بسم الله الرحمن الرحيم

انا وعدتكم والآن سوف اوفي بوعدي بعدة مواقف ولكن سوف أختصرها لكم منها المضحكة ومنها المؤلمة
الموقف الاول:
كنت أدرس في مدرسة ريفية وليست نائية فمره سألني طالب وقالي استاد قلت نعم قالي انته هين تشتغل ؟؟ قلت له الصراحه في مسقط ،، قال آهاااااااااااااااا الحين عندك إجازه؟؟ قلت ايوا ماتشوفني ياي اتمشى ماعكم وجلس وهو مقتنع، ( طبعا هالكلام قبل لاينتهي العام الدراسي بسبوع وانا ادرسه طوال العام )

الموقف الثاني:
مره كان ولد وااااايد على نياته ومسكين ، وجاني معلم وقالي تصدج ياستاذ فلان ان الطالب الفلاني متهزي وشايف نفسه ومدري شو، قلت فلاااااااان؟؟!!!! وانا مستغرب قال ايوا قلت له غريبه هذا مسكين وفي حاله وفهمه بطيء وماعتقد يضر حد قالي انت على نياتك وفجأه الطالب يمر من قدامي وناديته ياولد تعال وكان لابس تكرموا نعاله صح قلت ليش لابس نعالك كذيه اليوم متخالفه؟؟؟ تشوف على نعاله وقااال اوووووووووه صح قام وعكسها وقلت له الحين انت صح بس روح وراح كل نعال في صوب وقلت للاستاذ هذا اللي متهزي عليك؟؟؟ (طبعا الغرض من ذلك ليس الاستهزاء بالناس وانما اقناع الاخرين بشتى الطرق )

الموقف الثالث:
مره مسكت طالب وشكله كان يدخن سيجاره فقلت انا اذا جيته بالعرض راح ينكر بس جيته بأسلوب كأني اشجعه واقوله اني محتاج حبة سيجاره الولد مسكين صدج وقالي استاد فلان حتى انته تدخن؟؟ قلت له اسكت يالخلفه لا حد يسمع بيني وبينك ، قولي وين دخنت؟؟ قالي برع قلت لايكون حد شافك ؟؟ قال لا افا عليك استاد محد شافني ، قلت له تعجبني بس اني الحين ابا حبه سيجاره قال مب عندي عند ربيعي فلان ايضا طالب قلت له لازم تتصرف ، المهم الربيع راح عني وانا انتظره في الاداره رد علي بعد دقايق وفي ايده سيجاره وملفوف عليها كلنكس وناداني وعطاني وانا كنت مجهز له استدعاء ولي الامر فلما يعطني قلت له سلم واستلم ولما جاء الوالد اليوم الثاني قالي انته ماشفت حد غير ولدي اني يدخن؟؟ قلناله اسفين هالمره بنشتريله بروحنا ولايهمك

الموقف الرابع : اعرفكم مليتوا

المهم مره كنت بالصف وجاني ولي امر كالعاه يسأل عن ابنه وطبعا الابن تعبان وقلت له ابنك يحتاج لمتابعه اكثر ومن هذا القبيل وانا اتكلم الا والشايب يشل الباكوره على ولده ويضربه في الراس وصب الدم ، قلت له هذي التربيه ولا بلاش ، قالي اخوه اللي قبله ربطته فالعود ثلاث ايام لحد ما اخذ الشهاده ، قلت ماشاء الله ياب نسبه؟؟ قالي ايوا ويشتغل فالبوش الحين . صدج الضرب له نتائج حلوه الصراحه

طبعا المواقف تتعدد ولكن قد لانجد في سردها نوع من الدهشة والمرح كما هي عليه الحال في الواقع