ابن مصر : ابو صلاح (* صلاح جاهين *)

[يا ليل يا زمن]

نبذة حول الشاعر: صلاح جاهين



• اسمه الحقيقي محمد صلاح الدين بهجت أحمد حلمي

• ولد في 25 ديسمبر 1930 فى شارع جميل باشا بحي شبرا.

• والده المستشار بهجت حلمي الذي تدرج في السلك القضائي بدءًا من وكيل نيابة حتى عُين رئيساً لمحكمة استئناف المنصورة.

• التحق بكلية الحقوق بناء على رغبة والده، ودرس في ذات الوقت في كلية الفنون الجميلة دون علم والده لفترة قصيرة، ثم ترك الدراسة بأكملها وانغمس في العمل الصحفي.

• التحق بروز اليوسف وعمل سكرتير تحرير وظل يرسم بشكل سري إلى أن اكتشفه "أحمد بهاء الدين" -الرجل الثاني بالمجلة وقتها- فأفرد له صفحة كاملة أسبوعيا.

• كتب عددا كبيرا من الأغاني الوطنية وارتبط اسمه بثورة يوليو ومغنيها "عبد الحليم حافظ" وذاعت شهرته من خلال بعض الأغاني مثل "صورة" "السد العالي" وغيرهما.

• كتب السيناريو والحوار لعدة أفلام ‏مثل "خلّي بالك من زوزو"، "أميرة حبي أنا"، "شفيقة ومتولي" و"المتوحشة" كما شارك في إنتاج أفلام "أميرة حبي أنا"، "عودة الابن الضال"، وشارك بالتمثيل في عدة أفلام منها "شهيد الحب الإلهي" عام 62 و"لا وقت للحب" عام 63 و"المماليك" في عام 1965.

• توفي في 21 أبريل عام 1986.




ونلتقى الان مع بعض من اشعار الكاتب الصحفى الساخر : ابو صلاح

[يا ليل يا زمن]

خرج ابن آدم من العدم قلت : ياه

نوع القصيدة : عامي


خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا ... وحي بيصير تراب
الأصل هو الموت و الا الحياه ؟
عجبي !!!

[يا ليل يا زمن]

ضريح رخام فيه السعيد اندفن

نوع القصيدة : عامي


ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي !!!

[يا ليل يا زمن]

ياما صادفت صحاب و ما صاحبتهمش

نوع القصيدة : عامي


ياما صادفت صحاب و ما صاحبتهمش
و كاسات خمور و شراب و ما شربتهمش
أندم علي الفرص اللي انا سبتهم
و الا علي الفرص اللي ما سبتهمش
عجبي !!

[يا ليل يا زمن]

و الكون ده كيف موجود من غير حدود

نوع القصيدة : عامي


و الكون ده كيف موجود من غير حدود
و فيه عقارب ليه و تعابين ودود
عالم مجرب فات و قال سلامات
ده ياما فيه سؤالات من غير ردود
عجبي !!!

[يا ليل يا زمن]

أنا شاب لكن عمري ألف عام

نوع القصيدة : عامي


أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي !!!!

[يا ليل يا زمن]

يا باب يا مقفول ... إمتى الدخول نوع القصيدة : عامي




يا باب يا مقفول ... إمتى الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول
عجبي !!!

[يا ليل يا زمن]

أحب أعيش ولو في الغابات

نوع القصيدة : عامي


أحب أعيش ولو في الغابات
أصحي كما ولدتني أمي و ابات
طائر .. حوان.. حشرة .. بشر ..بس أعيش
محلا الحياة.. حتي في هيئة نبات
عجبي !!

[يا ليل يا زمن]

كان فيه زمان سحليه طول فرسخين

نوع القصيدة : عامي


كان فيه زمان سحليه طول فرسخين
كهفين عيونها و خشمها بربخين
ماتت لكين الرعب لم عمره مات
مع إنه فات بدل التاريخ تاريخين
عجبي !!

[يا ليل يا زمن]

عجبتني كلمة من كلام الورق

نوع القصيدة : عامي


عجبتني كلمة من كلام الورق
النور شرق من بين حروفها و برق
حبيت أشيلها ف قلبي .. قالت حرام
ده أنا كل قلب دخلت فيه اتحرق
عجبي !!!

[يا ليل يا زمن]

نوح راح لحاله و الطوفان استمر

نوع القصيدة : عامي


نوح راح لحاله و الطوفان استمر
مركبنا تايهه لسه مش لاقيه بر
آه م الطوفان وآهين يا بر الأمان
إزاي تبان و الدنيا غرقانه شر
عجبي !!

[يا ليل يا زمن]

انا كل يوم أسمع ...فلان عذبوه

نوع القصيدة : عامي


انا كل يوم أسمع ........ فلان عذبوه
أسرح في بغداد و الجزاير واتوه
ما أعجبش م اللي يطيق بجسمه العذاب
و اعجب من اللي يطيق يعذب أخوه
عجبي !!!

[يا ليل يا زمن]

شاف الطبيب جرحي وصف له الأمل

نوع القصيدة : عامي


شاف الطبيب جرحي وصف له الأمل
وعطاني منه مقام يا دوب ما اندمل
مجروح جديد يا طبيب و جرحي لهيب
ودواك فرغ مني .... و إيه العمل
عجبي !!!

[يا ليل يا زمن]

على بعد مليون ميل من أرضنا

نوع القصيدة : عامي


على بعد مليون ميل من أرضنا
من الفراغ الكوني بصيت أنا
لا شفت فرق بين جبال و بحور
و لا شفت فرق ما بين عذاب أو هنا
عجبي !!

[يا ليل يا زمن]

- يا نجم .. نورك ليه كده بيرتجف ؟

نوع القصيدة : عامي


- يا نجم .. نورك ليه كده بيرتجف ؟
هو انت قنديل زيت ؟ أو تختلف
- أنا نجم عالي .. بس عالي قوي
و كل ما انظر تحت اخاف انحدف
عجبي !!!!

[يا ليل يا زمن]

السم لو كان في الدوا منين يضر ؟

نوع القصيدة : عامي


السم لو كان في الدوا منين يضر ؟
و الموت لو عدونا .. منين يسر؟
حط القلم في الحبر و اكتب كمان
.. و العبد للشهوات .. منين هو حر؟
عجبي !!!