منتديات جعلان - عرض مشاركة واحدة



اشكر كل من يتابع روايتي واسمحولي على القصور لانشغالي

ساعتين وأني جالس هنيه بسيارتي..بس اتأملهم وهم يتمشو علي البحر..واحترق قهر..!!
وأني هيش اسوي غير اكل قهر واسكت..

شغلت مسجل وصدفه كانت فيه أغنية ل0 حسيتها صدق توصف أحساسي وأني اشوفها بأذيه القرب من راشد..

( )

أسبوع وأني لاشغله ولامشغله غير ملاحقهم من مكان لمكان..صرت مثل المينون وراها..
حاولت أني انسى وارجع جعلان بخيبة أمل بس قلبي ماطاعني..

والله صدق بن فطيس يوم قال"والله مااحر من دمع اليتيم غير دمع الرجال من فرق المره"

بس الحمد لله ماوصلت أذيه المرحله..
(رجعت رأسي ورا وسندته بذراعي اليسار ومسحت لحيتي المخنيره بكفي اليمين وأني افكر باللي ياي..)

همست مع نفسي"المهم ألحين أنفذ الي برأسي حتى لو ماياب نتيجه..المهم أحسسها بعذابي..
المهم احاول أحسسها..أنه في قلب متعذب من فراقها"

مسكت تيلفوني ورسلت لها

( {{لـــك وحشـــــة}}‏ تلفني شوق وعتاب.. وإن جيت تسكني حنان وطرابة.. علمتني إن الوفا طبع الأحباب.. رسمت عمري وردتين وسحابة.. خذني لوجودك وضمني بين الأهداب.. عمري بدونك ماتحمل عذابه..)

><><><><><><><><><><><><><><><><><><><><><><><><><><><><><><><><><><><><

..بيت بو يمعه..

بويمعه يأخذ فنيال القهوه: هين شيخه..؟
أم يمعه: تراجع فحجرتهي..

بويمعه: ويمعه؟؟

أم يمعه تقص البرتقال: طالع من الظهر حتى ماتغدا..

بويمعه رفع تيلفون عن طاوله: بتصله بتشوف هو هين؟

ام يمعه: محمد..الصبي صار ريال..مب لازم كل شويه أنته هين؟ ومع من؟ خف عليه

بويمعه يدور الرقم: أنتي بس لاتدخلي بيني وبين ولدي يكون أحسن!

ألووو...هينك بومحمد؟

يمعه: موجود طال عمرك..بغيت شي ياالغالي؟

بويمعه: تعال البيت..ابا اجلس معك نتقهوى رباعه

يمعه يغمز: حمود مصبح متقهوي ماعك كشتقتني؟؟

بويمعه: هههه حمود ؟؟ ياالخايس..فيه حد يقول لأبوه حمود؟

يمعه: هههههه اهاا فيه.. أني!
انزين بويه أني ألحين عند باب..بدخل السياره وبيي ونكمل سوالف ياحلوو هههه

(بعد خمس دقايق)

يمعه:السلام على من اتبع الهدى

:وعليكم السلام ورحمه

جرب يمعه وجلس جنب امه قبال ابوه: ها ابويه عسى مازعلت مني؟!

بويمعه يأشر لحرمته تصب ليمعه فنيال: عزيز وغالي بومحمد مينزعل منك..

يمعه يتناول الفنيال: قدرك الغالي يا بويمعه..

أم يمعه تدفع كتف يمعه: يمعوه اليوم اشوفك تتبسم هيش عندك..؟؟

ببتسامه جانبيه: فهيـــمه يافطيـــن طالعه علي ولدك..

بويمعه: ههههه لاتجل ادبك علي امك ياصبي..
يمعه يحب راس أمه: كوني مسامحه ياالغاليه..حقك علي هالرأس
(يشوف ابوه) رضيــــــت؟

بويمعه هز رأسه: انزين قول قول..خلصنا هيش تبا؟؟

جلس مكانه..وقال بهدوء: ابـــا.. ابا اتيوز
ام يمعه بفرحه: والله

بويمعه: بشرك الله بالخير..من زمان وأني احرس اذيه اليوم..

