منتديات جعلان - عرض مشاركة واحدة



يلست ع طرف شبريتها وحطت ريل ع ريل بطريقه تبرز انوثتها وجمالها..
وأخذت خصله من قذلتها وصارت تلعب فيها بغنج..

زهره: وأنتي شو حارج؟ ابا افهم...
مشاعل: زهره أنتي تغيرتي وايد..انتي مب زهره الحساسه الي اعرفها..

زهره مدت شفايفها ع اساسا ماعجبها كلامها: شو تغير فيني يعني؟؟
ولأ لأني صرت ادافع عن حب قلبي واحاسيسي صرت غير؟؟
"تمددت ع شبريتها وصارت تطالع مشاعل الي كانت وراها بنظرات حرقه وتعب" مشاعل انتي مب حاسه فيني..
مشاعل انا تحطمت من داخل..
وكل يوم يقرب فيه يوم زفافي احس اني اذوب فيه اكثر...قلبي...قلبي يامشاعل ماعاد يتحمل..

مشاعل تمسح دموع ربيعتها الي ملت خدودها..والكحل اخفا ملامحها:
ولو بيبي..كان لازم تعودي نفسج ع هالشي..كان لازم تنسي..
مب تقرري تقولين لأخو زوجج "والله انا احبك ما احب اخوك.."اتخيل موقفه ذيج اللحظه كيف بيكون..فشيله..والله فشيله..

زهره حبيبتي تعوذي من ابليس وارضي بالواقع..
زهره: صعب..صعب انساه جذيه بدون سبب..
مشاعل انا كل مااشوف صقر جدامي يزيد حبه فقلبي اكثر..
كل ما اقول بنساه قلبي يقول لا..
مشاعل صقر ملكني سحرني..قيدني..
ماقدر انساه..

طق طق طق طق

مسحت دموعها بحركه سريعه: منوو؟؟

انفج الباب
ميري: ماما.. بابا صقر تهت..ايريد ماما سالمه بس ماما مافي مني..

زهره ببتسامه شاقه حلجها: وي فديته..فديت روحه..الطيب عند ذكره دوم..
روحي ميري روحي..انا برأسي بنزله..

مشاعل: وي ياالخبله شو ناويه عليه؟
زهره: ولأ شي..بس بكحل عيوني بشوفته..فديته وفديت طاريه..
(قامت واقفه بعدين ردت قعدت) يمه مشاعل لحقي علي..قلبي بيوقف..

مشاعل: بسم الله عليج...ههههههههه هذا بعدج ماقعدتي معه هههههه

زهره تحط ايدها ع قلبها: يمه سكتي بس سكتي..اخاف يقول عندج عرس بصدرج؟ من كثر ماقلبي يخفق..
هههههه طبووول
طبوول يامشاعل
مشاعل: ههههههههههههههههههههههههههههههههه ياالعياره..
قبل شوي تبجي وحالتج حاله..شو صار ألحين ههههههههه

أخذت مخده ورمتها عليها: اقول سكتي..خليني ألحق عليها قبل لاتطب علينا امي وتخرب كل شي

مشاعل: ههههههههههههههه الله يعين هيثم بس
زهره تضبط شكلها: ووويع لاتيبي طاريه..خلينا فالمزيون..فــــــــــديتــــــه

تحت بصاله..

صقر: شو صار عندها هذي؟؟ ساعه لين تنزل..اووووف
بس بابا حبيبتي أنتي فديت ضحكتج..

زهزه وهي نازله ع دري" يمه صوته يذوب..": ياهلا والله.. هلا بالعذراء وابو العذراء..

صقر: هلا فيج.. تأخرتي علينا..
زهره(لو الأمر بأيدي جان مافارقتكم ولأ دقيقه): اسموحه..بس جان عندي ضيفه

صقر: مسموحه الغالية
زهره(يمه لحقي علي): تفضل الشيخ..
صقر: زاد فضلج..إلا وين عمه؟؟

زهره تطبع بوسه ع خد عذراء: مادري..شكلها راحت بيت ام ناصر..ربيعتها..
صقر: هيــــه عرفتها... طيب ماراح اطول عليجــ

زهره بسرعه ومن دون ماتحس بنفسها: لا..شو مااطول عليج.. اآا..اقصد..البيت بيتك خذ راحتك..

صقر: مشكوره..هذا من طيب اصلج..بس انا ياينكم عسب اسلم ع عمتي سالمه..انا باجر مسافر..

زهره وقفت ع طولها بصدمه..ووقف صقر معها: شــــــوو؟؟ مسافر؟ وين؟ وليــــش؟؟

صقر: بسم الله عليج..زهره فيج شي؟؟
زهره شوي وبتبجي: جاوبني؟ وين راح تسافر؟؟

صقر يمسح خشمه: هو مب سفر بمعنى سفر..اسبوع ونحن رادين البلاد..
زهره: نــحن؟ من انتــو؟
صقر ع نياته مب داري انه البنيه شوي وبطيح من طولها: انا وبويه..بنروح العمره اسبوع..
عاد هذي رغبة الوالد..

زهره: وانــــا؟؟ اقصد وعذراء؟؟
صقر: امايه نوره عندها..
زهره: هيه..بس انت تدري انها تموت ع شوفك..اخاف يصير فيها شي لغبت عنها..

صقر يأخذ بنته من ايد زهره ويمسح ع شعرها بحنان: انا الي بموت من دونها..
زهره: راح تشتاقلك حيل..

