اسئله تائهه(موضوع للنقاش للكل)

[الهاجس]

الموضوع .. مفتوح الابواب

لتساؤلات اوجدتها الحيرة بداخلنا

ودائما ما نبحث عن اجاباتها


ماعليك إلا ان تطرح سؤالك ومن يأتي بعدك يجيب على تساؤلك ، ومن ثم يطرح سؤاله

وهكذا ...

فربما خرجتُ انا وأنت بإجابة تقطع الحيرة

وتزيدنا خبرة بالحياة ..




وسؤالي ..

كل رجل عظيم وراءه امرأة .. لكن من وراء فشل المرأة الموهوبة ؟











عاطر التحايا ..






الهاجس

[التفاحة]

مشكــــــوووور
الهاجـــــــس
ع الموضوع والطرح..
بس الصراحة ما لافية اجابة ل سؤالك!
بس اعتقد ان سبب فشل المرآه المبدعة
القــدر!!
او ممكن بعض تحكمات الاهل
تحكمات الزوج مثلا!
بعض الازواج مايبغي زوجته اتكون
افضل عنه ف الوظيفة مثلا! او التعليم!
مايباها توصل ل منصب عالي!
والسبب انه خايف من انها
تتمرد! اوتعامله معاملة فيها نوع من التكبر
والغرور..

[عاشقة لوى]

مشكور الهاجس على الموضوع الأكثر من رائع
أنا أقترح تثبيته

الغالية التفاحة وين سؤالش ؟

أنا بسأل عنش ...

لماذا نبحث دائما عما ليس بأيدينا و عندما نصل إليه نتركه إلى غيره ؟

[التفاحة]

الانسان طبعه كذا!
دوووم ايحب انه ياخذ كل شي! حتي لو مايبغيه ومايحتاجه
بس يبي ياخذ كل شي..
وهالشي يكون له برووحه محد يشاركه فيه!
بس هذا كل شي..

والسوال للي عقبي.
شرايك ف ان الحرمة اتكون وزيرة وسفيرة؟؟(انا ضدد هالشي)
بس ابعرف وجهه نظرك..

[ابن الاشخرة]

طبعا ضد هالشي

هالعملين بالذات ينسو الحرمه شي اسمه بيت واهل واولاد وزوج واعتمادها في تربية اولادها بتكون على الخدم

لان نفس الشي الزوج بيكون عنده منصب عالي لانه مستحيل وحده من هالنوع تتزوج انسان على قده

ف هنا اقول الله يحفظ الاولاد وتربيتهم بيضيعو في شربة ماي



شو قولك في الدراسه خارج بلدك؟؟؟

[التفاحة]

ب النسبة للشباب اشوف انه عاادي
وهذا مستقبله ولازم يكون معه شهادة لانه بيتزوج وبيشتغل وبيكون عنده بيت وعيال وحرمه لازم يصرف عليهم!
وهم الرجّال مايعيبه شي لو درس ف الخارج عاادي.
اما بلنسبة للبنت انا اشوف انها لو ماحصلت نسبة ماتخلها ادش كلية
من كليات البلاد! مااشي اسمه دراسة ف الخارج!!
هذا نصيبها انها ماجابت نسبه! عااد شنسويلها؟؟
ومااشي اسمه تسافر براا تتعلم!!!
ليييييييش وش حقه؟؟
ف لاخير بتتزوج وبتجلس ف البيت!!
عيل ش حقه الغربة!؟؟ وفي الاول والاخير
هذي بنت! يعني مالها طلعه برااا الديرة!
الا لو كان ابوها وياها او اخوها
بس هذا كل شي..

