><><><><><><><><><><><><><><><><><><><><><><><><><><><><><><><><
أم هيثم: حيا الله زهره..تو مانور البيت..
زهره بخجل: البيت منور بأهله خالتي..
سولاف بضحكه خفيفه: عاد تصدقي اميه..زهره كانت رافضه أنها تي هنيه(تغمزلها) بس لما أكدت لها أنه هثوم مب بالبيت وافقت..
اونها تبا تقنعني أنها ماتبا تشوفه مع أنها ميته ع شوفه..
زهره تقرص ذراعها: أنا؟؟
سولاف: هيه نعم أنتي..ماكفاج شوفته كل يوم واهو موديج الجامعه ورادج..تبين تشوفينه حتى بالجمعه..
يابنت خفي ع ريال لايطفش!
زهره تعدل شيلتها وترفع شنطها تبا تروح: لي أنا هالرمسه ياسولاف؟؟ أنا؟
سولاف تمسك ذراعها: يابنت الحلال قعدي..كنت امزح معج!
امايه قوليلج كلمه!!
أم هيثم: شو أقول يامسودة الويه؟؟ فضحتينا بلسانج..
زهره حبيبتي لاتأخذين فخاطرج من هالخبله..تراها ماتثمن كلامها قبل ماتقوله!
قعدي يابنتي عشان خاطري
زهره تجلس ع الكنبه قبال أم هيثم: خاطرج ع العين والرأس ياخالتي ولأ هذي ماتسوى..
"احــــــم احـــم.."
أم هيثم: تعال يمه صقر مافي أحد غريب!
صقر نزل وببتسامه جذابه ع محياه: السلام عليكم..
..: وعليكم السلام والرحمه
صقر: أشحالج زهره ؟؟
زهره بهمس رقيق: طيبه طاب حالك! أشحالك أنت؟ وكيف عذير معك؟..عسى ماهي متعبتك.؟؟
صقر: لا كلنا بخير..وعذير على كثر ماهي متعبتني على كثر ما أحبها..فديتها..
زهره"إلا أنا الي فديتك..ماراح تصدق اشكثر تمنيت أكون مكان عذير بس عسب أكون كل يوم قبالك"
..: زهره..زهره ياصمخا..
زهره تلتفت لسولاف: شو؟
سولاف: أقول خلينا نروح غرفتي أحسن.. بدل مانحن جالسين جذيه..
زهره"مالت عليج ألحين تبي تروحي يوم صقير جا عندنا،،؟! الله يعدمني شوفج..أساسا أنا ماجيت إلا عشانه..مالت" : صادجه حبيبتي هناك بنأخذ راحتنا بالرمسه.. يله
(بعد ماطلعو البنات فوق)
أم هيثم: أقول صقر
صقر: قولي فديتج؟
أم هيثم: يمه مايد ماكلمك..؟
صار له أسبوعين من سافر ..لا دق ولا سأل عنا..حتى ماكلف ع روحه يخبرنا خلص دراسه ولأ بعده!
قلبي مو مطمن ياولدي..كل يوم احاتيه وأقول اليوم بيدق..بس مااتصل..
حتى ابوك يحاتيه..
صقر: ههه لاتتعبي روحج يمه نوره..ميود وتعرفينه لما يلتهي بالدارسه ينسى حتى عمره!
أم هيثم بحنان: يمه إذا هو نسانا نحن نذكره..دق عليه فديتك..خلني أسمع صوته والله أني مشتاقه لهمسه!
صقر يدخل ايده بمخباه: من عيوني..كم نوره نحن عندنا؟!
طوووووط
طووووووووووووووووووط
طوووووووووووووووووووووووووووووووط
: هـــــــــــــــلاااا بوعذراء.. عاش من سمع صوتك..
لاتتصــــــل..ولاتســـأل! مسرع نسيتنا
صقر: هههه أنا الي ما اسأل ولا أنت..؟
حتى أمي نوره قالت هذا أكيد تزوج شقراء ونسانا
مايد: ههههههههههههههههه والله؟ أمي قالت جذا؟؟
صقر: هيه..ومن صبح تصيح تبي تكلمك عسب تتأكد!
مايد: ههه صقور لاتجذب علي..ترا انا مااروم ع زعل امايه!
أم هيثم تأخذ سماعه من ايده: بسك جذب ياالعيار..
يمه مايد اشحالك؟ تأكل زين يمه؟ مرتاح؟ قاصرك شي؟
مايد ببتسامه عذبه: شوي شوي علي يمه..أنا طيب ومب قاصرني غير شوفج ياالغاليه!
أم هيثم: وينك يابعد عمري ماتتصليه ولا طمن قلبي عليك؟
مايد: لاهي بهالأختبارات فديت روحج..مابقى غير أختبارين وأخلص..
أن شاء الله الخميس الجايه أنا عندكم..
صقر: قولي له لاحقين ع ثقل طينتك..خذلك اسبوعين بعد
أم هيثم: لا أن شاء الله..لو الود ودي كان يا اليوم قبل باجر
مايد: اميه..شو علومكم؟ وكيف أبويه بخير؟
><><><><><><><><><><><><><><><><><><><><><><><><><><><><><><><><><><
بعد مرور أسبوع
قبل ماابدا بقصتي.. أعرفكم بنفسي..
