|
≈{ يُـڳفُيًنـٌي مُـنًـڳ -»بُسًمـٌتَڳ «- ۉۈٱغٌلًـىْ ٱڶهـٌدٱيًـٱٱ ضُحٌڳتك
بسم الله الرحمن الرحيم
دار الرأس وما عرفت شو ابى اسوي قلت افتتح مدونتي حتى العنوان ما عرفت شو اسميه المهم هذي مدونتي وان شاء الله تكون انعكاس لحياتي الواقعية :) شوف اهداف برشلونة بتعليق الشوالي بعدها رجااااد عاد شو تتوقعوا الفوز برشلوني ولا مدريدي ليلة السبت اهم الشي الروح الرياضيةtongue. لا احد يجي يغايضني اذا خسر برشلونة |
مرحبا بكم من جديد
خلونا نستعرض بطاقتنا الشخصية الاسم: مستر كونسلتنت العمر: 22 سنة الوظيفة: طالب __________________________________________________ ________ صار لنا معطلين اسبوعين بس الشغل ما يخلص ناخذ راحة كبيرة وشغل شوي مثل السلحفاة اليوم صبحت فالجامعة عالساعة 11:30biggrin وتوني راجع البيت يعني 11:00 مساء بس ما عليكم مثل ما قلت لكم الشغل شويهو اللعب وايد مشي جديد وخاص في هاليوم حاله حال غيره |
اخوي بوظبي داري
تشرفت بردك ولا عدمناك ان شاء الله بس الشيخ القوانين ما تسمح تحط مشاركات هنا سوي لك مدونة وحط المشاركة وان شاء الله بشوفها وبرد عليك فمدونتي تسلم الشيخ |
المنصور شكرا عالفيديو
هالذيب كأنه ما سوى شي وكأنه في كيد على صاحب الحظيرة قصف له كم رأس وخلاهم لا اكل ولا هم يحزنون!!!!!! |
يوم حلو الحمدلله
مشمس وصحو ودرجة الحرارة تقريبا 15 سيلزية قمت 11:30 سبحت كويت ملابسي ورحنا انا وصديقي نصلي الجمعة طلعنا من الصلاة ولقينا صديقنا من المالديف رحنا الجامعة على اساس اخلص شغل مهم في المشروع بس للأسف ما لقيت الناس اللي لازم الاقيها طلعنا من الجامعة الساعة 3:30 رحنا مطعم كردي اخذنا ساندويتشات دجاج وعصائر ورحنا على River side والله طبيعة رهيبة اكلنا وصورنا بحط موضوع ان شاء الله للصور اللي اخذتهم وحاولت اطلع الشجرة عشان اصور بس ما قدرت تعورت فايدي شوي رجعنا البيت على قرايب المغرب صلينا وطبخت العشاء وتوني مخلص الطباخ ناشف دياي<<<<<< اللي يريد يتذوق بس يتحمل نفسه اذا بغى المستشفى وناويين نروح السينما بعد العشاء ان شاء الله اغلق المحضر بتوقيت 9:30 مساءا |
مبرووووك لكل مشجعي برشلونة على الفوز على الريال في الكلاسيكو
وهاردلك لمحبي الريال راعية الطير<<<<<< لازم اهذر عليك انتي بس لي عودة لتسيطر يومي ان شاء الله |
مرحباين عودة
سوري ما حطيت يومياتي امس انشغلت توني راجع من الجامعة بس ما كنت اشتغل كنت العب يعني نضيع الوقت شوي :) كل ما اشوف مدونات غيري اقول صدج اني مصخرة شوف الناس وين وانت وين!! |
السلام عليكم
باكر عندي برزينتيشن للمشروع مال التخرج مكروفين كرف في هالمشروع لازم نسوي بوستر عن المشروع وكذلك لازم نطبع البور بوينت عاد توني راجع من الجامعة وقلت خلينا نتكشخ حق باكر لبسنا البدلة وجلسنا نلعب في الكرفتة بدو اللي فالحين فيه وزار ودشداشة ومصر او غترة لازم نتحضر يعني!!!!! دشينا اليو تيوب وتعلمنا ربطة العنق باكر معي البرزنتيشن دعواتكم لي ربي يسهلها امين يارب |
