إي بالله أخطوا والخطا اللي جابهم عين الصواب
مبطي وأنا أشوف الطمع يكشف رداهم وأستـره
مايملي عيون الحسود بهالزمـن غيـر التـراب
ومن لايتوب من الخطا تحـرم عليـه المعـذره
اللي من أولهـا خـراب أكيـد تاليهـا خـراب
والبنـدق اللـي ماتثـور فـي هدفهـا تـذعـره
ودك اليامن جاتك الغلطه مـن النـاس القـراب
الصاحـب اللـي ماكسبـت محبتـه ماتخسـره
مشكلتي إني ماعرفت أحسب لصدتهـم حسـاب
قلطتهم صدري علـى ذكـرى قصيـد وحنجـره
صوت ٍ يصول بمنبره واخطاب مامثلـه خطـاب
والطيبه اللي زعزعت صوت الخطيـب ومنبـره
مافيه دمع ٍ صوبـوه أحبابـي بوجهـي وخـاب
ولازرق حزنـي علـى غالـي ولافـج انحـره
كل الزهاب اللي معي ذكرى من أصحاب الزهاب
واللي بقالي من عذاب اشرس طريقي وأخطـره
لأني تجنبت الغرق.. عديت من فـوق السحـاب
لأن أكثر أصحابي ورق..ماشفت للطيـب إثمـره
والله ماحطيـت بيـن الحقدوالـخـوه حـجـاب
حتى غدوا ربعي يحدوني على الضيـق أشكـره
البارحه ثـارت علـي رقـاب وأوتنـي رقـاب
البـارحـه ياثـقـل دم الـبـارح ويامحـقـره
..........................
اهداء مني لكم