعة

لا عدمناكم

السلام عليكم ورحمة الله وبركاته

رجعنا لكم بعد غيبة

الغيبة كان سببها كنت طالع كشتة مع عيال عمي وخالي

رحنا بندر الصقلة

الجو كان روعة وصلنا الثلاثاء نصبنا خيامنا وعدلنا مطبخنا واطبخوا لنا الشباب

انا جلست اعدل خيمتي الخاصة ماخذ خيمة الوالد

نبي ننام على راحتنا

الساعة 12 الليل هبت ريح قوية وبدت الخيمة تتمايل واخوي نايم عندي

اقوله الخيمة بتطيح يقول مشي بأس

هو نام وانا بعد ما نمت وتطيح الخيمة

قالي طاحت الخيمة وانا اقول ماشي بأس تراها مغطتنا هع

قمنا وكان في مطر خفيف هو راح على الخيمة الكبيرة

وانا جلست ارتب الخيمة بسرعة اذا ما حافظت عليها الوالد بيعصب عليه

رحنا الخيمة الكبيرة وكانت الريح قوية قلنا بعد بتطيح الخيمة بس الحمدلله خفت الريح ونمنا

عاد اليوم الثاني نصبت خيمتي مرة ثانية ودامت لحد أمس اللي هو موعد رجعتنا

الجو كان جدا رهيب الطباخ روعة والتسلية روعة

لعبنا كرة يعجبك لما تشوت الحصى بدل الكورة

عاد باكر ورانا رحلة غيرها ان شاء الله مع العائلة الى جزيرة مصيرة

الصيف ما شاء الله عامر بالرحلات


تحيتي لكل من يقرأ مدونتي

مرحباين عووودة لكم جميع

اولا مبرووووك عليكم شهر رمضان

الله يرزقنه اتمامه بالوجه اللي يرضيه امين يارب

ويعيده علينا ونحن في ثوب الصحة والعافية

اسمحولي عالغيبة والقطاعة

كنت في جزيرة مصيرة لحد يوم الخميس

بصراحة الجو رهيب درجة الحرارة 24 والهواء شوي ويشلك من مقعدك من شدته

اجواء خريفية ضبابية ولا اروع

رجعنا الخميس والسبت رحت الامارات وبعدها قطر ومسقط واليوم راجع

اللهم سلمنا لرمضان وسلم رمضان لنا وتسلمه منا متقبلا ياذا الجلال والاكرام

مرحباين عودة

شفت المنتدى هادي قلت بستغل الفرصة عشان امسح الغبار من على مدونتي

عشان ما تشوفوها مغبرة

دخل رمضان علينا وانشغلنا معه

ما في اي شي استثنائي سويته يستحق الذكر

عادي صوم افطار صلاة تراويح باب الحارة ورجاد

وهكذا دواليك :)

ان شاء الله من يطرأ جديد بتشوفوه في مدونتي

يسلموا جميع من يتابع المدونة :)

مساء رمضاني مبارك

امس صليت الفجر وجالس فالسبلة ابا اقراء قران

ياني الوالد وقالي خلا بتروح معنا انا واخوك نجيب الغنم

لانه غنمنا صار فضيك السيوح وضيع درب العزبة ولقيناه واصل الجوابي

عاد رحنا عالفجر وسقنا الغنم ابويه قالي انت هات السيارة وانا اخوك بنلايم الغنم لحد ما نوصل الشارع

عاد انا قلت اوكي بعدها نزلت عنه وخليت هو يسوق وانا واخوي جلسنا نسوق الغنم لحد ما وصلنا العزبة

بس انا الاقل مسيرا منهم

ما ادري المسافة كم بس اكثر من 5 كيلو

طالعين 5:20 من البيت رجعنا الساعة 8

عاد انا دايخ ما نايم الليل سيده على فراشي لحد صلاة الظهر

وبعدها نوم للعصر

وبس :)