صقر: زهره خلاص عاد لا تخليني اهون عن الروحه هاه..
زهره بحزن عميق: ياريت(انا لو ماشفتك بيوم امووت..عاد اسبوع؟؟ اسبوع ياصقر؟؟)

صقر: صار لازم نروح ألحين..وصلي سلامي لعمه مو تنسين هههه
زهره ودموعها تعلن وقت نزولها: ان شاء الله..
صقر: خلي بالج من نفسج..هلله هلله بأمج..ماوصيج بها..

زهره: بعيون..إذا بقى فيني عيون
صقر: هــاه؟

زهره: سلامتك..تروح وترد بسلامه..
صقر: اشوفج ع خير..

"وطلع..وترك وراه قلب ينزف..تركها وراها تعد الدقايق الي ماراح تشوفه فيها..
تركها راكعه ع ركبها بنص الصاله تبجي من الداخل..
تبجي بآلم وحرقه..ماتدري شو صار لها؟ بس حاسه انه الدنيا اظلمتها..حطمتها..تركتها بطريج طويل اخره مفترقين..ماتدري صوب اي واحد تسير...
احتارت..تألمت..ماعاد فيها تتحمل اكثر...ها اسبوع وقتلها قتل..
عيل شو بتسوي طول عمرها وهي تشوفه جدامه ومب رايمه تقوله احبك..
هي لازم تتخذ قرارها بأسرع وقت..قرار حاسم..قرار يحدد مصيرها نهائيا"

><><><><><><><><><><
><><><><><><><><><><
><><><><><><><><><><
><><><><><><><><><><

رد ببتسامه جانبيه: مظاهر خداعه!!!
مب زين يامدام نبين لناس عكس حقيقتنا..

تشوفت عليه بنظرة احتقار..وفتحت بابي ونزلت..
تحرك...بس وهو يحرك من جدامي حسيت بشعور غريب بقلبي..
قبضه خفيفه بقلبي حسستني انه الي سويته غلط... معقوله..؟؟
معقوله..اني..؟؟؟ لا مستحيل لا.. ولأ تفكري فهالكلمه ابد..

...: أحــــــــــــلام؟؟؟!!!

التفت...

زادت نبضات قلبي وزاد تدفق الدم بعروقي ودمعت عيني.. يوم شفت بويه..بويه نظر عيني..
آآآه يابعد قلبي..اشتقتلك واشتقت اسمع اسمي منك..
بدون مااحس بعمري ركضت وكني اسابق الريح ودفنت ويهي بصدره...محتاجه له محتاجه لدفى حضنه..
ابويه بصدمه: أحلام..هيش صاير؟؟ أحلام فضحتينا بالشارع
(بعدني عن صدره وكلمني بصوت يفيض حنان وممزوج بحزم): أحلام..عيوني راشد صارله شي؟؟
(هزيت رأسي بلا)
ابويه: عيل هينه عنك؟؟ وهيش مطلعنك برا وحدك؟؟

أحلام : هاه؟! الله يهداك بويه.. حن ألحين واصلين..وراشد نزلني وروح يصلح سيارته.. جرب بويه بنتقهوي رباع!

ابويه: لا اني بروح البيت..انتي دخلي بيتك..وتغدي وستريحي وعصر تعالوا انتي وراشد..
وترا امك عزمت عايلتهي كلهي علي العشاء..
عاذرتك..
أحلام: الله يحفظك ويخليك لنا..

تبعته بنظري وهو يختفي شوي شوي.. وبعدها دخلت..لقيت عمتي عاشه ورحام جالسات ف الصاله..

رحمه ببتسامه شاقه ويها: حيا الله عروستنا..جربي
"وخذتني بالأحضان والبوس" هلا والله هلا..
"سلمت علي عمتي عاشه الي قالت": هين راشد؟؟

أحلام: روح يصلح سيارته..اختربت وحن فطريق
عمتي: نظر عيني... كان قلتيله يدخل يستريح وعصر يصير خير!!

أحلام: قلتله عمتي..بس تعرفيه راشد محد يقدرله..الي فرأسه يسويه
رحمه تهز حيانهي: الله يعينك عليه..
أحلام بضحكه خفيفه: هههه أمين.. أخليكم ألحين..أحس أني متكسره حيل..

عمتي: مشبعنا منك!
أحلام: معليه عمتي..بس والله تعبانه..انكسر ظهري طول الطريق وأني جالسه..

رحمه: خذي راحتك العروس..ألحين منجدر نقولك لا.. مأخذه الرأس العود فالبيت

أحلام: ههههههههه "صدق الرأس العود! "

دخلت بيتي اقصد بيت راشد افندي..عقيت شنطتي فالصاله..وركض للكرفايه..
ابا ارجد ابا انسى الي قاعد يصيرلي.. ابا ارجد ما ثور ابد..
بس محال..تقلبت يمين يسار..بس....
اوووووف..رأسي يبس مب قادره ارجد بهو..
ااااااااهــ ..اعتدلت جالسه وتشوفت ساعه 3:45 ياربي صارلي ثلاث ساعات اتقلب علي فراش..
لحظه راشد م ياا...ياربــي هين يمكن يكون؟؟!
معقوله روح بيتهم عشان مايشوفني؟!
ياالله اذيه الريال بينني..!! اووف

تسبحت ولبست..وحطيت شدو اسود ع لون ثوبي..وروج زهري يبين جمال شفايفي..مررت المسكره ع رموشي..
والقيت نظره اخيره علي شكلي..بعدين طلعت..يارب يكون هناك!

أحلام: السلام عليكم
الكل: وعليكم السلام ورحمه

><><><><><><><><><><><><><><><><><><><><><><><><><><><><><><><><><><><><><><><><><><><><