**************************************************
يوم الجمعة بعد صلاة الجمعة.. سالم راح يتغدى بيت اهله لان موزه رايحة بيت اهلها
ندى خافت لما شافت سالم ياي... قلبها يقول انه ياي يكلم ابوها
وبعد ماحطو الغدا... نصرى كانت طابخة عيش ومرق سمك... قعدو يتغدو
سالم وهو يشم المرق: اشتقت لمرقتك اماه
نصرى تبتسم: ومرق موزه؟؟ تراه طباخها ماشي يوبه
سالم: بس طبخك انتي غير.. له نكهة خاصة
احمد: يالله سمو
ومدو ايدهم يتغدو... ندى كانت ساكتة ومالها نفس تاكل... بس قاعدة عشان خاطرهم
احمد انتبه لسرحان بنته: ندى وراك ماتاكلي؟
ندى: هاه... بس مالي نفس
نصرى: اصريها متين ثايرة؟... من ساعة... ماواحت تيوع
ندى باعتراض: تكفينا قومة بقية ايام الاسبوع... من الساعة 5
سالم: الله يعينك... أن شاء الله ينقلوك ف مدرسة قريبة وبترتاحي
ندى: سويلي واسطة وخليه ينقلوني
سالم: قدمتي طلب نقل؟؟
ندى: بعده مايات الاوراق... بس ناوية اقدمها
سالم: انزين خبريني يوم بتقدمو الطلبات... بكلم حد من الربع
نصرى: بتفعل خير يوم بينقلوها... خايفين عليها من الدرب
احمد: تراه لساعة وقت... مب من بعد المكان... لعاد هيش بتقولي يوم بيحطوها ف اللبيدعة ولا شي من الاماكن البعيدة... حتى شارع جار مامسواي لهم
ندى: الحمدلله يوم حطوني ف السويح... والله ربيعاتي اللي حطوهن بعيد يشكن ويقولن لو نفنش احسن بدل آالتعب والمكدة
نصرى: الله يعينهن ويعينكن
ندى: امين... (تلتفت على اخوها) مشتاقة لبوحميد وازعاجه
سالم: ههههه... اصريه هو حد ف ثمه غير خاله صالح... هالي وهالي... ظنتي انه يبا صالح اكثر عني
نصرى: ههههه... وحليله احمد.... تراه صالح طيب وحباب... حتى اليهال يحبوه
ندى يا ف بالها حمد... وتشأمت منه ومن ذكره... الله لا قال اكون لك
وبعد ماخلصو الغدا...سالم قعد عند ابوه عشان يخبره
سالم: ابويه
احمد: هاه
سالم: حمد ود خالي محمد متقدم لندى ويباها
احمد: كلمك؟
سالم: لا... كلم موزه.. وموزه خبرتني... واذا وافقتو بيو يخطبو رسمي
احمد يفكر: اهاه
سالم: هيش رايك؟
احمد: دام انه ود محمد بن صالح... ليش نرفضه؟... كل اللي خطبوها قبل اقل منا وماوافقنا
سالم: تراني اقول كيه... حمد ماينعاب... ودامه من العايلة احسن لها
احمد: بنشاور امك وسلطان... وخلاف بنشاورها
سالم: امي اكيد بتوقف مع ود اخوها... وسلطان ربيعه
احمد: عسى خير... بنتشوف حن... وبنرد لكم يواب
سالم: ابويه بغيت انشدك عن الارض اللي ف سيح العلا
احمد: وراها؟
سالم: فيها ملكية؟
احمد: اها... مطلعلها السنة الماضية
سالم: سكينة ولا تجارية؟
احمد: تجارية
سالم: زين والله... واحد من ربعنا يدور على تجارية هناك... وقال شوف اذا بتحصل لي
احمد: يوني فيها ناس وايدين... بس مابعت... اعلى سعر عطوني ياه 95 الف... واني اشوفها تسوى اكثر عن كيه
سالم: ربيعي قال حتى لو بميتين يباها... ناوي على مشروع ف اذيك المنطقة متفق مع شركة اجنبية... ومالاقي ارض على مواصفات المشروع لين الحين
احمد: مايخالف انت خبره... وشله يتشوفها... اذا عيبه موقعها... بنتفق بعدين
سالم: ان شاء الله
ف بيت محمد... وبعد ماتغدو...
