بسم الله الرحمن الرحيم
صبحكم الله بالخير قماعة الخير
جمعه مباركه علينا وعليكم
كنا فالدوام وما زلنا فالدوام وسنظل فالدوام الى اجل غير مؤكد المدى
الحمدلله انه الموقع هالمره قريب من ولاية ادم
يعني توصل الولايه تتسوق تغير جو
تاخذلك شوارما شاي وترجع السكن تنخمد
تقوم الفجر تصلي وتروح الدوام وترجع المغرب
واحيانا متأخر تشوف التلفاز شوي وانخمد
وهو الروتين
عاد هالموقع في احتمالية خطر غاز كبريتيد الهيدروجين
وهو غاز سام جدا ويقتل فلحظات
فعاد تقرتبا كل اسبوع يسووا انذار عشان يشوفوا ردة فعل العمال
ولازم تحلق لحيتك ولا ما يدخلوك الموقع
عشان اللحيه بتخلي الماسك مال الاكسجين ما يلزج فالوجه كامل
فاحتمال يدخل الغاز من المسامات
عاد اللحيه كل يومين تكبر بس نتأخر لحد ما يكلمونا
وعاد السيفتي هنيه متشددين لازم تصاريح في كل شغله
حتى لما بتطلع ارتفاع بسيط لازم تربط حزام وشغلات
الحمدلله فالموقع كل شفت فيه حد من بلاد
فما تحس انك متغرب وحتى الشباب الثانين سوالف وضحك.