أنا عوافي..وحيدة ابوي وأمي أو ممكن تقولو صرت وحيدتهم بعد ماتوفى الغالي(هزاع أخوي) قبل سنتين..
كان مالي علينا البيت بضحكته وجنانه..
عمري ماحسيت بالوحده فوجوده..حتى جفوني ماكانت تغفي إلا ع صورته..
وألحين مابقت لنا غير ذكراه وصدى ضحكته بزوايا هالبيت..
كل الي بالبيت تغيرو بعد وفاته..ابوي صار عصبي بزياده..وأمي صارت طول الوقت ع الصامت..
عمتي صارت غامضه وطلعاتها كثيره..
وانا..صرت ولا شي ولا شي من بعده
لييـــــــــن ذاك اليوم الي نقلبت فيه حياتنا فوق تحت..
يوم قمنا صبح فيوم من الأيام ومالقينا عمتي..
ابويه ين..واطلعو براسه امية يني..عصب وصارخ علينا..ودار رأس الخيمه كلها ومالقها..
حزتها تأكدنا أنها شالت كل غشها وشردت...
ابويه انقلب حاله..صار ويهه اسود وطلعاته من البيت قليله ويعصب ع الطالعه والنازله..
أمي صارت تتجنبه حتى انها صارت ترجد عنديه..لأنها تخاف منه وايد..
بعد الي صار سحب أبويه أوراقيه من المدرسه الي كنت اقضي بها وقتي بدل الملل الي عايشته.. وسوى عليه حضر تجوال حتى بحوي البيت..
صرت ابكي بكل دقيقه تمر..وبكل ثانيه لامدرسه ولاجوال ولاحتى تيلفزيون!
حياتي صارت جحيم..تمنيت ترجع أيام أول..أيام ما كان يدخل هزاع عليه ويخرب عليه مذاكرتي..
أيام ماكان أبويه يحلف عليه اطلع ويا بنات خالاتي وربيعاتي الي صرت ماعرف عنهم شي..
صرت صبوره بزياده..وخصوصا عشان امايه المسكينه..
وصرت أتحمل اهانات ابويه وضربه وتذكيريه لي بعمتيه وأني بصير مثلها..
.
.
.
.
.
.
اليوم قمت العصر..صليت وقريت قرآن..أخذت نفس عميق وطلعت بالصاله..
لفيت يمين ويسار مالقيت أحد..
سويتلي بيالة شاهي وجلست بروحي بصاله..
طالعت صورتي بطاوله الزجاجيه الي جدامي..رفعت اصابعي اتحسس عيوني الذبلانه والسواد الي حولها..تحسست شفايفي الجافه..
معقوله هذي أنا..؟هذي عوافي؟
دمعت عيوني لما تذكرت مسخرت هزاع ع بشرتي وشفايفي الزهريه المليانه..
آآآه اشكثر اشتقت لك واشتقت لعيونك..
يااللـــه اشكثر اشتقت لضحكه بهالبيت الميت..حاسه أني عايشه ومو عايشه من بعدك..
ياالله ارحمنا
وفجأه قطع عليه تفكيري دخلت أبويه وهو يتفحص الصاله بعيونه..جرب مني وقالي: روحي لبسي عباتج..
بلعت ريقي بخوف: أن شاء الله..
لبست عباتي وحطيت الغشوه ع ويهي من دون تفكير وبسرعه نزلت...
لقيته ينتظرني بالحوي..قرب سيارته(اشرلي اركب جنبه..)
ركبت وانا صاخه..استغربت أنه اليوم ماقالي شي..
طالعت ع درب جدامي "نحن وين رايحين؟ معقوله ابويه يبا يتخلص مني..؟معقوله بيقتلني وبيريح عمره؟"
فجأه راح يسار..وسيـــده لين شفته دخل (محطة بترول) بس راح من الصوب ثاني..خفض سرعته ووقف ع يمين سياره لاند كروزر سوداء..
شفت أبويه يغمض عيونه ويحط رأسه ع سكان..أخذ نفس عميق.. بعدها نزل وفتح بابي وقالي بنبرة امر : نزلي
عوافي(ودموعي ع خدي): ابويه شو تبا تسويبيه؟
مسك ذراعي ونزلني بقوه ولف سيارته صوب السياره السودا وهو ماسك ذراعي بقوه حسيتها بتكسر عظامي..
فتح الباب الي قرب السايق وقاللي: ركبي..عوافي ركبي
صرت اصارخ برجا يقطع القلب:لا ابويه لاتذبحني بالحيا..لا رجيتك(وصرت أحب ايده وابكي من القلب..ماتوقعت ابويه يعقني جذا)
سحب ايده من بين ايديني..وصد عني الصوب الثاني وقال بصراخ يروع: ركبي ياعوافي..
ركبي ترا هذا ريلج مهو غريب..
.........>>>>> يتبع
><><><><><><><><><><><><><><><><><><><><><><><><><><><><><><><><><><><><
ها الجزء فيه اثاره اكثر من قبل..أتمنـــــــــــــــــــــــــــــــــــــــــ ى الاقـــــــــــــــــــي تفاعـــــــــــــــــل وتوقــــــــــــعات وردود أكثــــــــــــــــــــر..
،،..شاكــــــــــــرهــ لكـــــــــل من يدعمــــــــــني..،،