مريم ومنى جالسات مع عمار واحمد يلعبن بالبلي ستيشن.. حاطات مسابقة سيارات
عمار: انتن هيش دراكن باللعب؟ منى ييبي الجير
منى وهي مركزة ف اللعبة: عماروه خليني العب... خذ مال مريم هي ماتعرف
مريم: لا والله... اني ماعرف... تشوفي لعبك... كله تدعيم..هههههههه
عمار: مريوم زيدي عليها... عشان اسابقك عقب
منى: مالت عليكم ثنينتكم
احمد باعتراض: ابا بييييييييييب
منى: نابه!!! قاصر لا انت تلعب
احمد قرب من مريم ومسك ويهها بين ايدينه عشان تنتبه له: هالوه ابا بيب
مريم عاد نقطة ضعفها احمد ودلعه : ياعمري انت... امووووووووووواه (باستهه على خده).. بلاعبك من عيوني
وحطته ف حضنها وخلته يمسك الجهاز وتعلمه
منى: مريوموه هيش آاللعب؟ خلي عنك احمد
عمار: والله لعب احمد احسن عن تشويحك انتي
يا صالح على صراخهم... قال: انتن الثنتين بسكن من اللعب.... خلن عمار يلعب
عمار: خالي تعال لهن... متحكمات ف الجهاز ولا خلني العب
مريم تمسك راسها: ياربييييييييييي.... سمع التشليخ!!! ومن ملاعبنك قبل شوية
احمد لما سمع خاله... حط اللعبة وراح صوب خاله ويرفع ايدينه: هالي شالني (خالي شلني)
صالح: ههههههه تعال اشالك.... وشلاه بحضنه
عمار: خالي تعال بنلعب مباراة وقوم اللاه عنا
صالح: مايخالف.... وانتن يالله فارقن الجهاز
منى: حشا يالديكتاتورية
صالح يغايض منى: والله وكبرنا وصرنا نعرف الديكتاتورية
منى بتهديد: خااااااااالي.... اصريني مب شجعتنك ف اللعب... بشجع عمار
مريم: انزين مايخالف... بنوقف السباق... بس هاه عمور لا يزيد عليك صلللوحي
عمار بحماس: افا عليك خالوه... ان مادبلته بالاجوال ماكون عمار
صالح باستهزاء: سمع من يتكلم؟؟... انزين يالله بدي اللعب بدي وبنشوف
منى: خالي تراه عمار محد مثله ف اللعب... بس بعدني بشجعك انت
صالح يكلم احمد بحنان: وانت من تشجع؟
احمد مافاهم عن هيش يتكلمو... وببراءة يتساءل: هااااه؟!!
منى تلقنه: قول خالي صالح
احمد: هالي ثااااالح
صالح يمسك ويهه: ههههههههه ياحلوك انت... امووووووووووواااه
عمار: خالي أي فريق تختار؟؟
صالح: خلي الريال
مريم: عمور اختار برشلونة
عمار: تراني بختاره
وبعد ماختارو الفرق بدا اللعب... وصراخ منى ومريم يصمخ... ويزيد عمار وصالح حماس
احمد ومنى: هالي هالي
احمد يشجع مثلهن بس ماعارف على هيش... المهم يشارك ف حشرتهن
ومريم: عماااااااار....برشة... عمااااار...
عايشه وموزه كانن متسدحات ويتكلمن ف موضوع حمدوندى
موزه وهي قايمة: اللاه بيثورو ابويه من رجاده بحسوسهم.. بمشي لهم
عايشه: ههههههههههه.... ابوك بعيد مايسمعهم... خليهم
راحت موزه وهي معصبة
مريم وعمار: جوووووووووووووووووووووووووووول...