اقتباس:
جميعا يارب ولا يهمك الصورة بتوصلك ان شاء الله مشكور ما قصرت مديرنا |
اقتباس:
ما تقصرين راعية الله يوفقنا جميعا امين يارب |
1\6
المهمة الاولى أنجزت الحمدلله انتهينا من المهمة الاولى الا وهي البرزنتيشن حق المشروع الشخصي لسوء حظي كنت أول واحد لازم يقدم العرض فارتبكت اول بداية لكن الحمدلله انهيتها بايجابية ما أدري كم بتكون الدرجة بس اهم شي انجزنا المهمة وان شاء الله تكون ناجحة 5 مهمات باقيات قبل الامتحان برزنتيشن تاريخ 20-4-2010 الاسبوع القادم بعدها برزنتيشن 4-5-2010 تسليم مشروع جماعي صغير 11,000 كلمة تاريخ 4-5-2010 تسليم مشروع جماعي كبير 20,000 كلمة تاريخ7-5-2010 تسليم المشروع الشخصي 8,000 كلمة تاريخ 11-5-2010 دعواتكم لنا والله يوفقنا جميعا |
هذا زمان المســـخره هذا زمان المســـــــــخره
جوال ومشيه بفشخره في وسط السوق متبختره والكحله في وسط العيون والشفايف زود محمره هذا زمان المسخره هذا زمان المســـــــــخره لو يسألها ذاك الفقير وين انتي رايحه يامره جاه الجواب يبهدله وتقول كلام بيقهره باروح السوق ابشتري فستان للحفله المزهره وتروح الصاله كنها عروس مزينه ومعدله ومعطره وما ترجع الا في الصباح وتشيل الزينه الساحره هذا زمان المسخره هذا زمان المســـــــــخره اخر الشهر تقبض الراتب وتروح المجمع وتبعثره وتعير ذاك الفقير لو اني مثل غيري ما عشت واياك محسره شوف فلانه وشوف علانه عايشين عيشه ميسره فله جميله وسياره كشخه ماهو مثلك تركبني سياره مكسره هذا زمان المسخره هذا زمان المســـــــــخره لين استلمت ذاك التلفون تبمبع مثل البقره واتحش في الناس هذا طويل وهذا قصير وحكيها كله مسخره وفلانه اليوم مطلقه وفلان ماتت له مره وكلامها أصلا ماله أساس بس هذره فاضيه وبربره والوقت يسرع والهاتف يحسب أمواله تروح مهدره هذا زمان المسخره هذا زمان المســـــــــخره الله يرحم ذاك الزمان الحرمه فيه مستره كانت تجلس ويا الاذان وتصلي لله وتشكره وتدعي للناس الطيبين بنفس طيبه وطاهره هذا زمان المسخره هذا زمان المســـــــــخره مو مثل بنات هذا الزمن تركب ويه الاجنبي بيدها روج ومنظره وقصت الشعر أخر موديل كأنها ديك منفوش جناحه وعرعره والعبايه تحطها على الكتف حتى الشعر ماتستره ولو تقول لها هذا حرام قالت كلامك كله دندره !!كلامك كله ما يعني لي شيء أني فتاه متطوره لا يخدعوك باسم حضارة هالزمن آخرتها تالي المقبره وآخر كلامي بالصلاة على النبي واياه العترة الطاهره |
السلام عليكم
اليوم رحنا نلعب بولينج سبع اشخاص عادة العب زين وابدع يعني اذا ما كنت زين اجيب الثاني اما اليوم خرتها العافية ما جبت نتيجة عالية اعلى نقطة وصلتها 104mad. اهم شي طلعنا واستانسنا وغيرنا جو تصبحون على خير |
عجبني توقيع في منتدى ثاني
وحبيت اشارككم به Your future depends on your dreams, so go to sleep Can you do anything that other people can't? Sure, I can read my handwriting..! |