والسوال هــو:؟؟؟ ماعرف قولوا سوال يالاعضاااء)
النقاب؟؟شرايك ف اللي يقولون ان النقاب مب فرض
(مع العلم ان النقاب فرض بدليل القرآن والسنة)

[ابن الاشخرة]

التفاحه انتي ما ذكرتي فوائد الغربه

الصراحه الغربه لها فوائد كثيره غير التعليم




بالنسبه للنقاب

شي مفروض والادله موجوده مثل ما ذكرتي

بس في اختلاف المذاهب المسلمين والتطور لعب دور

بس في نظر اغلب المجتمعات الخليجيه المنقبه هي الافضل عن غيرها





_________________________________________

عندي اقتراح في الموضوع

ليش ما يتثبت الموضوع

وينطرح كل يوم سؤال

عشان نشوف اقتراحات وردود اكبر عد من الاعضاء الاعضاء

[التفاحة]

بس انا شفت ف احد المنتديات
ان ف ظفار النقاب ممنوع ف المدارس !؟؟
مدري هذا قرار جديد تنفذ ولا شوو؟؟!!

[بنت الشرقية]

هلا اختي التفاحة

ايوه القرار تنفذ في المدارس ونزلت نشرة تمنع ارتداء النقاب في المدارس والمديريات هذا للعلم

تحياتي للجميع

[ابن الاشخرة]

في المدارس البنات عادي انا اشوفها

لانه المدرسه كلها بنات يعني عادي ما فيها شي

واذا كان فيه ضيف ريال يتحجبن وما يتغشن

وهذى الشي من زمان صايره

[ريانة العود]

من قال ان المنقبة احسن من الغير منقبة
مافي حد احسن من حد وبعدين النقاب الحين صار فتنة
يعني البنت تتنقب وتبرز عيونها
والله يستر
والبنت الي هازبة نفسها ما اتوقع يجيها شي سواء كانت منقبه
او غير منقبة
والنقاب مو مفروض مستحب
يعني اذا لبست ولا ما لبست مارح اتعاقب
وفي بنات يلبسن نقاب هذا الشي ما عشان فرض بالاسلام عشان
الاهل غصبوهن عليه
وهذا الشي ما عليه خلاف
والسموحة

[عاشقة لوى]

عزيزتي ريانة العود .. شكرا على هذه المداخلة الرائعة .. ولكن ذلك لا يعني أنني أوافقك .. و رجاء لا تعممي .. يمكن أنتي اللي قلتي صح .. بس مب كل البنات يلبسون النقاب عشان الأهل غصبوهن .. و عشان يبرزن مفاتنهن ان لا أعارض في ان هناك ثلة من الفئات مثل ما قلتي .. ولكن ليس الكل ..


ثانيا : هنالك اختلاف .. واختلاف العلماء رحمة .. فالنقاب فرض حسب مذهبنا السني .. نستدل على ذلك بآيات سورة النور .. ( فليدلين عليهن بجلابيبهن ) الجلباب في العربية ما يغطي الشي من أعلاه إلى أدناه ...و كلمة الإدلاء تدل على انسدال الشي .. و لكن في المذهب الأباضي .. النقاب ليس فرض مستدلين بحديث الرسول مع أسماء .. و في النهاية كل واحد له مذهبه .. و ذلك لن يفسد في الود قضية .. مهما اختلفنا على النقاب و غيره .. كلنا مسلمين ...

ما رايك بمن تلبس البنطلون تحت العباءة .. ؟

[الهاجس]

الموضوع للنقاش وعن العصبيه الزائده خلوكم متفهمين للمواضيع والاسئله المطروحه

وبالنسبه للاجابه عن سؤالك

انا مقدر اجاوب

بس انا لو وجهت هالسؤال لك شو راح يكون ردك؟؟؟

[ريم الفلا]

اممممم
شخصيا
لا أجد كلمة فشل في محلها
لأن طبيعة المرأه تختلف عن طبيعة الرجل
المرأه
أبنة أخت زوجة أم
مسؤولياتها تحتم عليها تكون في إطار أسرتها
وهذا ما أراه طبيعي

أخوي
شوف كل النساء الناجحات
راح تحصل أغلبهن
فضلن شي على شئ
بس للأمانه ما نعمم

والموهوبه الذكيه اللي راح تنتج للمجتمع أبناء مبدعين
تهديهم لأمتها . تهدي المجتمع شباب أصحاء نفسيا وبدنيا
يكونوا فعالين فالمجتمع بفضل تربيتها لهم وحسن ادارتها لعقولهم
هذا مقياس نجاح المرأه في حياتها بالنسبه لي .


مجرد وجهة نظر