انزين ياالنشمي..أحسن شي نمشي حار بحار..
والعروس أن شاء الله متردك!

يمعه عقد حواجبه: اسمحلي بويه أعرفك تقصد رحمه بس أنـــي..
مـــابـــا رحمه..

أختفت ابتسامة ابوه..وتغيرت ملامحه للهدوء الواضح عليه عدم الرضا: عيل من تبا..؟؟

نزل رأسه وشبك اصابع ايدينه ببعض: والله يابويه... أنــــــي..

من زمان خاطري فــــ..

.
.
.
.
.
.

أختفت ابتسامة ابوه..وتغيرت ملامحه للهدوء الواضح عليه عدم الرضا: عيل من تبا..؟؟

نزل رأسه وشبك اصابع ايدينه ببعض: والله يابويه... أنــــــي..

من زمان خاطري فـــــ..
فــــــهدى بنت خالتي موزه..

بو يمعه ثار واقف وقال بعصبيه: هدى المطلقه؟

يمعه وقف: ليش؟ هيش يعيبها المطلقه؟
بويمعه: يعيبها أنها مطلقه.. وبعدين أنته لاتقول هيش يعيب مطلقه!
قول هيش يعيبك انته عشان تأخذ مطلقه..؟!

يمعه: اني راضي بعيوبهي..واباها حتى لو فيها عيوب ادنيا كلها

بويمعه بعصبيه: ورحمـــه؟؟

(سكت شوي يفكر ويوزن كل كلمه بيقولها لأنه يعرف ابوه وشخصيته العصبيه زين..يعرف أنه لو مااقتنع باللي بيقوله..محد بيرده من الي يباه يصير...وبذيك اللحظه راح يضيع كل شي بلمح البصر) زم شفايفه وهز رأسه : اسمعني ياالغالي..
رحمه بنت عمي وعلي عيني ورأسي..بس زواجي من هدى مب نهاية حياتهي..
رحمه حرمه سنعه وكل ريال يتمناها..والحياه بعدها جدامها.. وأن شاء الله بييها الي أحسن مني!

بويمعه مسح لحيته وقال بعصبيه: رحمه محد بيأخذها غيرك رضيت ولأ غصب علي عيونك..تسمع
وهاه بحلق لحيتي من اولها لأخرها كان خذيت غيرها..

يمعه خذ فنيال ولاحه ع اليدار بعصبيه: ابا افهم بس..أنته ولأ أني الي بيتيوز؟؟

بويمعه: ووووس...صوتك ماترفعه عليه تسمع..
أني بعدي ماطحت الأرض وأنته ترفع صوتك عليه عشان بنت حمد..
عيل لو خذتها هيش بتسوي..؟! بتجتلني؟

يمعه خذ مصره من راسه وعصره بين كفوفه وكأنه يبا يطلع جزء من ضيقه فيه: يااللـــــــــه..آآآآآآآآآه
ألحين ابا افهم هيش دخل هدى فالموضوع؟ ولأ بس تدور شي عشان ماتوافق عليها..

بويمعه بهدوء جاتل: قلت لك بتأخذ رحمه غصب عنك..يعني بتأخذها
حتى لو كسرت البيت اذيه كله فوق راسي.. وسع عن الدرب..وسع (وطلع)

يمعه يمسك امه من كتوفها وقال وعيونه تولع شرار: سمعيني..قولي لريلك غير هدى مب مأخذ.. وإذا يبا يتحكم فيه وملزم علي رحمه..أحسن متزوج..
قوليله بقعد هنيه لين امووت ولأ اخذ حد غير هدى..

(خذ مصره وطلع وأمه فاتحه عيونها من صدمه..هالموقف أول مره يصير بين زوجها وولدها..
صحيح بويمعه عصبي ومايحب أحد يمشي شوره عليه بس هو دايما يسمع لولده الوحيد ويأخذ ويعطي معه..حتى لو انتهى الحوار بينهم بفرض رأيه عليه، بس كان برضا يمعه..وماتوصل السالفه للغصب )

أم يمعه: يارب استر..يارب تهديهم ثنينتهم! يــــــارب