مساء الخيرات

عيدكم مبارك مقدما

اليومين الماضيين كنت في مسقط وبالتحديد في المعبيلة

طبعا رحت اشوف اصدقائي في الغربة من زمان ما شايفنهم

اللي من 3 سنوات واللي من 8 اشهر واللي من 3 اشهر

عاد رحنا عندهم وجلسنا هاليومين ونشوف اوضاع عملهم وكذا

وكنت رايح اخلص امور العيد بس ما طلعت الا بعطر

لانه الشباب مشغولين بعملهم شوي

رحت مركز البهجة وحصلت طاقيه انما اييييييه

نفس لون الثوب اللي مفصلنه للعيد بس ما طاع ينزلها عن 15 ريال

فما اخذتها ننتظر لبعد العيد بينزل سوقها يمكن

عاد امس راجع من مسقط

وهذي قصاة حياتي اليومين اللي طافوا

السلام عليكم ورحمة الله وبركاته

اخباركم؟؟؟

اشتقت للوجوه الطيبة وما بغيت أقطعكم

بس الظروف ما سمحت لي أدش

واللي سأل عني فيه الخير واللي ذكرني فيه الخير

واللي ما لاحظ غيابي فيه الخير

الحمدلله العيد كان حلوووووو بدرجة

يوم الاربعاء الماضي قبل العيد رحت الخميس للأحذية في صور عشان اخذ نعال

درنا المحل كامل انا وولد خالي ما لقينا قياس على رجولنا

ما شاء الله انا مقاسي 45 وهو 46

وايد اشكال عجبني من نوع غزال بس للأسف كل ما تطيح عيننا على نعال نلقى المقاس اقل عن

مقاساتنا، لقيت نعال VANNI ايطالية ب44,5 ريال عجبتني واسرتني وهمت في عشقها

بس للأسف الجيب خااااوي

واللي عندي ما شجعوني اشتريها

بعدين قلت لهم زوجة المستقبل اتصلت فيه وقالت ما مشكلة بهديك ياها في يوم زواجنا

طبعا انا عملت الاتصال عن طريق الة الزمن اللي شلتني المستقبل

اخر شي اخذت غزال بس مب النوع اللي بغيته بس غمضت عليها

جاء العيد ودقينا من ذاك العرسي اللذيد الحمدلله


اول يوم عيد سوينا دوري بلاي ستيشن بس للأسف طلعت من أول دور

اليوم اللي بعده رحنا عالسواحل وانتهينا في صور تغدينا وردينا

عاد ردينا للعب الكورة والاهداف الخرافية هع

الحين طلع شي يديد اسمه خشونة احترافية

بن خالي عرقلني امس تعورت فالركبتين وفكتفي وفايدي

اعرفكم بتقولوا شو هالعشب اللي يعور

بسسسسسسس هذا ملخصة يومياتي للأيام اللي راحت

مرااااااحب
أمس رحت مسقط لحضور عرس صديقي لكن للأسف حصلت معي بعض الظروف

أجبرتني ارجع البلد

بعدها رحت مع بن خالي كان مطلع سيارتهم من الجراج مركبين مكينة جديدة

فرحنا نجربها

تبعناه من أصيلة السواحل الرويس ودخلنا الوديان

بندت علينا السيارة في وداي الشكلة

حاولنا فيها مشي فايدة اتصلنا في باكستاني كهربائي قال يمكن شي من الوايرات منقطع

حاولنا وحاولنا ماكو فايدة

اخر شي اتصلنا فواحد من الربع عشان يجي ويقلص السيارة

كان معنا بعض الشباب من وادي الشكلة حاولوا يساعدونا في تصليح السيارة يزاهم الله خير

وما راحوا الا من اشتغلت السيارة

بعد ما يئسنا نحن وياهم في المحاولات

قالوا نعرف شخص وهو عماني يعرف يصلح السيارات قلنا هاتوه

فراحوا يجيبوه

وما شاء الله عليه 5 دقائق وعرف المشكلة وصلح السيارة

كان في واير منقطع فركبناه واشتغلت السيارة

بصراحة تفتخر لما يكون شخص من بلدك ماهر في تصليح السيارات

والخبرة المكتسبة لا تتعدى سيارة البيت بلا شهادة

الله يزيد من امثاله