المحششين عجيبين والله جاني هالايميل وضحكني كثير فقلت خلينا ننزله هنا ممكن يريحكم شوي محشش سايق إسعاف في الحرب نقل 35 قتيل ... سمع في الراديو سقوط 30 قتيل ! وقف وفتح الباب وقال: الخمسه اللي يستهبلون ينزلون ألحين ! ----------- --------- --------- ------- محشش إشترى لأمه عصفورين ! واحد يغرد والثاني ساااكت ! سألته أمه : ليش الثاني ساكت ؟! قالها هذا الملحن ------------ --------- --------- --------- ------- ولد يسأل أبوه المحشش وشو برج ايفل قال أبوه ماادري قال طيب وشو السيراميك قال أبوه ماادري قال طيب وشو الايميل قال ما ادري قال طيب وشي العولمه قال ماأدري قالت امه لا تزعج ابوك قال ابوه لا خلي الولد يستفيد ! ------------ --------- --------- --------- ------- محشش صديقه يتصل عليه ومايبي يرد أرسل رساله : "أنا ناسي تلفوني بالبيت" ------------ --------- --------- --------- ------ سعودي وصعيدي محششين مسكتهم الشرطه سالو الصعيدي وش أسمك؟ قال: أنا سبع الليل، قالو للسعودي وإنت؟ قال: انا ثمان الصبح !! ------------ --------- --------- --------- ------- عندماتغردالبعارين ونسمع نهيق العصافير ونرى الخيول تمتص رحيق الأزهار والخرفان تحلق في السماء نشعروكأننافي حلم... محشش يكتب خاطره ------------ --------- --------- --------- ------- فيه محشش راح لراعي بقاله قال:عندك عنب قال:لا راحت ورجع مره ثانيه وقال:عندك عنب قال:ماتفهم ماعندي ترا إذا رجعت بربطك عندالمحل راح وبعدشوي رجع وقال:عندك حبل قال:لا قال:طيب فيه عنب! ------------ --------- --------- --------- ------- محشش تمدحه خطيبته تقوله:إنت بطل شجاع وفارس الفرسان.قال:تدرين إني كنت شهيد في حرب الخلي |
راعية الطير
المشاغل في تزايد من كذا مغيبين عن المنتدى>>> اونه والله سوينا برزنتيشنيين لحد الحين الحمدلله مشت الامور بس المشرف مال البرزنتيشن الثاني رفعلي ضغطي وما اعتقد بيعطينا درجة زينة واحد غبي وعنصري والله ناوي عليه نية شر<<<< استهدى بالله باجي لنا برزنتيشن غيره و3 مشاريع تسليم يعني خلصنا 2/6 هيش يذكرنك هالرقمين<<<<<<< ما قصدي شي هههههههه اما بالنسبة للمشرفة المميزة المنتدى حب يميزني<<<< امحق تمييز |
يومياتي للايام الماضية
واللي بتيي كلها يوميات جامعية من نطلع من البيت الصبح ما نرجع الا تالي الليل ززحمة شغل مشاريع ووزحمة والمشكلة طلبة الجامعة ما عرفوا يخلصوا شغلهم من قبل عشان يفضوا الكمبيوترات والمكتبة لنا نحن المكتبة زحمة وكلا يغني على ليلاه والصنين تفوح والركض يصير والبهدلة تصير عليك تشوف وتبكي مثلهم ولا تضحك عليهم دعواااتكم |
بس كذا جات على بالي
وقلت خليني اشوف عدد الردود مقارنة بالمشاهدات طلع شموخ جعلاني الاول ب13 مشاهدة للمشاركة الوحدة وبعدها انا ب11 مشاهدة للمشاركة الواحدة بس كذا مجرد فضول صراحة شي يشجع معناه يومياي زينة وانا افكرها خرابيط حي اللا زين زين في تطور فالعملية التعليمية تصبحون على خير |
جوم الصبح من رجاد اسبح واتلبس وبدون ريوج الجامعة
الثلاثاء الماضي قمت 20 دقيقة متأخر عن الموعد الاعتيادي وفاتتني المحاضرة طبعا تفوتك نص ساعة بس انت تقول مالها طعم تدخلها متأخر نباها من الله وطلعت المحاضرة مب مهمة مراح تدخل الامتحان اليوم بعد نفس الشي قمت نص ساعة متأخر ادخل على ابو الشباب في غرفته اقولك الساعة 8:30 يشوف عليه بنص عين عارف انزين عيل كدت عمان كان تعرف ترانا متأخرين وهو ناوي كان يقوم نن الصبح يكمل شغل مهم فالمشروع رحنا الدوام متأخرين 30 دقيقة اوووه برايه ما يحتاي محاضرة خلينا نجلس عالكمبيوتر رحت للمشرف اسأله عن درجة البرزنتيشن بعدها ما طلعت رجعت اشوف من باب المحاضرة واحد من الشباب يقولي ادخل اقول لا ما يحتاي احسنت من حسن الحظ طلعت الماحضرة معيودة رجعت الجامعة شغل لحد نص الليل هذي هي اليوميات كل يوم اطلع الصبح من البيت ارجع تالي الليل والجامعة 24 ساعة حية اتاري الشعب كلهم يطبقوا المبدأ last minute.com فكرنا طلبة الهندسة مسحبين عالدراسة ويجلطوا الشغل اخر شي طلعت الجامعة كلها نفس الشي بنات واولاد الا من رحم ربي اعرف اني هذيت وايد لكن اسوي تفريغ للشحنات الكهربائية المكتسبة من جراء المرور بالجو الجامعي عشان لما ارجد ما يتطاير الشرار تصبحون على خير وسعادة |
الأربعاء
28 ابريل 2010 اليوم شرفنا بنتين مع مكتب العقار يشوفوا الشقة لاننا بنطلع عاد الشقة خالية ما فيها اثاث ولما احد يدخل عندنا نقوله خلاص طلعناه الاثاث عشان بننتقل ههههههه رحت الجامعة اشتغلت فالمشروع لحد الساعة 6 بعدها رحت اكل ورجعت اشوف مباراة برشلونة عالنت كنت ناوي ما اشوفها عشان ما تضربني كأبة عاد اشوفها ومندمج ولما جاء الجوول الاول ييسسسسسسسسسسس صرخت من قمة رأسي شلت السماعة واشوف حواليه الناس تشوف عليه قلت لهم سوري وتم يضحكوا عليه لما جاء الهدف الثاني قمت من الكرسي اشوف على ربيعي ييس بس طلع الهدف ملغى والناس يقولوا فخواطرهم الله بثبات العقل مباراة حلوة من طرف برشلونة بس للأسف دوام الحال من المحال العام الماضي تأهل بعد مساعدة تحكيمية ضد تشلسي والسنة طلع بسبب ظلم تحكيمي وهذي هي الحياة |
30 ابريل 2010
الجمعة جمعة مباركة عليكم جميعا اليوم راجع الساعة 5:30 الفجر البيت صراحة الجو روعة جدا والله ذكرني لما تكون فالطائرة وتشوف الشروق والسحب والافق جو روعة جدا رجدت لحد الساعة 12 رحنا صلينا الجمعة اكلنا في مطعم كردي وعلى الجامعة والحين اكتب لكم من الجامعة ما قدرت ادخل امس لاني كنت مشغول حتى الثمالة ههههههههه والحين بنروح نشوف فيلم Iron man 2 ان شاء الله ما تسوى لهم المشية بدوني <<<<< عطيني من البااايت ما احب ادخل السينما بس يجروني جر لها نشوفكم على خير ان شاء الله |
5-5- 2010
5 من 6 مهمات راحن وباقي مهمة واحدة بسني اليوم ما اريد اروح الجامعة راجع منها الساعة 5 اريد اسوي نقاهة ونريد نطبخ فالبيت صار لنا اسبوعين كله من برع البيت الله يعلم الراتب يكفي ولا يخلص قبل لا ينزل الراتب الثاني عندنا تسليم المشروع الجماعي يوم الجمعة والشخصي يوم الثلاثاء وبعدها الاختبارات بعدنا ما ذاكرنا امس سوينا برزنتيشن وسلمنا مشروع جماعي مصغر كنا مجموعة مكونة من 6 طلبة اول امس كنا فالجامعة نخلص التقرير في غرفة وخلص حجزنا وما لقينا غرف غيرها اضطرينا نروح بيتنا نكمل الاجتماع صدج تشوف الجنون في اسمى معانيه>><>> ههههههههه اللي يغني واللي يعب كرتيه مع نفسه واللي يلعب ملاكمة ومضارب وغناء خلصنا 3:30 حتى ما راجعنا البرزنتيشن مالنا صبحنا الصبح عالجامعة وسوينا البرزنتيشن بدون تحضير ذكريات ما تنتسي خصوصا اذا كانت موثقة |
الاسبوعين اللي طافوا تقريبا كذا كان الوضع
http://www14.0zz0.com/2010/05/05/16/500476383.jpg http://www6.0zz0.com/2010/05/05/16/676978794.jpg http://www.m5zn.com/uploads/2010/5/5...h9odc76bht.jpg http://www.m5zn.com/uploads/2010/5/5...bqmejdbr3x.jpg الصورة تختصر الف كلمة |
جمعة مباركة للجميع
تعب في تعب |
السلام عليكم ورحمة الله وبركاته
اشحالكم جميع؟ حبينا نسلم عليكم والسموحة على قلة التفاعل تراه مشغولين وايد معنا اختبار يوم الاثنين والثلاثاء ان شاء الله دعوااااااااااااااااااااااااااااااتكم |
الحمدلله كما ينبغي لجلال وجهك وعظيم سلطانك
الحمدلله رب العالمين واخيرا خلصنا الدراسة قولوا امين تكلل السنة بالنجاح واكون خلصت درجة البكالوريس واخيرا تصبح حر طليق عقبالكم الدارسين :) |
عاد الحين ما اهيسكم
بروح السينما ان شاء الله وانت جلسوا ذاكروا ودحوا ههههههه |
صراحة شعور مختلف جدا
جدا جدا جدا شعور مختلف لما تجوم من النوم وتحس ماشي وراك جامعة ولا يحث ولا دراسة تروح الجامعة وتضحك عالخلق اللي ما خلصت اختباراتها :) اليوم قمت من النوم اسمع احد يدق الجرس رحت المطبخ وقحمت فوق الطاولة وجلست اطاوس (اتشوف) من فوق الطابق الرابع اشوف حرمتين قلت غيبن اسمني ما افتح الباب تراهم مأذينا هالايام كل يوم لازم احد يجي الشقة يشوفها يمكن يستأجروها بعد ما نطلع منها بعدين رحت اتمرن واكل ورجعت لكم :) والجو تراها عندنا روووعة لا مكيفات ولا هم يحزنون ولا عرق هههه |
اليوم اجواء روعة عندنا
فقلنا نروح نسوي مشاكيك ودجاج مشوي رحنا نحن وطلاب الصف 18 واحد سوينا ولعبنا ورقصنا :) بعدها لعبنا كورة بس تكسير كله تمتعنا والحين بنروح سينما تمتعوا بوقتكم :) |
مرحبا بكل من طل ونور مدونتي المتواضعة
اليوم 23-5-2010 رحنا الهايد بارك الجو شمس مب حار بس الشمس تلسع لاقيت اثنين من ربعي كانوا معي فالكلية جلسنا معهم لعبنا كورة شوي وبعدها رحت عنهم اليوم طالعين عشاء ان شاء الله على شرف السمي (يعني شخص اسمه نفس اسمي) باكر بيسافر عننا وبيروح بلاده:vb85: بشتاق له كثير صراحة هالسنة كله مع بعض المشروع الجماعي واجماعي المصغر مع بعض وكل اسبوع لازم نلتقي بس ان شاء الله احضر عرسه ويحضر عرسيcool. |
السلام عليكم ورحمة الله وبركاته
اخباركم؟ عساكم بخير ان شاء الله اولا حمدالله عسلامة المنتدى ومبروكين على رجوعه ثانيا ويلكم باك راعية الطير وحمدالله على سلامتك الله يسلمكم امس جيت اريد اكتب في هالمدونة بس المنتدى كان زعلان فجينا نكتب لكم اليوم 27-5-2010 كنت رايح الجامعة وانا في طريقي من الخلف شفت مجموعة اولاد ومعهم بنتين البنت حطت السيجارة في فمها وجلست تشوف عليه نظرة استغراب من شفتها قلت في نفسي لا يكون حشيش لما قربت منهم حطت السيجارة على الجدار عشان ريحتها ما طلعت بس انا شميتها وكانت حشيش بالفعل قلت فخاطري انزين مبروك عليك كان حششتي رحت الجامعة وبعدها طلعت من البوابة الخلفية ولجيت الاولاد بعدهم جالسين لما مريت من جنبهم اسمع واحد منهم يقول لشخص ثاني كيف تحس الحين؟ شكله يقول:vb105::vb72: روج المنجا. اليوم عاد رحت اصلي الجمعة وبعدها رحنا نأكل وخطفنا على بعض المحلات رحت محل تلفونات اسألهم عن تلفون سوني اريكسون Aino كنت مقرر اشتريه بس طلع مسحوب من السوق بسبب مشاكل فالسوفت وير قلت الحمدلله اني ما استعجلت عاد اليوم معنا عشاء جماعي ان شاء الله وباكر بروح المطار استقبل اخوي وبن عمي ان شاء الله جايين معنا زيارة المهم تراني تكلمت وايد اخليكم الحين BE GOOD |
مساء الخير
الحمدلله انه الاعصار تحول الى عاصفة وان شاء الله بيكون منخفض قريب باذن الله هالفترة مشغول من خاطر نودع بريطانيا من مكان الى مكان تمشية لعب وكل شي حلو امس رحنا حديقة ملاهي بس ضحك من الخاطر عندنا واحد من الربع شوي ويطيح قلبه عاد اخذنا دي في دي لي لعبة من الالعاب والله ضحك من جد اليوم الفجر اتصلت في البيت والحمدلله خبروني الاوضاع مستتبة في جعلان بس مظلة السيارات وجدار المزرعة طاحوا الحمدلله انه الضرر مادي لا اكثر ان شاء الله يمر الاعصار وتكون عمان بخير وعافية |
Good Bye
Wish me a safe flight see you soon in sha allah |
اليوم كان فنان الحمدلله
طلعنا عالساعة 11 رحنا صوب الاشخرة لكن الدار ما تنطاح المياه موجوده الكهرباء مقطعوة بعض البيوت متكسرة هالحال لحد ما وصلنا صور لعبنا كورة بعد الاشخرة بعدها طلعنا نبغى نشرب شي بارد ماشي فايدة تمنيت القى ايسكريم لاني كنت عطشان شو نسوي الغريق يتمسك بقشة رحنا صور اشترينا العشاء ورحنا صوب مكان اسمه الرفصة اعتقد تعشينا ورحنا صوب الوادي واشوف الشعب كلهم يتسبحوا سبحنا وعملنا مسابقة من اللي يجلس تحت الماء اطول فترة ممكنة المرة الاولى طلعت الرابع والمرة الثانية طلعت الاول يوم عجيب والله بس ناقصنه اغلى انسان الله لا يحرمنا منه ان شاء الله يرجع قريب وترجع معه الحياة مثل ما كانت احبك وايد وايد |
جبت لكم فيديو عمل بواسطة فريق السماوي للمغامرة والاستكشاف وعرض على قناة دبي
الفيديو خلال اعصار فيت http://www.youtube.com/watch?v=a8ikglJFy0k |
اليوم دخلت 23 سنة ولحد فيكم بارك لي frown.
جلست اشوف مباراة البرازيل وكوريا الشمالية وشجعت كوريا الشمالية وطفرت بالبرازيليين تطفير مع اني برازيلي ههه لا انا اشجع 10 منتخبات في كأس العالم وبعدين بصفي |
مرحباين عوووووووووووودة بكل مشاهدينا المحترمين خلف شاشات التلفاز والذين
يشاهدون هذا البث الحي المباشر عبر الاقمار الاصطناعية كل التقدير لكم مشاهدينا قبل ان نبدأ حلقة اليوم هذا تذكير بأرقام البرنامج 009680097100965 تكلفة الاتصال من الخطوط الثابتة 10 بيسات اما بالنسبة للهواتف المتنقلة فهذا يعتمد على الشبكة المسجلة بهواتفكم عموما احبتي الكرام تجنبا لاي بداية مملة حبينا نفتتح حلقتنا بمعزوفة موسيقيةcool. مبرووووووووووووووووووووووووووووووووووووووووووك لكم فوز المنتخب الجزائري 0-0 على المنتخب الانجليزي اليوم ياني اتصال على البرنامج بحدود الساعة العاشرة صباحا وكان من حبيب الشعب بو فيصل يسلم عليه ويستاهل لنا السلامة اهل جعلان فبادلتعه السلام والسلامة على اهل قريات فوصاني اسلم عليكم لا تقولوا ما وصيت السلام اللي ما يعرف بو فيصل هذي صورته http://www.oman0.net/gal/data/681/medium/image00113.jpg وبهذه الفقرة نصل الى ختام حلقتنا الليلة متمنيين ان تكون قد نالت على اعجابكم الكنترول خلاص انزل المايك ايوه خلاص مع السلامة |
كيفكم مع كأس العالم؟؟؟؟
توقعاتي للمجموعة الاولى والثانية كانن صح :) عاد اليوم المجموعة الثالثة والرابعة انا متوقع انجلترا وسلوفينيا يتأهلوا بس اتمنى من عماق قلبي الجزائر وانجلترا يتأهلن المجموعة الرابعة متوقع المانيا مع صربيا بس حرام تطلع غانا عسى تفوز استراليا على صربيا ويتعادلن المانيا وغانا ويتأهلوا النجوم السوداء مبرووووك لكوريا الجنوبية التأهل وبهذا نبارك لاخواننا في كوريا الجنوبية التأهلbiggrin وفضحتينا يا بيونج يانجmad. |
اليوم كان حلو
نت وكوورة وكاس عالم كالعادة باكر ورايه الكرف الله يعين بعد صلاة الفجر معنا معسكر مع الوالد تحويل عزبة وما عزبة وهالشغلات يعني يعطيك:) بحاول ادور لي عذر اذا لجيت biggrin وبعد العصرية كذيه معي شغل طلعت بزنس مان وما عندي خبر :) |
السلام عليكم ورحمة الله وبركاته
يوم أمس واليوم كانوا معسكر امس من بعد صلاة الفجر لحد صلاة الظهر شغل حفر وتعديل وتحويل وتركيب بعد صلاة العصر رحنا نحن وعيال معي وخالي طلعنا مشاكيك رجعنا عالساعة 10 نوم واليوم من بعد صلاة الفجر لحد الساعة 11 في المعسكر وكملنا بعد صلاة العصر الجسم تغطيه حبوب اللدغ من الصامت واشباه الجلد في بعض الاماكن متفحم كأنه محترق بنار ما كأنه لدغ بس الحمدلله الامور طيبة |
| الساعة الآن 01:48 PM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir
][ ملاحظة: جميع المشاركات تعبر عن رأي الكاتب فقط ولا تمثل راي ادارة المنتدى بالضرورة، نأمل من الجميع الالتزام بقوانين الحوار المحترم ][