قامو يتنططو ويرقصو ويسوو حركات... ويغنو اغنية: برشا برشا يامدلل
واحمد قام يتنطط معهم
صالح ومنى منقهرين من الجول... وماباقي من الشوط الا القليل... وفريقهم خسران 3\1
صالح: شوف الخيانة.؟؟ احمدوه الدب... احيدك تشجعني
منى ضحكت على خالها واخوها: هههههههه... اذيه مع التربيشة والتخبيلة
موزه دخلت لهم: شوي شوي... ابويه راجد
صالح: ابويه مب هنيه... طلع
موزه: طلع؟
صالح: اها روح المزرعة
موزه: انزين حمد راجد مسكين
مريم: اوهووووو... حمد عااااااااادي... طبانة رجاد مايحس بشي
عمار: اماه فزت على خالي بثلاثة اجوال
منى: من هين فزت؟؟ المباراة بعدها ماخلصت... يالله خاااالللي خاااالللي خااالي
واحمد مع الجماعة: هالي هااالي
موزه وهي تروح عنهم...تدعي لبنتها: الله بثبات العقل
بعد يومين... ف بيت احمد... نصرى قاعدة مع بنتها وخبرتها بموضوع حمد... ندى رافضة وماتبا حمد
نصرى: انزين قولي لي ليش ترفضيه؟
ندى: يامي ماباه... مارتاح له حمد
نصرى: هيش نابه ماترتاحي له... اصريك شفتيه لين ترتاحي له؟؟
ندى: احسه واحد صايع ومايحب الا نفسه
نصرى عصبت: عييييب... لاتقولي كيه عن ود خالك... مايكفي انه ياي خاطبنك
ندى باصرار: واني ماباه... ماباه
نصرى: مب على كيفك تبيه ولا ماتبيه... الشور شور ابوك... وابوك موافق
ندى انصدمت: يعني عادي تغصبوني؟؟!!!
نصرى: مب نغصبك... بس حمد ماينرفض
ندى باعتراض: يامي ف نظري ينرفض... حرام عليكم لاتغصبوني على شي ماباه
نصرى: انتي فكري وشوفي... بس اقولك أن ابوك وخوتك موافقين... يعني يمكن يخلوك توافقي
ندى: بكلم ابويه روحي وبخبره اني ماباه
نصرى: فيك قوة راس تكلميه؟
ندى بادية دموعها تنزل: يامي اذيه حياة وعمر... لازم اتكلم اذا ماراضني الشي
نصرى وهي قايمة: والله اني خبرتك... واللي تبي تسويه سويه
راحت ندى غرفتها وقفلت على عمرها.. ورمت نفسها على الكرفاية وجلست تصيح... ممكن يغصبوني؟؟ بس اني احب محمد... اااااااااااااه يامحمد هينك... ااااااااااااااه ااااااااااااااه... وكملت صياحها
مسكت تلفونها وطرشت لمحمد:
" الحين كلمتني امي
وتقول انهم كلهم موافقين
يبوني آخذه بالغصب "
محمد كان مداوم شفت بالشغل... سمع رنة المسج وفتح تلفونه وقرى مسج ندى... نقز قلبه ولا شعوريا دق على تلفون ندى
ندى شافت الاتصال وهي بعدها تصيح... وماردت
طرش لها محمد:
" ردي ندى
ضروري اكلمك "
اتصل محمد مرة ثانية... بس بندت ف ويهه
ردت عليه:
" ماقدر اكلمك
مستحيل "
اتصل محمد... وهي تبند
طرش لها:
" حرام عليك
يكفي اللي فيني
ردي رحميني"
واتصل للمرة الرابعة... ندى كانت ايدها تتنافض ماقادرة ترد... صعبة عليها.... لين ماخلص الاتصال
واعاد الاتصال... وبتردد ضغطت على زر الاتصال
محمد بشوق: الووووو
ندى ماتكلمت
محمد: ندى حبيبتي اخبارك؟
ندى تعيمت... صوتها ماراضي يطلع.... كل اللي تسمعه صوت حبيبها وصوت قلبها اللي شكله بيطلع من كثر مايدق
محمد بترجي: ندى حبي ردي علي... ماكنت اتمنى اسمع صوتك فهالظروف
وهنيه ندى هلتها بكا
محمد تقطع قلبه على حبيبته: عمري لاتبكي... مابيصير الا الخير
تكلمت ندى وسط شهقاتها: وهلللل....ي ؟؟
محمد يحاول يهديها: أن شاء الله بنلقى حل... نسيتي ان الله فوق كل شي؟
ندى: ااااااااااه يامحمد اااااااااااه... ماتخيلني لغيرك
محمد بعصبية: مستحيل تكوني لغيري... تسمعيني؟؟ مستحيل
فتحت نصرى الباب بقوة (كانت ياية تطمن على بنتها.... وسمعت المكالمة)... وكان ويهها شكله معصب لاخر درجة
ندى ارتبكت وبندت التلفون وقامت واقفة
قربت نصرى من ندى... ومسكتها من شعرها... وصرخت عليها بعصبية: من محمد؟؟!!!!!
والى لقاء آخر مع جزء آخر :cool: