مختارات من أجمل القصائد 1

[المنجرد الاخضر]

ياسيدي صار الحكي كنه سكوت
وين القصيد .. وكيف أبا ألقى المعاني
بغيرك حروفي من ذهب .. حص .. ياقوت
أما أنت يعجز عن مقامك لساني
فـ .. أقصى ضميري جاير الحزن مكبوت
أبيه أنا لنفسي .. وحزنك عصاني
واشيخنا اللي وإن خذاه القدر فوت
عمره سنين .. وعمر غيره ثواني
ما أحدٍ بنى لشعبه مشاريع وبيوت
وأسكن بقلبه ساكنين المباني
إلا أنت ياشمسٍ محت كل طاغوت
يابو الوفاء .. والطيب .. بحر الحساني
عذروبك إنك مثلنا .. تشيب .. وتموت
وعذروبنا من حماك نلنا الأماني
لا .. لو يموت الح .. للحب تابوت
جفن المحب .. وخلجة ف المحاني
ويا سيدي صار الحكي كنه اسكوت
وين القصيد .. ووين أبا القى المعاني

[المنجرد الاخضر]

ان بكى الليل والدمعات سود
وسال كحل ٍ على قمرا الخدود
أعرف انه هوى نجمٍ فريد
مثل نوره سديم بلا حدود
حسبي الله عدد ضي النجوم
ورحمة الله على سهيل العنود
عمتي يشهد الله عمتي
هذا حق النسب وأغلى الجدود
وعمتي في المحبة والعطا
وعمة الناس يالقلب الودود
والله أكبر خذت منك السنين
كثر ما غيبت منك اللحود
والله أكبر خذيتي من السنين
كل ما يجعل الذكرى خلود
وأكثر الناس حقٍٍ في البقا
من إلى بخلت الدنيا يجود
ويحمد الله على طول الحياة
من قصَرها على تقوى وسجود
ما على الزهر لومٍ لو بكى
وذير الصوت غزلان النفود
خلّ نجدٍ تبوح بحزنها
قبل تنسى معــالمها النجود
كل شي مرده للزوال
وكل عبدٍ .. لخلاقـــه يعود

[المنجرد الاخضر]

اظلم الطرس واحتار القلم
ولبست الشمس ثوبٍ من عسام
عزوا السيف في موت الكرم
وعزوا الجود في موت الحسام
الله أكبر إلى طاح العلم
تبكي الحرب حزنه والسلام
خليت الدار من راعي الشيم
رابع الصيد من نسل الامام

[المنجرد الاخضر]

مالنا فيك ياالطيب نصيب
الله اللي كتب هذا السفر
جيت دار الفنا مثل الغريب
ورحت عنها مراويح المطر
كن ودك تغيب ولا تغيب
صرت مثل السنابل والزهر
يافهد وش نقول انك حبيب
صافي الحب في قلبك نهر
يافهد وش نقول انك قريب
اسأل العين عن قرب النظر
يافهد نكتبك لطفٍ وطيب
أو نعزي بك رجال الفخر
يافهد .. نندهك ليتك تجيب
فاقدينك مثل شمس وقمر
سهم الأقدار يقتل من يصيب
يالله انا .. رضينا بالقدر
بس في صدورنا دمع ونحيب
لو نثرناه .. ذوب له صخر

[المنجرد الاخضر]

الله يحبك كثر ماشقق البرق
سود الدياجي وانبت الغيث وارق
والله يثيبك كثر مابان من شرق
نجم وغاب فـ لجة الغرب شارق
يا سدرة في نجد يلقى بها الورق
للنوح غصن وللمعالي بيارق
لك الشموخ لباس .. عاليك للعرق
وباقي النسا خرص الذهب والعشارق
والله ما مثلك كتم آهته حرق
وما كن مسك من لياليه حارق
وقت الى منه كسر رمحه الزرق
بالنار يودع في الحنايا مطارق
يا هيه حول مثل ما تشتهي وإرق
وإفطن لقبرك بين هاك المفارق
الوقت يسرق باقي اعمارنا سرق
ما نجتمع .. إلا وحنا نفارق
ياعمتي .. بعض العزا يتعب الطرق
ما ينكتب والحرف بالدمع غارق
كل شكى لوعة لياليه والفرق
واللي يبي ما عند رب المشارق

[المنجرد الاخضر]

الله من قلبٍ تخاطفه الاوجاع
امسٍ طواه الحزن .. واليوم مفجوع
يكفخ كما طيرٍ من الوكر نزاع
ثنى الحبل راعيه ثم أهلكه جوع
يا جايبين العلم هو حق ما شاع
مات العزيز اللي له أنداده اخضوع
وين العزا .. ماعاد في العمر مرباع
الجذع يابس واخضر الغصن مقطوع
وسود الليالي جرحها بين الاضلاع
ما يندمل في عام .. في شهر فـ اسبوع
اضياع يرميني على سكة ضياع
فرحي شتات ودايم الهم مجموع
والله مادري كيف فزيت مرتاع
يرتاع من توه غشيمٍ .. ومخدوع
دنيا تزخرف لك على كل الانواع
كثيرها ياصاح زايف .. ومصنوع
يا مسافرٍ قبل السفر ينهض شراع
وغير الكواكب مالك اصحاب وربوع
تعب الرحيل وضاقت بوسعها القاع
وطاح التعب في موقع خطاك مصروع
رضيت باللي يطعم الحي لي جاع
وانت بيدك تملك من المال ينبوع
وصديت عن كل الدنايا والاطماع
ماكن في دنياك مشري ومبيوع
يابو فهد ماني من الموت جزاع
هذا قدر .. والناس تابع ومتبوع
ياشيخ هاج الحزن في صدر ملتاع
واللي كتبته دمع .. لا شك مسموع
يرحمك من خلا المسا نور وابداع
واللي خلق هالارض لسجود وركوع

[المنجرد الاخضر]

ما نشدت الشمس عن حزن الغياب
علمتنا الشمس نرضى بالرحيل
كل يومٍ يغرق الضي افـ عباب
ما سمعنا ناعي ٍ .. مابه عويل
وما هقيت الموت يجرحني جواب
لين شفتك في سما عمري اصيل
علميني ياللي كفوفك سحاب
وابتسامك غيث واهدابك نخيل
وش أسوي لا دخل فصل الضباب
وكفت عيوني وضيعني الدليل
حاجتي والشيب بهديني الصواب
حاجتي لك ما مضى افـ عمري حصيل
آه يا سلمى مضى وقت العتاب
والحديث اللي باقوله لك طويل
اعتذر يمه حصل مني غياب
واعتذر ازريت لا ارد الجميل
من يجازيك وعطاياك الشباب
والله العالم ترى ماني بخيل
يوم انا عاري غديتي لي ثياب
وان شكيت الضر شافيتي العليل
ويوم كبر الطفل ولمتي الزهاب
كل ما في الكون من طبعٍ جميل
هي درت حايل وهذيك الهضاب
عن غيابك هو درى الروض المسيل
بنت من لا ثوروا فوق الركاب
ما يباريهم سوى نصل وأصيل
واخت من لا كسرت سمر الحراب
من عنيف الطعن ردوا للصقيل
وام من جدانهم مثل الشهاب
كاسبين المجد من جيلٍ لجيل
يالله المطلوب يا جزل الثواب
تجعل الجنة لها ظلٍ ظليل

[المنجرد الاخضر]

ماد صرح السماحة وانهدم
طبت حي .. وميتٍ يالعلم
مشعل الدين يابحر التقى
قلعة العلم يانهر الشيم
مبصر القلب يخشاك الظلام
كف شوفك وبصرت الأمم
جتك الأيام بأغلى كنوزها
رامك التبر واخترت القلم
وجتك الأيام والفجر الخميس
كنت روحٍ تصلي في الحرم
سيد الزهد سلطان السماح
طاغي اللطف مبذول الكرم
والله ان لك من الفضل الغزير
كثر مافي المقابر من رمم
جود ربي وعطفه والفلاح
للذي صانها قلبٍ وفم
وخلده ربي وريفه والظلال
للذي شال للإسلام هم
ونور ربي وفضله والرضى
للذي ما رضي سفكٍ لدم
مات بن باز كل حيٍ يموت
ووجه ربك هو الموجود تم
ندعي الله بحسن المعاد
طبت حيٍ وميت يالعلم

[المنجرد الاخضر]

غزوك ياشيخ انكف .. تباريه الأعوام
ستين كون ومَا بها قامةٍ يَوم
قلت العلوم وبرزوا .. رمح .. لجام
عِقر الجواد .. وصوب الشيخ بسهوم
هَذي سواة السَيف في كف مقدام
ضربٍ بحد السِيف يثر به ثلوم
ودَرب الفخر يحتاج قلطات وزحَام
وإلى ظهر فعلٍ ترى النصر مقسُوم
إن وقفت في وداعك اليَوم الأيَام
وتهايقت بتشوف وجهك مَع القوم
فــ إنت الذي اتعبتها طيب وخصَام
وقهرتها يا شيخ ظَالِم ومظلـــوم
إن سَاعفت مَا ثمنت عندك حطام
وإن عَاضبت ما شلت من همٌها هموم
لين احتمى وقتك ورى غدر الاسقام
خوف وَرماك بسَهم وَالسهم مَسمُوم
يا بوي ليت الموت يرضى بالأسوام
يقبل بأحد غيرك ونرضيه بالسَوُم
ياخذ بدل يَومك من اعمَارنا عَام
يفدي مطيحك خادمك كان بتقـــوم
يا بوي انا ما في يدي كود الاوهام
وش في يدي والموت حقٍ ومقسوم
لا شك من يفنى على دين الاسلام
وطِيب الذكر يكفيه لا قيل مرحوم
مَرحوم يَا ريف الارامل والايتام
يَاللي رفيقك دوم مكرم ومحشوم
هَداج تيما .. وان زما الضد لطام
ولا جا اللزوم الصّعب يقضيه زيزوم
كلٍ يشيله بالعمر دم وعظام
وانته تشيلك عزة النفس والزوم
ومَا كل نصلٍ من ورى غمده حسَام
وش عاد لو هو بـافخر الدر مرسُوم
واعيني اللي في البكا قد لها عَام
أنا أشهد ان الدمع ميعاده اليَوم
حطي على خدّي كَمَا الكي ميسام
إن كان لي في الدمع تفريج لغموم
ولا صَار ما يطفي لهب نَار الآلام
ولا موسّعٍ ضيقه ولا جَالبٍ نوم
تبسّمي بَعض البكا فـ التبسَام
وأقسى الحزن ما كان في النفس مكتوم

[المنجرد الاخضر]

طيري عصافير السحر عن هدبها
عينٍ تخم النور .. من قلة النور
كود الظلام اللي علق في عصبها
وعروقها تبكيه حسرات وغرور
الله .. مااثقل جفنها وإن جذبها
برقٍ لمحت فـ ضيه اكفان وقبور
على الدروب اللي عشقنا تعبها
لين اقفرت من كل حيٍ ومعمور
كنه يلج بوسط سمعي صخبها
أو هو بكا .. ريحٍ على صدر ديجور
طيري عصافير الهوى اللي شربها
غدير .. واسقاها من أوهامه بحور
يكفي عن أحلام الحياة وطربها
لو ساعةٍ ببكي على ساعة قصور
أصيح شمسٍ ما تمن بذهبها
تنثره قلبٍ صادق .. ودافي شعور
والا النهار اللي عيوني حربها
اقبالته لحظه.. وغيباته دهور
أصيح عسبان الحياة ورطبها
أو حبها اللي توَّه اليوم مبذور
والا الضلوع اللي حنيني كتبها
شعرٍٍ قراه الصبح غامض ومكسور
اصيح من باصيح واغلى عربها
شدوا زمان الشوك باعشاب وزهور
يا حيف وضحى نور عيني جنبها
وخذت غياب الشمس من مرتع الزور
وخذت وعقرت مهرتي في طلبها
وقفت .. ودمعي في محاجره .. مذعور
ما غير أناظرها ويصغر لهبها
لين إنطفت ناديت يا سعود ماجور
خذها الذي من فيض جوده وهبها
يوم لنا رحمة.. وظل .. وذرى سور
ياعلها عنده بعالي رتبها
عند الذي نزه مقامه عن الجور
وطيري عصافير السحر عن هدبها
عينٍ تخم النور .. من قلة النور

[المنجرد الاخضر]

لا تشد القيد ...
تجرح يدي ... أو تجرح القيد ...
قيدك غدى يوجع يدي ...
سجني أنا انت ... وسجنك أنا ...
والحب ... الحب عبدي وسيدي ...
لا ... لا تشد القيد ...
دمي ... جرى ... دمك ...
همي إني اشوفك في يدي ...
وإلاّ يدي همّك ...
في معصمي صرت ...
إنت السجين في معصمي ...
وكانك تصبرت ... أنا مقوى الصبر ...
دمعي في عيني ... وصرختي تملا فمي ...
سجني وسجاني ... أحزانك احزاني ...
وشلون ابنساك ... وشلون تنساني ...
محبوس في عيونك دمع ...
وزنزانتي ... تقطيبة الحاجب ...
وحاول توارى في الجفا ...
يا وجهه الصاحب ...
بتشوف نفسك في يدي ...
قيدٍ رقيق ...
قيدٍ سلب حريتي ...
ليته طليــق ...
يا صاحبي ... ما به ابد قيدٍ طليق ...
لا ... لا توجع يدي ...
سجني انا انت ... وسجنك انا ...
والحب ... الحب عبدي وسيدي ...

[المنجرد الاخضر]

أنشد البحار على سر الحنين
عن قصيد البحر .. وجروح السفين
عن حبال الشوق تظمأ للشطوط
عن حروق الملح في شفاه السنين
ما عرفت الغوص في اليم المخيف
ولا رهنت العمر في الدر الثمين
جيت أنا من نجد .. في قلبي الرياض
وفي عروقي التهم .. والبيت الأمين
في كفوفي تصرم نخيل الحسا
ومن ذواري الرمل غادي لي جبين
جيتكم .. والعشق يطرحني سؤال
هو صحيح الشط له صدر ويدين
عانقتني بيوتكم .. وأنا بعيد
ما عبرت الجسر .. ما شفت القطين
ياهوى البحرين مريت الديار
عابرٍ والقلب باللهفة ضنين
لين حطت بي رحالي في هواك
وانبعث نبع المحبة في الكنين

[المنجرد الاخضر]

من اربع ليال ...
طيقك وقف ...
ما بين الرمش ... والرمش ...
ما غمضت لي عين ...
يا ابن الحلال ...
اما استرح ... والا امش ...
من أربع لال ... في مجلسي منك خيال ...
وفوق الجرايد والكتب ... اسمك حروفه تنكتب ...
يا ابن الحلال ...
اما استرح ... والا امش ...
من اربع ليال ... هبت من ديارك شمال ...
بريح الخزامى ... والنفل ...
أنا الظما ... انتي الأمل ...
داري لها عامين ... ما ربعت ...
وما غمضت لي عين ...

[المنجرد الاخضر]

يا هلا بك ولا تطري الوداع عش معي لحظة الفرحة حبيبي
عمرنا اليوم والباقي ضياع
تصبح الأرض في قربك وساع دام فرحة عيونك من نصيبي
ونبتت ضاقت الأرض الوساع
آه لولاك يا دافي الشعاع كان مرتاح بالي وش تبي بي
تشغل البال يا دافي الشعاع
أحسب إني على الفرقا شجاع بطوي الجرح أو بخفي نحيبي
وأثر ما في الهوى مغرم شجاع
يا هلا بك عدد عمري اللي ضاع او عدد ماتمنيت حبيبي
ليت الأيام ما فيها وداع

[المنجرد الاخضر]

تل قلبي .. تل طيرٍ على طلعٍ وكيد
جود المقرود سبقه وعيا يطلقه
يوم فاع اركى جناحه على قاسي الحديد
وانكسر ريش النداوي ولا الله وفقه
يكفخ القلب المشقي على الخل العنيد
ما وفا بالعهد لا شك قلبي صدقه
واهني اللي على الحول ينبت له جديد
وش سواة اللي جناحين قلبه محرقه
يا لطيف الروح وبحق خلاق العبيد
اكرم المملوك بالوصل والا فاعتقه

[المنجرد الاخضر]

عتيم الليل ...
قمرنا من زمان والله ... فقد نوره ...
عتيم الليل ...احس النظره تتكسر ...
على سوره ..

سهرنا ... في عتيم الليل ... حزين الهمس ...
قدرنا ... ننتظر باكر ... شعاع الشمس ...
تعالي ... طالت الغيبه ... وانا مشتاق ...
انا مشتاق ... انا الاشواق ... انا العشاق ...
تعالي من جسور الليل ... تعالي ضي ...
تعالي في هجير العمر .. حنان وفي ..
وربي ... طالت الغيبه
حنون الليل ... وصوتك همسة التحنان ..
حنون الليل .. بيروي بالامل عطشان ...
حنون الليل .. وانت بتسمعي صمتي ...
تحسي بي ...
تقاسي فيّ تعذيبي ...
تشديني من الامواج ...
ترسّيني على مينا ... وصوتك في ليالينا ...
أبد ساري ...
حنون الليل ... وانت الريح والساري ...
تعالي ... طالت الغيبه
وربي طالت الغيبه ..

[المنجرد الاخضر]

يا اجمل الحزن .. لدموعك سلام
من حبيبٍ ... بقى منه الكلام
وين انا منك .. غربني الزمان
وخانني النور ... وابعدني الظلام
لو بعزيك ... سالت دمعتي
تدري الدمع في حبك ... حرام
لو بواسيك ... مايكفي الهوى
ولو أبي ... عذر مايكفي الغرام
أعطنى من عذابك يا البعيد
صرخةٍ ... تجعل ظلوعي حطام
آه ...لو في يدي أبكي معاك
قطرةٍ مادرى عنها الغمام
ماابخل الوقت ... يحرمني البكا
وانت لجلك حرمني الإبتسام
يا اطهر الحزن ... لو كان القصيد
يكشف الغم عن بدر التمام
لكتب الشمس شعرٍ في سناك
وامحي إمن السما...عج وكتام
ياعسي البدر نوره مايغيب
عن حبيبٍ بقي منه الكلام

[المنجرد الاخضر]

خضار البحر في عينك ..
وملح البحر في اهدابي ..
وعيا البحر لا يسكن ..
أبد في صفحة كتابي ..
قصيده من خضار .. وملح ..
يا أول .. وأخر احبابي ..
انا من شفتها عيونك
ترى ما جفت ثيابي ..
ولو آخر قصيدي بيت ..
كتبته حب في عيونك ..
ولو يحمل همومي بيت ..
سكنت البحر وعيونك ..
ويبقى البحر .. وعيونك ..
وينشف في قصيدي البحر ..
ويبقى العشب .. وعيونك ..
ويزهر في متون الصخر ..
ويبقى الحب .. وعيونك ..
رغم كل الصحاري نهر ..
وانا والجرح والفرقا ..
وهذا الحزن بسبابي ..
ولو ادري البكا له بيت ..
اسوق فْـ دربه ركابي ..
ابي لا غابت عيونك ..
ابل بدمعي ثيابي ...

[admin]

المنجرد الاخضر

يعطيك العافية على هذا المجهود الرائع

في اختيار القصايد


ما قصرت

[عطر النسيان]

يعطيك الف عافيه أخوي المنجرد الأخضر